លោក ហ៊ុន សែន ឲ្យ​ផ្អាក​​​​ការ​យក​ពន្ធ​​​ពី​សណ្ឋាគារ និង​រោងចក្រ​​ រយៈ​ពេល​ខ្លី​ ដើម្បី​ដោះ​ស្រាយ​​ផល​ប៉ះពាល់​សេដ្ឋកិច្ច​បណ្ដាល​ពី​​ជំងឺ​ Covid-19 និង EBA

ដោយ អាស៊ីសេរី
2020-02-24
អ៊ីម៉ែល
មតិ
Share
បោះពុម្ព
លោក​នាយក​រដ្ឋមន្ត្រី​ ហ៊ុន សែន ក្នុង​ពិធី​ថ្លែង​សារ​ពិសេស អំពី​ស្ថានការណ៍​ថ្មីៗ ចុង​ក្រោយ ជូន​ដល់​ពលរដ្ឋ​​ខ្មែរ និង​ឧត្ដម​ក្រុម​ប្រឹក្សា​ពិគ្រោះ និង​ផ្ដល់​យោបល់ ធ្វើ​ឡើង​នៅ​វិមាន​សន្តិភាព រាជធានី​ភ្នំពេញ ថ្ងៃ​ទី២៤ ខែ​កុម្ភៈ ឆ្នាំ២០២០។
លោក​នាយក​រដ្ឋមន្ត្រី​ ហ៊ុន សែន ក្នុង​ពិធី​ថ្លែង​សារ​ពិសេស អំពី​ស្ថានការណ៍​ថ្មីៗ ចុង​ក្រោយ ជូន​ដល់​ពលរដ្ឋ​​ខ្មែរ និង​ឧត្ដម​ក្រុម​ប្រឹក្សា​ពិគ្រោះ និង​ផ្ដល់​យោបល់ ធ្វើ​ឡើង​នៅ​វិមាន​សន្តិភាព រាជធានី​ភ្នំពេញ ថ្ងៃ​ទី២៤ ខែ​កុម្ភៈ ឆ្នាំ២០២០។
រូប៖ ហ្វេសប៊ុក​លោក ហ៊ុន សែន

រដ្ឋាភិបាល​ក្រុង​ភ្នំពេញ សម្រេច​ផ្អាក​ការ​យក​ពន្ធ​អាជីវកម្ម​លើ​សណ្ឋាគារ​ ផ្ទះ​សំណាក់​ រយៈ​ពេល ៤ខែ និង​មិន​យក​ពន្ធ​ចំពោះ​រោងចក្រ ដែល​​រង​ផល​ប៉ះពាល់​ពី​ការ​ខ្វះ​វត្ថុធាតុ​ដើម និង​បញ្ហា EBA ពី ៦ខែ​ទៅ ១ឆ្នាំ។ ទន្ទឹម​នឹង​នោះ កម្មករ​រោងចក្រ​នឹង​ទទួល​បាន​ប្រាក់​ឈ្នួល ៦០ភាគរយ ​រយៈ​ពេល​៦ខែ ខណៈ​អ្នក​ជំនាញ​ថា វិធានការ​ទាំង​នេះ ធ្វើ​ឲ្យ​បាត់​ប្រយោជន៍​ជាតិ និង​មិន​មាន​និរន្តរភាព​យូរ​អង្វែង។

លោក ហ៊ុន សែន ថា វិធានការ​ទាំង​នេះ ដើម្បី​ជួយ​ទប់ទល់​នឹង​ការ​វិវត្ត​​សេដ្ឋកិច្ច​កម្ពុជា ដែល​រង​ការ​ប៉ះពាល់​ពី​វិបត្តិ​ជំងឺ​​រលាក​ផ្លូវ​ដង្ហើម​ថ្មី កូវីត​១៩ (Covid-19) ខណៈ​ប្រទេស​ក្នុង​ពិភព​លោក​​ផ្សេង​ទៀត ក៏​ជួប​ប្រទះ​វិបត្តិ​ភ្ញៀវ​ទេសចរ​ធ្លាក់​ចុះ​ដូច​គ្នា។

លោក​ថ្លែង​​ក្នុង​ពិធី​សន្និសីទ​កាសែត​ នៅ​ទីស្ដីការ​គណៈ​រដ្ឋ​មន្ត្រី ព្រឹក​ថ្ងៃ​ទី​២៤ កុម្ភៈ ដោយ​អះអាង​ថា ភ្ញៀវ​ទេសចរ​បាន​ធ្លាក់​ចុះ​យ៉ាង​គំហុក​ នៅ​ខែ​កុម្ភៈ គឺ​ធ្លាក់​ចុះ​​ជាង​ពាក់​កណ្ដាល​ (៦០​%) ក្នុង​នោះ ភ្ញៀវ​ទេសចរ​ចិន ធ្លាក់​ចុះ​ស្ទើរ​មួយ​រយ​ភាគ​រយ (៩០%) ហើយ​ខេត្ត​សៀមរាប បាន​រង​​ផល​ប៉ះ​ពាល់​​ខ្លាំង​ជាង​គេ។ លោក ហ៊ុន សែន ថា ដើម្បី​ទប់​ស្កាត់​បញ្ហា​នេះ រដ្ឋាភិបាល​សម្រេច​​ថា នឹង​បញ្ចេញ​កញ្ចប់​ថវិកា​ជាតិ ជួយ​ដល់​សហគ្រាស​ធុន​តូច និង​មធ្យម ក្នុង​វិស័យ​ទេសចរណ៍ ដែល​ក្នុង​នោះ សណ្ឋាគារ និង​ផ្ទះ​សំណាក់ នឹង​ត្រូវ​ផ្អាក​យក​ពន្ធ ៤ខែ គិត​ពី​ខែ​កុម្ភៈ ដល់​ខែ​ឧសភា ដោយ​រដ្ឋាភិបាល​ជា​អ្នក​បង់​ពន្ធ​ជំនួស៖ «ការ​លើក​លែង​ពន្ធ​នៅ​ទី​នេះ គឺ​មាន​ន័យ​ថា រដ្ឋ​ទទួល​បង់​ពន្ធ​ជំនួស​ ព្រោះ​យើង​ធ្លាប់​បាន​បង់​ពន្ធ​ហើយ យើង​មិន​អាច​ហៅ​ពាក្យ​ថា លើកលែង។ តែ​នៅ​ទី​នេះ ដើម្បី​ងាយ​ស្ដាប់​តែ​ប៉ុណ្ណោះ​ គឺ​ប្រើ​ពាក្យ​ថា លើកលែង​នូវ​ការ​បង់​ពន្ធ។ ប៉ុន្តែ​ធាតុ​ពិត​របស់​វា​ គឺ​រដ្ឋ​បង់ពន្ធ​ជំនួស​ រដ្ឋ​បង់​ពន្ធ​ជំនួស​។ អ្វី​ដែល​យើង​ធ្វើ​នៅ​ពេល​នេះ មិន​គ្រប់​ដណ្ដប់​ទូទៅ​នោះ​ទេ។ អ្វី​ដែល​សំខាន់​ គឺ​យើង​ធ្វើ​នៅ​ក្នុង​ខេត្ត​សៀមរាប ដែល​ជា​ខេត្ត​មួយ​ភ្ញៀវ​ទេសចរណ៍​បរទេស​ធ្លាប់ មក​កាន់​ទី​នោះ។ ប៉ុន្តែ​ឥឡូវ​នេះ ភ្ញៀវ​ទេសចរណ៍​មក​កាន់​ទី​នោះ​ធ្លាក់​ដល់​កម្រិត​មួយ​យ៉ាង​ខ្លាំង»

លោក ហ៊ុន សែន ក៏​បាន​បញ្ជា​ឲ្យ​​មន្ត្រី​រដ្ឋាភិបាល​ កាត់​បន្ថយ​ការ​ធ្វើ​ដំណើរ​ទៅ​​ប្រជុំ​នៅ​ក្រៅ​ប្រទេស​ និង​ជំរុញ​ឲ្យ​ពលរដ្ឋ​ កាត់​បន្ថយ​ការ​​ដើរ​កម្សាន្ត​ក្រៅ​ប្រទេស ហើយ​ងាក​មក​កម្សាន្ត​ និង​បង្កើត​កិច្ច​ប្រជុំ ក្នុង​ស្រុក រួម​ទាំង​​ជំរុញ​ឲ្យ​បង្កើត​ព្រឹត្តិការណ៍​វប្បធម៌ ដើម្បី​ទាក់ទាញ​ទេសចរណ៍ សម្រាប់​ខេត្ត​សៀមរាប​ជា​ដើម។

ប្រធាន​សហព័ន្ធ​សហជីព​កម្មករ​និយោជិក​វិស័យ​ទេសចរណ៍ និង​សេវាកម្ម​កម្ពុជា លោក ម៉ម រិទ្ធី យល់​ថា ការ​ជួយ​ទ្រទ្រង់​អ្នក​វិនិយោគ​​សណ្ឋាគារ និង​ផ្ទះ​សំណាក់​កុំ​ឲ្យ​ក្ស័យធន ដើម្បី​រក្សា​ការងារ​ដល់​កម្មករ ក្នុង​វិស័យ​ទេសចរណ៍ ជា​ការ​ប្រសើរ តែ​យុទ្ធ​សាស្ត្រ​នេះ គ្មាន​និរន្តរភាព ហើយ​បាត់បង់​ប្រយោជន៍​ជាតិ។ លោក​ថា ការ​បញ្ចេញ​កញ្ចប់​ថវិកា​ជាតិ ជួយ​បង់​ពន្ធ​ជំនួស​សណ្ឋាគារ​ ផ្ទះ​សំណាក់​នេះ ប្រើ​បាន​តែ​រយៈ​ពេល​ខ្លី និង​ជួយ​បាន​មួយ​ផ្នែក​តូច​ សម្រាប់​វិស័យ​ទេសចរណ៍។

អ្នក​ជំនាញ​ទេសចរណ៍​រូប​នេះ​ថា ដើម្បី​ជួយ​ដល់​កម្មករ និង​វិស័យ​ទេសចរណ៍ រដ្ឋាភិបាល គួរ​គិត​គូរ​​រក​វិធី​សាស្ត្រ​កែ​លម្អ​ កម្សោយ​​ក្នុង​វិស័យ​ទេសចរណ៍ បង្កើន​ការ​ផ្សព្វផ្សាយ​ដែល​មាន​ប្រសិទ្ធិ​ភាព និង​ចរចា​យក​ EBA ២០​ភាគរយ មក​វិញ​ទើប​ជា​ការ​ប្រសើរ​ដល់​វិស័យ​នេះ។

លោក ម៉ម រិទ្ធី ថា ការ​ជំរុញ​ភ្ញៀវ​ទេសចរ​ជាតិ ឲ្យ​ងាក​មក​ដើរ​កម្សាន្ត​ក្នុង​ស្រុក​វិញ នឹង​ពិបាក​ធ្វើ​បាន ហើយ​អាច​ជួយ​វិស័យ​ទេសចរណ៍​បាន​តិច​តួច​ប៉ុណ្ណោះ។ លោក​ថា អ្វី​ដែល​សំខាន់​គឺ ភ្ញៀវ​ទេសចរ​អន្តរជាតិ ដែល​នាំ​លុយ​ច្រើន​មក​ចាយ​នៅ​កម្ពុជា៖ «អ៊ីចឹង​ អា​យុទ្ធសាស្ត្រ​បែប​ហ្នឹង យើង​ប្រើ​បាន​តែ​ពេល​ខ្លី​ទេ យើង​អត់​អាច​យក​មក​ប្រើ​រយៈ​ពេល​វែង​បាន​ទេ ហើយ​រយៈ​ពេល​ហ្នឹង យក​មក​ជួយ​បាន​ ជួយ​បាន​តែ​ផ្នែក​តូច​​ខ្លះ​ទេ មិន​អាច​ជួយ​បាន​ទាំង​ស្រុង​ទេ។ អ៊ីចឹង សំណួរ​សួរ​ ផុត ៤ខែ​ហ្នឹង ពួកគាត់​ធ្វើ​អ្វី? ពួក​គាត់​រស់​បន្ត​យ៉ាង​ម្ដេច ក្រុម​ហ៊ុន​ទាំង​អស់​ហ្នឹង»

ក្រៅពី​វិស័យ​ទេសចរណ៍ ដែល​រង​ការ​ប៉ះពាល់​ដោយសារ​ជំងឺ​កូវីត-១៩ លោក ហ៊ុន សែន ក៏​អះអាង​ថា វិស័យ​កាត់ដេរ ក៏​រង​ផល​ប៉ះពាល់​ដែរ គឺ​ដោយសារ​ ការ​មិន​អាច​នាំ​ចូល​វត្ថុធាតុ​ដើម​បាន និង​ការ​ដក​ប្រព័ន្ធ​អនុគ្រោះ​ពន្ធ EBA ២០​ភាគរយ ដែល​មាន​តម្លៃ​ប្រហែល​ ១០០​លាន​ដុល្លារ​អាមេរិក។ លោក​ ហ៊ុន សែន ថា វិស័យ​នេះ រដ្ឋាភិបាល​ក៏​នឹង​បញ្ចេញ​កញ្ចប់​ថវិកា​ជាតិ ជួយ​ដល់​ភាគី​ពាក់ព័ន្ធ​ដែរ។

រដ្ឋាភិបាល នឹង​លើកលែង​ការ​យក​ពន្ធ ចំពោះ​រោងចក្រ​ខ្វះ​វត្ថុធាតុ​ដើម និង​​រោងចក្រ​រង​ផល​ប៉ះពាល់​EBA ចំនួន​ ៦​ខែ ទៅ​ ១​ឆ្នាំ ហើយ​ម្ចាស់​រោងចក្រ​នឹង​លើកលែង​ការ​បង់​​ប្រាក់​ចូល​បេឡា​ជាតិ​របប​សន្តិសុខ​សង្គម (បសស) ក្នុង​កំឡុង​ពេល​រោងចក្រ​ព្យួរ​អាជីវកម្ម។ ប៉ុន្តែ​ម្ចាស់​​រោងចក្រ មាន​កាតព្វកិច្ច​បង់​ប្រាក់​ឈ្នួល​ឲ្យ​កម្មករ​ ៤០​ភាគរយ នៃ​ប្រាក់​ឈ្នួល​គោល​អប្បបរមា រយៈ​ពេល ៦ខែ។ ឯ​រដ្ឋាភិបាល នឹង​បន្ថែម​ ២០​ភាគ​រយ​ទៀត ដែល​ធ្វើ​ឲ្យ​​កម្មករ​រង​ការ​ព្យួរ​ការងារ​​ ទទួល​បាន​ប្រាក់​ឈ្នួល​​ប្រហែល​ ១២០​ដុល្លារ​​អាមេរិក រយៈ​ពេល ​៦​​ខែ​ ដើម្បី​ទទួល​បាន​ការ​បណ្ដុះ​បណ្ដាល​វិជ្ជា​ជីវៈ​បន្ថែម និង​ក្នុង​កំឡុង​ពេល​រក​ការងារ​ថ្មី។

លោក ហ៊ុន សែន អះអាង​ថា រដ្ឋាភិបាល​លោក​បាន​ត្រៀម​ខ្លួន​ទប់​ទល់​នឹង​​ការ​ដក​ប្រព័ន្ធ​អនុគ្រោះ​ពន្ធ EBA ដល់​ទៅ ១០០ភាគ​រយ កុំ​ថា​ឡើយ​ត្រឹម ២០ភាគរយ ក៏​ប៉ុន្តែ​លោក​បាន​​បង្ហើប​ ប្រាប់​ឲ្យ​កម្មករ ដែល​រង​ការ​ព្យួរ​ការងារ​នោះ ឲ្យ​ត្រៀម​​រក​ការងារ​ថ្មី​ធ្វើ ក្រៅ​វិស័យ​កាត់ដេរ៖ «ប៉ុន្តែ​ក្នុង​រយៈ​ពេល​៦​ខែ​នេះ ក្មួយៗ ត្រូវ​ទទួល​បាន​ការ​បណ្ដុះបណ្ដាល​រយៈ​ពេល ៤ខែ ដោយ​ទទួល​បាន​បៀវត្សរ៍​ចំនួន ១២០ដុល្លារ។ ឯ ២ខែ​ផ្សេង​ទៀត ស្មើ​នឹង ២៤០ដុល្លារ គឺ​សម្រាប់​ក្មួយៗ ចាយ​វាយ​ នៅ​មុន​ពេល​ដែល​ក្មួយៗ រក​ការងារ​ធ្វើ​បាន។ ចំណុច​នេះ គេ​អាច​ឃើញ​ហើយ​ថា កម្ពុជា​បាន​បម្រុង​ទុក​ថា នឹង​មិន​មាន​ការ​វិល​ត្រលប់​ នៃ EBA ដែល EU បាន​ព្យួរ​នោះ​ទេ។ សុំ​បញ្ជាក់​ជូន​ចំពោះ ប្រជា​ពលរដ្ឋ​កម្ពុជា និង​អ្នក​នយោបាយ​កម្ពុជា ឲ្យ​បាន​ជ្រាប​ថា កម្ពុជា នឹង​មិន​ស្នើ​​សុំ​ត្រលប់​មក​វិញ នូវ​EBA ២០ ភាគ​រយ​ នោះ​ទេ។ នេះ​ជា​ការ​បញ្ជាក់​យ៉ាង​ច្បាស់ ហើយ​សុំ​កុំ​​មក​ធ្វើ​ចលនា​អ្វី​ ឲ្យ​សោះ»

អនុ​ប្រធាន​សហព័ន្ធ​សហជីព​សេរី​កម្មករ​នៃ​ព្រះរាជាណាចក្រ​កម្ពុជា លោក​ ម៉ាន់ សេងហាក់ យល់​ថា ជា​ការ​ទទួល​ខុសត្រូវ​ គឺ​រដ្ឋាភិបាល​ត្រូវ​មាន​កាតព្វកិច្ច​ជួយ​ដល់​កម្មករ និង​ម្ចាស់​រោងចក្រ ក្នុង​ពេល​មាន​វិបត្តិ។ ប៉ុន្តែ លោក​បារម្ភ​ថា ​កម្មករ​បាត់​ប្រយោជន៍​ច្រើន ខណៈ​ថៅកែ​រោងចក្រ​ទទួល​បាន​ការ​អនុគ្រោះ និង​ជួយ​ជ្រោមជ្រែង​​​ច្រើន។

លោក​ថា ប័ណ្ណ ប..ស​ ជា​ប្រយោជន៍​សង្គម​​របស់​កម្មករ នឹង​បាត់​សុពល​ភាព​ នៅ​ពេល​ផ្អាក​ការ​បង់​វិភាគទាន​រយៈ​ពេល​ ៦​ខែ។ ចំណែក​ការ​ចូលរួម​ជួយ​របស់​រដ្ឋាភិបាល ត្រឹម​ ២០​ភាគ​រយ ​សម្រាប់​ប្រាក់​ឈ្នួល ​នៅ​មាន​កម្រិត​តិចតួច ដែល​ធ្វើ​ឲ្យ​ជីវភាព​កម្មករ ស្ថិត​ក្នុង​ស្ថានភាព​លំបាក ខណៈ​កម្មករ​​ច្រើន​លើស​លុប ជាប់​កុន​ជំពាក់​ធនាគារ​​គ្រប់​គ្នា។

លោក ម៉ាន់ សេងហាក់ យល់​ថា វិធានការ​ជួយ​របស់​រដ្ឋាភិបាល​នេះ មិន​អាច​មាន​និរន្តរភាព​ទេ ខណៈ​គ្មាន​ភាព​ច្បាស់​លាស់​ថា វិស័យ​ការងារ នឹង​អាច​វិល​មក​រក​ភាព​​ដូចដើម​វិញ​នៅ​ពេល​ណា។ លោក​ជំរុញ​រដ្ឋាភិបាល​ឱ្យ​ជួយ​បន្ថែម​ប្រាក់​ឈ្នួល​ដល់​កម្មករ​ឲ្យ​បាន​ច្រើន​ជាង​នេះ​ទៀត យ៉ាង​ហោច​ណាស់ ដល់​កម្រិត​កៀក​នឹង​ប្រាក់​ឈ្នួល​គោល​ ទើប​អាច​ធ្វើ​ឲ្យ​កម្មករ​ទប់ទល់​ជីវភាព​រយៈ​ពេល​ព្យួរ​ការងារ​បាន៖ «ស្នើ​ទៅ​រដ្ឋាភិបាល ជួយ​ពិនិត្យ​ឡើងវិញ ការ​ដែល​ផ្ដល់​ប្រាក់​ខែ (ប្រាក់​ឈ្នួល) ៦០ភាគ​រយ ទៅ​ឲ្យ​បងប្អូន​កម្មករ​និយោជិត​នោះ ខ្ញុំ​ថា គួរ​តែ​ផ្ដល់​ច្រើន​ជាង​ហ្នឹង​ទៅ​ទៀត ពីព្រោះ​ឃើញ​ថា ក្រុមហ៊ុន​ផ្ដល់ ៤០ភាគ​រយ អាច​ទៅ​រដ្ឋាភិបាល គួរ​តែ​ជួយ​ផ្ដល់ ៤០ភាគ​រយ​ដូចគ្នា​ទៅ ពី​ព្រោះ​បង​ប្អូន​កម្មករ​ជួប​រឿង​បញ្ហា​ទាក់ទង​នឹង​បំណុល»

បើ​ទោះ​ លោក ហ៊ុន សែន ចេញ​មុខ​ប្រកាស​បញ្ចេញ​កញ្ចប់​ថវិកា​ជាតិ ជួយ​ដល់​​វិស័យ​ទេសចរណ៍ និង​វិស័យ​កាត់ដេរ ដោយសារ​វិបត្តិ​ជំងឺ​កូវីត ១៩ និង EBA តែ​ក្រសួង​ជំនាញ​​​ទាំង​២​ មិន​ទាន់​បង្ហាញ​​របាយការណ៍​ថា សហគ្រាស​ក្នុង​វិស័យ​ទេសចរណ៍ សហគ្រាស​ក្នុង​វិស័យ​កាត់ដេរ និង​កម្មករ​ ចំនួន​ប៉ុន្មាន ​កំពុង​រង​ផល​ប៉ះពាល់​ទេ។

មក​ដល់​ពេល​នេះ យ៉ាង​ហោច​ណាស់ មាន​សណ្ឋាគារ​ធំ​ចំនួន​២ គឺ​ The Great Duke Hotel អតីត​សណ្ឋាគារ​ Intercontinental នៅ​រាជធានី​ភ្នំពេញ​ និង​សណ្ឋាគារ អប្សរា​អង្គរ​ នៅ​ខេត្ត​សៀមរាប​ បាន​បិទ​ទ្វារ ​ដោយសារ​ក្ស័យ​ធន និង​ជួស​ជុល​ថ្មី។ ក្រសួង​ទេសចរណ៍​អះអាង​ថា ការ​​មិន​ដំណើរ​ការ ​របស់​សណ្ឋាគារ​ទាំង​២ មិន​មែន​ដោយ​សារ​វិបត្តិ​ជំងឺ​កូវីត១៩ ឬ EBA ឡើយ។ ចំណែក​រោងចក្រ​ខ្លះ ក៏​បាន​ជូន​ដំណឹង​ពី​ការ​ព្យួរ​ការងារ​កម្មករ​រយៈ​ពេល​ខ្លី រួច​ហើយ​ដែរ។

ទាំង​កម្មករ សហជីព និង​សមាគម​រោងចក្រ​កាត់ដេរ​នៅ​កម្ពុជា សុទ្ធ​តែ​បារម្ភ​ថា ការ​ដក​ប្រព័ន្ធ​អនុ​គ្រោះ​ពន្ធ EBA ២០ភាគ​រយ នឹង​​​បណ្ដាល​ឱ្យ​កម្មករ​រាប់​ម៉ឺន​នាក់​បាត់បង់​ការងារ។ គ្រប់​​ភាគី​សុទ្ធតែ​សំណូមពរ​ដល់​រដ្ឋាភិបាល​កម្ពុជា និង​​គណៈកម្មការ​អឺរ៉ុប​ ឲ្យ​ពិចារណា​​ក្នុង​ការ​ស្ដារ​​ប្រព័ន្ធ​អនុគ្រោះ​ពន្ធ​ទាំង​ស្រុង​ឲ្យ​​កម្ពុជា​វិញ ដើម្បី​​លើកស្ទួយ​ជីវភាព​ពលរដ្ឋ​ខ្មែរ​ ឱ្យ​រួច​ចាក​ផុត​ពី​ភាព​ក្រីក្រ។ ប៉ុន្តែ​សម្រាប់​​មេដឹកនាំ​របប​ក្រុង​ភ្នំពេញ ព្រមាន​ឲ្យ​បញ្ឈប់​ការ​ធ្វើ​ចលនា​ទាមទារ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល