សមត្ថកិច្ចខេត្តព្រះសីហនុ ជួយអន្តរាគមន៍បុគ្គលិក ៣នាក់ ដែលក្រុមហ៊ុនបនល្បែងអនឡាញចិននៅខេត្តព្រះសីហនុបានបង្ខាំងទុក ឲ្យមានសេរីភាពវិញ។
សាច់ញាតិជនរងគ្រោះ រស់នៅក្រុងប៉ោយប៉ែត ខេត្តបន្ទាយមានជ័យលោក ហេង បានប្រាប់វិទ្យុអាស៊ីសេរីដោយខ្លីថា បងប្អូនរបស់លោក ៣នាក់ ដែលចាញ់បោកទៅធ្វើការឲ្យក្រុមហ៊ុនចិនគ្មានស្លាកយ៉ីហោ ត្រូវបានអាជ្ញាធរសមត្ថកិច្ចខេត្តព្រះសីហនុ ចុះជួយអន្តរាគមន៍ចេញពីអគារបម្រើការងារនោះ កាលពីថ្ងៃទី៦ ខែវិច្ឆិកា។
លោកថា លោករីករាយដែលសាច់ញាតិរបស់លោកមានសុវត្ថិភាព៖ « ពេលនេះប្អូនប្រុសប្អូនស្រីខ្ញុំ គាត់បានចេញមកវិញហើយគាត់បានចេញមកវិញតាំងពីថ្ងៃទី ៦ អរគុណខាងអាជ្ញាធរដែលគាត់បានជួយដុតដៃដុតជើង ជួយគាត់បានចេញមកវិញឲ្យបានមានសេរីភាព » ។
កាលពីថ្ងៃទី១ ខែវិច្ឆិកា សាច់ញាតិអ្នកទាំង ៣ បានដាក់ពាក្យប្ដឹងទៅសមត្ថកិច្ចខេត្តព្រះសីហនុឲ្យជួយអន្តរាគមន៍យកមនុស្ស ៣ នាក់ ក្នុងចំណោមមនុស្សជាច្រើននាក់ទៀតមានទាំងជនជាតិវៀតណាម និងភូមាផង មានឈ្មោះ ហង្ស លីលី ហង្ស ទីទី និង ងួន ជឹម ដែលកំពុងចាញ់បោកធ្វើការឲ្យបនល្បែងអនឡាញចិន នៅក្នុងទីតាំងអគារមួយកន្លែងស្ថិតនៅភូមិ ១ សង្កាត់៣ ក្រុងព្រះសីហនុ។
សាច់ញាតិជនរងគ្រោះ ធ្លាប់ផ្ដល់សម្ភាសន៍ឲ្យដឹងថា បងប្អូនរបស់គាត់ត្រូវបានថៅកែចិនលក់ពីកន្លែងមួយទៅកន្លែងមួយ តាំងពីខែសីហា មក ដោយមិនផ្ដល់ប្រាក់ឈ្នួលឲ្យតាមការសន្យាក្នុងមួយខែ ១ពាន់ដុល្លារទេ ហើយថែមទាំងបង្ខាំងទុកមិនឲ្យចេញក្រៅអាគារ និងបង្ខំឲ្យធ្វើការទាំងឈឺ ហើយបើសិនជាចង់ឈប់ពីការងារនេះ ត្រូវបង់សង់ក្រុមហ៊ុននោះម្នាក់ថ្លៃ៣ពាន់៥រយដុល្លារទើបរួចខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។