បក្ស​ប្រឆាំង​ និង​អ្នក​វិភាគ​ បារម្ភ​ពី​ចិន​ប្រើ​ប្រាស់​ឥទ្ធិពល​ក្នុង​ក្រសួង​អប់រំ​តាម​រយៈ​​ការ​បង្កើត​បណ្ណាល័យ​ឌីជីថល​ប្រឆាំង​គ្រឿង​ញៀន

ដោយ ហេង រស្មី
2020-10-30
Share
ចិន អ្នកស្រី សឿ សុជាតា រដ្ឋលេខាធិការ​ក្រសួង​អប់រំ និង​លោក លី ជីញហ្វីង តំណាង​ឯក​អគ្គ​រដ្ឋទូត​ចិន​ប្រចាំ​ប្រទេស​កម្ពុជា ជួប​ពិភាក្សា​គ្នា​នៅ​ឯ​ស្ថានទូត​ចិន ជុំវិញ​គម្រោង​បង្កើត​បណ្ណាល័យ​ឌីជីថល (Digital) នៅ​កម្ពុជា កាល​ពី​ថ្ងៃ​ទី២៦ ខែតុលា ឆ្នាំ២០២០។
រូប៖ អគ្គលេខាធិការដ្ឋាន​នៃ​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន

មន្ត្រី​ជាន់​ខ្ពស់​បក្ស​ប្រឆាំង និង​អ្នក​វិភាគ​សង្គម​បារម្ភ​ពី​ប្រទេស​ចិន កំពុង​តែ​ប្រើ​ប្រាស់​ឥទ្ធិពល​របស់​ខ្លួន​ នៅ​ក្នុង​ក្រសួង​អប់រំ និង​ក្រសួង​មហាផ្ទៃ ​តាម​រយៈ​បង្កើត​បណ្ណាល័យ​ឌីជីថល (Digital) ប្រឆាំង​គ្រឿង​ញៀន។ ប៉ុន្តែ​មន្ត្រី​រដ្ឋាភិបាល​ថា ការ​បង្កើត​បណ្ណាល័យ​នេះ​ គឺ​ដើម្បី​ពង្រីក​ការ​ផ្សព្វផ្សាយ​ ពី​បញ្ហា​គ្រឿង​ញៀន ឲ្យ​កាន់​តែ​ទូលំទូលាយ​តាម​ប្រព័ន្ធ​បច្ចេកវិទ្យា​នៅ​កម្ពុជា។

លោក អេង ឆៃអ៊ាង អនុប្រធាន​គណបក្ស​សង្គ្រោះ​ជាតិ​ បញ្ជាក់​​ថា​ ប្រទេស​ចិន​មួយ​រយៈ​ចុង​ក្រោយ​​នេះ​ មិន​ត្រឹម​តែ​ប្រើប្រាស់​ឥទ្ធិពល​របស់​ខ្លួន​ចូល​ជ្រៀតជ្រែក​ក្នុង​រឿង​នយោបាយ​ និង​សេដ្ឋកិច្ច​ប៉ុណ្ណោះ​ទេ។ ប៉ុន្តែ​ថែម​ទាំង​បាន​ប្រើប្រាស់​ឥទ្ធិពល​របស់​ខ្លួន​តាម​រយៈ​ ការ​ផ្ដល់​ជំនួយ​ ដើម្បី​បង្កើត​បណ្ណាល័យ​ឌីជីថល (Digital) នៅ​កម្ពុជា​ថែម​ទៀត​ផង។​លោក​ថា​ ជំនួយ​របស់​ប្រទេស​ចិន​កន្លង​មក​ នឹង​​បង្ក​ឲ្យ​មាន​ការ​ព្រួយ​បារម្ភ​ខ្លាំង​អំពី​អព្យាក្រឹតភាព​របស់​កម្ពុជា៖ «យើង​មាន​ការ​ព្រួយ​បារម្ភ​ ចំពោះ​ជំនួយ​ទាំង​ឡាយ​របស់​ចិន​ ពី​ព្រោះ​វា​ខ្លាច​ជំនួយ​នេះ​ វា​ក្លាយ​ទៅ​ជា​ចំណង​សម្រាប់​ឲ្យ​កម្ពុជា​ប្រឈម​ ជាមួយ​នឹង​ប្រទេស​នានា​ជា​មិត្ត​ ហើយ​ធ្វើ​ឲ្យ​កម្ពុជា​បាត់​បង់​អព្យាក្រឹត​ភាព»

ក្រសួង​អប់រំ​ និង​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​​ របស់​ក្រសួង​មហាផ្ទៃ​គ្រោង​នឹង​បង្កើត​បណ្ណាល័យ​ឌីជីថល (Digital) ដើម្បី​ប្រយុទ្ធ​ប្រឆាំង​គ្រឿង​ញៀន​ ក្នុង​ខណៈ​គ្រឿង​ញៀន​កំពុង​រីក​រាល​ដាល​ក្នុង​ប្រទេស​កម្ពុជា។

អ្នកស្រី សឿ សុជាតា​ រដ្ឋលេខាធិការ​ក្រសួង​អប់​រំ និង​តំណាង​ឯក​អគ្គ​រដ្ឋទូត​ចិន​ប្រចាំ​ប្រទេស​កម្ពុជា​លោក​ លី ជីញហ្វីង បាន​ជួប​ពិភាក្សា​គ្នា​កាល​ពី​ថ្ងៃ​ទី២៦ តុលា នៅ​ឯ​ស្ថានទូត​ចិន ជុំវិញ​គម្រោង​បង្កើត​បណ្ណាល័យ​ឌីជីថល (Digital) នៅ​កម្ពុជា។

គេហទំព័រ​របស់​អគ្គលេខាធិការដ្ឋាន​នៃ​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ បាន​ផ្សាយ​ថា​ នៅ​ក្នុង​ជំនួប​នោះ​ប្រទេស​ចិន​មាន​គម្រោង​បង្កើត​បណ្ណាល័យ​ឌីជីថល​ ប្រឆាំង​គ្រឿង​ញៀន​ សម្រាប់​ពង្រីក​ការ​ផ្សព្វផ្សាយ​ ពី​បញ្ហា​គ្រឿង​ញៀន​ ឲ្យ​កាន់​តែ​ទូលំទូលាយ​តាម​ប្រព័ន្ធ​បច្ចេកវិទ្យា​នៅ​កម្ពុជា។

ក្រោយ​ពី​ជំនួប​នោះ​ ប្រធាន​នាយកដ្ឋាន​នីតិកម្ម​ អប់រំ​ និង​ស្ដារ​នីតិ​សម្បទា​ របស់​ក្រសួង​មហា​ផ្ទៃ​លោក​ លឹម តុងហួត​ មាន​ប្រសាសន៍​ថា​ ការ​បង្កើត​បណ្ណាល័យ​នេះ​ឡើង​គឺ​បាន​កើត​ឡើង​ក្រោយ​ពី​ជំនួប​រវាង​លោក​ឧបនាយក​រដ្ឋ​មន្ត្រី ស ខេង រដ្ឋមន្ត្រី​ក្រសួង​មហាផ្ទៃ និង​លោក​ កែ គឹមយ៉ាន​ ប្រធាន​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ ជាមួយ​នឹង​​ថ្នាក់​ដឹក​នាំ​ចិន​មួយ​ចំនួន។ លោក​ថា​ ប្រទេស​ចិន​បាន​ផ្ដល់​ថវិកា​ចំនួន ៥ម៉ឺន​ដុល្លារ ដើម្បី​ឲ្យ​បង្កើត​បណ្ណាល័យ​ឌីជីថល (Digital)នេះ​ឡើង។

ទាក់ទិន​រឿង​នេះ​ អ្នក​វិភាគ​នយោបាយ​ដែល​កំពុង​រស់​នៅ​និរទេស​ខ្លួន​ក្នុង​ប្រទេស​ហ្វាំងឡង់ (Finland) លោក គឹម សុខ បញ្ជាក់​ថា ប្រព័ន្ធ​ឌីជីថល (Digital) ជា​ផ្នែក​មួយ​នៃ​ការ​គ្រប់​គ្រង​សន្តិសុខ​ជាតិ​រដ្ឋាភិបាល​ត្រូវ​គ្រប់​គ្រង​ដោយ​ខ្លួន​ឯង​មិន​ត្រូវ​ឲ្យ​ប្រទេស​ចិន​គ្រប់​គ្រង​ទេ។

លោក​ថា​ ប្រសិន​បើ​កាលណា​បើ​រដ្ឋាភិបាល​បណ្ដោយ​ឲ្យ​រដ្ឋ​បរទេស​ បង្កើត​បណ្ដាញ​ឌីជីថល (Digital) ដោយ​ដៃ​របស់​គេ​ផ្ទាល់​នៅ​កម្ពុជា​ នោះ​មាន​ន័យ​ថា​ ស្មើ​នឹង​អ្នក​ដឹក​នាំ​នៅ​លក់​ប្រព័ន្ធ​សន្តិ​សុខ​ជាតិ​ដល់​រដ្ឋ​បរទេស​ ហើយ​ប្រទេស​ចិន​មាន​ជំនាញ​ច្បាស់​លាស់​នៅ​ក្នុង​ការ​គ្រប់​គ្រង​ផ្នែក​ឌីជីថល​ (Digital) ទៀត​ផង៖ «របៀប​នេះ​ស្មោះ​នឹង​ហែក​ បេះដូង​សន្តិ​សុខ​ខ្មែរ​ ឲ្យ​ចិន​ដឹង​ផង​ យួន​ដឹង​ផង​ ហើយ​គ្រួសារ​ខ្មែរ​មួយ​នគរ​ មើល​ទៅ​លែង​មាន​អ្វី​សម្ងាត់​នៅ​ចំពោះ​មុខ​ចិន​ និង​យួន​ទៀត​ហើយ។ អាច​និយាយ​បាន​ថា កម្ពុជា​ក្រោម​ការ​ដឹក​នាំ​របស់​លោក​ ហ៊ុន សែន។ បើ​ផ្នែក​សន្តិសុខ​ជាតិ​ណា​មិន​មែន​នៅ​ក្រោម​ការ​គ្រប់គ្រង​របស់​យួន​ គឺ​នៅ​ក្រោម​ចិន ហើយ​បើ​ត្រង់​ណា​មិន​មែន​នៅ​ក្រោម​ចិន គឺ​នៅ​ក្រោម​យួន​ជា​អ្នក​គ្រប់គ្រង»

ពាក់​ព័ន្ធ​នឹង​ការ​ចោទ​ប្រកាន់​ពី​អ្នក​វិភាគ​នេះ​ អាស៊ីសេរី​បាន​ព្យាយាម​ទាក់​ទង​អ្នក​នាំ​ពាក្យ​អគ្គស្នងការ​​នគរ​បាល​ជាតិ​លោក​ ឆាយ​ គឹមឃឿន តែ​លោក​មិន​លើក​ទូរស័ព្ទ។​

នាយក​ប្រតិបត្តិ​សម្ព័ន្ធ​អ្នក​សារព័ត៌មាន​កម្ពុជា​ ហៅ​កាត់​ថា ខេបូចា (CamboJA) លោក ណុប វី មាន​ប្រសាសន៍​ថា លោក​មិន​មាន​ការ​ព្រួយ​បារម្ភ​ថា​ ប្រទេស​ចិន​ លួច​យក​ព័ត៌មាន​ពី​រឿង​សន្តិសុខ​ជាតិ​នោះ​ទេ។ ដោយ​សារ​តែ​បណ្ណាល័យ​ឌីជីថល (Digital) គឺ​បង្កើត​ឡើង​ជា​សាធារណៈ​ ដែល​មនុស្ស​ទូទៅ​អាច​សិក្សា​ស្រាវ​ជ្រាវ​បាន។

លោក​ថា​ នេះ​ជា​ចំណុច​វិជ្ជមាន​ទៅ​វិញ​ទេ​ ដែល​ប្រទេស​ចិន​ និង​កម្ពុជា​អាច​សហការ​គ្នា​បាន​ពាក់​ព័ន្ធ​នឹង​ការ​លុប​បំបាត់​គ្រឿង​ញៀន​នៅ​កម្ពុជា៖ «អ្វី​ដែល​ជា​ការ​គាំទ្រ​របស់​ប្រទេស​ចិន​ ខ្ញុំ​មើល​ឃើញ​ថា​ វា​អាច​ជា​ការ​ដែល​អាច​ធ្វើ​ឲ្យ​ មាន​ទំនាក់​ទំនង​ល្អ​រវាង​ក្រសួង​មហា​ផ្ទៃ​ ជា​មួយ​ប្រទេស​ចិន​ទៅ​វិញ​ទេ។ នេះ​ជា​ចំណុច​មួយ​ដែល​កើត​ចេញ​ពី​ការ​ផ្តល់​ការ​គាំទ្រ​ផ្នែក​ហិរញ្ញវត្ថុ ពី​ព្រោះ​ខ្ញុំ​មើល​ថា ជា​និច្ចកាល​ ប្រទេស​ចិន​ក្លាយ​ជា​ប្រទេស​មួយ ដែល​សំខាន់​ក្នុង​ការ​គាំទ្រ​ផ្នែក​ហិរញ្ញវត្ថុ ចំពោះ​ការ​ផ្ដួច​ផ្ដើម ក្នុង​ការ​អភិវឌ្ឍន៍​គម្រោង​ផ្សេងៗ​នៅ​ក្នុង​ប្រទេស​កម្ពុជា​ក្នុង​ពេល​បច្ចុប្បន្ន​នេះ»។​​​​​​​​

ពាក់​ព័ន្ធ​នឹង​បញ្ហា​គ្រឿង​ញៀន​នេះ​សមត្ថកិច្ច​ កាល​ពី​ថ្ងៃ​ទី២៩ តុលា​ បាន​ចាប់​ខ្លួន​មនុស្ស​ប្រមាណ​ជាង ៣៧នាក់​​ក្នុង​មួយ​ថ្ងៃ​ ក្នុង​ប្រតិបត្តិការ​បង្ក្រាប​បទ​ល្មើស​គ្រឿង​ញៀន​ចំនួន ១៦ករណី​នៅ​ទូទាំង​ប្រទេស។

អ្នក​នាំ​ពាក្យ​ក្រសួង​មហាផ្ទៃ​លោក​ ខៀវ សុភ័គ​ ប្រាប់​សារព័ត៌មាន​ក្នុង​ស្រុក​ថា​ ក្នុង​ចំណោម​មនុស្ស ៣៧នាក់ មាន​មនុស្ស ៥នាក់​ត្រូវ​ឃាត់​ខ្លួន​ក្នុង​បទ​ល្មើស​ព្រហ្មទណ្ឌ​ចំនួន ៥ករណី និង​ជន​សង្ស័យ​៣៣នាក់​ទៀត ត្រូវ​ឃាត់​ខ្លួន​ ក្នុង​បទ​ល្មើស​គ្រឿង​ញៀន។

សមត្ថកិច្ច​​កាល​ពី​ថ្ងៃ​ទី២៤ តុលា​កន្លង​ទៅ​នេះ ​បាន​ចាប់​ខ្លួន​មនុស្ស​ប្រមាណ​ជាង ៥០នាក់ ពាក់​ព័ន្ធ​នឹង​បញ្ហា​គ្រឿង​ញៀន​ផង​ដែរ។ ក្នុង​ចំណោម​ជនសង្ស័យ​ដែល​សមត្ថកិច្ច​ចាប់​ខ្លួន​ទាំង​នោះ​ មាន​មុខ​សញ្ញា​ជួញ​ដូរ​គ្រឿងញៀន​ចំនួន​២៩​នាក់​ និង​អ្នក​ប្រើ​ប្រាស់​ចំនួន ២៤នាក់។

ជន​សង្ស័យ​ដែល​សមត្ថកិច្ច​ចាប់​ខ្លួន​នៅ​តាម​បណ្ដា​ខេត្ត​ផ្សេងៗ ដែល​រួម​មាន ខេត្ត​បាត់ដំបង​ កំពង់ចាម​ កំពង់ស្ពឺ​ កណ្ដាល​ ស្វាយរៀង​ និង​ខេត្ត​សៀមរាប។ សមត្ថកិច្ច​ឲ្យ​ដឹង​ថា ​ក្នុង​រយៈ​ពេល​ជាង ៩ខែ​ឆ្នាំ២០២០ មាន​ជនជាតិ​ចិន​ជាង ២០០នាក់ ត្រូវ​ចាប់​ខ្លួន​នៅ​ក្នុង​ខេត្ត​ព្រះសីហនុ​ ក្នុង​សំណុំ​រឿង​ផ្សេងៗ គ្នា ពាក់​ព័ន្ធ​នឹង​ការ​រត់​ពន្ធ​ថ្នាំ​ញៀន​ខុស​ច្បាប់ ចាប់​ជំរិត ចោរកម្ម និង​ការ​ប្រើ​ប្រាស់​អំពើ​ហិង្សា ទៅ​លើ​ជនជាតិ​ចិន​ដូច​គ្នា​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។