ក្រសួង​​មិន​ទាន់​ស៊ើបអង្កេត​ផ្លូវការ​ពី​បញ្ហា​បក្ខ​ពួក​គ្រួសារ​​និយម​​ក្នុង​តុលាការ​យោធា

ដោយ វ៉ែន សុមេធ
2019-07-24
អ៊ីម៉ែល
មតិ
Share
បោះពុម្ព
​សវនាការ​មួយ នៃ​តុលាការ​យោធា
​សវនាការ​មួយ នៃ​តុលាការ​យោធា
រូប៖ គេផ្ដល់ឱ្យ

ក្រសួងការពារជាតិ មិនទាន់​ស៊ើបអង្កេត​ជា​ផ្លូវការ​លើ​ប្រធាន​តុលាការយោធា​នោះ​ទេ បន្ទាប់​ពី មាន​ការ​ការចោទប្រកាន់​ថា បាន​ប្រមូល​ផ្តុំ​បក្ខពួក​សាច់ញាតិ​ធ្វើការ​ក្នុង​ស្ថាប័ន​តែមួយ​អស់​រយៈពេល​ច្រើន​ឆ្នាំ​មក​ហើយ​។ សង្គម​ស៊ីវិល និង​មន្ត្រី​ដែល​ទម្លាយ​ព័ត៌មាន រិះគន់​ថា ការ​ឆ្លើយ​តប​ត្រឡប់ ត្រឡិន​របស់​ក្រសួង​ការពារ​ជាតិ គឺ​បង្ហាញ​ថា ក្រសួង​គ្មាន​ឆន្ទៈ​ពិតប្រាកដ​ក្នុង​ការ​ស៊ើបអង្កេត​ដើម្បី​មាន​វិធានការ​ច្បាប់​នោះ​ទេ។

អ្នកនាំពាក្យ​ក្រសួង​ការពារ​ជាតិ លោក ឈុំ សុជាត ប្រាប់​អាស៊ីសេរី​ថា រដ្ឋមន្ត្រី​ក្រសួង​ការពារជាតិ លោក ទៀ បាញ់ មិន​ទាន់​សម្រេច​អនុញ្ញាត​ឱ្យ​ស៊ើបអង្កេត​រក​ការពិត​ពី​ករណី​ចោទ​ថា ប្រធាន​តុលាការ​យោធា លោក ន័យ ថុល បាន​បង្កើត​ឱ្យ​មាន​​អំពើ​ពុករលួយ និង​បាន​កេណ្ឌ​សែស្រឡាយ​បក្ខពួក​គ្រួសារនិយម​រហូតដល់​ជាង ​១០​នាក់​ឱ្យ​មក​កាន់​តួនាទី​នៅ​ក្នុង​​តុលាការ​យោធា​​ក្រោម​ការដឹកនាំ​របស់​លោក​នោះ​ទេ​។ ប៉ុន្តែ​លោក​បញ្ជាក់​ថា លោក​បាន​ដាក់​របាយការណ៍​ជូន​លោក ទៀ បាញ់ រួចហើយ និង​កំពុង​រង់ចាំ​តែ​សេចក្ដី​សម្រេច​របស់​លោក ទៀ បាញ់ ដើម្បី​បើក​ការ​ស៊ើប​អង្កេត​​ជា​​ផ្លូវការ។

ទោះបីជា​មិនទាន់​ស៊ើបអង្កេត​ជា​ផ្លូវការ​ក៏ដោយ អ្នកនាំពាក្យ​ក្រសួង​ការពារជាតិ ប្រាប់​បណ្តាញ​ឃោសនា​ក្នុងស្រុក​ថា ការ​ផ្សព្វផ្សាយ​ថា តុលាការយោធា​កម្ពុជា មាន​បញ្ហា​បក្ខពួក​និយម គ្រួសារ​និយម គឺជា​រឿង​បំផ្លើស​ហួស​ពី​ការពិត និង​ចេញមុខ​ការពារ​ថា តុលាការ​យោធា​កម្ពុជា បាន​ដំណើរការ ប្រកបដោយ​ភាព​ឯករាជ្យ​និង​តែងតែ​ផ្ដល់​យុត្តិធម៌​សម្រាប់​យោធិន​គ្រប់​រូប។ នៅ​ពេល​អាស៊ី​សេរី​​សួរ​ថា ហេតុអ្វី​បានជា​លោក​ហ៊ាន​អះអាង​ដូច្នេះ លោក ឈុំ សុជាត ឆ្លើយតប​ថា លោក​គ្រាន់តែ​ឆ្លើយ​ជំនួស​លោក ន័យ ថុល ដែល​បាន​ប្រាប់​លោក​ត្រួសៗ​ ថា រឿង​នេះ ហាក់​ដូចជា​បំផ្លើស​ពេក ហើយ​រឿង​ពិត​មិន​ដល់​ប៉ុណ្ណឹង​នោះ​ទេ ទោះបី​ជា​មាន​កំហុស​ឆ្គង​ខ្លះ​ក្ដី។ ទោះ​យ៉ាងណា​លោក ឈុំ សុជាត មិនដឹង​ថា តើ​រឿង​ពិត​ប៉ុណ្ណា​ហើយ​រឿង​មិន​ពិត​ប៉ុណ្ណា​នោះ​ទេ​៖ «ក្នុងនាម​ខ្ញុំ​ជា​អ្នក​នាំពាក្យ ខ្ញុំ​អត់​មាន​ដេញដោល​គាត់​ទេ គ្រាន់តែ​ខ្ញុំ​បាន​សួរ​ទៅ​គាត់​ហើយ​គាត់​ថា ហ៊ឹម​.​រឿង​នឹង​វា​មិន​ដល់​ប៉ុណ្ណឹង​ទេ​ប្អូន អើយ។ រឿង​នេះ​បំផ្លើស​ហើយ​ចាំ​មើល​បង​មានឱកាស​ជួប​ថ្នាក់ដឹកនាំ​បង​នឹង​រាយការណ៍​ជូន​ទៅតាម​ឋានានុក្រម។ គាត់​និយាយ​តែ​ប៉ុណ្ណឹង​ហើយ​ខ្ញុំ​និយាយ​តាម​គាត់​ទៅ»

កាលពី​ថ្ងៃ​ទី​១៥ ខែ​កក្កដា លោក ឈុំ សុជាត សន្យា​ថា ក្រសួង​ការពារជាតិ នឹង​ស៊ើបអង្កេត​ករណី​នេះ​ភ្លាមៗ ហើយ​នឹង​បង្ហាញ​ជា​សាធារណៈ ដោយ​ចំណាយ​ពេល​តែ ១​ថ្ងៃ ឬ​២​ថ្ងៃ ប៉ុណ្ណោះ ព្រោះ ក្រសួង​ការពារជាតិ ដាច់ខាត​មិន​គាំទ្រ​ឱ្យ​មាន​បញ្ហា​បក្ខពួក​និយម គ្រួសារនិយម​នោះ​ទេ ប៉ុន្តែ​រហូត មក​ដល់​ពេលនេះ​ជិត​២​សប្ដាហ៍​ហើយ មិន​ឃើញ​មាន​លទ្ធផល​ដូច​ការសន្យា​នោះ​ទេ។

កាល​ពី​ពេល​ថ្មីៗ​ នេះ មន្ត្រី​នៅ​តុលាការ​យោធា ដែល​សុំ​លាក់​អត្តសញ្ញាណ បាន​ទម្លាយ​ថា ប្រធាន​តុលាការ​យោធា ឧត្ដមសេនីយ៍ឯក​ផ្កាយ​៣ លោក ន័យ ថុល ដែល​កាន់​តំណែង​នេះ​តាំងពី​ឆ្នាំ ១៩៨៧ មក និង​ជា​ចៅក្រម​នៅ​សាលាក្ដី​ខ្មែរក្រហម​ផង បាន​តែងតាំង​ភរិយា​គឺ​អ្នកស្រី ខឹម សម្បត្តិ និង​កូនប្រុស​បង្កើត​ពីរ​នាក់​របស់​ខ្លួន​ឱ្យ​ធ្វើជា​ចៅក្រម និង​ជា​អនុប្រធាន​តុលាការ​យោធា។ កូន​ប្រុស​​ទាំងពីរ​នាក់ ឈ្មោះ ផូរ ភិរម្យ និង ឈ្មោះ ផូរ វីរៈ នេះ មិន​ត្រឹម​តែ​មាន​តួនាទី​ជា​អនុប្រធាន​តុលាការយោធា និង​ជា​ចៅ ក្រម​ដូច​ម្ដាយ​ទេ គឺ​ពួកគេ ក៏​ជា​នាយការិយាល័យ​ចៅក្រម​ស៊ើបសួរ​ព្រម​ទាំង​​ជា​នាយទាហាន មាន​ឋានន្តរសក្ដិ​ឧត្ដមសេនីយ៍ត្រី​និង​ទោ​ទៀត​ផង​។ ចំណែក​កូន​ទី​៣ លោក ន័យ ផូរច័ន្ទគង្គារ ក៏​កំពុង​ធ្វើការ​នៅ​ក្នុង​តុលាការយោធា​ដែរ។

ប្រភព​ដដែល​ឱ្យ​ដឹង​ថា អំពើពុករលួយ និង​គ្រួសារនិយម​នេះ បាន​ធ្វើ​ឡើងជា​ប្រព័ន្ធ និង​លាក់បាំង​បំផុត ដែល​សូម្បីតែ​ឈ្មោះ​ត្រកូល​ក៏​ផ្លាស់ប្ដូរ​ដែរ។ លោក ន័យ ថុល ក៏​ប្រមូល​សាច់ញាតិ​មួយ​ចំនួន​ទៀត ដូចជា លោក​ឧត្ដមសេនីយ៍ទោ នុត សោភ័ណ្ឌ ត្រូវជា​ប្អូនជីដូនមួយ កំពុង​កាន់​តួនាទី​ជា​អនុប្រធាន​តុលាការយោធា ជា​ចៅក្រម និង​ជា​នាយ​ការិយាល័យ​ហិរញ្ញវត្ថុ​។ លោក នុត សោភ័ណ្ឌ មាន​បងប្អូន​បង្កើត​ម្នាក់​ទៀត​ឈ្មោះ នុត សុផែន កំពុង​ធ្វើការ​ក្រោមបង្គាប់​របស់​លោក​។ ប្រភព​បន្ត​ថា សូម្បីតែ​អ្នក​បើក​ឡាន​ឱ្យ​លោក ន័យ ថុល ឈ្មោះ អ៊ូ សេរី ក៏​ត្រូវ​បាន​ដំឡើង​ឱ្យ​ធ្វើជា​ចៅក្រម​ដែរ​។ ក្រៅ​ពី​នេះ ចៅក្រម​មួយ​ចំនួន​ទៀត ក៏​ជា​សាច់ញាតិ និង​បក្ខពួក​របស់​លោក ន័យ ថុល ដែរ ដូចជា​លោក​ចៅក្រម ង៉ូវ វុទ្ធី ចៅក្រម ឃឹម សុឃាន និង​ចៅក្រម ពិន សំអឿន។

រីឯ​មន្ត្រី​គ្រាក់ៗ នៅ​ក្នុង​ស្ថាប័ន​នេះ​មួយ​ចំនួន ក៏​យក​គំរូ​តាម​លោក ន័យ ថុល ដែរ​ដោយ​ពួកគេ ប្រមូល កូន និង​សាច់ញាតិ​ចូល​ធ្វើការ​ជា​ហូរហែ​ដែរ​។ អនុរដ្ឋលេខាធិការ​ក្រសួងការពារជាតិ និង​ជា​ចៅក្រម​តុលាការ​យោធា នាយ​ឧត្ដមសេនីយ៍ ផ្កាយ​៤ លោក សាវ សុខ ក៏​មាន​កូនស្រី​ម្នាក់​ឈ្មោះ សុខ គីណូកត្តា ជា​ចៅក្រម​តុលាការ​យោធា និង​មាន​ឋានន្តរសក្ដិ វរសេនីយ៍ត្រី។ រីឯ​អនុប្រធាន​តុលាការ​យោធា និង​ជា​ចៅក្រម លោក​ឧត្ដមសេនីយ៍ទោ ប៉ោក ប៉ន មាន​កូន​ប្រុស​ឈ្មោះ ប៉ុន វណ្ណៈ ជា​ចៅក្រម។

ប្រភព​បន្ត​ថា ប្រធាន​តុលាការ​យោធា ក៏​ជាប់​ពាក់ព័ន្ធ​នឹង​អំពើពុករលួយ​ជាច្រើន​ករណី​ទៀត​ដែរ ដូចជា​កាត់​ប្រាក់ខែ​ចៅក្រម​ដែល​មិនមែន​ជា​សាច់ញាតិ ការ​ដំឡើង​តួនាទី​ឱ្យ​កូនចៅ​បក្ខពួក​របស់​ខ្លួន និង​ការ​ពន្យា​ពេល​ចូលនិវត្តន៍​ចំនួន ៧​លើក និង​ស៊ីដាច់​លុយ​មន្ត្រី​ខ្សែ​បណ្តោយ អស់​ម្នាក់ៗ ប្រហែល ជា ២​ពាន់​ដុល្លារ​ទៅ ២​ពាន់​៥​រយ​ដុល្លារ ក្នុង​ការ​សូក​ប៉ាន់​ឱ្យ​លោក ន័យ ថុល បញ្ចូល​សាច់ញាតិ​ជា​នាយទាហាន ប៉ុន្តែ​ត្រូវ​បាន​លោក ទៀ បាញ់ បដិសេធ។ ករណី​ទាំងនេះ មន្ត្រី​ក្នុង​តុលាការ​យោធា​ធ្លាប់​ប្តឹង​ទៅ​អង្គភាព​ប្រឆាំង​អំពើពុករលួយ​ដែរ​ក្នុង​អំឡុង​ឆ្នាំ​២០១៦ ប៉ុន្តែ​ពុំ​មាន​ការស៊ើបអង្កេត​អ្វី​ឡើយ បន្ទាប់ពី​មាន​លិខិត​ឆ្លើយ​បំភ្លឺ​ពី​លោក ន័យ ថុល។

ចំពោះ​ភាព​យឺតយ៉ាវ​ក្នុង​ការ​ស៊ើបអង្កេត និង​ការ​បដិសេធ​ព័ត៌មាន​ថា តុលាការយោធា មាន​បញ្ហា​បក្ខពួក​និយម​គ្រួសារនិយម​នេះ ត្រូវ​បាន​មន្ត្រី​ដែល​ទម្លាយ​ព័ត៌មាន​រិះគន់​បន្ថែម​ថា ក្រសួង​ការពារ ជាតិ គ្មាន​ឆន្ទៈ​ស៊ើបអង្កេត​ករណី​នេះ​ទេ ហើយ​កំពុងតែ​រក​វិធី​ការពារ​មនុស្ស​ទាំងនោះ​ថែមទៀត​។ មន្ត្រី​រូប​នេះ អះអាង​ថា ព័ត៌មាន​ដែល​ទម្លាយ​គឺជា​ការពិត និង​មាន​ឯកសារ​ច្បាស់លាស់​ត្រឹមត្រូវ​ជាច្រើន ដូច្នេះ​ពួកគេ​សង្ឃឹមថា រដ្ឋាភិបាល ជាពិសេស​ក្រសួងការពារជាតិ នឹង​ស៊ើបអង្កេត​ដោយ តម្លាភាព​លើ​ស្ថាប័ន​តុលាការយោធា និង​អនុវត្ត​តាម​អភិក្រម​ទាំង​៥​របស់​រដ្ឋាភិបាល​ក្នុង​ការ​វះ​កាត់ យក​សាច់​ស្អុយ​បោះចោល។ ក្នុង​ករណី​ក្រសួង​ការពារជាតិ គ្រាន់តែ​ធ្វើការ​ស៊ើបអង្កេត​បែប​បង្គ្រប់​កិច្ច នោះ គឺ​ពួកគេ​នឹង​ទម្លាយ​ឯកសារ​ផ្លូវការ​ជាច្រើន​ទៀត ហើយ​ក្រសួង​ការពារជាតិ ក៏​នឹង​រង​​ភាព​​អាម៉ាស​ដែរ​។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (Licadho) លោក អំ សំអាត លើកឡើង​ថា ក្រសួងការពារជាតិ គួរតែ​បើក​ការស៊ើបអង្កេត​ដោយ​តម្លាភាព និង​យក​ភស្តុតាង​មក​បញ្ជាក់​ឱ្យ​បាន​ត្រឹមត្រូវ​ចំពោះ​ការចោទប្រកាន់​នេះ ពោល​គឺ​មិន​អាច​ចេះតែ​ឆ្លើយតប​នោះ​ទេ​។ លោក​បន្ត​ថា ប្រសិនបើ​ស្ថាប័ន​មួយ​មាន​បញ្ហា​បក្ខពួក​គ្រួសារនិយម គឺ​វា​នាំ​ឱ្យ​មាន​អំពើពុករលួយ និង​ធ្វើ​ឱ្យ​ប៉ះពាល់​មុខមាត់​ស្ថាប័ន​ព្រម​ទាំង​ខូចខាត​ផលប្រយោជន៍​ជាតិ៖ «ប្រសិន​បើ​ជា​ក្រសួង​ការពារជាតិ លោក​ធ្វើការ​ស៊ើបអង្កេត​ហើយ​រក​ឃើញ​ការពិត គឺ​ត្រូវតែ​មាន​វិធានការ​ហើយ ដើម្បី​ជា​ផល​ប្រយោជន៍ របស់​ស្ថាប័ន មុខមាត់​ស្ថាប័ន និង​ផលប្រយោជន៍​ក្រសួង និង​ជាតិ។ ហើយ​ប្រសិនបើ​រក​ឃើញ​ការ​ពិតតែ​មិន​មាន​វិធានការ​គឺជា​បង្ហាញ​ថា ជា​ការ​បរាជ័យ​ក្នុង​ការ​បំបាត់​នូវ​បញ្ហា​បក្ខពួក​និយម និង​អំពើពុករលួយ​នៅ​ក្នុង​ស្ថាប័ន​មួយ​ដែល​គឺជា​ឧទាហរណ៍​ទេ»

មេដឹកនាំ​របប​ក្រុងភ្នំពេញ លោក ហ៊ុន សែន ធ្លាប់​បាន​ប្រកាស​យ៉ាង​ដាច់អហង្ការ មិន​ឱ្យ​មាន​ករណី​ក្រុម​គ្រួសារនិយម​នៅ​ក្នុង​ស្ថាប័ន​តែមួយ​នោះ​ឡើយ ក៏ប៉ុន្តែ​ស្ថានភាព​ជាក់ស្ដែង ស្ទើរ​គ្រប់​ស្ថាប័ន​រដ្ឋ​ទាំងអស់​កំពុងតែ​ចាក់ស្រេះ​ដោយ​បញ្ហា​គ្រួសារ ឬ​បក្ខពួក​និយម​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល