១ . តំណាងប្រជាពលរដ្ឋជាង១ពាន់នាក់ដាក់ញត្តិស្នើសុំឱ្យក្រសួងមហាផ្ទៃ បញ្ឈប់ការផ្តល់ អត្តសញ្ញាណប័ណ្ណ ជនអន្តោប្រេសន៍
ពលរដ្ឋចំនួន៥នាក់ ដែលតំណាងឱ្យប្រជាពលរដ្ឋជាង១ពាន់នាក់ (១,៥០០នាក់) នៅព្រឹកថ្ងៃទី១៩ ខែកញ្ញានេះ បាននាំគ្នាដាក់ញត្តិស្នើសុំឱ្យក្រសួងមហាផ្ទៃ បញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍។ មន្ត្រីសង្គមស៊ីវិល គាំទ្រញត្តិរបស់ក្រុមប្រជាពលរដ្ឋ ហើយថា ការស្នើសុំនេះ មិនមែនជាការរើសអើងជាតិសាសន៍នោះទេ ប៉ុន្តែគឺជាការដែលគិតពីផលប្រយោជន៍ប្រជាពលរដ្ឋខ្មែរ និងការការពារបូរណភាពទឹកដី។
២ . អ្នកគាំទ្រទាមទារឱ្យតុលាការដោះលែងអ្នកជំនាញផ្នែកច្បាប់កញ្ញា សេង ធារី
អ្នកគាំទ្រស្នើឱ្យរដ្ឋាភិបាល និងតុលាការដោះលែងអ្នកជំនាញផ្នែកច្បាប់កញ្ញា សេង ធាវី ឱ្យមានសេរីភាពឡើងវិញ ក្នុងឱកាសភ្ជុំបិណ្ឌនេះ ពីព្រោះអ្នកជំនាញផ្នែកច្បាប់រូបនេះមិនមានកំហុសដូចការចោទប្រកាន់ឡើយ។ ពួកគេយល់ថា ចំណាត់ការលើកញ្ញា សេង ធារី កន្លងមក គឺជាការបំបិទសិទ្ធិសេរីភាពបញ្ចេញមតិរបស់ពលរដ្ឋខ្មែរនៅសង្គមប្រជាធិបតេយ្យ។
៣ . មន្ត្រីជាន់ខ្ពស់គណបក្សជំទាស់និងគ្រួសារប្រឈមនឹងទុក្ខលំបាកក្រោយការតាមចាប់ខ្លួន
មន្ត្រីជាន់ខ្ពស់គណបក្សសង្គ្រោះជាតិលោក ជា ជីវ ព្រមទាំងប្រពន្ធនិងកូនៗ៥នាក់បានភៀសខ្លួននៅប្រទេសថៃថ្មីៗនេះដើម្បីគេចពីការប៉ុនប៉ងចាប់ខ្លួនដោយអាជ្ញាធរលោកហ៊ុន សែន។ជីវិតជាជនភៀសខ្លួននយោបាយដូច្នេះគ្រួសារលោកជា ជីវ ប្រឈមការលំបាកស្ទើរសព្វបែបយ៉ាងដូចជាការចំណាយប្រចាំថ្ងៃនិងការបារម្ភពីសុវត្ថិភាពជាដើម។
៤ . មន្រ្តីបរិស្ថានខេត្តកំពង់ធំបង្ខំឱ្យបណ្ដាញសហគមន៍ព្រៃឡង់១៦នាក់ធ្វើកិច្ចសន្យាបញ្ឃប់ចុះល្បាតព្រៃ
មន្រ្តីបរិស្ថានខេត្តកំពង់ធំបង្ខំឱ្យបណ្ដាញសហគមន៍ព្រៃឡង់១៦នាក់ធ្វើកិច្ចសន្យាបញ្ឃប់សកម្មភាពចុះល្បាតព្រៃអភិរក្សនៅតំបន់ព្រៃឡង់ដោយលើកឡើងថា ប្រជាពលរដ្ឋទាំងនោះតែងតែចូលល្បាតព្រៃនៅតំបន់ហាមឃាត់។ ពលរដ្ឋអះអាងថា ការរារាំងរបស់មន្រ្តីបរិស្ថាននេះគឺជាទង្វើមិនត្រឹមត្រូវខណៈដែលបទល្មើសព្រៃឈើកើតមានជាបន្តបន្ទាប់បែរជាមន្រ្តីពាក់ព័ន្ធទាំងនោះមិនអើពើបង្រ្កាប។
៥ . អាជ្ញាធរកម្ពុជាកំពុងស៊ើបអង្កេតជនជាតិវៀតណាមជិត ៦០ នាក់នាំគ្នារត់ចេញពីកាស៊ីណូមួយកន្លែងក្នុងក្រុងបាវិត ខេត្តស្វាយរៀង
អាជ្ញាធរកម្ពុជាកំពុងស៊ើបអង្កេតករណីជនជាតិវៀតណាមចំនួនជិត៦០ នាក់ ដែលបាននាំគ្នារត់ចេញពីកាស៊ីណូមួយកន្លែងក្នុងក្រុងបាវិត ខេត្តស្វាយរៀង កាលពីថ្ងៃទី១៧ ខែកញ្ញា។ នេះជាករណីទី២ ហើយដែលជនជាតិវៀតណាមជាច្រើននាក់នាំគ្នាសម្រុកចេញពីកាស៊ីណូនៅកម្ពុជា។
៦ . សង្គមស៊ីវិលបារម្ភពីការប្រមូលពន្ធកើនឡើង អាចប្រឈមនឹងកំណើនអតិផរណា
អង្គការសង្គមស៊ីវិលបារម្ភពីស្ថានភាពសេដ្ឋកិច្ចនៅកម្ពុជា អាចប្រឈមនឹងកំណើនអតិផរណា បន្ទាប់ពីអគ្គនាយកដ្ឋានពន្ធដារបង្ហាញរបាយការណ៍ថា កម្ពុជាប្រមូលពន្ធកើនឡើង ២៧ភាគរយក្នុងឆ្នាំ២០២២។ ពួកគាត់លើកឡើងថា កំណើនអតិផរណានេះ ធ្វើឱ្យជីវភាពពលរដ្ឋកាន់តែធ្លាក់ទៅក្នុងបន្ទាត់នៃភាពក្រីក្រ ស្របពេលកម្ពុជាកំពុងមានកំណើនអតិផរណាស្រាប់។ អ្នកវិភាគយល់ឃើញថា កម្ពុជាគួរប្រើប្រាស់ថវិកាដ៏ច្រើនដែលបានមកពីការប្រមូលពន្ធនេះ អភិវឌ្ឍប្រទេសឱ្យមានតុល្យភាព ដើម្បីជៀសវាងការខ្ចីបំណុលពីបរទេសបន្ថែម។
៧ . ប្រជាពលរដ្ឋជិត១ពាន់នាក់នៅខេត្តកោះកុងដាក់ញត្តិស្នើអាជ្ញាធរឃុំរកដំណោះស្រាយដីធ្លី
ប្រជាពលរដ្ឋប្រមាណ ៥រយនាក់(៥០០) តំណាងអោយពលរដ្ឋជិត១ពាន់នាក់(៩៥០) មកពី៥ឃុំ ប្រមូល ផ្តុំគ្នា ដាក់ញត្តិស្នើសុំអាជ្ញាធរឃុំក្នុងស្រុកស្រែអំបិលរកដំណោះស្រាយដីធ្លីសមរម្យជូនពួកគាត់។ សង្គមស៊ីវិលយល់ថារដ្ឋាភិបាលត្រូវធានានូវសិទ្ធិរស់រានរបស់ពលរដ្ឋស្របតាមរដ្ឋធម្មនុញ្ញនិងគួរផ្តល់ដីសម្បទានសង្គមកិច្ចជូនដល់ពលរដ្ឋក្រីក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។