តុលាការ​​ខេត្ត​ព្រះសីហនុ​ចោទ​ប្រកាន់​​ជនជាតិ​ចិន ៤នាក់ ពាក់ព័ន្ធ​នឹង​ការ​​បាក់​អគារ​ស្លាប់​​មនុស្ស​ជា​ច្រើន​នាក់​

ដោយ សុ ជីវី
2019-06-25
អ៊ីម៉ែល
មតិ
Share
បោះពុម្ព
ក្រុម​អ្នក​សង្គ្រោះ​កំពុង​សែង​ជន​រងគ្រោះ​ចេញ​ពី​គំនរ​ឥដ្ឋ និង​ឆ្អឹង​ដែក នៃ​អគារ​ ៧ជាន់ ដែល​បាក់រលំ​សង្កត់​កម្មករ​ស្លាប់ និង​របួស​ជាង ៥០នាក់ កាល​ពី​ព្រលឹម​ថ្ងៃ​ទី២២ ខែ​មិថុនា ឆ្នាំ២០១៩។
ក្រុម​អ្នក​សង្គ្រោះ​កំពុង​សែង​ជន​រងគ្រោះ​ចេញ​ពី​គំនរ​ឥដ្ឋ និង​ឆ្អឹង​ដែក នៃ​អគារ​ ៧ជាន់ ដែល​បាក់រលំ​សង្កត់​កម្មករ​ស្លាប់ និង​របួស​ជាង ៥០នាក់ កាល​ពី​ព្រលឹម​ថ្ងៃ​ទី២២ ខែ​មិថុនា ឆ្នាំ២០១៩។
រូប៖ ហ្វេសប៊ុក

សាលាដំបូងខេត្ត​ព្រះ​សីហនុ សម្រេច​​ចោទ​ប្រកាន់​មនុស្ស ៧នាក់ ពាក់ព័ន្ធ​នឹង​ការ​​បាក់​អគារ​កម្ពស់ ៧ជាន់​បណ្ដាល​ឲ្យ​កម្មករ​សំណង់ខ្មែរចំនួន ២៨នាក់ស្លាប់ និង ២៦នាក់​​របួស។ ក្នុង​នោះ​ចៅក្រម​បាន​សម្រេច​ឃុំ​ខ្លួន​បណ្ដោះអាសន្ន​ជនជាតិ​ចិន ៤នាក់ ចំណែក ៣​នាក់​ទៀត ដែល​មាន​ខ្មែរផង​ ចិន​ផង ទើប​ត្រូវ​បាន​ចោទ​ប្រកាន់​ថ្មី​បន្ថែម។ សង្គម​ស៊ីវិល ជំរុញ​ឲ្យ​តុលាការ​ផ្តន្ទាទោស​ពាក់ព័ន្ធ​ទាំង​អស់​ឲ្យ​បាន​ធ្ងន់ធ្ងរ​តាម​​ច្បាប់។

ចៅក្រម​ស៊ើបសួរ​សាលាដំបូង​ខេត្ត​ព្រះសីហនុ លោក សុក ហេង បាន​ចេញ​ដីកា​បង្គាប់​ឲ្យ​ឃុំ​ខ្លួន​ជន ជាតិ​ចិន​ចំនួន ៤នាក់ ក្រោយ​ចោទ​ប្រកាន់​ផ្សេងៗ គ្នា បន្ទាប់​ពី​ពួក​គេ​បាន​សាងសង់​អគារ​កម្ពស់ ៧ជាន់ ដោយ​គ្មាន​ច្បាប់​អនុញ្ញាត​ពី​អាជ្ញាធរ​កម្ពុជា និង​សាងសង់​ខុស​បច្ចេកទេស បណ្ដាល​ឲ្យ​រលំ​បាក់ អគារ​សង្កត់​កម្មករ​ខ្មែរ ដែល​ស៊ី​ឈ្នួល​ធ្វើ​ការ​សំណង់​នៅ​ទីនោះ ស្លាប់​ចំនួន ២៨នាក់ និង​របួស​ធ្ងន់ ស្រាល​ចំនួន ២៦នាក់។

