ជនជាតិ​ចិន​១៧៤​នាក់​នៅ​ខេត្ត​ស្វាយរៀង​ត្រូវ​បាន​ឃាត់​ខ្លួន​ដើម្បី​ពិនិត្យ​សុខភាព​រក​មេរោគ​កូរ៉ូណា

ដោយ អូន ភាព
2020-03-27
អ៊ីម៉ែល
មតិ
Share
បោះពុម្ព
ម៉ាស៊ីន​ស្គែនកម្ដៅ​អ្នក​ដំណើរ​ឆ្លង​កាត់​វាល​យន្តហោះ​ ដែល​ក្រសួង​សុខាភិបាល​ដាក់​ដើម្បី​តាម​ដាន​ការ​ឆ្លង​មេរោគ​ កូរ៉ូណា​វីរុស។
ម៉ាស៊ីន​ស្គែនកម្ដៅ​អ្នក​ដំណើរ​ឆ្លង​កាត់​វាល​យន្តហោះ​ ដែល​ក្រសួង​សុខាភិបាល​ដាក់​ដើម្បី​តាម​ដាន​ការ​ឆ្លង​មេរោគ​ កូរ៉ូណា​វីរុស។
រូប៖ ហ្វេសប៊ុក​នាយកដ្ឋាន​ប្រយុទ្ធ​នឹង​ជំងឺ​ឆ្លង

នគរបាល​ខេត្ត​ស្វាយរៀង បាន​ឃាត់ខ្លួន​ជនជាតិ​ចិន​ចំនួន ១៧៤​នាក់ ពួកគេ​កំពុង​ជិះ​រថយន្តក្រុង ក្នុង​ក្រុង បាវិត​។ សមត្ថកិច្ច​អះអាង​ថា សមត្ថកិច្ច​នឹង​ដាក់​ឱ្យ​ចិន​ទាំងនោះ​នៅ​ដោយឡែក​រយៈពេល​១៤​ថ្ងៃ ដើម្បី​ពិនិត្យ​រក​វីរុស​កូរ៉ូណា (Coronavirus) ឬ​ជំងឺ​កូវីដ-១៩ (Covid-19)

អ្នកនាំពាក្យ​អគ្គនាយកដ្ឋាន​អន្តោប្រវេសន៍​ក្រសួងមហាផ្ទៃ​លោក កែវ វ៉ាន់ថន ប្រាប់​អាស៊ីសេរី​នៅ​ថ្ងៃ​ទី​២៦​ខែ​មីនា​ថា ជនជាតិ​ចិន​ទាំងនេះ បាន​ធ្វើ​ដំណើរ​តាម​យន្តហោះ​ពី​ប្រទេស​ហ្វីលីពីន (Philippine) ចូល​មក​ប្រទេស​កម្ពុជា កាលពី​ថ្ងៃទី​២៤ ខែ​មីនា តាមរយៈ​អាកាស​យាន្ត​ដ្ឋា​ន​អន្តរជាតិ​ភ្នំពេញ ហើយ​ពួកគាត់​បាន​ធ្វើ​ដំណើរ​ទៅ​ទីក្រុង​បាវិត ខេត្ត​ស្វាយរៀង ក្នុង​គោលបំណង​ស្នាក់នៅ​ទីនោះ​ពីរ​បី​ថ្ងៃ ដើម្បី​ដើរ​កម្សាន្ត​មុន​នឹង​ពួកគាត់​ត្រឡប់​ទៅ​ប្រទេស​ចិន​វិញ។

លោក​ថា ជន​ជាតិ​ចិន​ទាំងនេះ​ធ្វើការ​នៅ​ហ្វីលីពីន ប៉ុន្តែ​ដោយសារ​ប្រទេស​នេះ​បាន​បិទ​ជើង​ហោះហើរ ទើប​ពួកគាត់​ធ្វើដំណើរ​ចូល​មក​ប្រទេស​កម្ពុជា​ដើម្បី​បន្ត​ដំណើរ​វិលត្រឡប់​ទៅ​ប្រទេស​របស់​ខ្លួន​វិញ ប៉ុន្តែ​អាជ្ញាធរ​បាន​ឃាត់​ពួកគាត់​ដើម្បី​ពិនិត្យ​សុខភាព​ដោយសារតែ​ជនជាតិ​ចិន ២​នាក់​ត្រូវ​បាន គេ​សង្ស័យ​ថា មាន​ផ្ទុក​មេរោគ​កូរ៉ូណា (Coronavirus)

លោក​បញ្ជាក់​ថា ក្នុងចំណោម​១៧៤​នាក់​នេះ ពីរ​នាក់​មាន​ជំងឺ​ក្តៅ​ខ្លួន​។ ដូច្នេះ​សមត្ថកិច្ច​រក្សា​ពួកគាត់​ឱ្យ​នៅ​ដាច់ដោយឡែក​ពី​គ្នា នៅ​មន្ទីរពេទ្យ​បង្អែក​ខេត្ត​ស្វាយរៀង ដើម្បី​យក​សំណាក​ទៅ​ពិនិត្យ​ជំងឺ Covid-19 ប៉ុន្តែ​ឥឡូវ​មិន​ទាន់​ចេញ​លទ្ធផល​នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល