សមត្ថកិច្ចថៃឃាត់ខ្លួនជនសង្ស័យបាន២នាក់ សាកសួរអំពីការដាក់បំផ្ទុះគ្រាប់បែកនៅទីក្រុងបាងកកនៅព្រឹកថ្ងៃទី២ សីហា។ ប៉ុន្តែអ្នកទាំង២ ថ្លែងថាពួកគេមិនបានដាក់បំផ្ទុះគ្រាប់បែកដូចចោទប្រកាន់នោះទេ។
នាយករដ្ឋមន្ត្រីថៃលោក ប្រាយុទ្ធ ចាន់អូចា (Prayut Chan-o-cha) ធ្វើសន្និសីទកាសែតនៅរសៀលថ្ងៃទី២ សីហាថា ជនល្មើសបំផ្ទុះគ្រាប់បែកចំនួន ៩ដង នៅ៥ទីតាំងខុសគ្នានៅក្រុងបាងកក ប៉ុន្តែមិនបណ្ដាលឱ្យគ្រោះដល់អាយុជីវិតមនុស្សនោះទេ។ លោកបន្តថា សមត្ថកិច្ចមានភស្តុតាងគ្រប់គ្រាន់ដើម្បីដាក់បន្ទុកលើជនសង្ស័យទាំងនោះ ដើម្បីឱ្យពួកគេទទួលទោសតាមច្បាប់បាន។ ចំណែកទីតាំងបំផ្ទុះគ្រាប់បែកទាំងនោះរួមមាន មជ្ឈមណ្ឌលរាជការចែងវឌ្ឍនៈ ទី២ នៅក្រោមស្ថានីយរថភ្លើងអាកាសឆុងនុនស៊ី (Chungnonsi) ទី៣ នៅផ្លូវព្រះរ៉ាមទី៩ នៅច្រកចូលផ្លូវលេខ៥៧ បណ្ដាលឱ្យមនុស្ស ៣នាក់រងរបួលស្រាល។ ទីតាំងទី៤ នៅបរិវេណស្រះទឹកមុខទីបញ្ជាការកងទ័ពថៃ និង ទី៥ បំផ្ទុះគ្រាប់បែក នៅមុខទីស្ដីការអគ្គនាយកដ្ឋានក្រសួងការពារជាតិ។
ក្រៅពីនោះជនល្មើសយកស្បោងគ្រាប់បែកផ្លុងចោលនៅស្ថានីយរថភ្លើងលើអាកាស សាលាដែង(Saladaeng) ស្ថានីយរថភ្លើងលើអាកាស ហួម៉ាក (Haumark) និងនៅកំពង់ដ យ៉តវិមាន (Viman) នៅមាត់ទន្លេចៅផាក់យ៉ា (Chao praya) និងដុតឆេះផ្សារប្រ៉ាក់ទូណាម (Phraktounam) ជាតំបន់ពាណិជ្ជកម្មក្នុងទីក្រងបាងកក បណ្ដាលឱ្យពលរដ្ឋខ្មែរ ជាពិសេសអ្នកទៅព្យាបាលជំងឺស្នាក់នៅក្នុងផ្ទះសំណាក់ ឌី.ឌី.ហៅ (DD House) ប្រមាណ ១ពាន់នាក់ នាំគ្នារត់ចេញពីបន្ទប់ផ្ទះសំណាក់ទាំងព្រលឹមស្រាងៗ។ ក្រៅពីនេះនៅទីក្រុងបាងកកក៏មានពលករខ្មែរស្នាក់នៅធ្វើការរាប់ម៉ឺននាក់ដែរ។
សមត្ថកិច្ចថៃសន្និដ្ឋានថា ការបំផ្ទុះគ្រាប់បែកនេះ ជនល្មើសធ្វើឡើងក្នុងបំណងបង្កើតឱ្យមានចលាចលនៅក្នុងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។