សមត្ថកិច្ច​ចាប់​ខ្លួន​មនុស្ស​ជាង​៥០​នាក់​ក្នុង​មួយ​ថ្ងៃ​ពាក់​ព័ន្ធ​នឹង​ការ​រត់​ពន្ធ​ថ្នាំ​ញៀន

ហេង រស្មី
2020-10-24
អ៊ីម៉ែល
មតិ
Share
បោះពុម្ព
គ្រឿងញៀនដែល​អាជ្ញាធរ​​នៃ​មន្ទីរប្រឆាំង​បទល្មើស​គ្រឿង​ញៀន​ចាប់​បាន។
គ្រឿងញៀនដែល​អាជ្ញាធរ​​នៃ​មន្ទីរប្រឆាំង​បទល្មើស​គ្រឿង​ញៀន​ចាប់​បាន។
រូប៖ គេហតំព័រ​នគរបាលជាតិ ថ្ងៃទី៣ ខែវិច្ឆិកា ឆ្នាំ២០១៩

សមត្ថកិច្ច​ចាប់​ខ្លួន​មនុស្ស​ចំនួន​ជាង​៥០​នាក់​ក្នុង​មួយ​ថ្ងៃ​ក្នុង​ប្រតិបត្តិ​ការ​បង្ក្រាប​គ្រឿង​ញៀន​នៅ​ក្នុង​ប្រទេស​កម្ពុជា។​មន្ត្រី​សង្គម​ស៊ីវិលថា​បញ្ហា​គ្រឿង​ញៀន​បាន​បង្ក​ផល​លំបាក​ដល់​សង្គម​ខ្មែរ ជា​ពិសេស​យុវជន​ដែល​ជា​ធនធាន​ដ៏​សំខាន់​សម្រាប់​ប្រទេស​ នឹង​ត្រូវ​បំផ្លាញ​ បើ​រដ្ឋា​ភិបាល​មិន​បាន​ទប់​ស្កាត់​អោយ​មាន​ប្រសិទ្ធភាព​។​

មន្ត្រី​សង្គម​ស៊ីវិល​បាន​សំដែង​ការ​ភ្ញាក់​ផ្អើល​នៅ​ពេល​ដែល​ឃើញ​របាយការណ៍​ពី​ចំនួន​មនុស្ស ជា​ច្រើន​នាក់​ត្រូវ​សមត្ថកិច្ច​ចាប់​ខ្លួន​ពាក់​ព័ន្ធ​នឹង​ការ​ជួញ​ដូរ​ថ្នាំ​ញៀន​ក្នុង​ប្រទេស​កម្ពុជា​ ក្នុង​មួយ​ថ្ងៃ​។​​​

អនុប្រធាន​ផ្នែក​សិទ្ធិមនុស្ស​នៃ​អង្គការ​លីកាដូ​លោក​អំ សំអាត​ មាន​ប្រសាសន៍​ថា​ បញ្ហា​គ្រឿង​ញៀន នៅ​តែ​ជា​ក្តី​កង្វល់​ខ្ពស់​ដដែល​ នៅ​ក្នុង​ប្រទេស​កម្ពុជា បើ​ទោះ​បី​ជា​អាជ្ញាធរ​ មាន​ការ​បង្ក្រាប​ជា​បន្ត​បន្ទាប់​ក៏​ដោយ​ ក៏​បញ្ហា​នេះ​នៅ​តែ​កើត​មាន​ឡើង​ដដែល​​។​​

លោក​ថា​ បញ្ហា​គ្រឿង​ញៀន​នេះ​បាន​វាយ​លុក​ស្ទើរ​តែ​គ្រប់​ទី​កន្លែង​ មិន​ថា​ទី​ក្រុង​ ឬ​ជនបទ​ទេ​ ហើយ​វា​បាន​បង្ក​ផល​លំបាក​ដល់​សង្គម​ខ្មែរ ជា​ពិសេស​យុវជន​ដែល​ជា​ធនធាន​ដ៏​សំខាន់​សម្រាប់​ប្រទេស​ នឹង​ត្រូវ​បំផ្លាញ​ បើ​រដ្ឋា​ភិបាល​មិន​បាន​ទប់​ស្កាត់​អោយ​មាន​ប្រសិទ្ធភាព​នោះ​ទេ​​។៖«ទាក់​ទង​នឹង​​បញ្ហា​គ្រឿង​ញៀន​នេះ​វា​ទាម​ទារ​ឱ្យ​មាន​ការ​ តាំង​ចិត្ត​ខ្ពស់​ក្នុង​ការ​បង្ក្រាប​នឹង​ការ​ទប់​ស្កាត់​ ដោយ​មិន​មាន​ការ​យោគ​យល់​ទេ​ ទោះ​បី​ជា​អ្នក​ ជួញ​ដូរ​គ្រឿង​ញៀន​ហ្នឹង​មាន​ឋានន្តរសក្ដិ​ប៉ុណ្ណា​ក៏​ដោយ ក៏​ត្រូវ​ចាត់​វិធាន​ការណ៍​តាម​ផ្លូវ​ច្បាប់​ ដើម្បី​ទប់​ស្កាត់​នឹង​បង្ក្រាប​ចាប់​ខ្លួន​ទៅ​ផ្ដន្ទាទោស​ទៅ​តាម​ផ្លូវ​ច្បាប់»

គេហទំព័រ​របស់​អគ្គ​ស្នង​ការ​នគរ​បាល​ជាតិ​បាន​ផ្សាយ​ថា​ កាល​ពី​ថ្ងៃទី​២៤​ តុលា​​ ក្នុង​រយៈ​ពេល​តែ​មួយ​ថ្ងៃ​ប៉ុណ្ណោះ​ សមត្ថកិច្ច​បាន​ចាប់​ខ្លួន​មនុស្ស​ចំនួន​៥៣​នាក់​។ក្នុង​នោះ​មាន​ស្ត្រី​​៣​នាក់​ក្នុង​ប្រតិបត្តិការ​បង្ក្រាប​បទ​ល្មើស​គ្រឿង​ញៀន​ចំនួន​ ២៤​ ករណី​នៅ​ទូទាំង​ប្រទេស​កម្ពុជា​។​

ក្នុង​ចំណោម​ជនសង្ស័យ​ដែល​សមត្ថកិច្ច​ចាប់​ខ្លួន​ទាំង​នោះ​ មាន​មុខ​សញ្ញា​ជួញ​ដូរ​គ្រឿងញៀន​ចំនួន​២៩​នាក់​ និង​អ្នក​ប្រើ​ប្រាស់​ចំនួន​២៤​ នាក់​។ជន​សង្ស័យ​ដែល​សមត្ថកិច្ច​ចាប់​ខ្លួន​នៅ​តាម​បណ្តា​ខេត្ត​ផ្សេងៗ​ ដែល​រួម​មាន​៖​ខេត្ត​​បាត់ដំបង​ កំពង់ចាម​ កំពង់ស្ពឺ​ កណ្ដាល​ ស្វាយរៀង​ និង​ខេត្ត​សៀមរាប។

អគ្គស្នងការ​រង​នគរ​បាល​ជាតិ​ទទួល​បន្ទុក​គ្រឿង​ញៀន​ ​លោក​ ម៉ក់ ជីតូ មាន​ប្រសាសន៍​ប្រាប់​អាស៊ីសេរី​ថា​ បញ្ហា​ជួញ​ដូរ​គ្រឿង​ញៀន​នៅ​ទូទាំង​សកល​លោក​ ទាំង​ការ​ដឹក​ជញ្ជូន​ ការ​ជួញ​ដូរ​ និង​ការ​កែច្នៃ​ មិន​មាន​ការ​ថយ​ចុះ​ទេ។​

លោក​ថា​ ការ​កើន​ឡើង​នៃ​ការ​ជួញ​ដូរ​គ្រឿង​ញៀន​នេះ​ ដោយសារ​តែ​ស្ថាន​ភាព​បញ្ហា​កូវីដ​ នៅ​តាម​ព្រំ​ដែន​ត្រូវ​បាន​បិទ​ ហើយ​ការ​ដឹក​ជញ្ជូន​តាម​ជើង​យន្ត​ហោះ​មិន​អាចកើត​មានឡើង​ទេ ហេតុ​ដូច្នេះ​ហើយ​បាន​ជា​ធ្វើ​អោយ​ឧក្រិដ្ឋ​ជន​បាន​បង្វែរ​មក​ដឹក​ជញ្ជូន​តាម​ផ្លូវ​ទឹក​​ ផ្លូវ​គោក​ និង​តាម​កញ្ចប់​ប្រៃសណីយ៍​ ម្តង​វិញ​​។​លោក​បន្ថែម​ថា​ ​ឧក្រិដ្ឋជន​បាន​នាំ​យក​គ្រឿង​ញៀន​ ពី​ប្រទេស​ភូមា​ និង​ប្រទេស​ឡាវ ដោយ​ឆ្លង​កាត់​ប្រទេស​កម្ពុជា​ ក្នុង​បំណង​នាំ​ទៅ​កាន់​ប្រទេស​ទី​៣​។​៖«​ចឹង​ពេល​ដែល​ពួក​ឧក្រិដ្ឋជន​ជួញ​ដូរ​គ្រឿង​ញៀន​ ផលិត​ទៅ​ពិបាក​បញ្ចេញ​ វា​សល់​ច្រើន​ ។​ដល់​សល់​ច្រើន​វា​រក​កន្លែង​សម្រុក​ចេញ​ ចឹង​បាន​ថា​ វា​ចេញ​ម្តង​ច្រើន​រយ​គីឡូក្រាម​តែ​ម្តង​ ហើយ​សារ​វា​ច្រើន​អញ្ចឹង​តម្លៃ​ផលិត​ដើម​របស់​វានឹង​គឺ​ថោក​។​ប៉ុន្តែ​តម្រូវ​ទីផ្សារ​នៅ​តាម​បណ្តា​ប្រទេស​ធំៗ​ដូច​ជា​នៅ​អាមេរិក​ អូស្ត្រាលី​ កោះតៃ​វ៉ាន់​ គឺ​ថា​ វា​នៅ​តែ​ធំ​ អញ្ចឹង​បាន​ជា​ពួកគេ​ខឹតខំ​។នៅ​យើង​នេះលក់​ថោក​ ហើយ​រុញ​ទៅ​ទីនោះ​វា​ថ្លៃ​ ចឹង​ហើយ​បាន​ប្រឹង​ប្រែង​ណាស់»

ពាក់​ព័ន្ធ​នឹង​បញ្ហា​គ្រឿង​ញៀន​នេះ​ សមត្ថកិច្ច​ឲ្យ​ដឹង​ថា​ក្នុង​រយៈ​ពេល​ជាង​៩​ខែ​ឆ្នាំ​២០២០​ មាន​ជនជាតិ​ចិន​ជាង​២០០​នាក់​ ត្រូវ​ចាប់​ខ្លួន​នៅ​ក្នុង​ខេត្ត​ព្រះសីហនុ​ ក្នុង​សំណុំ​រឿង​ផ្សេងៗ​គ្នា​ ពាក់​ព័ន្ធ​នឹង​ការ​រត់​ពន្ធ​ថ្នាំ​ញៀន​ខុស​ច្បាប់​ ចាប់​ជំរិត​ ចោរកម្ម​ និង​ការ​ប្រើ​ប្រាស់​អំពើ​ហិង្សា ទៅ​លើ​ជនជាតិ​ចិន​ដូ​ច​គ្នា។

នាយកដ្ឋាន​ប្រឆាំង​គ្រឿង​ញៀន​ កាល​ពី​ថ្ងៃ​ទី​១៥​ តុលា​ បាន​ផ្សាយ​នៅ​ក្នុង​គេហទំព័រ​ហ្វេស​ប៊ុក​របស់​ខ្លួន​ថា​ ​កម្លាំង​ជំនាញ​នៃ​មន្ទីរ​ប្រឆាំង​គ្រឿងញៀន បាន​សហការ​ជាមួយ​សមត្ថកិច្ច​ខេត្ត​ព្រះសីហនុ​ និង​ខេត្ត​ព្រះ​វិហារ​ បាន​ចាប់​ខ្លួន​ជនជាតិ​ចិន​តៃវ៉ាន់​ ចំ​នួន ​៤​នាក់​នៅ​ក្នុង​ទី​តាំង​ផ្សេងៗ ​គ្នា។​ក្រោយ​ពី​​បាន​នាំ​យក​គ្រឿង​ញៀន​ពី​ប្រទេស​ឡាវ​ ឆ្លង​ចូល​មក​ប្រទេស​កម្ពុជា​ តាម​ព្រំ​ដែន​ខេត្ត​ព្រះ​វិហារ។​

បុរស​ជនជាតិ​ចិន​ទាំង​ ៤​នាក់​នោះ​មាន​បំណង​នាំ​យក​គ្រឿង​ញៀន​ទាំង​នោះ​មក​លក់​ដូរ​នៅ​ក្នុង​ទៅ​ក្រុង​ភ្នំពេញ​ និង​ខេត្ត​ព្រះ​សីហនុ។​

ក្នុង​ចំណោម​គ្រឿងញៀន​ដែល​សមត្ថកិច្ច​ចាប់​បាន​នោះ​ មាន​ប្រភេទ​ ហេរ៉ូអ៊ីន (Heroin) ប្រភេទ​មេតំហ្វេតាមីន​ទឹកកក​ (ICE) ប្រភេទ​អ៊ិចស្តាស៊ី​ និង​ញៀន​កេតាមីន​ (Ketamine) ក្រៅ​ពី​នោះ​សារ​ធាតុ​ផ្សំ​ អេតាណុល ​ចំនួន​ ៣៧​ប៊ីដុង​ មាន​ទម្ងន់​ ៧០៣​គីឡូក្រាម។​

តាម​របាយការណ៍​របស់​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ បានឲ្យ​ដឹងថា​ នៅក្នុង​ឆមាសទី១ ​ឆ្នាំ​២០២០ ​នេះ​ សមត្ថកិច្ច​កម្ពុជា​បង្ក្រាប​បទល្មើស​គ្រឿងញៀន​បាន​​ចំនួន​ជាង​៥​ពាន់​ករណី (​៥.៤៦៣​ករណី)​ គឺ​បាន​កើន​ឡើង​​ចំនួន​ជាង​ ១​ពាន់​ករណី (១.២៨៨​ករណី)​ ស្មើ​នឹង​ជាង​ ៣០​ភាគរយ ​(៣០.៨ភាគរយ)​ បើ​ប្រៀប​ធៀប​នឹង​រយៈ​ពេល​ដូច​គ្នា​ក្នុង​ឆ្នាំ​២០១៩​៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល