មន្ត្រី​សង្គម​ស៊ីវិល​ទាមទារ​ឱ្យ​អាជ្ញាធរ​ចាប់ខ្លួន​មេ​បញ្ជាការ​រង​កងទ័ព​ជើង​ទឹក​មក​ផ្ដន្ទាទោស

ដោយ ហេង រស្មី
2020-06-20
អ៊ីម៉ែល
មតិ
Share
បោះពុម្ព
ស្នងការ​នគរបាល​ខេត្ត​ព្រះសីហនុ លោក ជួន ណារិន្ទ ថ្លែង​ក្នុង​កិច្ច​ប្រជុំ​នា​ស្នងការដ្ឋាន​នគរបាល​ខេត្ត​ព្រះសីហនុ នៅ​ថ្ងៃ​ទី​៣០ ខែ​ឧសភា ឆ្នាំ​២០១៧។
ស្នងការ​នគរបាល​ខេត្ត​ព្រះសីហនុ លោក ជួន ណារិន្ទ ថ្លែង​ក្នុង​កិច្ច​ប្រជុំ​នា​ស្នងការដ្ឋាន​នគរបាល​ខេត្ត​ព្រះសីហនុ នៅ​ថ្ងៃ​ទី​៣០ ខែ​ឧសភា ឆ្នាំ​២០១៧។
Photo: RFA

អ្នក​សម្របសម្រួល​សមាគម​សិទ្ធិមនុស្ស​អាដហុក (Adhoc) ខេត្ត​ព្រះសីហនុ អ្នកស្រី ជៀប សុធា​រី​ស្នើ ឱ្យ​អាជ្ញាធរ​ចាប់ខ្លួន​មេ​បញ្ជាការ​រង​កងទ័ព​ជើង​ទឹក​មក​ផ្ដន្ទាទោស​តាមច្បាប់ ​ក្រោយពី​គេចខ្លួន​អស់​រយៈពេល​ជាង​មួយ​ខែ​មក​ហើយ បន្ទាប់ពី​បាន​មាន​ជម្លោះ​ប្រដាប់​អាវុធ​ជាមួយ​ជនជាតិ​ចិន។

អ្នកស្រី​បញ្ជាក់​ថា សមត្ថកិច្ច​មិន​មាន​ឆន្ទៈ​ក្នុង​ការ​ចាប់ខ្លួន​ជនសង្ស័យ​ទេ ដោយសារតែ​ជា​មន្ត្រី​មានអំណាច និង​មាន​បក្សពួក​ជា​ខ្នងបង្អែក​មន្ត្រី​ធំៗ​ក្នុង​ជួរ​រដ្ឋាភិបាល​។ អ្នកស្រី​និយាយ​ថា ការ​ពន្យាពេល​របស់​អាជ្ញាធរ​នេះ​បង្ហាញ​ថា កម្ពុជា​កំពុង​អនុវត្ត​ស្តង់ដារ​ពីរ ដែល​ធ្វើ​ឱ្យ​ប្រជាពលរដ្ឋ​រិះគន់​ថា តុលាការ​គ្មាន​នីតិរដ្ឋ​ពិតប្រាកដ​នោះ​ទេ។

តុលាការ​ខេត្ត​ព្រះសីហនុ​កាលពីដើម​ខែ​ឧសភា បាន​ចេញ​ដីកា​បង្គាប់​ឱ្យ​ចាប់ខ្លួន​មេបញ្ជាការ​រង​កងទ័ព​ជើង​ទឹក​គឺ​លោក ហាស់ សុភា ពី​បទ​សង្ស័យ​ថា បាន​ប្រើប្រាស់​អំពើ​ហិង្សា​ដោយមាន​ស្ថាន​ទម្ងន់​ទោស។ នៅ​ក្នុង​សំណុំរឿង​ឈ្លោះប្រកែក​គ្នា​ជាមួយ​ជន​ជាតិ​ចិន​រហូតដល់​មានការ​ផ្ទុះអាវុធ​នៅ​ក្នុង​កោះរ៉ុង។

