អ្នកនាំពាក្យគណបក្សសង្គ្រោះជាតិថា លោក អ៊ូ ច័ន្ទប្ញទ្ធិ និយាយថា ការផ្ដល់ជំនួយរបស់ប្រទេសចិន ដល់ខេត្តព្រះសីហនុ អាចធ្វើឱ្យខេត្តជាប់មាត់សមុទ្រមួយនេះបាត់បង់ឯករាជ្យភាពរបស់ខ្លួន ហើយនៅថ្ងៃអនាគតអាចឱ្យប្រទេសចិនប្រើប្រាស់ជាទីតាំងរត់ពន្ធទំនិញខុសច្បាប់៖ «ការផ្ដល់បរិក្ខារបែបហ្នឹងមកប្រទេសកម្ពុជា ជាបន្តបន្ទាប់ គឺធ្វើឱ្យចិនធ្វើអីក៏បានយកទឹកដីខ្មែរ ប្រើប្រាស់ប្រព្រឹត្តនូវបទល្មើសផ្សេងៗ។ ថ្ងៃក្រោយអាចប្រើប្រាស់កំពង់ផែ ព្រះសីហនុទៅរត់គ្រឿងញៀន ទៅធ្វើអ្វីដែលខុសច្បាប់ ហើយខ្មែរអត់ហ៊ានជាមួយគេទេ»។
ការលើកឡើងរបស់មន្ត្រីបក្សប្រឆាំងនេះ បានកើតមានឡើងក្រោយពីប្រទេសចិន បានផ្ដល់គ្រឿងបរិក្ខារ ដើរដោយថាមពលពន្លឺព្រះអាទិត្យដល់ខេត្តព្រះសីហនុ។
គេហទំព័រស្ថានទូតចិនប្រចាំប្រទេសកម្ពុជា បានផ្សាយកាលពីថ្ងៃទី២៤ វិច្ឆិកាថា សម្ភារៈបរិក្ខារ ដែលចិនបានផ្ដល់ឱ្យ រួមមាន អំពូលសូឡាចំនួន ២.៨០០អំពូល ផ្ទាំងកញ្ចក់សូឡាចំនួន ២០០ផ្ទាំង និងម៉ូតូប្រើអាគុយចំនួន ២០០គ្រឿង។ សម្ភារៈទាំងនេះ នឹងត្រូវដំឡើងនៅតាមទីសាធារណៈ ដូចជាសាលារៀននៅក្នុងខេត្តព្រះសីហនុ ដើម្បីកាត់បន្ថយការបំភាយសារធាតុកាបូន និងបង្កើនការយល់ដឹងជាសាធារណៈស្ដីពីបរិស្ថាន។
អាស៊ីសេរីបានព្យាយាមទាក់ទងប្រតិភូរដ្ឋាភិបាលទទួលបន្ទុកអគ្គនាយកកំពង់ផែខេត្តព្រះសីហនុ លោក លូ គឹមឈន់ និងលោក គួច ចំរើន អភិបាលខេត្តព្រះសីហនុ ដើម្បីសុំព័ត៌មានបន្ថែមជុំវិញរឿងនេះ តែមិនអាចទាក់ទងបាន ដោយសារតែពួកលោកមិនលើកទូរស័ព្ទ។
ប្រទេសចិនកន្លងមកបានផ្ដល់ជំនួយយោធា សាងសង់កំពង់ផែរាម និងសម្ភារៈពេទ្យជាច្រើនដល់កម្ពុជា។ ប៉ុន្តែជំនួយទាំងនោះត្រូវមន្ត្រីបក្សប្រឆាំងមើលឃើញថា របបក្រុងភ្នំពេញបានលំអៀងទៅរកចិន ហើយងាកខ្លួនចេញពីគន្លងប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។