ចៅក្រម​ស៊ើបសួរ​ចោទ​ប្រកាន់​ម្ចាស់​ការដ្ឋាន​សំណង់​ឈ្មោះ ចេង គុន (Cheng Kun) អាយុ ៣៩ឆ្នាំ និង​ម្ចាស់​ក្រុមហ៊ុន​ម៉ៅការ​សំណង់ ស៊ី កាំង ថុង កុង ហ្គូ ជី ហៃសោវ (Xi Gang Tang Gong Gou Ji Haisao) គឺ​លោក ដេង ហ្ស៊ីន ហ្គុល (Deng Xin Gul) វ័យ ៤៨ឆ្នាំ ពី​បទ​មនុស្ស​ឃាត​ដោយ​អចេតនា បង្ក​ឲ្យ​មាន​របួស​ដោយ​អចេតនា និង​ធ្វើ​ឲ្យ​ខូច​ខាត​ដោយ​ចេតនា មាន​ស្ថាន​ទម្ងន់​ទោស ដោយសារ​បង្ក​របួស​ស្នាម​ដល់​អ្នក​ដទៃ។ ចំណែក​ជាង​សំណង់​ឈ្មោះ ហ្គៅ យុ (Gao Yu) និង​ស្ត្រី​មើល​ការងារ​ក្នុង​ការដ្ឋាន ឈ្មោះ ហ្ស៊ី យ៉ា ភីង (Xie Ya Ping) ត្រូវ​បាន​ចោទ​ប្រកាន់​ពី​បទ​សម​គំនិត​ក្នុង​អំពើ​មនុស្ស​ឃាត​ដោយ​អចេតនា សម​គំនិត​ក្នុង​អំពើ​បង្ក​ឱ្យ​មាន​របួស​ដោយ​អចេតនា និង​សម​គំនិត​ក្នុង​អំពើ​ធ្វើ​ឱ្យ​ខូច​ដោយ​ចេតនា មាន​ស្ថាន​ទម្ងន់​ទោស ដោយសារ​បង្ក​របួស​ស្នាម​ដល់​អ្នក​ដទៃ តាម​មាត្រ២៩ មាត្រា២០៧ មាត្រា២៣៦ និង​មាត្រា៤១៤ នៃ​ក្រម​ព្រហ្មទណ្ឌ។

ក្នុង​រឿង​នេះ​ដែរ តំណាង​អយ្យការ​អម​សាលា​ដំបូង​ខេត្ត​ព្រះសីហនុ បាន​ចោទ​ប្រកាន់​មនុស្ស ៣នាក់​បន្ថែម​ទៀត ប៉ុន្តែ​មិន​បង្ហាញ​អត្តសញ្ញាណ​នោះ​ទេ គ្រាន់​តែ​ប្រាប់​ថា មនុស្ស ៣នាក់​នោះ គឺ​ជា​ជន​ជាតិ​ខ្មែរ និង​ជន​ជាតិ​ចិន។

អ្នក​នាំ​ពាក្យ​សាលា​ដំបូង​ខេត្ត​ព្រះ​សីហនុ លោក លឹម ប៊ុនហេង ប្រាប់​ប្រព័ន្ធ​ឃោសនា ដែល​ស្និទ្ធ​របប​ក្រុង​ភ្នំពេញ​ថា ពួក​គេ​ទាំង ៣នាក់​នេះ ត្រូវ​បាន​ចោទ​ប្រកាន់ ពី​បទ​សម​គំនិត​ក្នុង​អំពើ​មនុស្ស​ឃាត​ដោយ​អចេតនា សម​គំនិត​ក្នុង​អំពើ​បង្ក​ឲ្យ​មាន​របួស​ដោយ អចេតនា និង​សម​គំនិត​ក្នុង​អំពើ​ធ្វើ​ឲ្យ​ខូច​ដោយ​ចេតនា មាន​ស្ថាន​ទម្ងន់​ទោស​ដោយសារ​បង្ក​របួស ស្នាម​ដល់​អ្នក​ដទៃ។

អាស៊ី​សេរី មិន​អាច​សុំ​ការ​បញ្ជាក់​បន្ថែម​ពី​អ្នក​នាំ​ពាក្យ​សាលាដំបូង​ខេត្ត​ព្រះសីហនុ លោក ហួត វិចិត្រ បាន​ទេ ដោយ​ទូរស័ព្ទ​ចូល ប៉ុន្តែ​បាន​បិទ​ទៅ​វិញ ហើយ​អ្នក​នាំ​ពាក្យ​មួយ​រូប​ទៀត គឺ​លោក លឹម ប៊ុនហេង ទូរស័ព្ទ​ចូល​ពុំ​មាន​អ្នក​ទទួល។

