កាសែត​រស្មី​កម្ពុជា​ដែល​មាន​វ័យ​ចំណាស់​ជាង ​៣០​ឆ្នាំ ប្រកាស​ផ្អាក​បោះពុម្ព​ផ្សាយ​ដោយ​សារ​គ្មាន​ពាណិជ្ជកម្ម

ហេង រស្មី
2020-10-29
Share
ការ​សែត​រស្មី​កម្ពុជា​ដែល​មាន​វ័យ​ចំណាស់​ជាង​៣០​ប្រកាស​ផ្អាក​បោះពុម្ព​ផ្សាយ​ដោយ​សារ​គ្មាន​ពាណិជ្ជកម្ម ប័ណ្ណសារព័ត៌មានរបស់អ្នកកាសែតរស្មីកម្ពុជា
រូប៖អតីតអ្នកកាសែតរស្មីកម្ពុជា

កាសែត​រស្មី​កម្ពុជា​ ដែល​មាន​វ័យ​ចំណាស់​ជាង​ ៣០​ឆ្នាំ​ និង​មាន​និន្នាការ​គាំទ្រ​របប​ក្រុង​ភ្នំពេញ បាន​ប្រកាស​ផ្អាក​បោះពុម្ព​ផ្សាយ​ជា​បណ្តោះ​អាសន្ន​​ដោយ​មិន​បាន​ជូន​ដំណឹង​ជាមុន ដែល​ធ្វើ​ឱ្យ​បុគ្គលិក​មួយ​ចំនួន​មិន​ពេញ​ចិត្ត​ ចំពោះ​វិធាន​ការ​របស់​ថ្នាក់​ដឹក​នាំ។​

អតីត​បុគ្គលិក​​អ្នក​កាសែត​រស្មី​កម្ពុជា​មួយ​រូប ដែល​និយាយ​ក្នុង​លក្ខខណ្ឌ​សុំ​មិន​បញ្ចេញ​ឈ្មោះ​ មាន​បញ្ជាក់​ប្រាប់​អាស៊ីសេរី​ថា​ អ្នក​គ្រប់​គ្រង​បាន​កោះហៅ​បុគ្គលិក​មក​ប្រជុំ​ រួច​ហើយ​ប្រកាស​ផ្អាក​ការ​បោះ​ពុម្ព​​ផ្សាយ​តែ​ម្តង​ ដោយ​គ្មាន​ជូន​ដំណឹង​អ្វី​ទាំង​អស់​។

លោក​ថា​ តាម​ច្បាប់​ការងារ​រាល់​ការ​សម្រេច​ផ្អាក​បោះ​ពុម្ព​ផ្សាយ​ ឬ​ក៏​កាត់​រំសាយ​បុគ្គលិក​ត្រូវ​ជូន​ដំណឹង​យ៉ាង​តិច ​៣​ខែ​មុន​ តាម​ច្បាប់​ការងារ​ ដើម្បី​ឱ្យ​​បុគ្គលិក​ទាំង​អស់​ត្រៀម​ខ្លួន​ទុក​ជាមុន។​ លោក​បាន​​រិះ​គន់​​ទង្វើ​របស់​ថ្នាក់​ដឹក​នាំ​នេះថា ​មិន​ត្រឹម​ត្រូវ ​ដែល​លោក​មិន​អាច​ទទួល​យក​បាន។​

​​​​​​ទាក់​ទិន​នឹង​បញ្ហា​នេះ​ និពន្ធ​នាយក​កាសែត​រស្មី​កម្ពុជា​ លោក​ ទាវ សារៈមុន្នី​ មាន​ប្រសាសន៍​ថា​ មូល​ហេតុ​ដែល​ការ​រស្មី​កម្ពុជា​សម្រេច​ផ្អាក​បោះពុម្ព​ផ្សាយ​ជា​បណ្ដោះ​អាសន្ន​នេះ ​គឺ​ដោយ​សារ​តែ​បញ្ហា​ហិរញ្ញវត្ថុ​ និង​ការ​កែ​សម្រួល​ផ្ទៃ​ក្នុង ​ដើម្បី​ឱ្យ​​សម​ស្រប​ទៅ​នឹង​​ការវិវឌ្ឍ​ថ្មី។

លោក​ថា​ សម្រាប់​គេហទំព័រ​កាសែត​រស្មី​កម្ពុជា​ គឺ​នៅ​បើ​ដំណើរ​ការ​ធម្មតា​ ដោយ​ឡែក​សម្រាប់​ការ​បោះពុម្ព​ផ្សាយ​វិញ​ បាន​សម្រេច​ផ្អាក​ជា​បណ្តោះ​អាសន្ន​ ដោយ​កាត់​បន្ថយ​បុគ្គលិក​ជាង ​៦០​នាក់​ ក្នុង​ចំណោម​បុគ្គលិក​ទាំង​អស់​ជាង ​១០០​នាក់​។​

លោក​​បន្ថែម​ថា​ សម្រាប់​បុគ្គលិក​ដែល​ត្រូវ​ផ្អាក​ពី​ការងារ​គឺ​ក្រុម​ហ៊ុន​ បាន​ផ្តល់​ប្រាក់​អតីត​ភាព​ការងារ​ និង​ប្រាក់​សោហ៊ុយ​ប៉ះប៉ូវ​ការងារ​ ទៅ​តាម​ច្បាប់​របស់​ក្រសួង​ការងារ៖ ​«​សម្រាប់​ខ្ញុំ​គិត​ថា​ ជា​ការ​វិវត្តន៍​មួយ​ក្នុង​វិស័យ​ព័ត៌មាន​ ការ​ផ្សព្វផ្សាយ​តាម​បែប​ប្រពៃណី​ យើង​មាន​ហានិភ័យ​ខ្ពស់​ប្រសិន​បើ​យើង​មិន​មាន​អ្វី​ផ្សេង​ទៀត​ ដើម្បី​​ជួយ​ប៉ះប៉ូវ​​វាទេ​។ យើង​ធ្វើ​បោះ​ពុម្ព​តែ​មួយ​មុខ​អត់​អាច​ទៅ​រួច​ទេ»។

កាសែត​រស្មី​កម្ពុជា​ បាន​បោះ​ពុម្ព​ផ្សាយ​លើក​ដំបូង​កាល​ពី​ថ្ងៃ​ទី​៩​ ខែ​មេសា​ ឆ្នាំ​១៩៩៣​។ កា​សែត​នេះ​ត្រូវ​បាន​​អ្នក​​អាន​​ចោទ​​ប្រកាន់​​ថា​ បាន​លម្អៀង​ទៅ​រក​រដ្ឋាភិបាល​កម្ពុជា​ ហើយ​រិះ​គន់​​គោល​នយោបាយ​​របស់​បក្ស​ប្រឆាំង។​

នាយក​ប្រតិបត្តិ​សម្ព័ន្ធ​អ្នក​សារព័ត៌មាន​កម្ពុជា​ ខេបូចា​ (CamboJA)​ លោក​ ណុប វី មាន​ប្រសាសន៍​ថា​ សារព័ត៌មាន​ណា ​ដែល​មិន​បាន​ឆ្លើយ​តប​តាម​តម្រូវការ​​ពី​អ្នក​អាន​ទេ​ ភាគ​ច្រើន​នឹង​ប្រឈម​មុខ​បិទ​ទ្វារ​។ ប៉ុន្តែ​ទោះ​ជាយ៉ាង​ណា​ក៏​ដោយ​ លោក​មើល​ឃើញ​ថា​ ក្នុង​ពេល​បច្ចុប្បន្ន​នេះ​ សារព័ត៌មាន​បោះពុម្ព​ផ្សាយ​ មិន​អាច​ប្រកួត​ប្រជែង​ជាមួយ​សារព័ត៌មាន​អនឡាញ​ (Online) បាន​​ទេ។​

លោក​ថា​ ប្រសិន​បើ​សារព័ត៌មាន​បោះពុម្ព​ផ្សាយ​ទាំង​នោះ​មិន​ធ្វើ​បច្ចុប្បន្ន​ភាព​របស់​ខ្លួន​ ទៅ​តាម​តម្រូវ​ការ​របស់​អ្នក​អាន​ទេ​ នោះ​អាច​នឹង​ត្រូវ​បិទ​ជា​បន្ត​បន្ទាប់៕​​​​​​

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។