ក្រុម​អតិថិជន​បុរី​ពិភពថ្មី​ដាក់ពាក្យ​ប្ដឹង ទៅ​ស្នងការ​ករណី​តៃកុង​ឡាន​បុរី​បើក​បុក​ពួកគាត់

ដោយ ជីវិតា
2024.04.08
ក្រុម​អតិថិជន​បុរី​ពិភពថ្មី​ដាក់ពាក្យ​ប្ដឹង ទៅ​ស្នងការ​ករណី​តៃកុង​ឡាន​បុរី​បើក​បុក​ពួកគាត់ អតិថិជនបុរីពិភពថ្មីតវ៉ានៅមុខក្រុមហ៊ុន​សាខា​ខណ្ឌ​កំបូល រាជធានីភ្នំពេញ កាលពីថ្ងៃទិ១៥ មីនា ២០២៤។
រូប​៖ ពលរដ្ឋ​ផ្តល់ឱ្យ

ក្រុម​អតិថិជន​បុរី​ពិភព ថ្មី​នាំគ្នា​ដាក់ពាក្យ​ប្ដឹង ទៅ​ស្នងការ​នគរបាល​រាជធានី​ភ្នំពេញ​ពាក់ព័ន្ធ​ករណី​អ្នក បើក​ឡាន​ឱ្យ​ក្រុមហ៊ុន​បុរី​ពិភពថ្មី​មាន​ចេតនា​បើក​បុក​ពួកគាត់​ដែល​កំពុង​តវ៉ា​នៅ ខាងមុខ​ក្រុមហ៊ុន​បុរី​ពិភពថ្មី​សាខា​កួរស្រូវ​២​។ ការ​ដាក់​ពាក្យ​ប្ដឹង​នេះ​គឺ​ដោយសារ​ក្រុមហ៊ុន​បុរី​ពិភព​ថ្មី​ការពារ​ជន​បង្ក​ដែល​បើកឡាន​បុក​អតិថិជន និង​អាជ្ញាធរ​ខណ្ឌដង្កោ​នៅតែ​គ្មាន​ចំណាត់​លើ​ជន​បង្ក។

ក្រុម​អតិថិជន​បុរី​ពិភព​ថ្មី​នៅក្នុង​ខណ្ឌដង្កោ និង​ខណ្ឌ​កំបូល​ប្រមាណ​៧០ នាក់ នៅ​ថ្ងៃទី​០៧ ខែមេសា ជួបជុំគ្នា​នៅខាង​មុខ​ស្នងការ​នគរបាល​រាជធានី​ភ្នំពេញ​ដើម្បី​ដាក់ពាក្យ​បណ្ដឹង​ប្រឆាំង​អ្នក​បើក​ឡាន​ដឹក​ទឹក​ឱ្យ​ក្រុមហ៊ុន​បុរី​ពិភព​ថ្មី​ដែល​ពួកគាត់​អះអាង​ថា​មាន​ចេតនា​បើកឡាន​បុក​ពលរដ្ឋ។

ពួកគាត់​បាន​នាំគ្នា​ឈរ​នៅ​ខាងមុខ​ស្នងការ​នគរបាល​រាជធានី​ភ្នំពេញ​ដើម្បី​រង់ចាំ​ស្ដាប់​លទ្ធផល និង​ការ​ស៊ើបសួរ​ជន​បង្ក ដោយសារ​ពួកគាត់​មិន​ទុកចិត្ត​លើ​អាជ្ញាធរ​ពីព្រោះ​កាលពី​យប់​ថ្ងៃទី​៦ មេសា អាជ្ញាធរ​ខណ្ឌដង្កោ​មិន​អើពើ​ជាមួយ​ពលរដ្ឋ​បើ​ទោះបី​ជា​ពួកគាត់​មាន​ភស្តុតាង​ដាក់បន្ទុក​លើ​ជន​បង្ក​យ៉ាងណាក៏ដោយ។

អតិថិជន​បុរី​ពិភព​ថ្មី​សាខា​កួរស្រូវ​២ លោកស្រី កៅ សុធារី ប្រាប់​វិទ្យុ​អាស៊ីសេរី នៅ​ថ្ងៃទី៧ មេសា ថា លោកស្រី​មក​ដាក់​ពាក្យបណ្ដឹង​នេះ​គឺ​ដោយសារ​លោកស្រី​ហួស​ចិត្តនឹង​ម្ចាស់​បុរី​ពិភព​ថ្មី​មិន​ដោះស្រាយ​បញ្ហា​ឱ្យ​ពួកគាត់​ហើយ បែរជា​ឱ្យ​តៃកុង​ឡាន​បើកឡាន​ទឹក​បុក​ពួកគាត់​ថែម​ទៀត។

លោកស្រី កៅ សុធារី៖ «និយាយ​ទៅ​ខ្ញុំ​មើលរូប​ភាព​ហ្នឹង​ខ្ញុំ​មាន​អារម្មណ៍​ថា ខាង​ក្រុមហ៊ុន​គឺ​ព្រៃផ្សៃ​ហ្មង​បុក​អតិថិជន​ខ្លួនឯង​ទាំង​បំពាន​ហ្មង។ និយាយ​ទៅ​បំពាន​ធម្មតា​គ្មាន​អ្នក​ជនរងគ្រោះ​ណា​គេ​មក​សុខៗ​គេ​មក​រក​រឿង​អ៊ីចឹង​ទេ វា​មាន​ហេតុ​ទើប​វា​មាន​ផល»

កាលពី​ថ្ងៃទី​៦ ខែ​មេសា អតិថិជន​បុរី​ពិភព​ថ្មី​នៅ​ខណ្ឌ​ដង្កោ​ចំនួន ២០​នាក់​នាំគ្នា​តវ៉ា​នៅ​ខាង​ក្រុមហ៊ុន​បុរី​ពិភពថ្មី​សាខា​កួរស្រូវ​២ ជំរុញ​ឱ្យ​ថៅកែ​ជួសជុល​ទ្វារផ្ទះ និង​ផ្ទះ​ដែល​ម្ចាស់​បុរី​បាន​ស្វាន​ដែក​បិទទ្វារ​នោះ​ឱ្យ​ពួកគាត់​វិញ​។ បន្ទាប់​ពី​គ្មាន​ដោះស្រាយ​ពួកគាត់​ក៏​ផ្ទុះ​កំហឹង​នាំគ្នា​ដុត​កង់ឡាន​នៅ​ខាងមុខ​ក្រុមហ៊ុន​បង្ក​ឱ្យ​មាន​ជម្លោះ​ជាមួយ​ក្រុម​សន្តិសុខ​របស់​ក្រុមហ៊ុន​។ ក្រោយ​ពួកគាត់​នាំគ្នា​ដុត​កង់ឡាន​ភាគី​ខាង​បុរី​ក៏​ឱ្យ​ឡានទឹក​មក​ពន្លត់ភ្លើង និង​បើក​ហួស​ទៅ​បុក​ពលរដ្ឋ​ដែល​កំពុង​ឈរ​តវ៉ា ប៉ុន្តែ​មិន​រង​របួស​ធ្ងន់ធ្ងរ​ឡើយ។

អតិថិជន​បុរី​ពិភព​ថ្មី​នៅ​ខណ្ឌ​កំបូល លោក ហេង ដារ៉ា ថ្លែង​ថា លោក​សោកស្ដាយ​ដែល​អាជ្ញាធរ​មិន​អើពើ​ពី​ទុក្ខ​លំបាក​របស់​ពលរដ្ឋ​ដោយ​បណ្ដោយ​ឱ្យ​ម្ចាស់​បុរី​ធ្វើ​អ្វី​តាមតែ​អំពើ​ចិត្ត។

លោក ហេង ដារ៉ា៖ «ជូន​ទៅ​ថ្នាក់ដឹកនាំ​សូម​លោក​ជួយ​អន្តរាគមន៍​លើ​កិច្ច​ការងារ​នេះ​ប្រជាពលរដ្ឋ តែ​ទឹកប្រាក់​របស់​លោក​ដែល​គាត់​ជា​ញើស​ជា​ឈាម​របស់​លោក​ដែល​បុរី​បំពាន​កិច្ចសន្យា​គោលការណ៍​ដែល​គាត់​សន្យា​ជាមួយ​ប្រជាពលរដ្ឋ​ដែល​គាត់​ទិញ​ចូល​៥០​ភាគរយ​ហើយ​មួយទៀត​គាត់​បំពាន​ចំណាត់ការ​ដោះស្រាយ​របស់​ក្រសួង​ដែនដី»

វិទ្យុ​អាស៊ីសេរី​មិនអាច​ទាក់ទង​តំណាង​ក្រុមហ៊ុន​បុរី​ពិភព​ថ្មី​សាខា​កួរស្រូវ​២ និង​ស្នងការ​នគរបាល​រាជធានី​ភ្នំពេញ លោក ជួន ណា​រិន្ទ ដើម្បី​សុំ​ការ​ស្រាយ​បំភ្លឺ​ជុំវិញ​បញ្ហា​នេះ​បានទេ​នៅ​ថ្ងៃទី​០៧ ខែ​មេសា។

ជុំវិញ​បញ្ហា​នេះ​ប្រធាន​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា មាន​ប្រសាសន៍​ថា ប្រសិនបើ​អាជ្ញាធរ​នៅតែ​គ្មាន​កិច្ច​អន្តរាគមន៍​ដោះស្រាយ​បញ្ហា​ឱ្យ​អតិថិជន​បុរី​ពិភព​ថ្មី​ទេ នោះ​បញ្ហា​នេះ​នឹង​កាន់​រីកធំឡើង​ដែល​បង្ក​ឱ្យ​មាន​វិបត្តិ​សង្គម។

លោក នី សុខា៖ «អាជ្ញាធរ​គួរតែ​ចូលខ្លួន​ដើម្បី​ទទួល​យក​ករណី​ទាំងអស់​ហ្នឹង​ទៅ​ដោះស្រាយ និង​ឈរ​ទៅលើ​គោលការណ៍​ច្បាប់ និង​ឈរ​ទៅលើ​គោលការណ៍​ឈ្នះៗ​ទាំងសងខាង​ដើម្បី​ឱ្យ​មាន​ការ​ទទួលខុសត្រូវ​ទាំងសងខាង​ជាជាង​កុំ​ឱ្យ​មាន​ព្រឹត្តិការណ៍​ឬក៏​អ្វីមួយ​កើតឡើង​បន្ត​ទៅមុខ​ទៀត​គឺ​ថា អាជ្ញាធរ​ត្រូវតែ​ដោះស្រាយ​បញ្ហា​ហ្នឹង​ឱ្យ​បាន​ឆាប់ និង​ឱ្យ​មាន​ប្រសិទ្ធភាព​ដោយ​ឈរ​លើ​គោលការណ៍​ច្បាប់ និង​ឈរ​លើ​ភាគី​ទាំងសងខាង»

អតិថិជន​បុរី​ពិភព​ថ្មី​អះអាង​ថា បញ្ហា​របស់​ពួកគាត់​កំពុង​ស្ថិត​នៅក្នុង​ការ​ដោះស្រាយ​ជា​ស្ថាប័ន​ពាក់ព័ន្ធ​ជាពិសេស​ក្រសួង​ដែនដី​ប៉ុន្តែ​ក្រុមហ៊ុន​បុរី​ពិភព​ថ្មី នៅតែ​បន្ត​រឹបអូស​ផ្ទះ​ពី​អតិថិជន ដែល​អស់​លទ្ធភាព​បង់​បន្ត​ទៅ​ឱ្យ​ក្រុមហ៊ុន​ក្នុង​នោះ មានផ្ទះ​របស់​អតិថិជន​មួយចំនួន ត្រូវ​បាន​ក្រុមហ៊ុន​ផ្សារ​ដែក​បិត ឬ​ចាក់សោ​ពី​ខាងក្រៅ និង​ដាក់​ស្លា​កថា ផ្ទះ​របស់​ក្រុមហ៊ុន​អនុវត្ត​តាម​កិច្ចសន្យា​។ វិធាន​នេះ បាន​ធ្វើ​ឱ្យ​អតិថិជន​មួយចំនួន ដែល​ម្ចាស់​បុរី​ពិភព​ថ្មី​រឹបអូស​ផ្ទះ ធ្លាក់ខ្លួន​ក្រីក្រ បាត់បង់​ទីជម្រក និង​ជំពាក់​បំណុល​ធនាគារ​។ ទោះជា​យ៉ាងណា​ពួកគាត់​នៅតែ​ប្រកាន់​គោលជំហរ ក្រាញននៀល​ទាមទារ​ឱ្យ​ថៅកែ​គោរព​តាម​កិច្ចសន្យា និង​ទទួល​ទិញ​ផ្ទះ​ត្រឡប់​ទៅវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។