ពាក្យ​បណ្ដឹង​រឿង​ពុករលួយ​ក្នុង​ឆ្នាំ​២០១៥​ថយ​ចុះ

ដោយ អ៊ុំ រង្សី
2015-12-31
អ៊ីម៉ែល
មតិ
Share
បោះពុម្ព
ប្រជាពលរដ្ឋ​នាំ​គ្នា​លើក​បដា​តវ៉ា​នៅ​ខាង​មុខ​អង្គភាព​ប្រឆាំង​អំពើ​ពុករលួយ នៅ​ព្រឹក​ថ្ងៃ​ទី​២៩ ឧសភា ឆ្នាំ​២០១៤។
ប្រជាពលរដ្ឋ​នាំ​គ្នា​លើក​បដា​តវ៉ា​នៅ​ខាង​មុខ​អង្គភាព​ប្រឆាំង​អំពើ​ពុករលួយ នៅ​ព្រឹក​ថ្ងៃ​ទី​២៩ ឧសភា ឆ្នាំ​២០១៤។
RFA

អង្គភាព​ប្រឆាំង​អំពើ​ពុករលួយ (ACU) ឲ្យ​ដឹង​ថា ពាក្យ​បណ្ដឹង​រឿង​ពុករលួយ​ក្នុង​ឆ្នាំ​២០១៥ ថយ​ចុះ ២០% បើ​ធៀប​នឹង​ឆ្នាំ​២០១៤។ សង្គម​ស៊ីវិល​យល់​ថា ការ​ថយ​ចុះ​នេះ​អាច​បណ្ដាល​មក​កត្តា​ពីរ​គឺ​ភាព​យឺតយ៉ាវ​ឆ្លើយ​តប​របស់​អង្គភាព​ប្រឆាំង​អំពើ​ពុករលួយ​មក​កាន់​ប្រជាពលរដ្ឋ និង​យន្តការ​ដោះស្រាយ​តាម​ផ្លូវ​ច្បាប់​មិន​មាន​ប្រសិទ្ធភាព។

សង្គម​ស៊ីវិល​ដែល​ធ្វើការ​ពាក់ព័ន្ធ​នឹង​អភិបាលកិច្ច​យល់​ថា ការ​ថយ​ចុះ​ពាក្យ​បណ្ដឹង​ប្ដឹង​ជុំវិញ​រឿង​ពុករលួយ​របស់​ប្រជាពលរដ្ឋ មក​កាន់​អង្គភាព​ប្រឆាំង​អំពើ​ពុករលួយ​ជា​សញ្ញា​អវិជ្ជមាន​នៃ​ការ​អនុវត្ត​ការងារ​របស់​អង្គភាព​នេះ ពោល​គឺ​មិន​ទាន់​អាច​ឆ្លើយ​តប​ទៅ​នឹង​សេចក្ដី​ត្រូវ​ការ​របស់​ប្រជាពលរដ្ឋ​កម្ពុជា នៅ​ឡើយ។

ការ​លើក​ឡើង​របស់​សង្គម​ស៊ីវិល​នៅ​ពេល​នេះ ធ្វើ​ឡើង​បន្ទាប់​ពី​អង្គភាព​នេះ​ចេញ​សេចក្ដី​ជូន​ដំណឹង​ស្ដីពី​កិច្ច​ប្រជុំ​លើក​ទី​២ អាណត្តិ​ទី​២ នៃ​ក្រុមប្រឹក្សា​ជាតិ​ប្រឆាំង​អំពើ​ពុករលួយ នៅ​ថ្ងៃ​ទី​៣០ ខែ​ធ្នូ បង្ហាញ​ថា រយៈពេល ១​ឆ្នាំ គឺ​ឆ្នាំ​២០១៥ នេះ អង្គភាព​ប្រឆាំង​អំពើ​ពុករលួយ​ទទួល​បាន​ពាក្យ​ប្ដឹង​ចំនួន ៧២២​ករណី ដែល​ក្នុង​នោះ​មាន​បណ្ដឹង​អនាមិក​ចំនួន ៣៦០​ករណី ស្មើ​នឹង ៤៦​ភាគរយ។ អង្គភាព​នេះ​អះអាង​ថា ចំនួន​នេះ​មាន​ការ​ថយ​ចុះ​ជាង​មុន ២០​ភាគរយ បើ​ធៀប​នឹង​ឆ្នាំ​២០១៤។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ មាន​ប្រសាសន៍​ថា ការ​ថយ​ចុះ​ពាក្យ​ប្ដឹង​ជុំវិញ​រឿង​ពុករលួយ​ជា​សញ្ញា​មិន​ល្អ​មួយ ព្រោះ​វា​អាច​បង្ហាញ​ថា ប្រជាពលរដ្ឋ​មិន​ហ៊ាន​លាតត្រដាង​បញ្ហា​ពុករលួយ​ដើម្បី​ចូល​រួម​កែប្រែ​សង្គម​ឲ្យ​កាន់តែ​ប្រសើរ​ឡើង។

លោក សន ជ័យ បាន​ឲ្យ​ដឹង​ទៀត​ថា លោក​សង្កេត​ឃើញ​ថា អំពើ​ពុករលួយ​នៅ​កម្ពុជា មិន​បាន​ថយ​ចុះ​នោះ​ទេ។ ជាក់ស្ដែង​ដូច​ជា​រឿង​ទំនាស់​ដីធ្លី បញ្ហា​ធនធាន​ធម្មជាតិ និង​ការ​ដោះស្រាយ​សេវា​សាធារណៈ​ជូន​ពលរដ្ឋ​ជាដើម។ លោក​អះអាង​ថា មាន​កត្តា​ពីរ​ដែល​ជំរុញ​ឲ្យ​ថយ​ចុះ​ពាក្យ​បណ្ដឹង​ប្ដឹង​ជុំវិញ​រឿង​ពុករលួយ​របស់​ប្រជាពលរដ្ឋ គឺ​ទី​១ មក​ការ​យឺតយ៉ាវ​ឆ្លើយ​តប​របស់​អង្គភាព​ប្រឆាំង​អំពើ​ពុករលួយ​មក​កាន់​ប្រជាពលរដ្ឋ និង​កត្តា​ទី​២ មក​ពីរ​យន្តការ​ដោះស្រាយ​តាម​ផ្លូវ​ច្បាប់​មិន​មាន​ប្រសិទ្ធភាព៖ «ការ​ឆ្លើយ​តប​មួយ​ដែល​មិន​ទាន់​ពេលវេលា អា​ហ្នឹង​ក៏​វា​អាច​ប៉ះពាល់​មក​លើ​អារម្មណ៍ និង​ទំនុក​របស់​ប្រជាពលរដ្ឋ​មក​លើ​បញ្ហា​អំពើ​ពុក​រលួយ»

​លោក​ចង់​ឃើញ​អង្គភាព​នេះ ដុះ​ខាត​ពង្រឹង​ប្រព័ន្ធ​អភិបាលកិច្ច​ល្អ​ឲ្យ​មាន​ប្រសិទ្ធភាព​ជា​មុន​សិន​ទើប​អាច​ទប់ស្កាត់​បញ្ហា​ពុករលួយ​នៅ​កម្ពុជា បាន៖ «គួរ​តែ​មាន​វិធានការ ឬ​យន្តការ​ណា​មួយ​ឆ្លើយ​តប​ទៅ​កាន់​ប្រជាពលរដ្ឋ​ឲ្យ​បាន​លឿន​ជាង​មុន ពិសេស​ត្រូវ​ពង្រឹង​សមត្ថភាព​មន្ត្រី ឲ្យ​មាន​ការ​ឆ្លើយ​តប​ឲ្យ​បាន​ឆាប់​រហ័ស ដើម្បី​លើក​ទឹក​ចិត្ត​ដល់​ពលរដ្ឋ​ដែល​រង​ផល​ប៉ះពាល់​ដោយសារ​អំពើ​ពុក​រលួយ»

​ចំណែក​ឯ​ប្រធាន​អង្គការ​តម្លាភាព​កម្ពុជា លោក ព្រាប កុល មិន​អាច​សន្និដ្ឋាន​ច្បាស់​ពី​ការ​ថយ​ចុះ​ពាក្យ​បណ្ដឹង​ថយ​ចុះ​នេះ​នៅ​ឡើយ​ថា តើ​មក​ពី​បញ្ហា​ពុករលួយ​ថយ​ចុះ? ឬ​ពលរដ្ឋ​ឈប់​ដាក់​ពាក្យ​ប្ដឹង​នោះ​ឡើយ។ ប៉ុន្តែ​លោក ព្រាប កុល នៅ​តែ​ជំរុញ​ឲ្យ​អង្គភាព​នេះ ដោះស្រាយ​រាល់​ពាក្យ​ប្ដឹង​ឲ្យ​មាន​ប្រសិទ្ធភាព ពិសេស​ត្រូវ​មាន​ច្បាប់​ការពារ​អ្នក​រាយការណ៍​អំពើ​ពុករលួយ៖ «យើង​ត្រូវ​ការ​ច្បាប់​ការពារ​អ្នក​រាយការណ៍ ឬ​សាក្សី​ពី​អំពើ​ពុក​រលួយ ដើម្បី​ផ្តល់​ការ​ជឿជាក់ មាន​ជំនឿ​ចិត្ត​ជាង​មុន ក្នុង​ការ​សហការ​ជាមួយ​អង្គភាព​ប្រឆាំង​អំពើ​ពុក​រលួយ»

វិទ្យុ​អាស៊ីសេរី មិន​អាច​សុំ​ការ​បំភ្លឺ​បន្ថែម​ពី​ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង ជុំវិញ​ការ​អះអាង​ថា មាន​ចុះ​ពាក្យ​ប្ដឹង ២០% ក្នុង​ឆ្នាំ​២០១៥ ដោយសារ​មូលហេតុ​អ្វី​បាន​ឡើយ​នៅ​ថ្ងៃ​ទី​៣១ ខែ​ធ្នូ។ ប៉ុន្តែ​សេចក្ដី​ជូន​ដំណឹង​របស់​អង្គភាព​ប្រឆាំង​ពុករលួយ​ដដែល​បង្ហាញ​ថា ក្នុង​ចំណោម​ពាក្យ​ប្ដឹង​ទាំង ៧២២​ករណី នៅ​ក្នុង​ឆ្នាំ​២០១៥ នេះ អង្គភាព​ប្រឆាំង​អំពើ​ពុករលួយ​បាន​បើក​បន្ទប់​ស្ដាប់​ចម្លើយ​ចំនួន ១៧៥​លើក។ ក្រៅ​ពី​ជូន​ដំណឹង ពាក្យ​ប្ដឹង​ថយ​ចុះ​នេះ​ដែរ អង្គភាព​ប្រឆាំង​អំពើ​ពុករលួយ​ក៏​បាន​ឲ្យ​ដឹង​ពី​ការងារ​ប្រកាស​ទ្រព្យសម្បត្តិ និង​បំណុល តាម​របប ២​ឆ្នាំ បាន​ចំនួន​ជាង ២​ម៉ឺន​រូប (២១.៦៨៣​រូប) ទើប​នឹង​តែងតាំង​ថ្មី​ចំនួន ២០០​រូប និង​លា​ឈប់ (ចប់​អាណត្តិ) ចំនួន ២០០​រូប។

យ៉ាង​ណា​ក៏ដោយ សង្គម​ស៊ីវិល​ក៏​ស្នើ​ឲ្យ​រដ្ឋាភិបាល​កម្ពុជា កែទម្រង់​អំពើ​ពុករលួយ​ក្នុង​ប្រព័ន្ធ​តុលាការ​កម្ពុជា ដើម្បី​ឲ្យ​ពលរដ្ឋ​ឈប់​ភ័យ​ខ្លាច​ក្នុង​ការ​រាយការណ៍ ឬ​ដាក់​ពាក្យ​ប្ដឹង​ពី​បញ្ហា​ពុករលួយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

No doubt about it if they want corruption go down tear of some paper and corruption go down if they want no corruption burning all paper of corruption and no corruption Cambodia this year.

Dec 31, 2015 07:27 PM

គេហទំព័រ​ទាំងមូល