ទាហានថៃរារាំងព្រះសង្ឃខ្មែរមិនឲ្យសាងសង់កុដិក្នុងវត្តកែវសិក្ខាគិរីស្វៈរៈ
2009.03.14
ទាហានថៃអង្គុយលើផ្លូវនៅក្បែរប្រាសាទព្រះវិហារ ជាប់ព្រំដែនថៃក្នុងខែត្រព្រះវិហារ នាថ្ងៃទី២០ កក្កដា ២០០៨ ។
ទាហានថៃម្នាក់ឈ្មោះ ចាសូរ ក្នុងចំណោមគូកនជាច្រើនទៀតបានមានប្រសាសន៍កាលពីព្រឹកថ្ងៃសុក្រ ទី១៣ ខែមីនា ថាពួកគេមិនសប្បាយចិត្តជាមួយព្រះសង្ឃខ្មែរដែលបានទៅជីករណ្តៅសសរដើម្បីរៀបចំគម្រោងសង់កុដិថ្មីមួយនៅកន្លែងដែលពួកគេកំពុងបោះជំរំនោះទេ។
ទាហានថៃដដែលនោះបានមានប្រសាសន៍ទៀតថា ពួកគេសុំឲ្យព្រះសង្ឃខ្មែរផ្អាកការសាងសង់មួយរយៈដើម្បីរង់ចាំការដោះស្រាយបញ្ហារវាងមន្ត្រីកម្ពុជានិងថៃឲ្យរួចរាល់សិន។
ក៏ប៉ុន្តែគណៈកម្មការអាចារ្យវត្តកែវសិក្ខាគិរីស្វៈរៈគឺលោកអាចារ្យស្វាបានមានប្រសាសន៍ថា ទាហានថៃបានព្យាយាមរារាំងព្រះសង្ឃខ្មែរមិនឲ្យសង់បង្គន់អនាម័យម្តងរួចមកហើយកាលពីពេលថ្មីៗ ក៏ប៉ុន្តែព្រះសង្ឃនៅតែជម្នះ ហើយពេលនេះទាហានថៃក្រុមដដែលនោះបានរារាំងព្រះសង្ឃខ្មែរមិនឲ្យសាងសង់កុដិដោយគំរាមថាបើនៅតែសាងសង់កុដិនោះពួកគេនឹងយកព្រះសង្ឃថៃមកនៅក្នុងទីវត្តនេះដែរ។
លោកអាចារ្យស្វាបានមានប្រសាសន៍ទៀតថា ទោះជាយ៉ាងណាព្រះសង្ឃខ្មែរនៅតែប្រកាន់ជំហរបន្តការសាងសង់កុដិថ្មីនោះពីព្រោះវាជាទឹកដីរបស់ខ្មែរ ៖ «យើងសាងសង់នៅតែសាងសង់អ៊ីចឹងព្រោះវត្តខ្មែររបស់យើង»។
មេបញ្ជាការយោធាខ្មែរនៃកងពលធំលេខ៣ដែលកំពុងគ្រប់គ្រងកងកម្លាំងទាហានខ្មែរនៅតំបន់ជម្លោះជិតប្រាសាទព្រះវិហារ លោកឧត្តមសេនីយ៍ទោ ស្រី ឌឹក បានមានប្រសាសន៍ថា ការដែលថៃរារាំងព្រះសង្ឃខ្មែរមិនឲ្យសង់កុដិនោះគឺលោកគ្រោងនឹងលើកយកទៅជជែកនៅក្នុងកិច្ចប្រជុំជាមួយមេបញ្ជាការយោធាថៃនៅថ្ងៃទី១៧ ខែមីនាខាងមុខនេះ។
លោកឧត្តមសេនីយ៍ ស្រី ឌឹក បានមានប្រសាសន៍ថា ការហាមឃាត់មិនឲ្យសង់កុដិនោះគឺពាក់ព័ន្ធនឹងអនុស្សរណៈនៃការយោគយល់គ្នាដែលរដ្ឋាភិបាលនៃប្រទេសទាំងពីរបានចុះហត្ថលេខាជាមួយគ្នាកាលពីឆ្នាំ២០០០មក ក៏ប៉ុន្តែថៃហាក់ដូចជាមិនគោរពតាមអនុស្សរណៈនៃការយោគយល់នោះ។
លោកឧត្តមសេនីយ៍ ស្រី ឌឹក បានបញ្ជាក់ថា ៖ «សាងសង់កុដិវាជារឿងដូចជាហាមឃាត់ ព្រោះវាពាក់ព័ន្ធនឹង MOU ដែលយើងកំពុងតែដោះស្រាយគ្នានៅថ្ងៃ១៧ហ្នឹងឯង។ ចុះបើថាយើងរំលោភ MOU មានថៃណាអនុវត្ត ប៉ុន្តែបើរឿងវារំលោភ MOU ដែលយើងត្រូវដោះស្រាយគ្នា»។
សូមរំឭកថា វត្តមានរបស់ទាហានឈុតខ្មៅថៃនៅក្នុងទីវត្តខ្មែរកែវសិក្ខាគិរីស្វៈរៈតាំងតែពីថ្ងៃទី១៥ ខែកក្កដា ឆ្នាំ២០០៨ នៅពេលដែលទាហានថៃរាប់រយនាក់បានលើកទ័ពចូលលុកលុយព្រំដែនខ្មែរនៅតំបន់ប្រាសាទព្រះវិហារ។
តាមកងទាហានខ្មែរបានឲ្យដឹងថា ស្ថានភាពប្រឈមមុខដាក់គ្នារវាងទាហានខ្មែរ-ថៃនៅតំបន់ជម្លោះជិតប្រាសាទព្រះវិហារនៅតែមានការប្រុងប្រយ័ត្ន ខណៈដែលទាហានថៃនៅតែបន្តធ្វើសកម្មភាពផ្សេងៗជាច្រើននៅតាមតំបន់ជម្លោះទីនោះ៕
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