លោក សៀង វិបុល កូនប្រុសអ្នកស្រី មូល លន់ ដែលមានលំនៅនៅឯភូមិព្រែកអំពិល ឃុំកោះតូច ស្រុកកំពត ខេត្តកំពត បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទនៅព្រឹកថ្ងៃទី២ កញ្ញា ថា ប៉ូលិសប៉ុស្តិ៍រដ្ឋបាលឃុំកោះតូចបានយកក្រដាសមួយសន្លឹកមកប្រគល់ឲ្យលោកដោយប្រាប់ថា តុលាការកោះហៅម្តាយលោកគឺអ្នកស្រី មូល លន់។
លោក សៀង វិបុល ថ្លែងយ៉ាងដូច្នេះ ៖ «អ្នកយកមកឲ្យហ្នឹង អ្នកនៅកន្លែងធ្វើការប៉ុស្តិ៍រដ្ឋបាលនៅឃុំកោះតូច ឈ្មោះគេក្រៅហៅ តាពេជ្រ បើនៅក្នុងបញ្ជីជាតិគេហៅ ជា ប្រុស។ ខ្ញុំអត់បានពិនិត្យផង គ្រាន់តែគេយកមកដល់ ខ្ញុំសួរថា សំបុត្រអី គេថាសំបុត្រតុលាការឲ្យម៉ែខ្ញុំមកទទួល ហើយដល់នេះខ្ញុំប្រាប់គាត់ថា ម៉ែខ្ញុំនៅភ្នំពេញ ក៏គ្រាន់តែគេប្រាប់ថា ឲ្យគាត់ចុះមក បើគាត់បានចុះមកក៏បាន បើមិនបានប្រាប់គេ គេចារយកឲ្យគេវិញ។ គេឲ្យចូលទៅថ្ងៃទី៣ ខែ៩ ហ្នឹង»។
អ្នកស្រី មូល លន់ កំពុងរងការប្តឹងចោទប្រកាន់ពីលោក ហួន ម៉ានី ចៅក្រមនិងជាប្រធានសាលាដំបូងខេត្តកំពត ថា បានបរិហារកេរ្តិ៍លោក បន្ទាប់ពីលោកបានកាត់ឲ្យអ្នកស្រីចាញ់ក្តីក្នុងរឿងក្តីជាមួយឈ្មោះ សែម ស៊ន, សែម ហ៊ង, សែម ម៉ៅ និង សែម យឿន ដែលត្រូវជាបងប្អូនខាងសពប្តីគាត់ គឺលោក មាស ម៉ាង ដែលបានទទួលមរណភាពទៅហើយនោះ។
បន្ទាប់ពីចាញ់ក្តី អ្នកស្រីបានធ្វើការចោទប្រកាន់ថា លោក ហួន ម៉ានី ព្រមទាំងលោក ម៉ាន់ បូរ៉េត ជាក្រឡាបញ្ជីសាលាដំបូងខេត្តកំពត លោក ឈូក ផូ មេឃុំកោះតូច អ្នកស្រី វង់ ភារី គិលានុប្បដ្ឋាយិកានៃមន្ទីរពេទ្យបង្អែកខេត្តតាកែវ ថា បានឃុបឃិតជាមួយភាគីដើមបណ្តឹង ក្លែងឯកសារដោយបន្លំស្នាមមេដៃប្តីគាត់ ក្នុងការប៉ុនប៉ងរំលោភយកដីធ្លីគាត់ ហេតុនេះហើយ ទើបលោក ហួន ម៉ានី មិនសុខចិត្ត បានប្តឹងចោទប្រកាន់អ្នកស្រីវិញពីបទបរិហារកេរ្តិ៍លោក។
ទោះបីជាយ៉ាងនេះក្តី លោក ហួន ម៉ានី ប្រធានសាលាដំបូងខេត្តកំពត មានប្រសាសន៍ថា លោកពុំបានដឹងពីការកោះហៅអ្នកស្រី មូល លន់ នោះទេ ៖ «បើគេកោះហៅគាត់ ឲ្យគាត់ចូលទៅ ធ្វើម៉េចរឿងរបស់គាត់។ លោកអាចជួយប្រាប់គាត់ទៅថា តុលាការហៅចូល ត្រូវតែចូល តែមិនចូល គេបង្គាប់ឲ្យនាំខ្លួនអីតាំងរឿង ព្រោះខ្ញុំប្ដឹងគាត់ ដូចខ្ញុំប្រាប់លោកអ៊ីចឹង ថាគាត់បរិហារកេរ្ដិ៍ខ្ញុំ ចុះផ្សាយប៉ះពាល់កិត្តិយសខ្ញុំ ខ្ញុំមិននៅស្ងៀមទេ ខ្ញុំប្ដឹង។ ឥឡូវនេះ គេហៅគាត់លើកហ្នឹងទៀត ៣ដងហើយ គាត់មិនដែលនៅផ្ទះទេ»។
យ៉ាងណាក៏ដោយ មកទល់ពេលបច្ចុប្បន្នអ្នកស្រី មូល លន់ កំពុងគេចខ្លួនចេញពីផ្ទះក្រោយពីលេចឮដំណឹងថា លោក ហួន ម៉ានី ប្រធានសាលាដំបូងខេត្តកំពត បានប្តឹងលោកស្រីពីបទបរិហារកេរ្តិ៍នោះ៕