ស្នងការ​ប៉ូលិស​ខេត្ត​ព្រះសីហនុ​លោក ជួន ណារិន្ទ បញ្ជាក់​ថា បើទោះបីជា​ករណី​ផ្ទុះ​អាវុធ​បាន​កើតមានឡើង​ជាង​មួយខែ​មក​ហើយ ក៏​លោក​បញ្ជាក់​ថា លោក​មិនទាន់​ទទួល​បាន​ដីកា​បង្គាប់​ឱ្យ​ចាប់ខ្លួន​ជនសង្ស័យ​នៅឡើយ​។ អាស៊ីសេរី​មិនទាន់​អាច​ទាក់ទង​លោក​ព្រះរាជអាជ្ញា​ខេត្ត​ព្រះសីហនុ​លោក សៀង សុខ បាន​ទេ កាល​ពី​ថ្ងៃ​ទី២០ មិថុនា ដោយសារតែ លោក​មិន​លើក​ទូរស័ព្ទ។

កាល​ពី​ថ្ងៃ​ទី១៤ ខែ​ឧសភា កន្លង​ទៅ​នេះ​ក្នុង​ភោជនីយដ្ឋាន​មួយ​នៅ​កោះរុង មានការ​ឈ្លោះប្រកែក​គ្នា​មួយ​រវាង​ជនជាតិ​ចិន និង​ជនជាតិ​ខ្មែរ​ដែល​ឈាន​រហូតដល់​ការ​ផ្ទុះអាវុធ​បាន​កើត​ឡើង។ ក្រោយពី​កើតហេតុ​ក្រុម​សមត្ថកិច្ច​បាន​ឃាត់ខ្លួន​ជនជាតិ​ចិន​ចំនួន​២៥​នាក់ និង​ជនជាតិ​ខ្មែរ​ចំនួន​៦​នាក់​។ ក្រោយពី​បាន​សាកសួរ​សមត្ថកិច្ច​ក៏​សម្រេច​ដោះលែង​ជនជាតិ​ខ្មែរ​ទាំង​៦​នាក់​នោះ ឱ្យ​មាន​សេរីភាព​វិញ​តែ​ក្នុងចំណោម​នោះ​មាន ២​នាក់​បាន​ដោះលែង​ឱ្យ​នៅ​ក្រៅ​ឃុំ តែ​ដាក់​ឱ្យ​ស្ថិត​នៅ​ក្រោម​ការ​ត្រួតពិនិត្យ​ពី​តុលាការ។

តុលាការ​ខេត្ត​ព្រះសីហនុ​បាន​សម្រេច​ឃុំខ្លួន​ជនជាតិ​ចិន​ចំនួន ១៦​នាក់ ក្រោយ​ពី​បាន​ប៉ះទង្គិច​គ្នា​ដោយ​អាវុធ​ជាមួយ​ពលរដ្ឋ​ខ្មែរ​តែ​ជម្លោះ​ប្រដាប់​អាវុធ​នោះ​មិន​មាន​មនុស្ស​ណា​ម្នាក់​រងរបួស​នោះ​ទេ​។​

ចំណែក​ជនជាតិ​ចិន​ទាំង​២៥​នាក់ មានតែ​១៦​នាក់​ប៉ុណ្ណោះ ជា​ជន​សង្ស័យ​ថា បាន​បង្ក​ឱ្យ​មាន​អំពើ​ហិង្សា​កើតឡើង ចំណែក​អ្នក​ផ្សេងទៀត​មិន​ជាប់​ពាក់ព័ន្ធ​ទេ។ ចំណែក​ឯ​មេបញ្ជាការ​រង​កងទ័ព​ជើង​ទឹក​គឺ​លោក ហាស់ សុភា បាន​គេច​ខ្លួន ដោយមាន​សេរីភាព​រហូត​មក​ដល់​ពេល​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល