មន្ទីរប្រឆាំងបទល្មើសគ្រឿងញៀនបានបញ្ជូនជនជាតិចិនម្នាក់ទៅកាន់តុលាការក្រុងភ្នំពេញនៅព្រឹកថ្ងៃទី២៤ខែកុម្ភ: បន្ទាប់ពីបានសង្ស័យថាបានជួញដូរគ្រឿងញៀន។
អគ្គលេខាធិការនៃអគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀនលោក មាស វីរឹទ្ធ ប្រាប់អាស៊ីសេរីថា ជនសង្ស័យនេះ បានបញ្ជូនទៅឃុំខ្លួននៅពន្ធនាគារព្រៃស។
លោកថា ជនសង្ស័យដដែលនេះ ត្រូវបានចោទប្រកាន់ពីបទជួញដូរ និងរក្សាទុកគ្រឿងញៀនតាមមាត្រា៤០-៤១ នៃច្បាប់ប្រឆាំងគ្រឿងញៀន។
ជនជាតិចិនម្នាក់នេះត្រូវបានឃាត់ខ្លួនកាលពីថ្ងៃទី២១ខែកុម្ភ: នៅមុខសណ្ឋាគារមួយក្នុងសង្កាត់បឹងកេងកង២ ទីក្រុងភ្នំពេញ បន្ទាប់ពីបានឆែកឃើញសារធាតុញៀនប្រភេទមេតំហ្វេតាមីនប្រមាណជិត១គីឡូក្រាម (៩៩៤.១០ក្រាម)។
លោកបញ្ជាក់ថាភ្នាក់ងារនគរបាលយុត្តិធម៌ នៃមន្ទីរប្រឆាំងបទល្មើសគ្រឿងញៀនកំពុងបន្តការស្រាវជ្រាវដើម្បីរកបណ្តាញមេខ្លោងដែលមានទំនាក់ទំនងជាមួយនឹងជនល្មើស៕