គ្រោះថ្នាក់ចរាចរណ៍មួយកើតឡើងនៅម្ដុំគល់ស្ពានគីហ្សូណា ទីរួមខេត្តកំពង់ចាម នៅថ្ងៃទី២៣ កុម្ភៈ បណ្ដាលឱ្យក្មេងអាយុប្រហែលមួយខួបម្នាក់ស្លាប់ភ្លាមៗ នៅនឹងកន្លែង និងមានអ្នករងរបួសធ្ងន់ប្រមាណជា ៦នាក់ ក្នុងនោះស្រី ៣នាក់ និងប្រុស ៣នាក់។
នាយរងការិយាល័យចរាចរណ៍ផ្លូវគោកនៃនគរបាលស្នងការខេត្តកំពង់ចាម លោក យក់ ផល្លា បានឱ្យដឹងថា គ្រោះថ្នាក់ចរាចរណ៍នេះបង្កឡើងដោយរថយន្តដឹកប្រេងមួយគ្រឿងដែលដាក់អក្សរនៅរថយន្តថា ថារី (THARY) ពាក់ស្លាកលេខ កំពង់ចាម 3A-2896 បើកបរពីកើតមកទិសខាងលិច ចុះពីលើស្ពានគីហ្សូណា ក៏ជ្រុលចង្កូតមកបុករះប្រជាពលរដ្ឋធ្វើដំណើរក្បែរនោះ និងជ្រុលមកបុកកន្លែងលក់សាំងមួយកន្លែង។ ក្រៅពីមានមនុស្សស្លាប់និងរបួស ក៏មានខូចខាតរថយន្ត ២គ្រឿង ម៉ូតូ ៩គ្រឿង ម៉ូតូកង់បី ១គ្រឿង និងកង់ចំនួន ២គ្រឿង។
លោកសុំសំណូមពរឱ្យប្រជាពលរដ្ឋទាំងអស់ដែលធ្វើចរាចរណ៍ ពិសេសរថយន្តធុនធ្ងន់ គប្បីមានការប្រុងប្រយ័ត្នខ្ពស់នៅពេលចុះចំណោតម្តងៗ៖ «គឺសំណូមពរឱ្យអ្នកប្រើប្រាស់ហ្នឹងមានការប្រុងប្រយ័ត្ននៅពេលដែលយើងចុះពីលើស្ពាន ពីព្រោះរថយន្តធុនធ្ងន់ វាមានទម្ងន់ទាញខ្លាំង ហើយប្រជាពលរដ្ឋដែលប្រើប្រាស់ផ្លូវនៅក្នុងរង្វង់មូល គឺមានច្រើន។ អ៊ីចឹងយើងជាអ្នកបើកបរគ្រប់គ្នា យើងត្រូវមានការប្រុងប្រយ័ត្ន ជាពិសេស ប្រុងប្រយ័ត្ននឹងប្រព័ន្ធហ្វ្រាំង»។
លោកបញ្ជាក់ថា នេះជាលើកទីមួយសម្រាប់ខេត្តកំពង់ចាម ក្នុងរយៈពេលដើមឆ្នាំ២០១៤ ដែលមានករណីគ្រោះថ្នាក់ចរាចរណ៍ធ្ងន់ធ្ងរបែបនេះ។ លោកបន្ថែមថា បើប្រៀបធៀបទៅនឹងដើមឆ្នាំដូចគ្នា ឃើញថា ដើមឆ្នាំ២០១៤ នៅខេត្តកំពង់ចាម មានគ្រោះថ្នាក់ចរាចរណ៍ច្រើនជាងដើមឆ្នាំ២០១៣ កន្លងទៅ ដែលភាគច្រើនគ្រោះថ្នាក់ចរាចរណ៍ទាំងនោះបង្កឡើងដោយអ្នកបើកបរមិនបានគោរពច្បាប់ចរាចរណ៍ឱ្យបានត្រឹមត្រូវ និងប្រព័ន្ធបច្ចេកទេសរបស់យានយន្តទាំងនោះមិនបានត្រួតពិនិត្យឱ្យបានត្រឹមត្រូវមុនពេលបើកបរម្តងៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។