រី​ឯ​អ្នក​នាំ​ពាក្យ​សាលា​ខេត្ត​ព្រះសីហនុ លោក ឃាង ភារម្យ ប្រាប់​អាស៊ី​សេរី​ថា ក្រុម​ការងារ​អន្តរ​ក្រសួង​កំពុង​ធ្វើ​ការ​ស៊ើប​អង្កេត​នៅ​ឡើយ៖ «មិន​ទាន់​សម្រេច​យ៉ាង​ណា​ទេ ព្រោះ​ក្រុម​ការងារ​កំពុង​តែ​ធ្វើ​ការ»

អាគារដែលបាក់រលំ​សង្កត់​កម្មករសំណង់ស្លាប់ និងរបួសច្រើននេះ មានកំពស់ ៧ជាន់ សង់​ពី​គ្រោង​ដែក មាន​បណ្តោយ ៣០ម៉ែត្រ និង​ទទឹង ១៥ម៉ែត្រ។ វា​ជា​អគារ​ថ្មី​កំពុង​សាងសង់ និង វិនិយោគ​ដោយ​ជនជាតិចិន។ អាគារ​នេះ មាន​ទីតាំង​ស្ថិត​ក្នុង​ភូមិ៣ សង្កាត់៤ ខេត្ត​ព្រះសីហនុ បាន​រលំ​ដួល​កាលកាលពីម៉ោង ៤ទៀបភ្លឺ ថ្ងៃទី២២ ខែមិថុនា។ អាជ្ញាធរខេត្តព្រះសីហនុ និងក្រសួង​ដែន​ដី​បញ្ជាក់​ថា​ អាគារ​នេះ សង់​ឡើង​ដោយ​គ្មានច្បាប់អនុញ្ញាត និងខុសបច្ចេកទេស ហើយ​អាជ្ញាធរ​បាន​ហាម​ឃាត់ ២ដងហើយ ប៉ុន្តែជនជាតិចិន ដែល​ជាម្ចាស់ការដ្ឋានមិនចូលរួមសហការ។

មន្ត្រីសប្របសម្រួលសមាគម អាដហុក ប្រចាំខេត្តព្រះសីហនុ អ្នកស្រី ជៀប សុធារី លើក​ឡើង​ថា ការ​ចោទ​ប្រកាន់​ជន​ជាតិ​ចិន​​ទាំង ៤នាក់ ពី​បទ​មនុស្ស​ដោយ​អចេតនា និង​ចោទ​ពី​បទ​សម​គំនិត​ក្នុង​អំពើ​មនុស្ស​ឃាត​អចេតនា​នេះ គឺ​ហាក់​ដូច​ជា​នៅ​ស្រាល មិន​សាក់សម​នឹង​អំពើ​របស់​ពួក​គេ​នោះ​ទេ។ លោក​ស្រី​ជំរុញ​ឲ្យ​តុលាការ​ផ្តន្ទាទោស​ជនជាតិ​​ចិន ដែល​បំពាន​ច្បាប់​កម្ពុជានេះឲ្យបានធ្ងន់ធ្ងរ៖ «តុលាការ​ចោទ​ប្រកាន់​ប៉ុណ្ណឹង វា​មិន​អាច​សម​ល្មម​ទទួល​យក បាន​សម្រាប់​យើង​ជា​សង្គម​ស៊ីវិល និង​ប្រជា​ពលរដ្ឋ​ទេ ព្រោះ​អី​ក្រុមហ៊ុន​សាងសង់​មួយៗ គាត់​មាន សមត្ថភាព​ឆ្លង​កាត់​ការ​បណ្ដុះបណ្ដាល​ហើយ​សុទ្ធតែ​មាន​ការ​ត្រួត​ពិនិត្យ​ត្រឹម​ត្រូវ​ហើយ​គាត់​ត្រូវ​ដឹង ថា អ្វី​ដែល​គាត់​កំពុង​ធ្វើ គឺ​ធ្វើ​ឲ្យ​មនុស្ស​រស់​នៅ​ប៉ុន្តែ​បើ​គាត់​ធ្វើ​ឲ្យ​ថ្លោះធ្លោយ​តែ​បន្តិច គឺ​ដឹង​ថា អាច​មាន​អ្នក​ស្លាប់ អ្នក​រង​គ្រោះ​ហើយ ដូច្នេះ​ម៉េច​នឹង​អចេតនា​កើត»

ទន្ទឹមគ្នានេះ អ្នកស្រី​ជំរុញឲ្យរដ្ឋាភិបាល ជាពិសេសគណៈកម្មការដែលបង្កើតឡើងដើម្បីស្រាវជ្រាវ រក​មូលហេតុ​នៃ​ការ​បាក់​រលំ​អគារ​នេះ ត្រូវពន្លឿនការងាររបស់ខ្លួនដោយឯករាជ្យនិងត្រឹមត្រូវដើម្បី លាត​ត្រដាង​ការ​ពិត និង​នាំ​ខ្លួន​អ្នក​ពាក់ព័ន្ធ ឬ​មន្ត្រី​ខិល​ខូច​​មួយ​ចំនួន ដែល​បណ្តោយ​ឲ្យ​សំណង់​អាគារ កម្ពស់ ៧ជាន់​របស់​ជន​ជាតិ​ចិន បន្ត​សាងសង់​ស្ទើរ​រួចរាល់​ទាំង​គ្មាន​ច្បាប់​អនុញ្ញាត៖ «អ៊ីចឹង​រឿង​នេះ មិន​មែន​អត់​ពាក់ព័ន្ធ​ជា​មួយ​មន្ត្រី​ខ្មែរ​យើង​ទេ គឺ​ពិត​ជា​មាន។ បើ​មិន​អ៊ីចឹង គេ​ម៉េច​នឹង​អាច​ធ្វើ​បាន ព្រោះ​វា គឺ​ជា​អាគារ មិន​មែន​គ្រាប់​ល្ង​ឯ​ណា ដែល​យើង​មើល​មិន​ឃើញ។ ឥឡូវ​នេះ​គេ​កំពុង​មើល​ត​ទៅ​ទៀត តើ​អ្នក​ណា​ខ្លះ ដែល​ពាក់ព័ន្ធ និង​ធ្វើ​មិន​ដឹង​មិន​ឮ រឿង​នេះ។ ជា​ធម្មតា ច្បាប់​បាន​តែងតាំង​ស្ថាប័ន​តាំង​ពី​ថ្នាក់​ជាតិ រហូត​ដល់​ថ្នាក់​ស្រុក បើ​និយាយ​ពី​រឿង អគារ​សំណង់ ហើយ​យើង​ចាំ​បាន​ថា ថ្នាក់​ជាតិ​បាន​បង្កើត​គណៈកម្មការ​ច្រើន​ណាស់ ដើម្បី​ចុះ​ជួយ​ខេត្ត​ព្រះសីហនុ​នេះ ព្រោះ​ខេត្ត​នេះ​មាន​ការ​អភិវឌ្ឍន៍​លឿន​ខ្លាំង​ណាស់។ ដូច្នេះ តើ​គណៈកម្មការ ដែល​ទទួល​បន្ទុក​លើ​ការងារ​សំណង់ ការងារ​បរិស្ថាន​អី​ទាំង​អស់​នេះ តើ​លោក​មាន​ដឹង​រឿង​នេះ​ទេ ឬក៏ លោក​ធ្វើ​អត់​ដឹង​អត់​ឮ​ទាំង​អស់​គ្នា»

អ្នក​ជំនាញ​ផ្នែក​ច្បាប់ លោក​មេធាវី សុក សំអឿន មានប្រសាសន៍ថា លោក​មិន​ដឹង​ថា តុលាការ​មាន​ភស្តុតាង​​អ្វី​​ខ្លះ​ក្នុង​ការ​ចោទ​ប្រកាន់​ជន​ជាតិ​ចិន​ទាំង ៤នាក់​នោះ​ទេ ប៉ុន្តែ​ប្រសិន​បើ​ជន​ជាតិចិន ដែល​ម្ចាស់​ការដ្ឋាន​សំណង់ និង​ក្រុមហ៊ុន​ម៉ៅ​ការ​សំណង់ ដឹង​ថា ការសាងសង់របស់ពួកគាត់ខុសបច្ចេកទេស និង​គ្មាន​ច្បាប់​អនុញ្ញាត ហើយ​នៅ​តែ​បំពាន​ទៀត គឺ​ត្រូវ​មាន​ទោស​ធ្ងន់ធ្ងរ ព្រោះបណ្តាលឲ្យ មនុស្ស​ស្លាប់ និង​របួស​ច្រើន​នាក់។ លោក​ពន្យល់​ទៀត​ថា អាជ្ញាធរ​ពាក់ព័ទ្ធ​របស់​រដ្ឋាភិបាល​ក៏​ប្រឈម ចំពោះ​​មុខ​​ច្បាប់​​ដែរ ប្រសិន​បើ​រក​ឃើញ​ថា ដើម​ហេតុ​ដួល​រលំ​អគារ​នេះ វា​កើត​ឡើង​ពី​ការ​ធ្វេស​​ប្រហែស ឬ​​ទទួល​ផល​ណា​មួយ ជា​ថ្នូរ​នឹង​មិន​ចាត់​វិធានការ​ច្បាប់៖ «ចំពោះ​រឿង​សំណង​ជន​រង​គ្រោះ គឺ​ជា​រឿង​មួយ។ ប៉ុន្តែ រឿង​ការ​ទទួល​ខុស​ត្រូវ រឿង​ការ​សាង​សង់​នេះ គឺ​ថា អាជ្ញាធរ​មាន​សមត្ថកិច្ច ជា​ពិសេស តុលាការ ឬ​ក្រសួង​មាន​សមត្ថកិច្ច គួរ​តែ​ធ្វើ​ការ​ស៊ើប​អង្កេត​ឲ្យ​បាន​ល្អិតល្អន់។ ទី១ ហេតុ​អី​បាន​ជា​អត់​មាន​ច្បាប់​អនុញ្ញាត ហើយ​ហេតុ​អី បាន​ជា​អាជ្ញាធរ​អត់​ហ៊ាន​ឃាត់ អត់​ហ៊ាន​ប្រើ​កម្លាំង​ទៅ​ឃាត់ ព្រោះ​កន្លង​មក ជួន​កាល​រឿងរ៉ាវ​ខ្លះ អាជ្ញាធរ​ប្រើ​កម្លាំង​ប៊ឹបៗ តែ​ម្ដង ចុះ​កន្លែង​សំណង់​នោះ ម៉េច​អត់​ហ៊ាន។ តើ​ម្ចាស់​សំណង់​នោះ គាត់​អាង​អី ហើយ​គាត់​ពឹង​លើ​នរណា​ម្នាក់? ពាក់ព័ន្ធ​ច្បាប់​អនុញ្ញាត តើ​មាន ឬ​មិន​មាន ហើយ​បើ​សិន​ជា មិន​មាន ហើយ​ម្ចាស់​សាងសង់​នៅ​តែ​សាងសង់​ទៀត គឺ​ត្រូវ​ពាក់ព័ន្ធ​ច្បាប់​ដែរ ។ ធ្វើការដល់ទៅ៧ជាន់ រឿង​អី​មិន​សុំ​ច្បាប់​ត្រឹមត្រូវ ហើយ​ក្រុមហ៊ុន​សាងសង់​គួរ​តែ​ធ្វើ​កោសល្យ​ឲ្យ​បាន​ច្បាស់លាស់»

ទាក់ទិននឹងការបាក់រលំអាគារនេះ លោក ហ៊ុន សែន បានសម្រេចផ្ទេរភារកិច្ចអភិបាលខេត្តព្រះសី ហនុ​លោក យន្ត មីន ឲ្យទៅបម្រើការងារនៅទីស្តីការក្រសួងមហាផ្ទៃវិញ ក្រោយពីលោក យន្ត មីន ទទួល​ស្គាល់​កំហុសនិងសុំលាលែងពីដំណែង។ បន្ទាប់មក លោក ហ៊ុន សែន ក៏បានដក​លោក ញឹម វណ្ណដា ចេញពី​តំណែង​ទេសរដ្ឋមន្ត្រី និង​ជា​អនុប្រធាន​ទី​១​គណៈកម្មកា​ធិ​ការ​ជាតិ​គ្រប់គ្រង​គ្រោះ មហន្តរាយ​ដោយសារ «ខ្វះ​ទំនួល​ខុសត្រូវ​និង​ភូតភរ» ក្នុង​ការដឹកនាំ​ប្រតិបត្តិ​ការ​ជួយ​សង្គ្រោះ​ជន រង​គ្រោះ។ ប៉ុន្តែ​បន្តិច​ក្រោយ​មក លោក ហ៊ុន សែន ស្នើសុំ​តែងតាំង​ជា​ទីប្រឹក្សា​រដ្ឋាភិបាល មាន​ឋានៈ ស្មើ​ទេសរដ្ឋមន្ត្រី​ដដែល។

អ្នកតាមដានព្រឹត្តិការណ៍នេះ ចាត់ទុកថា លោក ហ៊ុន សែន គ្រាន់តែប្រើល្បិចដើម្បីរម្ងាប់អារម្មរណ៍​ប្រជាពលរដ្ឋ​ប៉ុណ្ណោះ។

អ្នកស្រី ជៀប សុធារី លើកឡើងថា ការផ្ទេរភារកិច្ចមន្ត្រីចុះឡើងបែបនេះ ប្រហែល​ជា​មិន​អាច​ដោះ​​ស្រាយ​​បញ្ហា​​ក្នុង​ខេត្តព្រះសីហនុ និង​រម្ងាប់​អារម្មរណ៍​ប្រជាពលរដ្ឋ​បាន​នោះ​ទេ។ អ្នកស្រី​បន្ថែមថា នៅ​ពេល​​ឃើញ​សំណង់​អគារ ដែល​​សាងសង់​​ពី​​គ្រោង​ដែក​​ដួល​​រលំ​​បែប​​នេះ ធ្វើឲ្យអ្នកស្រី និងពលរដ្ឋ​មួយ​ចំនួន​កាន់តែមានការព្រួយរម្ភ ព្រោះ​សំណង់​អគារ​នៅ​ក្នុង​ខេត្ត​​ព្រះសីហនុ ដែល​វិនិយោគ​ដោយ​​ជន​​ជាតិ​​ចិន​​ប្រមាណ ៧០ ទៅ ៨០ភាគ​​រយ ​សាង​សង់​​ដោយ​គ្រោង​ដែក​ទាំង​អស់៖ «ភាគ​ច្រើន​អគារ​ខ្ពស់​រហូត​ដល់​ទៅ ១០ជាន់ ២០ជាន់ គឺ​សុទ្ធតែ​ដែក​ទាំង​អស់ ហើយ​យើង​ក៏​មិន​ដឹង​ថា​វា​ម៉េច​ដែរ ព្រោះ​ឥឡូវ​នេះ​វា​មិន​មែន​អគារ​នេះ គឺ​អគារ​ខុនដូ​ទំនើបៗ ដែល​គេ​សាង​សង់​នៅ​តាម​ឆ្នេរ​ឯករាជ្យ ដែក​នេះ​ដែរ»

ក្រោយការបាក់រលំអាគារកម្ពស់ ៧ជាន់នេះ របបក្រុងភ្នំពេញ បានសម្រេចបង្កើតគណៈកម្មការត្រួត ពិនិត្យគុណភាពសំណង់ និងលក្ខណៈសម្បត្តិរបស់ក្រុមហ៊ុនម៉ៅការសាងសង់នៅខេត្តព្រះសីហនុ ឡើងវិញ។ចំណែកក្រសួងរៀបចំដែនដី ក៏​បាន​ចេញ​សេចក្តីប្រកាសណែនាំឲ្យរដ្ឋបាលខេត្តព្រះសីហនុ​​បញ្ឈប់​ផ្តល់​គោលការណ៍​ឲ្យ​ដំណើរ​ការ​សាងសង់ មុន​ទទួល​បាន​លិខិត​អនុញ្ញាត​សាងសង់។ សេចក្តី​ប្រកាស​បញ្ជាក់​ថា ការដ្ឋាន​​សំណង់​​ជា​​ច្រើន​​ក្នុង​​ខេត្ត​​ព្រះសីហនុ​​កំពុង​​ដំណើរ​​ការ​​សាងសង់​ខ្លះ ជិត​​រួចរាល់​ស្ទើរ​ទាំង​ស្រុង​ដោយ​ពុំ​មាន​លិខិត​អនុញ្ញាត​ឲ្យ​សាង​សង់​នោះ​ទេ។

អ្នក​នាំពាក្យសាលាខេត្តព្រះសីហនុ មិនទាន់អាចបញ្ជាក់បានទេ អំពីលទ្ធផលត្រួតពិនិត្យគុណភាព សំណង់​​នៅ​ក្នុង​ខេត្ត​ព្រះសីហនុ ព្រោះ​ក្រុមការងារកំពុងបន្តស្រាវជ្រាវនៅឡើយ។

កម្មករ​សំណង់​ដែល​នៅរស់រានមានជីវិតម្នាក់ គឺលោក អ៊ឹម ចំរើន រៀបរាប់​ថា លោក​មាន​ស្រុក​កំណើត​នៅ​ខេត្តពោធិ៍សាត់ ហើយទើបតែចូលធ្វើការទីនោះបាន២ថ្ងៃប៉ុណ្ណោះ។ លោក​បន្ត​ថា នៅ​ពេល​ទៅ​ដល់​ការដ្ឋានសំណង់ថ្ងៃដំបូងនោះ ក្រុម​ការងារ​របស់​លោក បាននិយាយថា គ្រោងដែក​អាគារ​​នេះ ហាក់​មិនសូវមាំទាំនោះទេ។ លោកបន្ថែមទៀតថា ដែក និងឥដ្ឋ រួម​​ទាំង​​សម្ភារៈ​​សាង​​សង់​​​​ទាំង​​​អស់ គឺ​សុទ្ធតែ​នាំ​ចូល​ពី​ប្រទេស​ចិន ដែលមើលទៅហាក់មិនសូវមាំទាំ​នោះ​ទេ។ លើស​ពី​នេះ ស្ទើរ​តែ​គ្រប់​​ការដ្ឋាន​សំណង់​របស់​ជន​ជាតិ​ចិន មិន​បាន​ខ្វាយខ្វល់​ផ្ដល់​សម្ភារៈ និង​ឧបករណ៍​ការពារ សុវត្ថិភាព​ដល់​កម្មករ​ខ្មែរ ដូចជា កម្មករ​ជនជាតិ​ចិន​នោះ​ទេ៖ «គ្រាន់​តែ​ខ្ញុំ​មក​ដល់ បង​របស់​ខ្ញុំ​គាត់​ថា ជើង​ក្រោម​ដូច​រាង​ជ្រាយ ឬ​ទន់ អ៊ីចឹង​ណ៎ា។ ប៉ុន្តែ​ខ្ញុំ​ក៏​មិន​​បាន​​ចាប់​ភ្លឹក​អី​ដែរ។ ឥដ្ឋ​អី​គេ​យក​មក​ពី​ចិន ហើយ​ដូច​ជា​មិន​សូវ​មាំ​ដែរ។ និយាយ​រួម គ្រឿង​សំណង់​សុទ្ធ​តែ​យក​មក​ពី​ស្រុក​ចិន​ទាំង​អស់»

ទោះ​បី​ជា​យ៉ាង​ណា​ក្តី មេ​ដឹក​នាំ​របប​ក្រុង​ភ្នំពេញ លោក ហ៊ុន សែន ថ្លែង​ការពារ​អ្នក​វិនិយោគ​ចិន ហើយ​ថ្កោលទោស​អ្នក​រិះគន់​ការ​វិនិយោគ​របស់​ចិន​ថា ជា​ក្រុម​ប្រឆាំង។ ថ្លែង​ក្នុង​ពេល​បិទ​បញ្ចប់ការ​រុក​រក​ជន​រង​គ្រោះ​កាល​ពី​ល្ងាច​ថ្ងៃ​ចន្ទ ទី២៥​មិថុនា លោក ហ៊ុន សែន លើក​ឡើង​ថា គ្រោះថ្នាក់​អាច​កើត​មាន​ឡើង​គ្រប់​ពេល​ដែល​មិន​ថា ​ជនជាតិ​ណា​ជា​អ្នក​បង្ក​ទេ ​ប៉ុន្តែ​កត្តា​សំខាន់​ត្រូវ​គិត​ពី​ប្រយោជន៍​ជាតិ​ និង​ពលរដ្ឋ។ លោក​អះអាង​ថា ពលរដ្ឋ​ខេត្ត​ព្រះសីហនុ​កំពុងតែ​ទទួល​បាន​ផល​ពី​ការ​វិនិយោគ​ទុន​របស់​ចិន។ ក្នុងពេលនោះ លោក ហ៊ុន សែន ក៏បានប្រកាសយកថវិកាជាតិ​បូករួម​ជា​មួយ​ថវិកា​សប្បុរស​ជនជូនគ្រួសាររបស់អ្នកស្លាប់​ម្នាក់ៗ ទទួលបាន ៧ម៉ឺនដុល្លារ ហើយ​អ្នក​រង​របួស​ទទួល​បាន ១ម៉ឺនដុល្លារ។ ចំណែក​ជន​រង​គ្រោះ ២នាក់ ដែល​នៅ​មាន​​ជីវិត​​ក្រោយ​ កប់​ក្រោម​គំនរ​បាក់​​បែក​​របស់​​សំណង់​​រយៈ​ពេល ២យប់ ៣ថ្ងៃ និង​ត្រូវ​បាន​ជួយ​សង្គ្រោះ​ចុង​ក្រោយ​គេ​នោះ គឺ​ទទួល​បាន ៣ម៉ឺន​​ដុល្លារ។ បន្ថែម​​ពី​​នេះ លោក ហ៊ុន សែន អះអាង​ថា ការ​​ស៊ើប​​អង្កេត​​ទៅ​​លើ​​ការ​​សាង​សង់​​សំណង់​​នេះ គឺ​​​មិន​​​បញ្ចប់​​ឡើយ ដើម្បី​​ស្វែង​រក​​អ្នក​​ជាប់​​ពាក់ព័ន្ធ​​នឹង​​ការ​​បាក់​​អគារ​​នេះ​​បន្ថែម​​ទៀត។

ដោយឡែក ប្រធាន​ស្តីទី​គណបក្ស សង្គ្រោះ​​ជាតិ លោក​ សម រង្ស៊ី​ រួម​ទាំង​សង្គម​ស៊ីវិល និង​ប្រជា​ពលរដ្ឋ​មួយ​ចំនួន ​បាន​ភ្ជាប់​ការ​ដួល​រលំ​អគារ​នេះ​ទៅ​នឹង​អំពើ​ពុករលួយ ​ការ​ព្រងើយ​កន្តើយ ​និង​ស្មារតី​មិន​ទទួល​ខុស​ត្រូវ​របស់​ថ្នាក់​ដឹក​នាំ​ប្រទេស។​ លោក​ សម រង្ស៊ី​ បាន​សរសេរ​នៅ​ក្នុង​ទំព័រ​ហ្វេសប៊ុក​ផ្ទាល់​ថា នេះ​គ្រាន់តែ​ជា​សញ្ញា​មួយ ដែល​យើង​ទើបតែ​មើល​ឃើញ​ទាំង​អស់​គ្នា​ តែ​មិន​ដឹង​ថា​ តើ​មាន​អគារ​បែប​នេះ ​ប៉ុន្មាន​ខ្នង​ទៀត ​ដែល​កំពុង​តែ​សាងសង់​ដែរ​ ឬ​ក៏​ត្រូវ​បាន​​សង់​រួច​ហើយ ដោយ​មិន​មាន​​លិខិត​អនុញ្ញាត​ ហើយ​ដោយ​មិន​បាន​ទទួល​ការ​ត្រួត​ពិនិត្យ​អ្វី​ឡើយ ​ចំពោះ​ស្តង់ដារ​បច្ចេកទេស​ និង​សុវត្ថិភាព។ នៅ​ប្រទេស​កម្ពុជា​សព្វថ្ងៃ ​មនុស្ស​ខិលខូច​​ចង់​ធ្វើ​អ្វី​ក៏​បាន​ដែរ​ ឲ្យ​តែ​មាន​លុយ។ លោក​ថា របប​ពុករលួយ ​ដឹកនាំ​ដោយ ហ៊ុន សែន គឺ​​ជា​​គ្រោះថ្នាក់​សាធារណៈ ​សម្រាប់​ប្រជាពលរដ្ឋ​ខ្មែរ​ទូទៅ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

who would be blame?who would be responsible?who would be held for accountable?stop finger point or blame game to other

There is not only a few Chinese constructor to face trial,but who'd permission the Chines to do so,please find and read the first story,then read and find the middle of the story,and then find&read the end of the story"avoid confusion and mess up...step by step".There are a lot of criminal conspiracy out there,and those who connection with this horrific crime must bring to justice,it doesn't matter who are they".And don't let anyone get away from this criminal charges"stop finger point blame to other,ENOUGH IS ENOUGH "justice must deserve.Stern legal actions will be taken against the pple who build the structure defying the codes of laws.

Jun 25, 2019 11:36 AM

គេហទំព័រ​ទាំងមូល