សហជីពចំនួន១១បាននាំគ្នាថោ្កលទោសចំពោះអាជ្ញាធរសមត្ថកិច្ចដែលបានចាប់ខ្លួនតំណាងសហជីពម្នាក់យកទៅដាក់មន្ទីរឃុំឃាំងក្រោយពីបានបង្ហោះសារលើបណ្ដាញសង្គមហ្វេសប៊ុកលើការរំលោភច្បាប់ការងាររបស់ថៅកែរោងចក្រទៅលើក្រុមកម្មករ។
នៅក្នុងសេចក្ដីថ្លែងការណ៍រួមរបស់តំណាងសហជីពទាំង១១ នៅថ្ងៃទី៣ មេសា នេះ បានចាត់ទុកការចាប់ខ្លួនអ្នកស្រី សយ ស្រស់ ថា គឺជាសកម្មភាពគំរាមកំហែងធ្ងន់ធ្ងរ និងមានចេតនាបំបាក់ស្មារតី មកលើថ្នាក់ដឹកនាំ និងសកម្មជនសហជីពដទៃទៀតឱ្យបញ្ឈប់ការចូលរួមចលនាសហជីពដើម្បីការពារសិទ្ធិកម្មករតទៅទៀត។
ប្រធានសហភាពការងារកម្ពុជាលោក អាត់ ធន់ មានប្រសាសន៍ថា ការបញ្ឈប់តំណាងសហជីពនេះគឺជារឿងដែលលោកមិនអាចទទួលយកបានហើយទាមទារឱ្យសមត្ថកិច្ចគួរតែដោះលែងអ្នកស្រី សយ ស្រស់ ឱ្យមានសេរីភាពមកវិញ៖ «ក្នុងសំណុំរឿងនេះ ខ្ញុំគិតថា គួរតែរដ្ឋាភិបាលពិនិត្យឡើងវិញចំពោះការដាក់ឃុំរបស់តុលាការ ឬរបស់អាជ្ញាធរ របស់ក្រុមហ៊ុនចោទប្រកាន់នឹងដាក់ឃុំហ្នឹង។ ពីព្រោះខ្ញុំគិតថា វាអយុត្តិធម៌សម្រាប់គាត់ ហើយពេលនេះកម្មករ និងតំណាងសហជីពគឺកំពុងតែរកវិធីដើម្បីជួយកម្មករ ឬក៏ដើម្បីការពារនូវគំនិតរដ្ឋាភិបាលថា មិនឱ្យក្រុមហ៊ុនបញ្ឈប់ឬក៏បញ្ចប់កិច្ចសន្យាកម្មករ»។
អ្នកស្រី សយ ស្រស់ ប្រធានសហជីពកម្មករ និងជាតំណាងកម្មករនៅរោងចក្រផលិតកាបូប ស៊ូ ភៀល មានទីតាំងនៅភូមិត្រពាំងជៀក ឃុំត្រពាំងគង ស្រុកសំរោងទង ខេត្តកំពង់ស្ពឺ ត្រូវកម្លាំងសមត្ថកិច្ចនៃការិយាល័យសន្តិសុខផ្ទៃក្នុងនៃស្នងការនគរបាលខេត្តកំពង់ស្ពឺចាប់ខ្លួនកាលពីថ្ងៃទី២ ខែមេសា ក្នុងពេលដែលអ្នកស្រីកំពុងបំពេញការងារក្នុងរោងចក្រ។
មូលហេតុដែលនាំទៅរកការចាប់ខ្លួនអ្នកស្រីនេះ ដោយសារតែអ្នកស្រីបានបញ្ចេញសារនៅលើហ្វេសប៊ុករបស់អ្នកស្រីកាលពីថ្ងៃទី៣១ មីនា ដោយបានសរសេររិះគន់ថា «ថៅកែរោងចក្រ ស៊ូភៀល ផ្គើននឹងអនុសាសន៍របស់លោក ហ៊ុន សែន និងសេចក្តីអំពាវនាវរបស់ក្រសួងការងារ ព្រោះកុំថាឡើយកម្មករធម្មតា សូម្បីតែកម្មការិនីមានផ្ទៃពោះ៦ខែ ក៏ត្រូវក្រុមហ៊ុនបញ្ចប់កិច្ចសន្យាការងារដែរ»។
ខ្លឹមសារដែលអ្នកស្រី សយ ស្រស់ បានបង្ហោះចេញនេះត្រូវបានក្រុមហ៊ុនរោងចក្រ ស៊ូភៀល ចោទប្រកាន់ថា ជាការបរិហារកេរ្តិ៍ធ្វើឱ្យប៉ះពាល់ដល់កេរ្តិ៍ឈ្មោះរបស់ក្រុមហ៊ុន និងបំពុលព័ត៌មាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។