បក្ស​ប្រឆាំង និង​សង្គម​ស៊ីវិល​ ស្មើ​របប​ក្រុង​ភ្នំពេញ ឱ្យ​បើក​ចំហ​ជា​សាធារណៈ​រឿង​សាងសង់​ទី​បញ្ជាការ​កងទ័ព​ជើង​ទឹក​ថ្មី​នៅ​កោះ​ព្រាប

ហេង រស្មី
2020-11-13
Share
Ream រូបខាងឆ្វេង គឺអគារ​បញ្ជាការដ្ឋាន ថតកាលពីថ្ងៃទី ២២ ខែ សីហា ឆ្នាំ ២០២០។ ឯរូប​ខាង​ស្ដាំ គឺដីទំនេរ​ក្រោយ​អគារនោះត្រូវបានកម្ទេចចោល ថតកាលពីថ្ងៃទី ០១ ខែ តុលា ឆ្នាំ ២០២០។
Screen Capture from CSIS's ASIA MARITIME TRANSPARENCY INITIATIVE Website

លោក អេង ឆៃអ៊ាង អនុ​ប្រធាន​គណបក្ស​សង្គ្រោះ​ជាតិ​ ប្រាប់​អាស៊ីសេរី​កាល​ពី​ថ្ងៃ​ទី១៣ ​វិច្ឆិកា​ថា​ របប​ក្រុង​ភ្នំពេញ​ មាន​ផែនការ​ទុច្ចរិត​ រួម​ជាមួយ​ប្រទេស​ចិន​ក្នុង​ការ​សាងសង់​មូលដ្ឋាន​កងទ័ព​ជើង​ទឹក​ថ្មី ទើប​មិន​ហ៊ាន​បង្ហាញ​ចេញ​ជា​សាធារណៈ។ លោក​ថា ការ​កសាង​មូលដ្ឋាន​កងទ័ព​ជើង​ទឹក នៅ​កំពង់ផែ​រាម មិន​គួរ​មាន​អ្វី​លាក់​ជា​អាថ៌កំបាំង​ទេ ប្រសិន​បើ​ការ​សាងសង់​នោះ​សម្រាប់​អធិបតេយ្យ​​ដែន​សមុទ្រ​របស់​ខ្មែរ។ ប៉ុន្តែ​បើ​របប​លោក ហ៊ុន សែន ចង់​ធ្វើ​មូលដ្ឋាន​កងទ័ព​ជើង​ទឹក មិន​ឱ្យ​មហាជន​ដឹង នោះ​បង្ហាញ​ថា កម្ពុជា​ជាមួយ​ប្រទេស​ចិន​កំពុង​មាន​អ្វី​លាក់​បាំង៖​«ពីព្រោះ​រដ្ឋាភិបាល​របស់​លោក ហ៊ុន សែន គេ​អាច​និយាយ​ថា នេះ​ជា​កិច្ចការ​យោធា ជា​កិច្ចការ​សន្តិសុខ ជា​កិច្ចការ​សម្ងាត់ គេ​មិន​ប្រាប់។​ នេះ​កាន់​តែ​ធ្វើ​ឱ្យ​មតិ​សាធារណៈ​ដែល​គេ​កំពុង​តែ​មាន​ភាព​សង្ស័យ​ស្រាប់​ហ្នឹង គេ​កាន់​តែ...??? បើ​ឃើញ​កាន់​តែ​ច្បាស់​ថា មាន​ការ​ពាក់ព័ន្ធ​ជាមួយ​នឹង

រដ្ឋាភិបាល​ចិន​ហើយ ​បាន​ជា​របប​លោក​ ហ៊ុន សែន ​មិន​ហ៊ាន​ប្រាប់​ឱ្យ​គេ​បាន​ដឹង​ ពី​ការ​កសាង​កំពង់​ផែ​នៅ​កោះ​ព្រាប»

ការ​លើក​ឡើង​របស់​មន្ត្រី​ជាន់​ខ្ពស់​គណបក្ស​ប្រឆាំង​នេះ​ បាន​កើត​មាន​ឡើង​ក្រោយ​ពី​រដ្ឋាភិបាល​កម្ពុជា​ មិន​ត្រឹម​តែ​មិន​បាន​បង្ហាញ​គម្រោង​សាងសង់​មូលដ្ឋាន​កង​ទ័ព​ជើង​ទឹក​ថ្មី​ជា​សាធារណៈ​ប៉ុណ្ណោះ​ទេ ប៉ុន្តែ​ថែម​ទាំង​បាន​រុះរើ​អគារ​ចំនួន​ពីរ ដែល​ជា​ជំនួយ​របស់​សហរដ្ឋអាមេរិក​ថែម​ទៀត​ផង។​

ទោះ​បី​ជា​យ៉ាងណា​ក្ដី លោក​ ទៀ បាញ់ ​រដ្ឋមន្ត្រី​ក្រសួង​ការពារ​ជាតិ​ប្រាប់​អាស៊ីសេរី ​កាល​ពី​ថ្ងៃ​ទី១០ វិច្ឆិកា​ថា ក្រសួង​ការពារ​ជាតិ​ពិត​ជា​បាន​រុះរើ​អគារ​ ដែល​ជា​ជំនួយ​របស់​អាមេរិក​ប្រាកដ​មែន។

លោក​ថា កម្ពុជា​ត្រូវ​ការ​សាងសង់​ទីតាំង​ថ្មី ដែល​មាន​ទំហំ​ធំ​ទូលាយ​ជាង​ពេល​បច្ចុប្បន្ន។ ប៉ុន្តែ​សម្រាប់​ថវិកា​សាងសង់​នេះ​ លោក​ព្យាយាម​បដិសេធ​មិន​ធ្វើ​អត្ថាធិប្បាយ​ឡើយ៖​«ខ្ញុំ​មិន​ដឹង​ជា​ទៅ​រៀបរាប់​របៀប​ម៉េច​ទេ​ គ្រាន់​តែ​ប្រាប់​ហើយ​ប្រាប់​ទៀត​ថា ធ្វើ​ឱ្យ​ល្អ​ជាង​មុន​ ធំ​ជាង​មុន​ ឆ្លើយតប​តាម​តម្រូវ​ការ​ជាង​មុន​ ឱ្យ​រីក​ចម្រើន​ជាង​មុន​ ទៅ​រៀបរាប់​បរិយាយ​ ទៅ​បញ្ជាក់​ប្រាប់​អស់​លោក​ទាំង​អស់​ហ្នឹង​បាន​ទេ?»។

កាលពី​ខែ​តុលា​សារ​ព័ត៌មាន​របស់​ជប៉ុន​មួយ​ឈ្មោះ នីកេ អេស៊ា (The NIKKEI Asian) បាន​ស្រង់​សំដី​មន្ត្រី​ជាន់ខ្ពស់​យោធា​កម្ពុជា​ លោក​ វ៉ាន់ ប៊ុនលៀង ​ថា ​មូលដ្ឋាន​កងទ័ព​ជើង​ទឹក​ថ្មី គឺ​ត្រូវ​បាន​ប្រទេស​ចិន​ជួយ​ឧបត្ថម្ភ​ និង​កែ​លម្អ​ក្នុង​ការ​សាង​សង់​ថ្មី។​

ពាក់ព័ន្ធ​រឿង​នេះ​ដែរ អ្នក​សិក្សា​ស្រាវជ្រាវ​បញ្ហា​សង្គម និង​នយោបាយ លោក​បណ្ឌិត សេង សារី បញ្ជាក់​ថា គ្មាន​អ្វី​ចម្លែក​ទេ ដែល​រដ្ឋាភិបាល​កម្ពុជា​លាក់​បាំង​ព័ត៌មាន​ទាំង​ឡាយ​ដែល​ទាក់ទង​ នឹង​ជំនួយ​របស់​ប្រទេស​ចិន។

លោក​បន្ថែម​ថា ​ប្រទេស​មហា​អំណាច​ទាំង​ពីរ គឺ​សហរដ្ឋ​អាមេរិក​ និង​ប្រទេស​ចិន បាន​ព្យាយាម​យក​តំបន់​អាស៊ី​អាគ្នេយ៍ ជា​ពិសេស​បញ្ហា​សមុទ្រ​ចិន​ខាង​ត្បូង យក​មក​ធ្វើ​ជា​ទីលាន​ប្រជែង​អំណាច​របស់​ខ្លួន​នៅ​ក្នុង​តំបន់៖​«សង្គម​ស៊ីវិល ក៏​ដូច​ជា​មហាជន និង​អ្នក​តាមដាន​សិក្សា​ស្រាវជ្រាវ អំពី​ការ​វិវឌ្ឍន៍ នយោបាយ​សង្គម​នៅ​កម្ពុជា សំដែង​ការ​ព្រួយ​បារម្ភ​ស្រដៀង​គ្នា​ទៅ​នឹង​កម្ពុជា​នឹង​អាច​ធ្លាក់​ចូល​ទៅ​ក្នុង​សង្គ្រាម​រវាង​មហា​អំណាច​ទាំង​ពីរ។ បើ​សិន​ជា​ក្នុង​ករណី ត្រូវ​បាន​មើល​ឃើញ​ថា យើង​បាន​ផ្ដល់​នៅ​ទីតាំង​សមុទ្រ​រាម​នេះ ជា​មូលដ្ឋាន​ទ័ព ទៅ​ឱ្យ​ប្រទេស​ណា​មួយ»

កាលពីថ្ងៃទី៩ វិច្ឆិកា ស្ថាប័ន​ស្រាវជ្រាវ​មួយ​របស់​អាមេរិក គឺ​មជ្ឈមណ្ឌល​ដើម្បី​ការ​សិក្សា​អំពី​យុទ្ធសាស្ត្រ និង​កិច្ចការ​អន្តរជាតិ (CSIS) តាម​រយៈ​គំនិត​ផ្ដួចផ្ដើម​តម្លាភាព​លំហ​សមុទ្រ​អាស៊ី (Asia Maritime Transparency Initiative, AMTI) បាន​បង្ហាញ​រូបភាព តាម​រយៈ​ថត​បាន​ពី​ផ្កាយ​រណប ឱ្យ​ដឹង​ថា អាជ្ញាធរ​យោធា​កម្ពុជា​ទើប​បាន​រុះរើ​អគារ​ជា​ជំនួយ​របស់​អាមេរិក​មួយ​ផ្សេង​ទៀត នៅ​ឯ​មូលដ្ឋាន​កងទ័ព​ជើង​ទឹក​រាម។​

អគារ​នោះ គឺ​ជា​រោង​ជាង​សម្រាប់​ចត និង​ជួសជុល​អូប័រ​របស់​បញ្ជា​ការដ្ឋាន​ជួរ​មុខ​នៃ​សន្តិសុខ​លម្ហ​សមុទ្រ​។ ​ការ​រុះរើ​នេះ​បាន​កើត​មាន​ឡើង​កាល​ពី​ចុង​ខែ​តុលា​ហើយ​បញ្ចប់​ ការ​រុះរើ​ទាំងស្រុង​កាល​ពី​ថ្ងៃ​ទី​០២​ វិច្ឆិកា​កន្លង​ទៅ។​

ការ​រុះរើ​អាគារ​នេះ គឺ​បាន​ធ្វើ​ឡើង​ជា​លើក​ទីពីរ បន្ទាប់​ពី​រដ្ឋាភិបាល​កម្ពុជា​ កាល​ពី​លើក​ទី​មួយ ក្នុង​ខែ​កញ្ញា​ ​បាន​រុះរើ​អគារ​មួយ​ក្នុង​​ចំណោម​អគារ​ជាច្រើន​ នៅ​ក្នុង​មូលដ្ឋាន​ទ័ព​ជើង​ទឹក​រាម ដែល​សង់​ដោយ​ថវិកា​ជំនួយ​របស់​សហរដ្ឋអាមេរិក​ តាំង​ពី​ខែ​សីហា ឆ្នាំ​២០១២​មក​។

អគារ​ ដែល​ត្រូវ​បាន​រុះរើ​ចោល​នោះ​ គឺ​ជា​បញ្ជា​ការដ្ឋាន​យុទ្ធសាស្ត្រ​ នៃ​គណៈកម្មាធិការ​ជាតិ​សន្តិសុខ​លំហ​សមុទ្រ​។​

ទោះ​បី​មាន​ការ​រក​ឃើញ​ដូច្នោះ​ក៏​ដោយ ក៏​មេបញ្ជាការ​រង និង​ជា​នាយសេនាធិការ​ទូទៅ​នៃ​កងទ័ព​ជើង​ទឹក លោក វ៉ាន់ ប៊ុនលៀង ​បដិសេធ ហើយ​ក៏​មិន​បញ្ជាក់​បន្ថែម​ដល់​ ជាមួយ​អាស៊ីសេរី​ដែរ ពាក់ព័ន្ធ​ថវិកា​ចំណាយ​ក្នុង​ការ​សាងសង់​មូលដ្ឋាន​កងទ័ព​ជើង​ទឹក​ថ្មី​នេះ៖​«ទៅ​សួរ​គេ​អ្នក​សាងសង់​ទៅ ខ្ញុំ​ម៉េច​ទៅ​ដឹង។ ខ្ញុំ​មិនមែន​ជា​អ្នក​សាងសង់​ឯ​ណា។ អត់​ទេ ខ្ញុំ​អត់​ដឹង​ទេ។ សួរ​គេ​អ្នក​សាងសង់​ទៅ»

ទាក់ទិន​នឹង​ទឹក​ប្រាក់​សម្រាប់​ការ​សាងសង់​មូលដ្ឋាន​ កងទ័ព​ជើង​ទឹក​ថ្មី​នេះ ​មេបញ្ជាការ​កងទ័ព​ជើង​ទឹក​លោក​ ទៀ វិញ​ ក៏​បដិសេធ​មិន​ធ្វើ​អត្ថាធិប្បាយ​ដែរ៖« សួរ​ទៅ​ថ្នាក់​លើ​ទៅ ខ្ញុំ​អត់​ដឹង​ទេ»

កាល​ពី​ខែកក្កដា ឆ្នាំ២០១៩ សារព័ត៌មាន​របស់​អាមេរិក​ ឌឹ​ វ៉លស្រ៊ីត​ ជរណល​ (The​ Wall ​Street​ Journal) ​ធ្លាប់​រាយការណ៍​ឲ្យ​ដឹង​ថា កម្ពុជា​បាន​លួច​ចុះ​កិច្ច​ព្រមព្រៀង​យោធា​សម្ងាត់​រយៈ​ពេល ៣០ឆ្នាំ ឲ្យ​ចិន​ប្រើប្រាស់​មូលដ្ឋាន​កងទ័ព​ជើង​ទឹក​រាម ហើយ​ដែល​កិច្ច​ព្រមព្រៀង​នេះ អាច​បន្ត​រៀងរាល់ ១០ឆ្នាំ​ម្ដង។ រដ្ឋាភិបាល​លោក​នាយក​រដ្ឋមន្ត្រី ហ៊ុន សែន តែង​បដិសេធ​ជុំវិញ​នេះ ​ដោយ​ចាត់​ទុក​ថា ជា​ព័ត៌មាន​ក្លែងក្លាយ​ ហើយ​ថា ​រដ្ឋធម្មនុញ្ញ​កម្ពុជា​​មិន​អនុញ្ញាត​ឲ្យ​មាន​វត្តមាន​យោធា​បរទេស​នៅ​លើ​ទឹកដី​ខ្លួន​ឡើយ​៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល