ក្រុមកម្មករជិត ១ពាន់នាក់នៃរោងចក្រ ឃេនធឹរ៉េន អាផារ៉ែល (Canteran Apparel) បន្តធ្វើកូដកម្មដោយទាមទារឱ្យថៅកែម៉ាឡេស៊ីកាត់ចិន បើកប្រាក់ឈ្នួលរាល់ ២សប្ដាហ៍ម្ដង កុំឱ្យមានភាពយឺតយ៉ាវនៅពេលលើកក្រោយទៀត។
តំណាងកម្មករ លោកស្រី សាន់ សុផា ប្រាប់នៅអាស៊ីសេរីនៅថ្ងៃព្រហស្បតិ៍ ទី២៦ មីនា នេះ ថា ការតវ៉ារយៈពេល ៣ថ្ងៃ មកនេះ ភាគីក្រុមហ៊ុននៅតែប្រកាន់គោលជំហរដដែល ដោយបើកប្រាក់ឈ្នួលនៅសល់២៥%ទៀតឱ្យកម្មករនៅដើមខែក្រោយ ដោយមិនគោរពតាមច្បាប់ការងារនោះឡើយ។
លោកស្រីបន្តថា មកដល់ពេលនេះ គឺមិនឃើញមានវត្តមាន មន្ត្រីដោះស្រាយវិវាទនៃក្រសួងការងារ ចុះអន្តរាគមន៍និងសម្របសម្រួលរឿងនេះទៀតទេ។ លោកស្រី បញ្ជាក់ថា ក្រុមកម្មករ ចង់ឱ្យថៅកែចេញលិខិតស្នាមជាលាយលក្ខណ៍អក្សរមួយដោយកំណត់ពេលជាក់លាក់ ក្នុងការបើកប្រាក់ឈ្នួលឱ្យកម្មករតែប៉ុណ្ណោះ។
តំណាងកម្មកររូបនេះ ឱ្យដឹងថា កម្មករប្រមាណជាង៤០០នាក់ចូលធ្វើការងារ ដោយសារថៅកែដាក់គំរាមមិនបើកប្រាក់ឈ្នួលឱ្យពួកគេបើមិនព្រមចូលធ្វើការវិញ។ ចំណែកកម្មករជាង៤០០នាក់ដែលនៅតវ៉ាក៏បានបំបែកគ្នាទៅផ្ទះរៀងៗខ្លួន ព្រោះខ្លាចជំងឺឆ្លងកូវីដ១៩ ដែលកំពុងកើតឡើងក្នុងស្រុក។
ក្រុមកម្មករអះអាងថា ពួកគេនឹងប្រមូលផ្ដុំគ្នាតវ៉ាមុខរោងចក្រនៅថ្ងៃស្អែកបន្តទៀត រហូតដល់មានដំណោះស្រាយដែលអាចទទួលយកបាន។
ប្រធានសហភាពចលនាកម្មករកម្ពុជា លោក ប៉ាវ ស៊ីណា ស្នើឱ្យក្រសួងការងារចុះដោះស្រាយវិវាទការងារមួយនេះ ឱ្យបានម៉ឺងម៉ាត់និងមានវិធានការជាក់លាក់ជាមួយក្រុមហ៊ុនដើម្បីដោះស្រាយបញ្ហាលំបាករបស់កម្មករ ដែលកំពុងប្រឈមនិងការខ្វះខាតថវិកា សម្រាប់ប្រើប្រាស់លើការចំណាយផ្សេងៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។