ពលរដ្ឋ​ខ្មែរ​ក្រោម​ធ្វើ​បាតុកម្ម​ទាមទារ​ឲ្យ​វៀតណាម​ដោះលែង​សកម្មជន​ខ្មែរ​ក្រោម​៤នាក់ នៅ​មុខ​ស្ថានទូត​វៀតណាម​ប្រទេស​ហុល្លង់

ដោយ សេក បណ្ឌិត
2023.09.04
ពលរដ្ឋ​ខ្មែរ​ក្រោម​ធ្វើ​បាតុកម្ម​ទាមទារ​ឲ្យ​វៀតណាម​ដោះលែង​សកម្មជន​ខ្មែរ​ក្រោម​៤នាក់ នៅ​មុខ​ស្ថានទូត​វៀតណាម​ប្រទេស​ហុល្លង់ ពលរដ្ឋខ្មែរ​កម្ពុជា​ក្រោមធ្វើបាតុកម្ម​នៅមុខស្ថានទូតវៀតណាម នៅ​ទីក្រុង​ឡាអេ (The Haguge) ប្រទេសហូឡង់ (Netherlands) ទាមទារ​ឱ្យ​ដោះលែង​សកម្មជន​សិទ្ធិមនុស្សខ្មែរក្រោម ៤ នាក់ កាលពីថ្ងៃទី២ ខែកញ្ញា ឆ្នាំ២០២៣។
រូប៖ VOKK

ពលរដ្ឋ​ខ្មែរ​ក្រោម​ប្រមាណ ៦០​នាក់ នៅ​ថ្ងៃ​ទី២ កញ្ញា ជួបជុំគ្នា​ធ្វើ​បាតុកម្ម​នៅ​ខាង​មុខ​ស្ថានទូត​វៀតណាម ប្រទេស​ហុល្លង់ (Netherlands) ដើម្បី​ទាមទារ​ឲ្យ​រដ្ឋាភិបាល​វៀតណាម គោរព​សិទ្ធិ​ជនជាតិ​ដើម និង​ដោះលែង​សកម្មជន​ខ្មែរ​ក្រោម​ចំនួន ៤នាក់ ដែល​កំពុង​ជាប់​ពន្ធនាគារ​ក្នុង​ប្រទេស​វៀតណាម។

បាតុកម្ម​នៅ​ថ្ងៃ​នេះ មាន​ការ​ចូលរួម​ពី​ពលរដ្ឋ​ខ្មែរ​ក្រោម មក​ពី​​ប្រទេស​បារាំង(French) អ៊ីតាលី(Italy) និង​ហុល្លង់(Netherlands)ជាដើម ក្នុង​នោះ​មាន​ទាំង​ព្រះសង្ឃ ក្មេង​ចាស់ ប្រុស ស្រី នាំ​គ្នា​កាន់​ទង់​ជាតិ​ខ្មែរ​ក្រោម និង​កាន់​បដា ដែល​បាន​សរសេរ​ថា រដ្ឋាភិបាល​វៀតណាម​ត្រូវតែ​គោរព​សិទ្ធិ​មនុស្ស និង​ដោះលែង​សកម្មជន​ខ្មែរ​ក្រោម។

បាតុកម្ម​ធ្វើ​ឡើង បន្ទាប់​ពី​អាជ្ញាធរ​វៀតណាម បាន​ឃាត់​ខ្លួន​សកម្មជន​សិទ្ធិ​មនុស្ស​ខ្មែរ​ក្រោម ចំនួន ៤នាក់ កាល​ពីថ្ងៃ​ទី៣១ កក្កដា ក្រោម ​បទ​ចោទ កេង​ចំណេញ​លើ​សិទ្ធិ​សេរីភាព និង​លទ្ធិ​ប្រជាធិបតេយ្យ បំពាន​លើ​ផល​ប្រយោជន៍​របស់​រដ្ឋ និង​សិទ្ធិ​សេរីភាព​ស្រប​ច្បាប់ នៃ​អង្គការ​ចាត់​តាំង និង​បុគ្គល របស់​ប្រទេស​វៀតណាម។ អង្គការ​សិទ្ធិ​មនុស្ស​ខ្មែរក្រោម​បាន​បដិសេធ​ការ​ចោទប្រកាន់​នេះ

អនុប្រធានទី២ សហព័ន្ធ​ខ្មែរ​កម្ពុជា​ក្រោម​នៅ​ប្រទេស​អ៊ីតាលី(Italy) លោក ត្រាន សារ៉ុង(Tran Xarong) ប្រាប់​វិទ្យុ​អាស៊ីសេរី នៅថ្ងៃទី២ កញ្ញា ថា បាតុកម្ម​នេះ គឺ​ធ្វើឡើង​ដើម្បី​ទាមទារ​ឲ្យ​រដ្ឋាភិបាល​វៀតណាម​គោរព​សិទ្ធិ​ជនជាតិ​ដើម​ភាគ​តិច​ខ្មែរ​ក្រោម និង​ដោះលែង​សកម្មជន​ខ្មែរ​ក្រោម​ទាំង​៤នាក់។ លោក អំពាវនាវ​ដល់ ពលរដ្ឋ​ខ្មែរ​កណ្ដាល​នៅ​កម្ពុជា ចូលរួម​ទាមទារ​សិទ្ធិ​ជនជាតិ​ដើម​ខ្មែរ​ក្រោម នៅ​ប្រទេស​វៀតណាម ព្រោះ​ទាំង​ពលរដ្ឋ​ខ្មែរ​ក្រោម និង​ខ្មែរ​កណ្ដាល សុទ្ធ​តែ​ឈាម​ជា​ខ្មែរ​ដូច​គ្នា។

លោក ត្រាន សារ៉ុង៖ «គោលដៅ​យើង​តែ​មួយ​ឲ្យ​ដោះលែង​សកម្មជន​សិទ្ធិ​មនុស្ស​ខ្មែរ​កម្ពុជា​ក្រោម​យើង ទី​២​ទៀត​ឲ្យ​គាត់​ហ្នឹង​ទទួលស្គាល់​ខ្មែរ​កម្ពុជា​ក្រោម ជា​ជនជាតិ​ដើម។ ទី៣​ទៀត​យើង​ចង់​ឲ្យ​រដ្ឋាភិបាល​កុម្មុយនីស្ត​យួន គោរព​សិទ្ធិ​មនុស្ស ណា៎​គោរព​សិទ្ធិ​មនុស្ស គោ​កតិកាសញ្ញា​របស់​អន្តរជាតិ​ផ្សេងៗ​ទៀត ដែល​ពួកគាត់​បាន​ចុះ​ហត្ថលេខា​ជាមួយ​គេ​ទាំងអស់​ហ្នឹង»។

អាជ្ញាធរ​វៀតណាម បាន​ចាប់​ឃុំ​ខ្លួន និង​គំរាម​កំហែង​សកម្មជន​សិទ្ធិ​មនុស្ស​ខ្មែរ​ក្រោម​ចំនួន ៩នាក់ កាលពីថ្ងៃទី៣១ ខែកក្កដា ក្រោម​ការ​ចោទ​ប្រកាន់​ពី​បទ «កេង​ចំណេញ​លើ​សិទ្ធិ​សេរីភាព និង​លទ្ធិ​ប្រជាធិបតេយ្យ បំពាន​លើ​ផល​ប្រយោជន៍​របស់​រដ្ឋ និង​សិទ្ធិ​សេរីភាព​ស្រប​ច្បាប់ នៃ​អង្គការ​ចាត់​តាំង និង​បុគ្គល» តាម​មាត្រា ៣៣១ នៃ​ក្រម​ព្រហ្ម​ទណ្ឌ​របស់​ប្រទេស​វៀតណាម។ ក្រោយ​ការ​ឃាត់ខ្លួន និង​សួរ​នាំ អាជ្ញាធរ​បាន​ដោះលែង​ពួកគេ​ឱ្យ​មាន​សេរីភាព​វិញ ប៉ុន្តែ​នៅ​បន្ត​ឃុំ​ខ្លួន​សកម្មជន​សិទ្ធិ​មនុស្ស​ខ្មែរ​ក្រោម​ចំនួន ៤នាក់៕

សូម​ទស្សនា​បទសម្ភាសន៍​ជាមួយ​ប្រធាន​នាយក​ដ្ឋាន​ព័ត៌មាន​សហព័ន្ធ​ខ្មែរ​ក្រោម ព្រះអង្គ ស៊ើង យ៉ឺងរតនា មាន​ថេរដីកា​បន្ថែម​ជុំវិញ​រឿង​នេះ។ សូម​អរគុណ!

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។