អ្នកឃ្លាំមើលលើកឡើងថា ការឡើងកាន់តំណែងជាប្រធានព្រឹទ្ធសភារបស់លោក ហ៊ុន សែន កំពុងនាំកម្ពុជា ឱ្យក្លាយជាប្រទេសដឹកនាំបែបគ្រួសារនិយម។ ការលើកឡើងនេះ ស្របពេលអតីតនាយករដ្ឋមន្ត្រី លោក ហ៊ុន សែន បានជាប់ឆ្នោត ក្លាយជាប្រធានព្រឹទ្ធសភានីតិកាលទី៥។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី ប្រាប់វិទ្យុអាស៊ីសេរី នៅថ្ងៃទី៣ មេសាថា ការឡើងកាន់តំណែងជាប្រធានព្រឹទ្ធសភារបស់លោក ហ៊ុន សែន នៅពេលនេះ គឺមិនខុសទៅនឹងច្បាប់នោះទេ ប៉ុន្តែវាខុសទៅនឹងសីលធម៌នយោបាយ ដោយសារអំណាចទាំង៣ គឺអំណាចនីតិប្បញ្ញត្តិ នីតិប្រតិបត្តិ និងតុលាការ ត្រូវតែជាអំណាចឯករាជ្យ និងមិនអាចមានការជ្រៀតជ្រែកអំណាចណាមួយបាននោះទេ។
ការលើកឡើងនេះ ក្រោយពីព្រឹទ្ធសភា នីតិកាលទី៥ បានបើកកិច្ចប្រជុំដំបូងនៅថ្ងៃទី៣ មេសា ក្រោយពីការបោះឆ្នោតជ្រើសរើសសមាជិកព្រឹទ្ធសភា កាលពីថ្ងៃទី២៥ មីនា កន្លងទៅ។
នៅពេលបើកសម័យប្រជុំនៅពេលនេះ ព្រះមហាក្សត្រ ព្រះបាទសម្ដេចព្រះបរមនាថ នរោត្ដម សីហមុនី ទ្រង់យាងបើកសម័យប្រជុំដំបូង នៃព្រឹទ្ធសភានីតិកាលទី៥ ហើយព្រះអង្គមានព្រះរាជបន្ទូលជូនចំពោះសមាជិកព្រឹទ្ធសភា នីតិកាលទី៥ ថា ព្រឹទ្ធសភា ត្រូវមានសាមគ្គីភាពរឹងមាំ រួមគ្នាបំពេញតួនាទីភារកិច្ច នៅក្នុងស្ថាប័ននីតិប្បញ្ញត្តិកំពូលនេះ ឲ្យបានកាន់តែប្រសើរ មានប្រសិទ្ធភាព និងគណនេយ្យភាពខ្ពស់ ក្នុងក្របខ័ណ្ឌអភិបាលកិច្ចល្អ និងនីតិរដ្ឋ។ ព្រះអង្គ មានព្រះរាជបន្ទូលទៀតថា ព្រឹទ្ធសភា ត្រូវចូលរួមចំណែកធ្វើឲ្យអំណាចរដ្ឋ ប្រព្រឹត្តទៅបានល្អ និងមានតុល្យភាព ដើម្បីការពារឯករាជ្យ អធិបតេយ្យភាព បូរណភាពទឹកដី ស្ថិរភាពនយោបាយ រដ្ឋធម្មនុញ្ញ និងរបបរាជានិយម។
ព្រះមហាក្សត្រ ព្រះបាទសម្ដេចព្រះបរមនាថ នរោត្ដម សីហមុនី។
ក្រោយពីបើកសម័យប្រជុំព្រឹទ្ធសភា នៅព្រឹកថ្ងៃទី៣ មេសា ប្រធានបណ្ដោះអាសន្នព្រឹទ្ធសភា នីតិកាលទី៥ លោក សុខ ឥសាន បានប្រកាសសុពលភាព សមាជិកព្រឹទ្ធសភាទាំង ៦២រូប និងបានបោះឆ្នោតជ្រើសរើសប្រធាន និងអនុប្រធាន២ រូបផ្សេងទៀត។ លទ្ធផល នៃការបោះឆ្នោតនោះ អតីតនាយករដ្ឋមន្ត្រី និងជាប្រធានគណបក្សប្រជាជនកម្ពុជា លោក ហ៊ុន សែន បានជាប់ឆ្នោតក្លាយជាប្រធានព្រឹទ្ធសភា ចំណែកឯអតីតរដ្ឋមន្ត្រីក្រសួងការបរទេស លោក ប្រាក់ សុខុន បានជាប់ឆ្នោតក្លាយជា អនុប្រធានទី១ និងអតីតរដ្ឋលេខាធិការក្រសួងការបរទេស លោក អ៊ុច បូររិទ្ធ បានជាប់ឆ្នោតក្លាយជាអនុប្រធានទី២ នៃព្រឹទ្ធសភា។
ប្រធានព្រឹទ្ធសភា នីតិកាលទី៥ លោក ហ៊ុន សែន ថ្លែងក្នុងពេលត្រូវបានជ្រើសរើសជាប្រធានព្រឹទ្ធសភាថា លោកអរគុណចំពោះអង្គបោះឆ្នោត ដែលបានបោះឆ្នោតជូនគណបក្សរបស់លោក។ លោក ហ៊ុន សែន បានប្ដេជ្ញាចិត្ត ដឹកនាំស្ថាប័ននីតិប្បញ្ញត្តិ ក្នុងការបំពេញតួនាទី និងភារកិច្ច ហើយចូលរួមជាមួយរដ្ឋសភា និងរដ្ឋាភិបាល ដើម្បីបំពេញអាណត្តិរបស់ខ្លួនដោយការទទួលខុសត្រូវខ្ពស់ ក្នុងការបម្រើជាតិ និងប្រជាជន។
សមាជិកព្រឹទ្ធសភា មកពីគណបក្សឆន្ទៈខ្មែរ លោក គង់ មុនីកា ប្រាប់វិទ្យុអាស៊ីសេរី នៅថ្ងៃទី៣ មេសាថា ការឈានជើងចូលក្នុងស្ថាប័ននីតិប្បញ្ញត្តិរបស់សមាជិកព្រឹទ្ធសភានីតិកាលទី៥នេះ គឺបង្ហាញពីពន្លកនៃអ្នកប្រជាធិបតេយ្យ កំពុងតែលូតលាស់មកវិញ ក្រោយពីគណបក្សប្រឆាំងដ៏ធំ គឺគណបក្សសង្គ្រោះជាតិ ត្រូវបានរំលាយ កាលពីពេលកន្លងទៅ។ លោកលើកឡើងថា លោក និងសមាជិកព្រឹទ្ធសភា ២រូបផ្សេងទៀត មកពីគណបក្សឆន្ទៈខ្មែរ ដែលតំណាងឲ្យគណបក្សភ្លើងទៀន នឹងបំពេញតួនាទីខ្លួនក្នុងភាពជាតំណាង នីតិកម្ម និងការតាមដានការអនុវត្តគោលនយោបាយ និងច្បាប់ឲ្យបានខ្ជាប់ខ្ជួន និងយកចិត្តទុកដាក់ចំពោះទុក្ខលំបាករបស់ពលរដ្ឋ។
នេះជាទំព័រប្រវត្តិសាស្ត្រថ្មីមួយទៀត សម្រាប់ប្រទេសកម្ពុជា ដែលជាប្រទេសប្រជាធិបតេយ្យ សេរី ពហុបក្ស ប៉ុន្តែក្បាលម៉ាស៊ីនដឹកនាំរដ្ឋ ជាពិសេស គឺក្បាលម៉ាស៊ីនដឹកនាំអង្គនីតិប្បញ្ញត្តិ និងនីតិប្រតិបត្តិ ដែលត្រូវបានក្ដោបក្ដាប់ដោយបុគ្គលចេញពីគ្រួសារតែមួយ គឺត្រកូល ហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។