សប្បុរសជនខ្មែរនៅបារាំងផ្ដល់អំណោយដល់ពលរដ្ឋរងការបណ្ដេញចេញពីលំនៅឋាន
2014.02.28
សកម្មភាពពលរដ្ឋដែលរងការបណ្ដេញចេញពីលំនៅឋាន និងអ្នករងគ្រោះនៅពេលកងកម្លាំងរដ្ឋាភិបាលបង្ក្រាបការតវ៉ារបស់កម្មករ ចូលរួមទទួលអំណោយពីសប្បុរសជនមកពីប្រទេសបារាំង នាវត្តសាមគ្គីរង្សី រាជធានីភ្នំពេញ នៅថ្ងៃទី២៨ ខែកុម្ភៈ ឆ្នាំ២០១៤។
សប្បុរសជនខ្មែរនៅប្រទេសបារាំង សហការជាមួយគណបក្សសង្គ្រោះជាតិ និងព្រះសង្ឃ ចែកអំណោយជាអង្ករ និងថវិកាដល់ពលរដ្ឋរងគ្រោះដោយការបណ្ដេញចេញពីលំនៅឋាន និងអ្នករងគ្រោះនៅពេលកងកម្លាំងរដ្ឋាភិបាល បង្ក្រាបការតវ៉ារបស់កម្មករ កាលពីដើមខែមករា ឆ្នាំ២០១៤។
អង្ករជាង ៣តោន និងថវិកាច្រើនពាន់ដុល្លារ ត្រូវបាន អ្នកស្រី អានីតា រស់នៅប្រទេសបារាំង យកទៅជួយឧបត្ថម្ភដល់អ្នករងគ្រោះ ក្រោមអំពើហិង្សានៃការបណ្ដេញចេញពីផ្ទះ និងគ្រួសាររងនូវការបង្ក្រាបបាតុកម្ម របួស ស្លាប់ និងជាប់ពន្ធនាគារ។
អ្នកស្រី អានីតា ថ្លែងនៅព្រឹកថ្ងៃទី២៨ ខែកុម្ភៈ ឆ្នាំ២០១៤ នៅបរិវេណវត្តសាមគ្គីរង្សី ថា អ្នកប្រើអាវុធមកលើជនស៊ីវិល ដែលទាមទារឲ្យមានការរស់នៅសមរម្យនេះ ធ្វើឲ្យខ្មែរនៅក្រៅប្រទេសរន្ធត់ខ្លាំង ក្រោយពីមានការផ្សាយទាំងសំឡេង និងរូបភាព ត្រូវបានលាតត្រដាងកន្លងមកនោះ។
អ្នកស្រីថា អ្នកស្រឡាញ់ខ្មែរនៅក្រៅប្រទេស ពិសេសអ្នករស់នៅទីក្រុងប៉ារីស បានផ្តល់ថវិកាតាមរយៈអ្នកស្រី ដើម្បីយកមកទិញអង្ករ ១៦០បាវ ក្នុង ១បាវទម្ងន់ ២០គីឡូក្រាម ចែកដល់គ្រួសារដែលអាជ្ញាធរចម្រុះបណ្ដេញមនុស្សចេញពីអគារបុរីកីឡា និងថវិកាច្រើនពាន់ដុល្លារទៀត ចែកដល់គ្រួសារអ្នកជាប់ពន្ធនាគារ ២៣នាក់ អ្នករបួស ៣០នាក់ អ្នកស្លាប់ ៥នាក់ និងអ្នកបឹងកក់ មួយចំនួន៖ «លោកប៉ូលិសទាហាន លោកសន្តិសុខពួកលោកសុទ្ធតែស្បែកខ្មៅៗ គឺជាខ្មែរ មុននឹងលោកវាយកូនគេ ប្រពន្ធគេ ម្តាយគេ លោកយកដៃក្តិចសាច់របស់លោក តើឈឺឬអត់?»។
លោក ប៊ុត នឿន រងរបួសដោយគ្រាប់កាំភ្លើងបាញ់ត្រូវកជើង ឲ្យដឹងថា ក្រោយពីរបួស គាត់មិនអាចធ្វើការ ២ខែមកហើយ គឺបង់ខាតប្រាក់ចំណូលជាង ២០០ដុល្លារ។ លោកថា ពេលសម្រាកនៅមន្ទីរពេទ្យរហូតចេញពីពេទ្យ មិនដែលបានទទួលអំណោយ ឬការសួរសុខទុក្ខពីសំណាក់មន្រ្តីរាជរដ្ឋាភិបាល ពីកាកបាទក្រហម ពីព្រះមហាក្សត្រទេ ទោះបីគ្រប់គ្នាដឹងថា អ្នករបួស និងអ្នកស្លាប់ ក្នុងនោះមានអ្នកខ្លះមិនមែនបាតុករក៏ដោយ។ លោកថា ទោះជាយ៉ាងណា គាត់ទទួលបានជំនួយទាំងសម្ភារៈ និងថវិកាពីសប្បុរសជនក្នុង និងក្រៅប្រទេសទៅវិញ៖ «សុខភាពខ្ញុំរាងគ្រាន់បើ តែគ្រាន់ថាដើរអត់បានឆ្ងាយ ត្រឹម ៥០ម៉ែត្រអី វានៅឈឺជើងវាប្រេះឆ្អឹង»។
