នៅក្នុងការជួបជុំគ្នានោះដែរ មានអំពើហិង្សាមួយបានកើតឡើង ដោយសារបុរសម្នាក់មានកាំភ្លើងដើរបន្លំខ្លួននៅក្នុងចំណោមអ្នកចូលរួមប្រារព្ធពិធី។
ក្រុមគ្រូបង្រៀនមកពី ២០រាជធានី ខេត្ត កម្មករ និងក្រុមយុវជនសរុបប្រមាណ ២០០នាក់ បានជួបជុំគ្នានៅទីលានប្រជាធិបតេយ្យក្នុងទិវាគ្រូបង្រៀនពិភពលោក ដែលដឹកនាំដោយលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ។
លោក រ៉ុង ឈុន ថ្លែងថា វិស័យអប់រំនៅកម្ពុជា កំពុងធ្លាក់ចុះ ដោយសារតែក្រសួងអប់រំ មិនបានយកចិត្តទុកដាក់ចំពោះតួនាទីសំខាន់របស់គ្រូបង្រៀន។ លោកអះអាងថា ដើម្បីលើកកម្ពស់វិស័យអប់រំឲ្យបានប្រសើរឡើងវិញ ដរាបណារាជរដ្ឋាភិបាល និងក្រសួងអប់រំចាត់វិធានការដោះស្រាយបញ្ហា ៩ចំណុច រួមមានការដំឡើងប្រាក់ខែអប្បបរមា យ៉ាងហោចឲ្យបាន ១លានរៀលក្នុងមួយខែ និងការបំបាត់អំពើពុករលួយក្នុងវិស័យអប់រំជាដើម។
លោក រ៉ុង ឈុន៖ «សូមជំរុញឲ្យក្រសួង ក៏ដូចជារដ្ឋាភិបាល ត្រូវបើកបៀវត្សរ៍ជូនអ្នកគ្រូ លោកគ្រូ តាមធនាគារ ចៀសវាងការបើកដូចសព្វថ្ងៃនេះ ឲ្យជនឆ្លៀតឱកាសកាត់លុយកាត់ប្រាក់ខែលោកគ្រូ អ្នកគ្រូ។ ត្រូវតែផ្ដល់សិទ្ធិជូនគ្រូបង្រៀនឲ្យមានសិទ្ធិពេញលេញក្នុងការបញ្ចេញមតិការប្រមូលផ្ដុំ និងការដង្ហែក្បួន»។
គ្រូបង្រៀនម្នាក់ គឺលោកស្រី រស់ ទិត្យម៉ាឡៃ បានថ្លែងថា បញ្ហាប្រាក់ខែគ្រូបង្រៀនទាប ជាមូលហេតុមួយធ្វើឲ្យវិស័យអប់រំធ្លាក់ចុះ។ លោកស្រីបន្តថា ការធ្លាក់ចុះវិស័យដ៏សំខាន់មួយនេះ មិនអាចឲ្យកម្ពុជា ប្រកួតប្រជែងទីផ្សារការងារបាន នៅពេលដែលធ្វើសមាហរណកម្មអាស៊ាននៅឆ្នាំ២០១៥ បានទេ។
ស្របពេលដែលគ្រូបង្រៀនឡើងថ្លែងសារដល់អ្នកចូលរួមក្នុងទិវាគ្រូបង្រៀនពិភពលោក ក្នុងន័យស្នើសុំឲ្យរដ្ឋាភិបាលគិតគូរពីជីវភាពគ្រូបង្រៀន និងស្នើសុំឲ្យមានការផ្លាស់ប្ដូរកែទម្រង់វិស័យអប់រំឡើងវិញនោះ។ អំពើហិង្សាមួយបានកើតឡើងរវាងអ្នកចូលរួមទៅលើបុរសម្នាក់ដែលមានកាំភ្លើងខ្លីយកចូលក្នុងពិធីនោះ។
បុរសនោះឈ្មោះ ប៉ឹង ជឿន មានប័ណ្ណអ្នកកាសែតប្រចាំនៅអង្គភាពគេហទំព័រមួយមិនមានឈ្មោះច្បាស់លាស់ និងមានកាំភ្លើងខ្លីសៀតនឹងចង្កេះ។ អ្នកចូលរួមភាគច្រើនជឿថា បុរសនោះមិនមែនជាអ្នកកាសែតពិតប្រាកដទេ ប៉ុន្តែអាចជាជនបង្កប់ម្នាក់ដែលបន្លំបង្កឲ្យមានចលាចលកើតឡើង។
ភ្លាមៗកាំភ្លើងដែលដកហូតពីបុរសនោះ ត្រូវបានតំណាងរាស្ត្រគណបក្សសង្គ្រោះជាតិ លោក សុន ឆ័យ ប្ដឹង និងប្រគល់ឲ្យព្រះរាជអាជ្ញារងសាលាដំបូងរាជធានីភ្នំពេញ លោក មាស ច័ន្ទពិសិដ្ឋ ខណៈដែលឈ្មោះ ប៉ឹង ជឿន ត្រូវដឹកទៅសង្គ្រោះបន្ទាន់នៅមន្ទីរពេទ្យ។
ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ លោក អំ សំអាត សំដែងការសោកស្ដាយចំពោះអំពើហិង្សាកើតឡើងក្នុងទិវាគ្រូបង្រៀន៖ «អ្វីដែលសោកស្ដាយ គឺយើងអំពាវនាវដល់បាតុករថា បើសិនជាមានរឿងអ៊ីចឹងតទៅទៀត សុំឲ្យបងប្អូនឃាត់ ហើយហៅសមត្ថកិច្ចមកយក ហើយប្តឹងសមត្ថកិច្ចនៅកន្លែងកើតហេតុផ្ទាល់តែម្តង ដែលមានភស្តុតាង យើងកុំប្រើប្រាស់នូវអំពើហិង្សាជាបន្តទៀតនេះជាវប្បធម៌មួយដែលមិនល្អ»។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ ស្នើសុំឲ្យសមត្ថកិច្ចស៊ើបអង្កេតករណីមានជនបង្កប់យកកាំភ្លើងចូលក្នុងពិធីជួបជុំគ្រូបង្រៀនឲ្យច្បាស់ និងត្រូវផ្ដន្ទាទោសទៅតាមច្បាប់។
ចំពោះគម្រោងដង្ហែក្បួនយកញត្តិទៅដាក់នៅក្រសួងអប់រំ របស់សមាគមគ្រូបង្រៀនកម្ពុជាឯករាជ្យ ត្រូវអភិបាលខណ្ឌដូនពេញ លោក សុខ សម្បត្តិ ហាមជាដាច់ខាត ដោយអះអាងថា ប៉ះពាល់សន្តិសុខ សណ្ដាប់ធ្នាប់សាធារណៈ ប៉ុន្តែអនុញ្ញាតឲ្យមានការជួបជុំនៅទីលានប្រជាធិបតេយ្យ។
លោក រ៉ុង ឈុន ក៏បានប្រកាសរំសាយពិធីជួបជុំគ្រូបង្រៀន ដោយសម្រេចមិនដង្ហែក្បួននៅគ្រាដែលកម្លាំងសមត្ថកិច្ច និងមន្ត្រីកងរាជអាវុធហត្ថប្រមាណ ៣០០នាក់ ដាក់ពង្រាយបិទផ្លូវដែលគ្រោងធ្វើដំណើរទៅដាក់ញត្តិនៅក្រសួងអប់រំ។
យ៉ាងណាលោកមានគម្រោងយកញត្តិទៅដាក់នៅក្រសួងអប់រំ ដោយផ្ទាល់ នៅថ្ងៃទី១៤ ខែតុលា ដើម្បីស្នើសុំឲ្យក្រសួងគិតគូរដំឡើងប្រាក់បៀវត្សរ៍ឲ្យគ្រូបង្រៀនយ៉ាងទាបឲ្យបាន ១លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។