រដ្ឋាភិបាលប្រកាសសងថ្ងៃឈប់សម្រាក ៥ថ្ងៃជូនកម្មករ និងមន្ត្រីរាជការនៅពាក់កណ្ដាលខែក្រោយ
2020.07.15
ប្រមុខរដ្ឋាភិបាលកម្ពុជា លោក ហ៊ុន សែន ប្រកាសសងថ្ងៃឈប់សម្រាកចំនួន ៥ថ្ងៃជូនកម្មករ និង មន្ត្រីរាជការចាប់ពីថ្ងៃទី១៧ ដល់ថ្ងៃទី២១ ខែសីហា បន្ទាប់ពីរដ្ឋាភិបាល បានលុបចោលថ្ងៃឈប់ សម្រាកក្នុងឱកាសបុណ្យចូលឆ្នាំខ្មែរកាលពីខែមេសាកន្លងទៅដោយសារការផ្ទុះរីករាលដាលនៃ ជំងឺកូវីដ-១៩។
ជាមួយគ្នានេះ លោក ហ៊ុន សែន ក៏អំពាវនាវឲ្យក្រសួងពាក់ព័ន្ធ និងអាជ្ញាធរដែនដី សហការ និងពង្រឹងការអនុវត្តវិធានការការពារសុវត្ថិភាព និងសុខភាព ព្រមទាំងធ្វើការផ្សព្វផ្សាយអប់រំប្រជា ពលរដ្ឋ និងម្ចាស់អាជីវកម្មឲ្យអនុវត្តតាមគោលការណ៍ណែនាំរបស់ក្រសួងសុខាភិបាល ដើម្បីកាត់បន្ថយហានិភ័យនៃការចម្លងរាលដាលជំងឺកូវីដ-១៩ អំឡុងពេលនៃថ្ងៃឈប់សម្រាកចំនួន ៥ថ្ងៃនោះ។
ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ សាទរចំពោះសេចក្ដីសម្រេចរបស់រដ្ឋាភិបាល ខណៈសហជីពបានស្នើសុំជាយូរមកហើយ។ ទោះបីជាយ៉ាងណា អ្នកស្រីព្រួយបារម្ភថា កម្មករភាគច្រើន អាចនឹងគ្មានប្រាក់សម្រាប់ទៅជួបជុំជាមួយក្រុមគ្រួសារ និងធ្វើដំណើរកម្សាន្តនៅតាមតំបន់នានា ព្រោះកម្មករជាច្រើនត្រូវបានថៅកែព្យូរការងារ និងខ្លះទៀត ទើបតែមានការងារធ្វើវិញ៖ «កន្លងមកនេះ ក្រុមហ៊ុនមួយចំនួនបានយកលេសក្នុងការបញ្ឈប់កម្មករដោយមិនផ្តល់លុយឲ្យគាត់ទេនៅថ្ងៃដែលពួកគាត់ធ្វើការ ៥ថ្ងៃក្នុងអំឡុងពេល ចូលឆ្នាំ ដូច្នេះនាំឲ្យកម្មករខាតបង់ប្រយោជន៍សន្ធឹកសន្ធាប់ណាស់រួចហើយព្រោះតាំងពីចូលឆ្នាំមកដល់ឥឡូវនេះ មានក្រុមហ៊ុនជាច្រើន ផ្ដាច់កិច្ចសន្យាកម្មករ ឬបញ្ឈប់កម្មកររាប់ម៉ឺននាក់ ហើយក្រុមហ៊ុនមិនបានផ្តល់លុយនោះទេ ដោយសារគេយកលេសថា ទោះបីជាទៅប្ដឹងនៅណាក៏មិនបានដែរ ព្រោះរដ្ឋាភិបាលមិនទាន់ចេញសេចក្ដីប្រកាស។ បើសិនបើអាចទេ ពួកយើងស្នើសុំឲ្យសងលុយដល់កម្មករ ដែលត្រូវបានបញ្ឈប់នាពេលកន្លងមក»។
ក្រសួងការងារបង្ហាញថា គិតត្រឹមដើមខែកក្កដា មានរោងចក្រជាងពីររយ (២៥០) បានព្យួរការងារ និងបិទរោងចក្រ ដោយសារវិបត្តិជំងឺកូវីដ១៩ ហើយប៉ះពាល់ដល់កម្មករ ជាង ១៣ម៉ឺននាក់។ លើសពីនេះ សមាគមថៅកែរោងចក្រកាត់ដេរ ធ្លាប់ព្យាករថា នឹងមាន កម្មករជាង ៧៥ម៉ឺននាក់ ប្រឈមវិបត្តិអត់ការងារធ្វើ ហើយក្រុមគ្រួសារ កម្មករខ្ទង់ ៣លាននាក់ទៀត នឹងទទួលរងផលប៉ះពាល់បន្ត ប្រសិនបើសហភាពអឺរ៉ុប សម្រេចដកប្រព័ន្ធអនុគ្រោះពន្ធEBA ២០ភាគរយជាផ្លូវការពីកម្ពុជានៅថ្ងៃទី១២ ខែសីហាខាងមុខ៕