ពលរដ្ឋ​ខ្មែរដែល​ជាប់​គាំង​នៅ​ម៉ាឡេស៊ី ១១៥នាក់ នឹង​មក​ដល់​កម្ពុជា​វិញ នៅ​ល្ងាច​ថ្ងៃ​ទី១៦ មិថុនា

ដោយ មាន ឫទ្ធិ
2020-06-15
អ៊ីម៉ែល
មតិ
Share
បោះពុម្ព
ពលរដ្ឋ​ខ្មែរ​ជាប់​នៅ​ម៉ាឡេស៊ី​ដោយសារ​​ការ​រាតត្បាត​ជំងឺ​កូវីដ១៩។ រូប៖ ស្ថានទូត​កម្ពុជា​ប្រចាំ​នៅ​ម៉ាឡេស៊ី
ពលរដ្ឋ​ខ្មែរ​ជាប់​នៅ​ម៉ាឡេស៊ី​ដោយសារ​​ការ​រាតត្បាត​ជំងឺ​កូវីដ១៩។ រូប៖ ស្ថានទូត​កម្ពុជា​ប្រចាំ​នៅ​ម៉ាឡេស៊ី
រូប៖ ស្ថានទូត​កម្ពុជា​ប្រចាំ​នៅ​ម៉ាឡេស៊ី

ពលរដ្ឋ​ខ្មែរ ១១៥នាក់ ក្នុងចំណោម​ពលរដ្ឋ​ខ្មែរ ១៤៣នាក់ ដែល​បាន​ជាប់​គាំង​នៅ​ប្រទេស ម៉ាឡេស៊ី ដោយសារ​តែ​លោក​នាយក​រដ្ឋមន្ត្រី ហ៊ុន សែន ពុំ​អនុញ្ញាត​ឲ្យ​ពួក​គេ​ធ្វើ​ដំណើរ ចូល​ស្រុក​វិញ​កាល​ពី​ពេល​កន្លង​ទៅ ក្រោម​លេស​ថា ទប់​ស្កាត់​ការ​ចម្លង​រាលដាល នៃ​ជំងឺ​កូវីដ-១៩ នឹង​ធ្វើ​ដំណើរ​មក​ដល់​កម្ពុជា​តាម​ជើង​ហោះ​ហើរ​ពាណិជ្ជកម្ម​របស់​ក្រុមហ៊ុន អាកាសចរណ៍​ម៉ាឡេស៊ី នៅ​ល្ងាច​ថ្ងៃ​ទី១៦ មិថុនា​នេះ។ ពួក​គេ​ទាំង​នេះ បាន​ខក​ដំណើរ​តាំង​ពី​ថ្ងៃ​ទី៧ ខែ​មេសា មក​ម៉្លេះ ក្រោយ​ពេល​លោក ហ៊ុន សែន ចេញ​បញ្ជា មិន​ឲ្យ​ពលរដ្ឋ​ខ្មែរ​ខ្លួន​ឯង​ចូល​ស្រុក។

ក្រសួង​ការ​បរទេស​អះអាង​ក្នុង​សេចក្ដី​ប្រកាស​ព័ត៌មាន ផ្សាយ​កាល​ពី​ថ្ងៃ​ទី១៥ មិថុនា​ថា អ្នក​ដែល​នៅ​សេសសល់ ២៨នាក់ គឺ​ជា​អ្នក​ដែល​ពុំ​បាន​ផ្ដល់​ព័ត៌មាន​មក​ស្ថានទូត រីឯ​អ្នក​ខ្លះ​ទៀត សម្រេច​មិន​ត្រឡប់​មក​កម្ពុជា​វិញ ដោយ​សារ​តែ​ពួក​គេ​ត្រូវ​ចូល​ធ្វើ​ការ​វិញ ឬ​ខ្លះ​ទៀត​ត្រូវ​ចូល​សាលា​រៀន​វិញ។

យ៉ាងណាក៏​ដោយ តាម​ការ​អះអាង​កន្លង​ទៅ​របស់​ពលរដ្ឋ​ខ្មែរ​ដែល​ជាប់​គាំង​នៅ​ម៉ាឡេស៊ី ទាំង​នោះ រដ្ឋាភិបាល​ពុំ​បាន​ចេញ​លុយ​ជួយ​ទិញ​សំបុត្រ​យន្ត​ហោះ​ឲ្យ​ពួក​គេ​ទេ ដោយ​ពួក​គេ​ត្រូវ​ចេញ​លុយ​ដោយ​ខ្លួន​ឯង បើ​ទោះ​ជា​ពួក​គេ​បាន​ប្រឈម​បញ្ហា​ខ្វះ​ខាត យ៉ាង​ណា​ក៏​ដោយ។ ដោយសារ​តែ​ការ​សម្រេច​ចិត្ត​មិន​ច្បាស់លាស់​របស់​លោក ហ៊ុន សែន ពួក​គេ​ទាំង​នោះ បាន​រង​គ្រោះ​ខ្វះខាត​ផ្នែក​ជីវភាព ខ្វះ​អាហារ​ហូប​ចុក គ្មាន​កន្លែង​ស្នាក់​នៅ ឬ​ប្រឈម​នឹង​ការ​ចាប់​ខ្លួន​ដោយសារ​រស់​នៅ​ខុស​ច្បាប់​នៅ​ម៉ាឡេស៊ី។

នៅ​ពេល​មក​ដល់​កម្ពុជា​វិញ​នៅ​ល្ងាច​ថ្ងៃ​ទី១៦ មិថុនា ពលរដ្ឋ​ខ្មែរ​ទាំង​នេះ ក៏​នឹង​ត្រូវ​ដាក់​ឲ្យ​នៅ​ដាច់​ដោយ​ឡែក​ពី​គេ​រយៈ​ពេល ១៤ថ្ងៃ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល