កសិករថា​ចង់​លក់​មេ​​ទា​​​ យក​លុយ​​​​​​សង​ធនាគារ​វិញ​បើ​តម្លៃ​ស៊ុត​ នៅ​តែ​​ធ្លាក់​ថ្លៃ

យន់ សាមៀន
2020.12.26
កសិករថា​ចង់​លក់​មេ​​ទា​​​ យក​លុយ​​​​​​សង​ធនាគារ​វិញ​បើ​តម្លៃ​ស៊ុត​ នៅ​តែ​​ធ្លាក់​ថ្លៃ
បណ្ដាញសង្គម

កសិករ​​ចិញ្ចឹម​ទា​ យកស៊ុត​​ ត្រៀម​លក់​មេ​ទា ដើម្បី​យក​លុយ ​ទៅ​សង​​បំណុល​ធនាគារ​វិញ​​។ ពួកគេ ប្រាប់​ថា តម្លៃ​​ស៊ុត​ទា​ ធ្លាក់​ចុះ​ខ្លាំង​ មិន​ធ្លាប់​មាន ដែល​បណ្ដាល​ ឲ្យ​​​ខាត​បង់​ច្រើន។ អ្នក​ជំនាញ​កសិកម្ម ជំរុញ​​ឲ្យ​អាជ្ញាធរ ធានា​កុំ​ឲ្យ​មាន​ការ​នាំ​ចូល​ស៊ុត​ ពី​ប្រទេស​ជិត​ខាង មក​លក់​នៅ​ក្នុង​ស្រុក និង ​ត្រូវ​រក​យន្ត​ការ ​ជួយ​ឲ្យ​ស៊ុត​ទា​ មាន​តម្លៃ ​គ្រាន់​បើ​ ឡើងវិញ។

ក្រុម​កសិករ​​​ចិញ្ចឹម​ទា​យក​ស៊ុត​លក់​​​​ អះអាង​ដូច​ៗ​ គ្នា​ថា មួយ​រយៈ​ចុង​ក្រោយ​នេះ ស៊ុតទា ឬពងទា ធ្លាក់ថ្លៃខ្លាំង មិន​ធ្លាប់​​មាន​ពីមុន​មកទេ។ ពួកគេ សង្ស័យ​ថា មាន​ការ​​លួច​​​នាំ​ស៊ុត​ទា​ ពី​ប្រទេស​ក្បែរ​ខាង​​ ពិសេស​ពី​ប្រទេស​វៀតណាម​ មក​លក់​​នៅ​កម្ពុជា ទើប​បណ្ដាល​ឲ្យ​តម្លៃលក់ក្នុងស្រុក​ធ្លាក់​ចុះ​ខ្លាំង​។ 

កសិករ​​​​ចិញ្ចឹម​ទា ម្នាក់​ នៅ​ស្រុក​ជីក្រែង ខេត្ត​សៀមរាប​លោក ចាន់ ចក និយាយ​ថា ឈ្មួញ​កណ្ដាល​ ​ដែល​ទទួល​ទិញ​ស៊ុត​ទា​ បាន​ប្រាប់​លោក ថា ការ​ធ្លាក់​ថ្លៃ​ គឺ​គ្រប់​​កន្លែង​ចិញ្ចឹម​​ទាំងអស់​ទូទាំង​ប្រទេស ព្រោះ ​មាន​​ស៊ុត​ទា​ លួច​នាំ​ចូល ​ពី​ប្រទេស​ជិត​ខាង​មក​លក់ ក្នុង​តម្លៃ​ថោក​ជាង​។ 

«ខាង​ដេប៉ូ គេ​ថា មាន​ឈ្មួញ គេ​ដឹក​(ស៊ុត)​មក​ពី​បរទេស ចូល​មក​ខ្មែរ បាន​ជា​ខ្មែរ​យើង​លក់​អត់​ដាច់។ សង្កេត​មើល​ ដូចជា តាម​ទីផ្សារ​អ្វី អត់​មាន​​ពង​ទា ឯណា មក​ពី​បរទេស មាន​តែ​ពង​ទា​ក្នុង​ស្រុក​ (លក់)។ មុន​ដំបូង​យក​លុយ​ធនាគារ (ចិញ្ចឹម​ទា) ដល់​យូរ​ឆ្នាំ​ទៅ កាក់​កប លែង​ជំពាក់​ហើយ។» 

លោក ចាន់ ចក ​​ចិញ្ចឹម​ទា ប្រមាណ​មួយ​ពាន់ ប្រាំ​រយ​ (១ ៥០០)​ក្បាល ឲ្យ​ដឹង​ថា មួយ​ថ្ងៃ លោក​ប្រមូល​ស៊ុត​​បាន ប្រហែល​មួយ​ពាន់ ពីរ​រយ​ (១ ២០០)​គ្រាប់។ លោក​ថា រយៈ​ពេល​២​ថ្ងៃ ឈ្មួញ​ នឹង​មក​ទទួល​យក​ស៊ុត​ទា​ ពី​លោក​ម្ដង បាន​​ខ្ទង់​ជាង​ពីរ​ពាន់ (២ ០០០)​គ្រាប់ ដោយ​គិត​តម្លៃ ​រាប់​ជា​គ្រាប់។ លោក ថា ចំនួន​ទា ជាង​​១ ៥០០​ក្បាល​នេះ ស៊ី​ចំណី​អស់​​​៧​បាវ ក្នុង​មួយ​ថ្ងៃ ហើយ​ចំណី​ មួយ​បាវ ​ថ្លៃ ជិត​បួន​ម៉ឺន​រៀល ឬ​​ប្រហែល​ដប់​ដុល្លារ។ 

លោកឱ្យដឹងថា ពងទាសម្រាប់​យក​ទៅធ្វើម្ហូប ​​ធ្លាប់​លក់​បាន មួយ​គ្រាប់​​ជាង​បួន​រយ​(៤០០)​រៀល បែរ​ធ្លាក់​មក​នៅ​បី​​រយ​(៣០០)​រៀល​ ក្នុង​មួយ​គ្រាប់។ ឯ​​​​ ពង​ទា​កូន​ ​និងពង​ទា​សម្រាប់​​​​ភ្ញាស់វិញ​ ​ធ្លាប់​លក់​បាន​មួយ​គ្រាប់ ជាង​ប្រាំ​រយ(៥០០)​រៀល ឥឡូវនៅសល់​​​ជិត​បួន​(៣៨០)​​រៀល​​។ កសិករ ចាន់ ចក អះអាង​ថា ប្រសិនបើ ​​​តម្លៃ​ស៊ុត​ទា​ នៅ​តែ​បន្ត​​ធ្លាក់ថ្លៃបែបនេះ លោក​មិន​អាច​ទូទាត់​ថ្លៃ​ចំណី​ទា​​បាន​ទេ​ ហើយគ្រួសាររបស់​លោក នឹង​បោះ​បង់ មុខ​របរ​ចិញ្ចឹម​ទា ហើយ​ប្ដូរ​មក​ប្រកប​របរ​ធ្វើ​ស្រែ​វិញ។ 

«ទាក់​ទង​នឹង​តម្លៃ បើ​សិន​ជា​តម្លៃ​នៅ​តែ​អ៊ីចឹង​ទៀត ពិបាក​ទទួល​យក​ណាស់។ និយាយ​ថា ប្រឈម​នឹង​បរាជ័យ នឹង​អាច​លក់​(​មេ​ទា)​ចេញ។ រក​(​ការងារ​)​ថ្មី​ធ្វើ តែ​កូរ៉ូណា មាន​អ្វី មាន​តែ​(​ធ្វើ​)​ស្រែ​ចម្ការ​ហ្នឹង​ឯង។»​ 

ស្រដៀងគ្នានេះ កសិករ​ចិញ្ចឹម​ទា ម្នាក់​ទៀត នៅ​ស្រុក​គូលែន ខេត្ត​ព្រះវិហារ លោក អោក ចន្ថា ព្រួយ​បារម្ភថា​ បើ​ស៊ុត​ទា​​នៅ​តែ​បន្ត​ធ្លាក់​ថ្លៃទៀត គ្រួសារ​លោក​ នឹង​ជួប​បញ្ហា ​​គ្មាន​លុយ​សង​ធនាគារ​វិញ​ទេ។ លោក មិន​​ដឹង​ថា ស៊ុត​ទា​ ធ្លាក់​ថ្លៃ​ខ្លាំង ដោយសារ​អ្វីឱ្យ​ពិតប្រាកដនោះ​ទេ តែ​លោក​ឃើញ​ឈ្មួញ​កណ្ដាល ដឹក​ស៊ុត​ទា​ ទាំង​ឡានៗ តាម​​ផ្លូវ​ រាល់​ថ្ងៃ។ អ្នក​​​ចិញ្ចឹម​ទា​​រូប​នេះ ក៏​សង្ស័យ​ថា ​មាន​ការ​នាំ​ចូល​ស៊ុត​ទា​ ពី​ប្រទេស​ជិត​ខាង​ មក​លក់​លើ​ទី​ផ្សារ​ដែរ ទើប​បណ្ដាល​ឲ្យ​តម្លៃ​ស៊ុត​ទា​ ធ្លាក់​ថ្លៃ​ខ្លាំងបែបនេះ។ 

«ឧទាហរណ៍​ថា យើង​លក់​(​ស៊ុត)​បាន​១០​ម៉ឺន (រៀល)​ ចំណី​វា​ត្រូវ​ស៊ី​វិញ​ ១១​ម៉ឺន។ ខ្ញុំ​ធ្លាក់​ខ្លាំង ធ្លាក់​២​ខែ ធ្លាក់​ខ្លាំង​មែន​ទែន។ មួយ​ថ្ងៃ​អន់​(​ខាត)​បំផុត វា​ចូល​បី បួន​ ម៉ឺន បាត់​ហើយ​អូន។ ១០​ថ្ងៃ សាម សែសិប​ម៉ឺន។ អា​នេះ តិច​ផង ទម្រាំ​​អា​ផល​ច្រើន​ វា​ឱ្យ​ វា​ខាត​ច្រើន​ជាង​នេះ​ទៀត ព្រោះ​វា​ច្រើន​។ ខ្ញុំ​ឆ្ងល់​ថា វា​អ៊ីចេះ​ គេ​អ្នក​ចិញ្ចឹម​ច្រើន រី​ឯ​កម្មករ​ផង ម្ដេច​គេ​លក់​(តម្លៃ) ​ប៉ិន​ហ្នឹង​ ​វា​ចំណេញ។ ឯ​ខ្ញុំ​ ពលកម្ម​អ្វី ធ្វើ​ខ្លួន​​ឯង​ទាំង​អស់​ ឲ្យ​ចំណី​អ្វី​ដូច​គេ ហើយ​អត់​ចំណាយ​(ពលកម្ម)​ទេ ហើយ​ម្ដេច​បាន​នៅ​តែ​ខាត។ (សួរ​មន្ត្រី​) គេ​មិន​ចាប់​អារម្មណ៍​នឹង​យើង​សោះ។ បន្ថែម​យ៉ាង​ណា និយាយ​យ៉ាង​ម្ដេច​ទៀត ប្រាប់​គេ​ទៅ គេ​ថា មក​ពី​កូរ៉ូណា។ ប្រាប់​គេ​ទៅ គេ​ថា គ្មាន​ពង​ទា​យួន​មក​ទេ ខែ​នេះ វា​ថោក​អ៊ីចឹង​ឯង។ តែ​ ថោក ក៏​វា​មិន​ដូច​ខែ​នេះ​ដែរ រាល់​ឆ្នាំ វា​មាន​កម្រិត​របស់​វា។ តែ​ឆ្នាំ​នេះ សេរ៉ូ តែ​ម្ដង។»​ 

​ចំណែក ម្ចាស់​ដេប៉ូ​​ឈ្មោះ ស៊ី ណាក់ ដែល​ ទទួល​ទិញ​ស៊ុត​ទា​ ស្ថិត​នៅ​ឃុំ​ស្រយ៉ង់ ស្រុក​គូលែន ខេត្ត​ព្រះ​វិហារ ឲ្យ​ដឹង​ថា តម្លៃ​ស៊ុត​ ពិត​ជា​ធ្លាក់​ថ្លៃ​ខ្លាំង​មែន។ លោក អះអាង​ថា មួយ​រយៈពេល​ចុង​ក្រោយ​​​នេះ​ ក្រោយ​ពី​ប្រមូល​ទិញ​ស៊ុត​ទា​​​ចូល​ដេប៉ូ​ហើយ លោក​​ក៏​ពិបាក​លក់​ចេញ​វិញ​ដែរ ដោយសារ​តម្លៃ​ប្រែប្រួល​លឿន​។ លោក មិន​ដឹង​ថា ​​ការ​ធ្លាក់​ថ្លៃ ស៊ុត​ទា​ ដោយសារ​​មូលហេតុ​អ្វី​ទេ។ 

«តម្លៃ​ទាប​ជាង​​មុន។ ​យើង​ប្រៀប​ផ្ទឹម​នឹង​ខែ​១១ វា​ខុស​គ្នា​ឆ្ងាយ។ ភាគ​ច្រើន​ខ្ញុំ​ អត់​សូវ​​ដឹង​ពី​មូលហេតុ​ដែរ។ ភាគ​ច្រើន ខ្ញុំ​នៅ​ខេត្ត​ព្រះវិហារ ពង​ទា ពង​មាន់​អ្វី ខ្ញុំ​យក​មក​ពី​ខាង​ស្គន់។ តំបន់​ហ្នុង​ សម្បូរ​គេ​ចិញ្ចឹម កសិករ​សម្បូរ​ចិញ្ចឹម។ ពង​ទិញ​ថ្មី ២៨០​(រៀល)​។ ភាគ​ច្រើន​ខ្ញុំ​ទទួល​ទិញ​ពី​កសិករ​មក ខ្ញុំ​លក់​ទៅ​តាម​ផ្សារ។ ណា​មួយ​ខ្ញុំ ជា​អាជីវករ​លក់​នៅ​តាម​ផ្សារ​អ៊ីចឹង​ដែរ​ណា។»​ 

​​​ពាក់ព័ន្ធ​​តម្លៃ​ស៊ុត​ទា​​ធ្លាក់​ថ្លៃ​នេះ អាស៊ី​សេរី មិន​អាច​សុំ​ការ​បញ្ជាក់ ​ពី​​អ្នក​នាំ​ពាក្យ​ក្រសួង​កសិកម្ម រុក្ខា​ប្រមាញ់ និង​នេសាទ លោក ស្រី វុឌ្ឍី បាន​ទេ នៅ​ថ្ងៃ​ទី​២៦ ធ្នូ ដោយសារ​ទូរស័ព្ទ​រោទ៍ ​គ្មាន​អ្នក​ទទួល​។ ប៉ុន្តែ​​រដ្ឋ​មន្ត្រី លោក វេង សាខុន បាន​អះអាង​ លើ​ហ្វេសប៊ុក(​facebook) ថា​ក្រសួង​មិន​បាន​ចេញ​គោល​ការណ៍​ ឲ្យ​នាំ​​ស៊ុត​​បក្សី​ ចូល​កម្ពុជា​ឡើយ។ បន្ថែម​ពី​នេះ​ ក្រសួង​កសិកម្ម ​​ចេញ​​សេចក្ដី​ប្រកាស​ព័ត៌មាន កាល​ពី​ថ្ងៃ​ទី​២១ ធ្នូ ដោយទទួល​ស្គាល់​ថា តម្លៃ​​ស៊ុត​ទា​ ពិត​ជា​ធ្លាក់​ចុះ និង​មាន​តម្លៃ​ មិន​ដល់​បី​រយ (២៨០)​រៀល ទេ ក្នុង​មួយ​គ្រាប់។ 

ក្រសួង​ អះអាង​ថា តម្លៃ​ស៊ុត​ភ្ញាស់ និង​ស៊ុត​ទា​ធម្មតា ​នៅ​ប្រទេស​វៀតណាម មាន​តម្លៃ​ប្រហាក់​ប្រហែល​គ្នា នឹង​តម្លៃ​ នៅ​ប្រទេស​កម្ពុជា​បច្ចុប្បន្ន។ ម្យ៉ាង​ទៀត ក្រសួង​កសិកម្ម យល់​ថា ការ​ធ្លាក់​ថ្លៃ​​​ស៊ុត​ទា ​ដោយសារ ពលរដ្ឋ​ផ្អាក​ពិធី​ជប់លៀង​ ក្នុង​​វិបត្តិ​ជំងឺ​កូវីដ​១៩(Covid-19) ការ​កើន​ឡើងអ្នក​ចិញ្ចឹម​សត្វ​យក​ស៊ុត​ទូទាំង​ប្រទេស និង​ពលរដ្ឋ​​ខ្លះ ងាក​មក​បរិភោគ​ត្រី ជំនួស​ស៊ុត​បក្សី ក្នុង​រដូវសម្បូរ​ត្រី​ ជាដើម។ 

ទោះ​យ៉ាង​ណា ក្រសួង​កសិកម្ម ពុំ​បាន​បញ្ជាក់រឿង​​ករណី​លួច​ នាំ​ចូល​ស៊ុត​ពី​ប្រទេស​ក្បែរ​ខាង​ចូល​កម្ពុជា​នោះទេ។ តែ​ក្រសួង​ លើក​ទឹក​ចិត្ត​ឲ្យ​​អ្នក​ពាក់ព័ន្ធ​រាយការណ៍​ទៅ​អាជ្ញាធរ ដើម្បី​ចុះ​បង្ក្រាប​ ប្រសិន​បើ ​ដឹង​ពី​ករណី​ លួច​នាំ​ស៊ុត​មាន់ ស៊ុត​ទា ពី​ប្រទេស​ជិត​ខាង ចូល​កម្ពុជា។ 

ចំណែក​មន្ទីរ​កសិកម្ម​តាម​ខេត្ត​មួយ​ចំនួន​ ក៏​​បាន​ចេញ​សេចក្ដី​ប្រកាស​ព័ត៌មាន​ បង្ហាញ​​ហេតុផល​នៃ​តម្លៃ​ស៊ុត​ទា តាម​តំបន់​របស់​ខ្លួន​ធ្លាក់​​ថ្លៃ​ដែរ។ មន្ទីរ​កសិកម្ម​​ខេត្ត​ខ្លះ​ អះអាង​ថា រដូវ​រំហើយ ជា​ខែ​ទា​ ​សំបូរ​ចំណី​តាម​វាល​ស្រែ ជាហេតុ​ធ្វើ​ឲ្យ​មេ​ទា ផលិត​បាន​ស៊ុត​ច្រើន និង​​វិបត្តិ​ជំងឺ​កូវីដ​១៩ ធ្វើ​ឲ្យ​អ្នក​លក់​មី​ឆា លត​ឆា បាយ​ឆា ខ្លះ​ ផ្អាក​អាជីវកម្ម ​​បណ្ដាល​ឲ្យ​​តម្រូវ​ការ​ស៊ុត​ទា ថយ​ចុះ​ ជាដើម។​​​ 

​ប្រធាន​សមាគម​កសិករ ​​ដើម្បី​អភិវឌ្ឍ​ជីវភាព​​ លោក ស៊ុម ម៉ាណែត ព្រួយបារម្ភ​ថា បើ​តម្លៃ​ស៊ុត​​ទា នៅ​តែ​បន្ត​ធ្លាក់ចុះបែបនេះ​ ជីវភាព​កសិករចិញ្ចឹម​ទាយក​ស៊ុត នឹង​​​គ្មាន​លទ្ធភាព​សង​​បំណុល​ធនាគារឡើយ។ លោក ជំរុញ​ឲ្យ​រដ្ឋាភិបាល អន្តរាគមន៍​ដោះស្រាយ​បញ្ហា​​​នេះ ដោយ​ផ្ដើម​ចេញ ពី​ការ​ធានា​ឲ្យ​បាន​ថា គ្មាន​ការ​លួច​នាំ​ចូល​ស៊ុត​ពី​ប្រទេស​ជិត​ខាង​ចូល​កម្ពុជា និង​ត្រូវ​រក​យន្ត​ការ​ជួយ​ដោះស្រាយ​បញ្ហា ​ចំពោះ​មុខ​របស់​អ្នក​ចិញ្ចឹម​ទា។ ជា​ពិសេស លោក ​ចង់​ឲ្យ​រដ្ឋាភិបាល​​​​ជួយ​សម្រួល ​​ ដល់​កសិករ​ចិញ្ចឹម​ទា​​ខ្លះ​​ ដែល​គ្មាន​លទ្ធភាព​​សង​​បំណុល​ធនាគារ អាចពន្យារពេល​ក្នុងការសង​បំណុល។ 

«រាជរដ្ឋាភិបាល​ដដែល​ គាត់​គួរ​តែ​ឲ្យ​​មាន​មន្ត្រី នៅ​តាម​ច្រក​របស់​គាត់​ហ្នឹង​ ឲ្យ​បាន​ច្បាស់​លាស់ បញ្ជាក់​ឲ្យ​បាន​ច្បាស់​លាស់ ថា​តើ​ទំនិញ​អស់​ហ្នឹង​​ វា​មាន​គុណ​ភាព​​ឬ​នៅ តម្លៃ​សមរម្យ​ឬ​នៅ? ដើម្បី​ឲ្យ​ការ​នាំ​ចូល​ក្នុង​ស្រុក​។ សម្រាប់​ទី ៣ កសិករ គួរ​តែ​ចងក្រង​ជា​សហគមន៍​រួម​មួយ សម្រាប់​អ្នក​ផ្គត់ផ្គង់ ឬ​អ្នក​ចិញ្ចឹម​ទា ដើម្បី​ស្នើសុំ​ទៅ​មន្ត្រី​ពាក់ព័ន្ធ​ក្រសួង​កសិកម្ម ឲ្យ​ទិញ​ទំនិញ​របស់​គាត់​ ឲ្យ​មាន​តម្លៃ​ខ្ពស់​ជាង​ហ្នឹង ឬ​មួយ​ឲ្យ​កសិកម្ម មាន​តម្លៃ​សម​​រម្យ អាច​ឲ្យ​គាត់​ រួច​ផុត​ពី​ការ​ជំពាក់​ធនាគារ​ផង​ដែរ។»​​ 

​​​​​​​​ក្រុម​កសិករ​ចិញ្ចឹម​ទា និយាយ​ថា បើ​ទោះ​ជា​តម្លៃចុះថោក​​ បែប​ណាក៏ដោយ ក៏​ពួក​គេត្រូវ​តែ​បង្ខំ​ចិត្ត​លក់​ចេញដែរ ដើម្បី​បាន​លុយ​ខ្លះ ទិញ​ចំណីទុក​ឲ្យមេ​ទា​​ស៊ី​វិញ ព្រោះស៊ុត​​ទា​ មិន​អាច​ស្ដុក​ទុក​បាន​ទេ ហើយ​មេ​​ទា នឹង​ផលិត​ស៊ុត ជា​​បន្តបន្ទាប់។ ក្រុម​កសិករ ​ស្នើយ៉ាង​ទទូច ​ដល់​រដ្ឋាភិបាល​ ​ជួយ​អន្តរាគមន៍យ៉ាងណាឱ្យ​តម្លៃស៊ុតទា​វិល​មក​ធម្មតាវិញ បើ​ពុំដូច្នេះទេ ពួក​គេ​នឹង​ត្រូវ​បង្ខំ​ចិត្ត​បោះបង់​ចោល​មុខ​របរមួយនេះ​៕​​

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។