ក្រុមបាតដៃទីបីតាមយាយីអ្នកធ្វើបាតុកម្មប្រឆាំងលោក ហ៊ុន សែន ដល់ទឹកដីអឺរ៉ុប
កិច្ចប្រជុំកំពូលរវាង សហភាពអឺរ៉ុប និងអាស៊ាន នៅទីក្រុងព្រុចសែល (Brussels) ប្រទេសបែលហ្សិច (Belgium) បានបញ្ចប់ហើយ។ ទាំងលោក ហ៊ុន សែន និងក្រុមអ្នកនិយមប្រជាធិបតេយ្យដែលបាននាំគ្នាមកធ្វើបាតុកម្មនោះក៏ត្រឡប់ទៅផ្ទះវិញដែរ។
សូមស្ដាប់សេចក្ដីរាយការណ៍ផ្ទាល់របស់លោក ជុន ច័ន្ទបុត្រ តាមរយៈការសាកសួរពីសំណាក់លោក យ៉ង ចាន់តារា ដែលបានទៅយកព័ត៌មានដល់ទៅទីក្រុងព្រុចសែល អំពីព្រឹត្តិការណ៍នានាដែលបានកើតឡើងកាលពីថ្ងៃទី១៤ ខែធ្នូ ជាពិសេសទាក់ទងទៅនឹងសកម្មភាពរបស់ក្រុមបាតដៃទីបីរបស់លោក ហ៊ុន សែន ដែលតាមយាយីដល់ក្រុមបាតុករ។
[ សូមស្ដាប់សំឡេង និងទស្សនាដូចតទៅនេះ៖Opens in new window ]
ក្រុមមេដឹកនាំអាស៊ាន - អឺរ៉ុប ដាក់គោលដៅបង្កើតកិច្ចព្រមព្រៀងពាណិជ្ជកម្មសេរីរវាងប្លុកទាំងពីរ
ការបង្កើនទំនាក់ទំនងផ្នែកពាណិជ្ជកម្មបានក្លាយជាប្រធានបទសំខាន់មួយនៃកិច្ចប្រជុំកំពូលរំលឹកខួបលើកទី៤៥ នៃភាពជាដៃគូសន្ទនារវាងអាស៊ាន និងសហភាពអឺរ៉ុប ដែលទើបនឹងបិទបញ្ចប់ទៅកាលពីថ្ងៃទី១៤ ខែធ្នូ នៅទីក្រុងព្រុចសែល (Brussels) ប្រទេសប៊ែលហ្សិក (Belgium)។
ស្ត្រីវិចិត្រករខ្មែរដែលត្រូវជនបរទេសធ្វើទារុណកម្មស្ទើរស្លាប់នៅថៃទាមទារឲ្យចាប់ជនដៃដល់ដាក់ទោស
ស្ត្រីវិចិត្រករខ្មែរដែលត្រូវជនបរទេសធ្វើទារុណកម្មស្ទើរបាត់បង់ជីវិតនៅប្រទេសថៃ ទាមទារឲ្យអាជ្ញាធរខ្មែរ និងថៃចាប់ជនដៃដល់មកដាក់ទោស និងរកអ្នកដែលបញ្ជាពីក្រោយ ព្រោះកញ្ញាមិនដែលមានរឿងជាមួយជនជាតិប៉ូឡូញ (Poland) ទាំងពីរនាក់នោះទេ។ មន្ត្រីសង្គមស៊ីវិលថា ស្ថានទូត និងរដ្ឋាភិបាលខ្មែរមិនត្រូវព្រងើយកន្តើយ ចំពោះករណីនេះទេ ពោលគឺ កម្ពុជាត្រូវសហការជាមួយថៃចាប់ជនល្មើស ដើម្បីរកយុត្តិធម៌ជូនស្ត្រីខ្មែររងគ្រោះ។
សមត្ថកិច្ចខេត្តព្រះសីហនុចាប់ខ្លួនជនជាតិចិន ៧នាក់រឿងបង្ខាំងមនុស្សជំរិតទារប្រាក់
មន្ត្រីឃ្លាំមើលការរំលោភសិទ្ធិមនុស្សបន្តស្នើដល់អាជ្ញាធរខេត្តព្រះសីហនុពង្រឹងការអនុវត្តច្បាប់ និងបង្ហាញព័ត៌មានឱ្យបានទូលំទូលាយទាក់ទងនឹងបញ្ហាជួញដូរមនុស្ស និងការបង្ខាំងមនុស្សដោយខុសច្បាប់។ ការស្នើនេះធ្វើឡើងក្រោយសមត្ថកិច្ចខេត្តព្រះសីហនុបន្តចាប់បានជនសង្ស័យជនជាតិចិនចំនួន ៧នាក់ ពាក់ព័ន្ធករណីចាប់បង្ខាំងមនុស្សជំរិតទារប្រាក់ និងប្រើប្រាស់អាវុធដោយខុសច្បាប់។
មន្ត្រីសង្គមស៊ីវិល និងមេធាវីរិះគន់ថា ការសម្រេចរបស់សាលាឧទ្ធរណ៍ ហាក់ដូចជាការបំពេញចិត្តភាគីឈ្នះក្ដី
មេធាវីការពារអនុប្រធានគណបក្សភ្លើងទៀន និងមន្ត្រីសង្គមស៊ីវិលរិះគន់ថា សាលាឧទ្ធរណ៍ហាក់កាត់ក្ដី ដើម្បីបំពេញចិត្តទៅភាគីឈ្នះក្ដី គឺគណបក្សប្រជាជនកម្ពុជា និងគណៈកម្មាធិការជាតិរៀបចំការបោះឆ្នោត (គ.ជ.ប)។ ប្រតិកម្មនេះ ធ្វើឡើងក្រោយពេលសាលាឧទ្ធរណ៍រាជធានីភ្នំពេញ បានប្រកាសសាលដីកា ដោយតម្កល់សាលក្រមសាលាដំបូងរាជធានីភ្នំពេញ ទុកជាបានការដដែល ពោលគឺ លោក សុន ឆ័យ នៅតែបន្តចាញ់ក្ដី គ.ជ.ប និងបក្សកាន់អំណាច។
ពលរដ្ឋមួយចំនួនចាប់អារម្មណ៍នឹងការបោះឆ្នោតជ្រើសរើសតំណាងរាស្ត្រនៅឆ្នាំ២០២៣
ការបោះឆ្នោតជ្រើសរើសតំណាងរាស្ត្រនីតិកាលទី៧ កាន់តែខិតចូលមកហើយ។ ស្របគ្នានេះប្រជាពលរដ្ឋមួយចំនួនហាក់ផុសផុលចាប់អារម្មណ៍នឹងការបោះឆ្នោតនេះ និងបានអំពាវនាវឱ្យគណៈកម្មាធិការជាតិរៀបចំការបោះឆ្នោត(គ.ជ.ប)អនុវត្តតួនាទីដោយអព្យាក្រិតនិងយុត្តិធម៌ឱ្យបានស្មើភាពគ្នាគ្រប់គណបក្សនយោបាយ។ មន្ត្រីជំនាញខាងការបោះឆ្នោតយល់ថា ការដែលប្រជាពលរដ្ឋផុសផុលចូលរួមក្នុងសកម្មភាពនយោបាយនិងការបោះឆ្នោតនេះនឹងធ្វើឱ្យប្រទេសមានប្រជាធិបតេយ្យនិងមានការអភិវឌ្ឍន៍រីកចំរើន។
អានព័ត៌មានពិស្ដារ ...
កូដករក្រុមហ៊ុនណាហ្គាវើលដ៍ម្នាក់ចូលបំភ្លឺតុលាការភ្នំពេញតាមការកោះហៅ
ទាក់ទងនឹងការធ្វើកូដកម្មរបស់កម្មករនៃក្រុមហ៊ុនកាស៊ីណូណាហ្គាវើលដ៍ (NAGAWORLD) វិញ កាលពីព្រឹកថ្ងៃទី ១៥ ខែធ្នូម្សិលមិញ កូដករម្នាក់ បានចូលបំភ្លឺនៅសាលាដំបូងរាជធានីភ្នំពេញ តាមបណ្ដឹងរបស់ក្រុមហ៊ុនបនល្បែងមួយនេះ ក្រោយចូលរួមធ្វើកូដកម្មអហិង្សាទាមទារដំណោះស្រាយវិវាទការងារ ដែលអូសបន្លាយពេលជិតមួយឆ្នាំមកនេះ។
កូដករណាហ្គាវើលដ៍ និងមន្ត្រីសង្គមស៊ីវិល នៅតែទទូចឲ្យតុលាការ ទម្លាក់ចោលការចោទប្រកាន់លើក្រុមកូដករ និងជំរុញឲ្យក្រុមហ៊ុនទទួលយកសហជីពចូលធ្វើការវិញ ហើយស្ថាប័នពាក់ព័ន្ធពន្លឿនការដោះស្រាយបញ្ចប់វិវាទការងារក្រៅប្រព័ន្ធតុលាការ។
អានព័ត៌មានពិស្ដារ ...
ព្រះមហាក្សត្រប្រកាសឱ្យប្រើច្បាប់ថវិកាជាតិឆ្នាំ២០២៣មានទំហំជាង៩ពាន់លានដុល្លារ
ព្រះមហាក្សត្រប្រកាសឱ្យប្រើច្បាប់ថវិកាជាតិឆ្នាំ២០២៣ ដែលអនុញ្ញាតឱ្យរដ្ឋាភិបាលលោក ហ៊ុន សែន ប្រើប្រាស់លុយជាតិជាង៩ពាន់លានដុល្លារ ហើយអាចខ្ចីលុយពីម្ចាស់បំណុលជាង២ពាន់លានដុល្លារទៀតផង។ មន្ត្រីសង្គមស៊ីវិលបារម្ភថា បើរដ្ឋប្រើប្រាស់ថវិកាជាតិមិនចំគោលដៅទេ នឹងបង្កផលប៉ះពាល់ដល់សេដ្ឋកិច្ចជាតិ និងជីវភាពពលរដ្ឋ។
អានព័ត៌មានពិស្ដារ ...
ប្រជាសហគមន៍ស្នើ រដ្ឋាភិបាលលុបអនុក្រិត្យកាត់ឆ្វៀលដីព្រៃមេត្តាធម្មជាតិ
ពាក់ព័ន្ធនឹងព្រៃមេត្តាធម្មជាតិវិញ ប្រជាសហគមន៍ ស្នើដល់រដ្ឋាភិបាលលុបអនុក្រិត្យកាត់ឆ្វៀលដីព្រៃមេត្តាធម្មជាតិជាង២រយហិកតារ កាលពីខែសីហា ឆ្នាំ២០២១ ដើម្បីឱ្យប្រជាសហគមន៍គ្រប់គ្រងវិញ។ សកម្មជនបរិស្ថាន យល់ឃើញថា រដ្ឋាភិបាលគួរធ្វើតាមសំណូមពររបស់ប្រជាសហគមន៍ ដើម្បីចូលរួមការពារសត្វព្រៃជិតផុតពូជ និងទប់ស្កាត់បម្រែបម្រួលអាកាសធាតុ។
អានព័ត៌មានពិស្ដារ...
កម្ពុជានាំចេញទំនិញទៅអាមេរិកមានតម្លៃជាង ៨ ពាន់លានដុល្លារក្នុងរយៈពេល ១១ខែ
កម្ពុជានាំចេញផលិតផលទំនិញ ទៅកាន់ទីផ្សារអន្តរជាតិសរុប ចំនួន ២០ពាន់លានដុល្លារអាមេរិក ចាប់ពីខែមករា ដល់ខែវិច្ឆិកា ឆ្នាំ២០២២ គឺកើនឡើង១៨% បើធៀបនឹងរយៈពេលដូចគ្នា កាលពីឆ្នាំ២០២១។ ក្នុងនោះសហរដ្ឋអាមេរិក គឺជាទីផ្សារនាំចេញធំជាងគេបំផុតរបស់កម្ពុជា ដែលមានទំហំទឹកប្រាក់ជាង ៨ពាន់លានដុល្លារ (៨,២១៧) ឬស្មើនឹង៤០% នៃតម្លៃនាំចេញសរុប។
របាយការណ៍របស់អគ្គនាយកដ្ឋានគយ និងរដ្ឋាករ (GDCE) នៃក្រសួងសេដ្ឋកិច្ច និងហិរញ្ញវត្ថុ ឱ្យដឹងថា សហរដ្ឋអាមេរិកនៅតែជាប្រទេសទិញផលិតផលរបស់កម្ពុជាច្រើនជាងគេ។ អត្រានាំទំនិញចេញទៅសហរដ្ឋអាមេរិករយៈពេល១១ខែ ក្នុងឆ្នាំ២០២២នេះ គឺកើនឡើងប្រមាណ២៣% បើធៀបទៅនឹងអំឡុងដូចគ្នា កាលពីឆ្នាំ២០២១។
ចំណែកទំនិញនាំចូលពីសហរដ្ឋអាមេរិកវិញ គឺមានតម្លៃសរុប ជិត ៣ពាន់លានដុល្លារ (២៩២,៧) ធ្លាក់ចុះ ជិត ៥% (៤,៨) រយៈពេល ១១ ខែនៅឆ្នាំ២០២២នេះ បើធៀបអំឡុងពេលដូចគ្នា កាលពីឆ្នាំមុន។ ទំនិញដែលកម្ពុជានាំចេញ ទៅសហរដ្ឋអាមេរិករួមមាន សំលៀកបំពាក់ ស្បែកជើង ផលិតផលធ្វើដំណើរ និងផលិតផលកសិកម្ម ខណៈដែលការនាំចូលសំខាន់ មានដូចជា យានយន្ត ចំណីសត្វ និងគ្រឿងម៉ាស៊ីន។
របាយការណ៍ដដែលបន្តថា បន្ទាប់ពីសហរដ្ឋអាមេរិក ទីផ្សារវៀតណាមជាប់លំដាប់ថ្នាក់លេខ២ ដែលមានទំហំទឹកប្រាក់ជិត ២ពាន់លានដុល្លារ។ ចំណែកប្រទេសចិនវិញ ជាប់ចំណាត់ថ្នាក់ទី៣ មានទឹកប្រាក់ជាង១ពាន់លានដុល្លារ៕
ស្ត្រីខ្មែរ ជាង៧រយនាក់ ( ៧២២ ) បំរើការងារបោសសំអាតមីន
អាជ្ញាធរមីននិងសង្គ្រោះជនរងគ្រោះ (CMAA) ឱ្យដឹងថា ចាប់ពីខែមករា ដល់ខែវិច្ឆិកា ឆ្នាំ ២០២២ មានស្ត្រីជាង៧រយនាក់ (៧២២) កំពុងបម្រើការងារជាអ្នកបោសសម្អាតមីន និងគ្រាប់មិនទាន់ផ្ទុះនៅកម្ពុជានិងនៅប្រទេស។
គេហទំព័រអាជ្ញាធរមីនកម្ពុជាឲ្យដឹងថា រយៈពេល ៣ ទសវត្សរ៍កន្លងមកនេះ ច្រើនតែមានបុរសចូលរួមការងារបោសប្រកបដោយគ្រោះថ្នាក់នេះ ក៏ប៉ុន្តែបច្ចុប្បន្ន មានស្ត្រីកាន់តែច្រើនឡើងៗ បានចូលបម្រើការងារបោសសម្អាតមីន និងគ្រាប់មិនទាន់ផ្ទុះ ទាំងនៅក្នុងប្រទេសនិងក្រៅប្រទេស។ បន្ថែមពីនេះ មានស្ត្រីជាច្រើនរូបបានក្លាយជាអ្នកមានតួនាទីខ្ពស់នៅក្នុងស្ថាប័ន និងដៃគូប្រតិបត្តិករដោះមីន។
លោកនាយករដ្ឋមន្ត្រី ហ៊ុន សែន កាលពីដើមខែធ្នូ បានបង្កើត «មូលនិធិកម្ពុជាគ្មានមីនឆ្នាំ ២០២៥» ដែលលោកប្ដេជ្ញាថា គឺដើម្បីចូលរួមគាំទ្រគោលដៅបោសសម្អាតមីន និងគ្រាប់មិនទាន់ផ្ទុះ ឱ្យអស់នៅត្រឹមឆ្នាំ ២០២៥ ខាងមុខ។ អាជ្ញាធរមីនឲ្យដឹងថា ចាប់តាំងពីឆ្នាំ១៩៧៩មក ប្រជាពលរដ្ឋចំនួនប្រមាណ៦៥ម៉ឺននាក់ (៦៥,០០៤) បានរងគ្រោះដោយសារគ្រាប់មីន និងសំណល់ជាតិផ្ទុះពីសង្គ្រាម ក្នុងនោះស្លាប់បាត់បង់ជីវិតចំនួន ជិត ២ម៉ឺននាក់ (១៩,៨១៨)។ ចំណែជនរងគ្រោះប្រចាំឆ្នាំវិញ ក៏បានថយចុះពី ជាង ៤ពាន់ នាក់ (៤,៣២០) ក្នុងឆ្នាំ១៩៩៦ មកនៅ ចំនួន៤៤នាក់ ក្នុងឆ្នាំ២០២១ កន្លងទៅនេះ៕
ក្រសួងបរិស្ថានរកឃើញឈ្លូសយក្សជិតផុតពូជនៅខេត្តរតនគិរី
ក្រសួងបរិស្ថាន បានរកឃើញសត្វឈ្លូសយក្សដែលជិតផុតពូជ នៅក្នុងតំបន់ការពារធម្មជាតិក្នុងខេត្តរតនគិរី បន្ទាប់ពីបាត់ដានវា អស់រយៈពេលជិត៣០ឆ្នាំ។
អ្នកនាំពាក្យក្រសួងបរិស្ថាន លោក នេត្រ ភក្ត្រា ប្រាប់កាសែតក្នុងស្រុក (ភ្នំពេញប៉ុស្តិ៍) កាលពីថ្ងៃទី ១៥ ខែធ្នូថា ឈ្លូសយក្សនេះ ជាប្រភេទសត្វរងគ្រោះជិតផុតពូជខ្លាំង នៅលើពិភពលោក។ លោកបន្តថា សត្វឈ្លូសយក្សនេះ បានរកឃើញដំបូងបំផុត នៅក្នុងតំបន់ការពារធម្មជាតិ កាលពីឆ្នាំ១៩៩៤ ហើយក៏គេលែងប្រទះឃើញវត្តមានរបស់វាទៀត។ ក្រោយពីបាត់ដានអស់យៈពេលជិត៣០ឆ្នាំមក សត្វឈ្លូសយក្សនេះ បានបង្ហាញវត្តមានម្ដងទៀត តាមរយៈទិន្នន័យរូបភាពដែលប្រមូលបានពីម៉ាស៊ីនថតស្វ័យប្រវត្តិ នៅក្នុងឧទ្យានជាតិវីរជ័យ ខេត្តរតនគិរី។
លោកអះអាងថា សត្វឈ្លូសយក្សត្រូវបានចាត់ជាប្រភេទរងគ្រោះជិតផុតពូជខ្លាំង (Critically Endangered) នៅក្នុងបញ្ជីក្រហម ហើយកត្តាគំរាមកំហែងដល់សត្វឈ្លូសយក្ស គឺការបរបាញ់យកស្នែងនិងសាច់។ សត្វឈ្លូសយក្សចូលចិត្តរស់នៅក្នុងព្រៃស្រោងនិងព្រៃពាក់កណ្តាលស្រោង ហើយស្នែងរបស់សត្វឈ្លូសយក្ស មានទំហំធំជាងស្នែងសត្វឈ្លូសធម្មតា៕
ពលរដ្ឋមានជម្លោះដីនៅខេត្តឧត្ដរមានជ័យជាង៣០០គ្រួសារ កំពុងភៀសខ្លួនបន្ទាប់ពីអាជ្ញាធរដុតផ្ទះពួកគេចោល
ប្រជាពលរដ្ឋប្រមាណ ៣៧០គ្រួសារ នៅស្រុកត្រពាំងប្រាសាទ ខេត្តឧត្តរមានជ័យ កំពុងភៀសខ្លួននិងរត់គេចពីការតាមចាប់របស់អាជ្ញាធរ ខណៈផ្ទះសម្បែងរបស់ពួកគាត់ត្រូវបានដុតបំផ្លាញ ក្រោយមានទំនាស់ដីធ្លីជាមួយក្រុមហ៊ុនចម្ការកៅស៊ូចំនួន២។
មន្ត្រីសង្គមស៊ីវិល ចាត់ទុកទង្វើរបស់អាជ្ញាធរនិងក្រុមហ៊ុនទាំងនោះថា ជាអំពើព្រៃផ្សៃ អមនុស្សធម៌ និងរំលោភបំពានសិទ្ធិមនុស្សធ្ងន់ធ្ងរ។
អានព័ត៌មានពិស្ដារ ...
ប្រជានេសាទជាច្រើនគ្រួសារបារម្ភបាត់បង់របរនេសាទ ក្រោយពីក្រុមហ៊ុនឧកញ៉ា ឃុន សៀ បន្តចាក់លុបពង្រីកចូលផ្ទៃទឹកទន្លេមេគង្គ នៅអរិយក្សត្រ
ប្រជានេសាទជាច្រើនគ្រួសារព្រួយបារម្ភបាត់បង់មុខរបរនេសាទ និងទីកន្លែងដាំបន្លែបង្ការ តាមបណ្តោយច្រាំងទន្លេមេគង្គ បន្ទាប់ពីក្រុមហ៊ុនឧកញ៉ា ឃុន សៀ នៅតែបន្តចាក់លុបផ្ទៃទឹកទន្លេមេគង្គមួយផ្នែកធំតាមបណ្តោយច្រាំងទន្លេត្រើយខាងកើតប្រវែងជាង៤គីឡូម៉ែត្រ នៅតំបន់អរិយក្សត្រខេត្តកណ្តាល។
អ្នកភូមិថា គម្រោងអភិវឌ្ឍន៍ខ្នាតធំនេះ កំពុងបំផ្លាញទីកន្លែងនេសាទត្រីយ៉ាងសំខាន់របស់អ្នកភូមិ និងធ្វើឱ្យទិន្នផលត្រីថយចុះខ្លាំង ប៉ះពាល់ប្រភពចំណូលសេដ្ឋកិច្ចរបស់ប្រជានេសាទ។
អានព័ត៌មានពិស្ដារ ...