ជាងដែករោងចក្រ ជីនវីន ឈ្មោះ សូ ណា អាយុ ២៧ឆ្នាំ ឲ្យដឹងថា គាត់របួសនៅផ្លូវវ៉េងស្រេង កាលពីថ្ងៃទី៣ ខែមករា គឺទាហានបាញ់ត្រូវពោះ ធ្វើឲ្យដាច់ពោះវៀន ៤កំណាត់។ លោកថា គាត់មិនមែនកម្មករទេ គាត់ជាជាងដែកក្នុងរោងចក្រនោះ ប្រាក់ខែគាត់ក្នុង១ខែជិត ២០០ដុល្លារ។ ឥឡូវគាត់របួសបាត់បង់ការងារ ២ខែ និងគ្មានប្រាក់ខែច្រើនខែទៀត ទម្រាំពោះវៀនជា នឹងចូលធ្វើការ មិនដឹងពេលណាទេ៖ «របួសវាសះខាងក្រៅ តែខាងក្នុងវានៅមិនទាន់ស្រួល ត្រូវការវះកាត់ម្តងទៀត»។
លោក យូ សារិន ជាឪពុក លោក ជា សារ៉ាត់ កំពុងនៅពន្ធនាគារត្រពាំងផ្លុង ឬ ម៣ ខេត្តកំពង់ចាម ថ្លែងថា កូនគាត់រត់ម៉ូតូកង់បី នៅផ្លូវវ៉េងស្រេង ស្រាប់តែក្រុមស្លៀកពាក់ស៊ីវិលមកភ្ជង់ចាប់កូនគាត់ ហើយវាយដំចាប់ដាក់គុកចោទថាជាកម្មករ ដែលទាមទារដំឡើងប្រាក់ខែដល់ ១៦០ដុល្លារ។ លោកថា គាត់ជាថ្នាក់ដឹកនាំភូមិនៅខេត្តកណ្ដាល លោកឈប់បម្រើគណបក្សកាន់អំណាចហើយ បើកូនគាត់មិនត្រូវបានគេដោះលែងពីគុកទេនោះ៖ «បើសិនណាខ្ញុំចេញពីគណបក្សប្រជាជន គឺ ១០០អស់ហើយ លែងជឿហើយ»។
លោកស្រី ហេង សុឃុន ត្រូវជាបងរបស់ លោក ហេង រដ្ឋា ដែលកំពុងជាប់ឃុំនៅគុកត្រពាំងផ្លុង បានឲ្យដឹងថា រូបដែលបង្ហោះតាមហ្វេសប៊ុក (Facebook) មានក្រុមស្លៀកពាក់ខោអាវទាហាន វាយដំយុវជនម្នាក់លើផ្ទះថ្មនោះ គឺរូបប្អូនគាត់ឈ្មោះ ហេង រដ្ឋា ហើយ៖ «ប្អូនខ្ញុំហ្នឹង គេវ៉ៃត្រូវក្បាលភ្នែក និងបាក់ខ្ទង់ច្រមុះ»។
ជនពិការភ្នែកម្ខាង ដែលត្រូវបណ្ដេញពីបុរីកីឡា កញ្ញា ខៀវ ឡៃ ឲ្យដឹងថា គាត់បានទទួលអង្ករ ១បាវ ទម្ងន់ ២០គីឡូ លុយ ៤ម៉ឺនរៀល។ កញ្ញាបន្តថា គាត់ទទួលបានការឧបត្ថម្ភញឹកញាប់ពីសប្បុរសជន និងពីគណបក្សសង្គ្រោះជាតិ។ ក្រោយការបណ្ដេញចេញពីបុរីកីឡា រដ្ឋាភិបាល និងក្រុមហ៊ុន ផានអ៊ីម៉ិច បោះបង់ពួកគាត់ ឲ្យរស់នៅកណ្ដាលវាលគ្មានទឹកគ្មានភ្លើងនៅភ្នំបាត។
ក្នុងពិធីចែកអង្ករ និងថវិកាជំនួយពីប្រទេសបារាំង នៅវត្តសាមគ្គីរង្សី នាថ្ងៃទី២៨ ខែកុម្ភៈ មានវត្តមានតំណាងរាស្ត្រជាប់ឆ្នោតគណបក្សសង្គ្រោះជាតិ ព្រះសង្ឃ លួន សាវ៉ាត និងព្រះសង្ឃក្នុងវត្តសាមគ្គីរង្សី រួមទាំងពុទ្ធបរិស័ទប្រមាណ ៣០០នាក់ និងអង្គ ដែលឃ្លាំមើលពីសមត្ថកិច្ចដែលស្លៀកពាក់ស៊ីវិល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
