ហ្វេសប៊ុក​នឹង​ជូនដំណឹង​ឱ្យ​​អ្នក​ប្រើប្រាស់​​ប្ដូរ​ពាក្យ​សម្ងាត់ ខណៈ​ពាក្យ​សម្ងាត់​ជាច្រើន​គ្មាន​សុវត្ថិភាព

ដោយ សន ចាន់រដ្ឋា
2019-03-23
អ៊ីម៉ែល
មតិ
Share
បោះពុម្ព
ឡូហ្គោ​កម្មវិធី Facebook Page Manager នៅក្នុងទូរស័ព្ទដៃ។
ឡូហ្គោ​កម្មវិធី Facebook Page Manager នៅក្នុងទូរស័ព្ទដៃ។
Photo: RFA

ក្រុមហ៊ុន​បណ្ដាញ​សង្គម​ហ្វេសប៊ុក (Facebook) នឹង​ជូនដំណឹង​ដល់​អ្នកប្រើប្រាស់​កម្មវិធី Facebook និង Instagram រាប់​លាន​នាក់ ឱ្យ​ផ្លាស់ប្ដូរ​ពាក្យ​សម្ងាត់​របស់​ខ្លួន​ចេញ បន្ទាប់ពី​ក្រុមហ៊ុន​នេះ​បាន​រក​ឃើញ​ថា ពាក្យ​សម្ងាត់​របស់​អ្នកប្រើប្រាស់​ទាំងនោះ​បាន​បែក​ធ្លាយ​នៅ​ក្នុង​ផ្ទៃ​ក្នុង​របស់​ក្រុមហ៊ុន។

សេចក្ដី​ប្រកាស​ព័ត៌មាន​របស់​ក្រុមហ៊ុន​ហ្វេសប៊ុក​បាន​ចេញផ្សាយ​កាលពី​ថ្ងៃទី២១ ខែ​មីនា ឱ្យ​ដឹង​ថា ជាទូទៅ ពាក្យ​សម្ងាត់​របស់​អ្នកប្រើប្រាស់​ត្រូវ​បាន​បិទបាំង​មិន​ឱ្យ​អ្នកណាម្នាក់​អាច​មើល​យល់ ប៉ុន្តែ​ក្នុង​ពេល​ពិនិត្យ​ផ្នែក​សុវត្ថិភាព​កាលពី​ខែ​មករា ក្រុមហ៊ុន​ហ្វេសប៊ុក​បាន​រក​ឃើញ​ថា ពាក្យ​សម្ងាត់​របស់​អ្នកប្រើប្រាស់​រាប់​លាន​នាក់ បាន​បង្ហាញ​ចេញ​មក​នៅ​ក្នុង​ទម្រង់​ឯកសារ​ដែល​គេ​អាច​មើល​យល់ និង​រក្សាទុក​នៅ​ក្នុង​ម៉ាស៊ីន​ផ្ទុក​ឯកសារ​របស់​ក្រុមហ៊ុន។

ក្រុមហ៊ុន​ហ្វេសប៊ុក​បាន បន្ថែម​ទៀត​ថា ខ្លួន​បាន​ដោះស្រាយ​បញ្ហា​ទាំងនេះ​រួចរាល់​ហើយ។ ទោះ​យ៉ាងណា​ក្រុមហ៊ុន​ហ្វេសប៊ុក​នឹង​ធ្វើ​ការ​ជូន​ដំណឹង​ទៅ​អ្នកប្រើប្រាស់ Facebook Lite ប្រមាណ​រាប់​រយ​លាន​នាក់ អ្នកប្រើប្រាស់ Facebook ប្រមាណ​ដប់​លាន​នាក់ និង​អ្នកប្រើប្រាស់ Instagram ប្រមាណ ១​ម៉ឺន​នាក់​ផង​ដែរ។

ក្រុមហ៊ុន​ហ្វេសប៊ុក​ផ្ដល់​អនុសាសន៍​ដល់​អ្នក​ប្រើប្រាស់​ដែល​នឹង​ប្ដូរ​ពាក្យ​សម្ងាត់​ថ្មី​ឱ្យ​ជ្រើសរើស​ពាក្យ​សម្ងាត់​ដែល​មាន​ភាព​ស្មុគស្មាញ និង​រឹងមាំ គ្រប់​គណនី​ដែល​អ្នកមាន។ អ្នកប្រើប្រាស់​អាច​ប្រើ​កម្មវិធី​គ្រប់គ្រង​ពាក្យ​សម្ងាត់ ដើម្បី​ជួយ​បង្កើត​ពាក្យ​សម្ងាត់​ដែល​ស្មុគស្មាញ​និង​រឹងមាំ​ទាំងនេះ។

បន្ថែម​ពីលើ​នេះ​អ្នកប្រើប្រាស់​អាច​បើក​ដំណើរការ​នូវ​មុខងារ Security Key ឬ​សោរ​សុវត្ថិភាព និង​បើក​មុខងារ Two-Factor Authentication ឬ​ការ​ផ្ទៀងផ្ទាត់​ពី​កត្តា ដើម្បី​ការពារ​គណនី​ហ្វេសប៊ុក​របស់​លោក​អ្នក តាមរយៈ​ការប្រើប្រាស់​លេខ​កូដ​ជំនួស​ឱ្យ​ពាក្យ​សម្ងាត់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល