លោក ទូច ណារ៉ុថ ស្នងការនគរបាលក្រុងភ្នំពេញ បានបញ្ជាក់ថា ៖ «រហូតមកទល់ពេលនេះ យើងមិនទាន់សហការគ្នាទេ ក៏ប៉ុន្តែខ្ញុំបានជម្រាបជូនលោកលេខាទីមួយស្ថានទូតអាមេរិកថា យើងខ្ញុំរីករាយនឹងទទួលកិច្ចសហការផ្ដល់ព័ត៌មានពី FBI (អេហ្វ.ប៊ី.អាយ) ជុំវិញករណីហ្នឹង ហើយមិនមែនតែ អេហ្វ.ប៊ី.អាយ មួយទេ ស្ថាប័នណាក៏ដោយឲ្យតែផ្ដល់ព័ត៌មានពាក់ព័ន្ធនឹងករណីនេះ ឈានទៅរកការចាប់មុខសញ្ញាបានឆាប់រហ័ស គឺយើងខ្ញុំរីករាយនឹងទទួលសហការជាមួយ ក៏ប៉ុន្តែឲ្យខ្ញុំទៅសុំឲ្យ អេហ្វ.ប៊ី.អាយ សហការ វាផុតពីសមត្ថភាពយើង» ។
លោកបានមានប្រសាសន៍បញ្ជាក់ឲ្យដឹងទៀតថា សមត្ថកិច្ចក្រុងភ្នំពេញកំពុងបន្ត ប្រមូលព័ត៌មាននានា ដែលទាក់ទងនឹងករណីឃាតកម្មដើម្បីឈានដល់ការកំណត់មុខសញ្ញារបស់ ឃាតករ ។
លោក ទូច ណារ៉ុថ មានប្រសាសន៍បន្ថែមដូច្នេះថា ៖ «យើងបានបង្កើតគណៈកម្មការមួយ ស្រាវជ្រាវកន្លែងកើតហេតុ សាក្សីជុំវិញកន្លែងកើតហេតុ ហើយឥឡូវយើងបានប្រមូលព័ត៌មានជុំវិញក្រុមគ្រួសារ ហើយយើងបានគូររូបមុខសញ្ញា ដូច្នេះយើងនឹងបន្តការស៊ើបអង្កេតថែមទៀត ។ យើងបានគូរចេញហើយ ក៏ប៉ុន្តែរូបគំនូរវាមិនច្បាស់ដូចរូបពិត ដូច្នេះបន្តស្រាវជ្រាវបន្ថែមទៀត អ្វីដែលអាចឲ្យយើងកំណត់ឈានទៅចាប់ខ្លួនមុខសញ្ញាបាន» ។
សូមបញ្ចាក់ជូនថា អ្នកកាសែតមនសិការខ្មែរ លោក ឃឹម សម្បូរណ៍ អាយុ៤៧ឆ្នាំ និងកូនប្រុស ខាត់ សារិន្ទភាតា អាយុ២១ ឆ្នាំ ត្រូវបានជនមិនស្គាល់មុខ បាញ់សម្លាប់នៅជិតស្តាតអូឡាំពិក កាលពីថ្ងៃទី១១ ខែកក្កដា ខណៈដែលជនរងគ្រោះទាំងពីរជិះម៉ូតូចេញពីហាត់ប្រាណនៅឯស្តាតអូឡាំពិក ៕