យុវជន​២​នាក់​ត្រូវ​ទាហាន​ខេត្ត​បាត់ដំបង​វាយ​ដំ​ឲ្យ​របួស​ធ្ងន់

យុវជន​ពីរ​នាក់​បាន​ថ្លែង​ថា ទាហាន​ខេត្ត​បាត់ដំបង​ជា​ច្រើន​នាក់​បាន​ព្រួត​គ្នា​វាយ​ទៅ​លើ​ពួកគេ​ទាំង​ពីរ ចាប់​ដាក់​ខ្នោះ​យក​ទៅ​វាយ​ដំ​នៅ​បន្ទាយ​ទាហាន​ឲ្យ​របួស​ធ្ងន់​រហូត​ដេក​នៅ​មន្ទីរពេទ្យ។

0:00 / 0:00

ជន​រង​គ្រោះ​ឈ្មោះ តុន ពយ អាយុ​១៨​ឆ្នាំ នៅ​ភូមិ​ទួល ឃុំ​ចក្រី ស្រុក​កំរៀង បាន​បញ្ជាក់​នា​ព្រឹក​ថ្ងៃ​ច័ន្ទ ទី​២២ ខែ​ធ្នូ ថា មុន​ពេល​កើត​ហេតុ​ខ្លួន​និង​មិត្ត​ភ័កិ្ក​២​នាក់​ទៀត​កំពុង​អង្គុយ​នៅ​ផ្ទះ​លក់​គ្រឿង​ទេស​មួយ​នៅ​ភូមិ​ទឹក​ផុស ឃុំ​អង្គរ​បាន ស្រាប់​តែ​ទាហាន​នៃ​វរ​សេនា​តូច​ថ្មើរ​ជើង​លេខ​២​ប្រចាំ​ស្រុក​សំពៅ​លូន មាន​គ្នា​៨​នាក់ បាន​ព្រួត​វាយ​ខ្លួន​ដោយ​គ្មាន​មូលហេតុ។

យុវជន តុន ពយ រៀបរាប់​ដូច្នេះ​ថា ៖ «មូលហេតុ​អត់​ដឹង​រឿង។ កំពុង​តែ​អង្គុយ​ហូប​នំ​ធម្មតា ហើយ​គេ​មក​វ៉ៃ​ចំ​ក្បាល បែក​ក្បាល ពក​ថ្ងាស​គ្រប់​កន្លែង​ទាំង​អស់។ យក​អំពៅ​វ៉ៃ ខ្នោះ​វ៉ៃ ខ្សែ​ក្រវាត់​វ៉ៃ គេ​អត់​មាន​​សួរ​ហេតុផល​អី​មក​ដល់​វ៉ៃ​តែ​ម្តង ទាហាន​នៅ​ស្រុក​សំពៅ​លូន ៨​នាក់ ទាំង​អស់​ស្លៀកពាក់​ជា​ស៊ីវិល»

ករណី​នេះ​កើត​ឡើង​កាល​ពី​វេលា​ម៉ោង ៧ និង ៣០​នាទី​ព្រលប់​ថ្ងៃ​ទី​១៩ ខែ​ធ្នូ នៅ​ភូមិ​ទឹក​ផុស ឃុំ​អង្គរ​បាន ស្រុក​សំពៅ​លូន ខេត្ត​បាត់ដំបង។

ជន​រង​គ្រោះ​ម្នាក់​ទៀត ឈ្មោះ លីវ ត្រេន អាយុ ២០​ឆ្នាំ បាន​បន្ថែម​ថា ៖ «ទៅ​ដល់​បន្ទាយ វាយ​ខ្ញុំ​រួច​មួយ​សា បាន​ដាក់​ខ្នោះ ហើយ​វាយ​មួយ​សា​ទៀត។ គេ​អត់​បា្រប់​ពី​មូលហេតុ​ផង ហើយ​ដល់​ពេល​នេះ​គេ​ថា ច្រឡំ​មនុស្ស»

កងទ័ព​រង​ការ​ចោទ​នេះ មិន​អាច​សុំ​បញ្ជាក់​បាន​ទេ ប៉ុន្តែ លោក ណន វ៉ាន់នី មេបញ្ជាការ​វរសេនា​តូច​ថ្មើរ​ជើង​លេខ​២ ប្រចាំ​ស្រុក​សំពៅ​លូន ចោទ​វិញ​ថា យុវជន​ទាំង​ពីរ​នាក់​និង​គ្នី​គ្នា​ដទៃ​ទៀត​បាន​ចាក់​ឲ្យ​ទាហាន​របស់​លោក​រង​របួស​មុន។

លោក ណន វ៉ាន់នី មាន​ប្រសាសន៍​ថា ៖ «មូលហេតុ​អី វាយ​គ្នា​ទៅ​វិញ​ទៅ​មក វា​វាយ​ទាហាន ខ្ញុំ​ដែរ ពួក​វា​មក​ទិញ​ស្ករ​គ្រាប់ ពួក​ហ្នុង​មក​ចាក់​ដៃ​ទាហាន​ខ្ញុំ​របួស​ម្នាក់»

ទោះ​ជា​យ៉ាង​នេះ​ក្តី ក្រុម​ជន​រង​គ្រោះ បាន​បដិសេធ​ថា មិន​បាន​ចាក់​ទៅ​លើ​ទាហាន​ដូច​ការ​អះអាង​នេះ​ទេ។

ឪពុក​ជន​រង​គ្រោះ លោក ឡា ទីម បាន​ថ្លែង​ថា មេបញ្ជាការ​យោធា​បាន​សុំ​ចេញ​លុយ​សង​១០​ម៉ឺន​រៀល​នៅ​អធិការដ្ឋាន​នគរបាល​ស្រុក​សំពៅ​លូន ប៉ុន្តែ​លោក​បដិសេធ ហើយ​ទាមទារ​ឲ្យ​ចេញ​លុយ​សង​ចំពោះ​ថ្លៃ​ព្យាបាល​នៅ​មន្ទីរពេទ្យ។

លោក ឡា ទីម មាន​ប្រសាសន៍​ថា ៖ «ឲ្យ​មេ​ទាហាន​ណែនាំ​កូន​ទាហាន រៀបចំ​សណ្ដាប់​ធ្នាប់​កូន​ទាហាន​ហ្នឹង​ឲ្យ​ត្រឹមត្រូវ កុំ​ឲ្យ​ដើរ​វ៉ៃ​ប្រជាពលរដ្ឋ​ពាស​វាល​ពាស​កាល​អ៊ីចឹង»

អធិការ​នគរបាល​ស្រុក​សំពៅលូន លោក ពេជ្រ សារ៉ែន បាន​ថ្លែង​ថា សមត្ថកិច្ច​ប៉ូលិស​មិន​បាន​សម្រប​សម្រួល​ទេ ហើយ​បច្ចុប្បន្ន​កំពុង​រង់ចាំ​ឯកសារ​ពី​នគរបាល​ស្រុក​ភ្នំព្រឹក ដើម្បី​បញ្ជូន​សំណុំ​រឿង​ទៅ​ថ្នាក់​លើ។

មន្រ្តី​សិទ្ធិ​មនុស្ស​សមាគម​អាដហុក​ខេត្ត​បាត់ដំបង លោក យិន ម៉េងលី បាន​ថ្លែង​ថា តាម​ការ​អង្កេត​និង​ការ​បំភ្លឺ​របស់​សាក្សី គឺ​ក្រុម​ទាហាន​បាន​វាយ​ទៅ​លើ​យុវជន​ដោយ​ការ​យល់​ច្រឡំ​យ៉ាង​សន្ធាប់។

លោក​បញ្ជាក់​ថា សមាគម​អាដហុក​ធ្វើ​លិខិត​ទៅ​មេបញ្ជាការ​ខេត្ត​និង​យោធ​ភូមិ​ភាគ​៥ ដើម្បី​ទាមទារ​ឲ្យ​មាន​ការ​ដោះស្រាយ​តាម​វិន័យ​កងទ័ព។

គួរ​បញ្ជាក់​ថា យុវជន​ទាំង​២​នាក់ ក្រោយ​ពី​មាន​របួស​ត្រូវ​បាន​គេ​ដឹក​យក​ទៅ​ព្យាបាល​នៅ​មន្ទីរពេទ្យ​បង្អែក​យោធ​ភូមិ​ភាគ​៥ ស្រុក​សំពៅ​លូន ខេត្ត​បាត់ដំបង៕