បុគ្គលិក​សណ្ឋាគារ Great Duke ​សម្រេច​មិន​ធ្វើ​ការ​តវ៉ា​ជា​ថ្មី ដោយ​រង់​ចាំ​ការ​បើក​ប្រាក់​សំណង​ការងារ​ពី​ថៅកែ តាម​ការ​សម្រេច​របស់​ក្រុម​ប្រឹក្សា​អាជ្ញាកណ្ដាល

ដោយ ជុន ច័ន្ទបុត្រ
2020-02-24
អ៊ីម៉ែល
មតិ
Share
បោះពុម្ព
បុគ្គលិក​សណ្ឋាគារ​​ ដឺ ហ្ក្រេត ឌ្យូក ​ភ្នំពេញ (THE GREAT DUKE PHNOM PENH) តវ៉ា ច្រើន​ម៉ោង​នៅ​ព្រឹក​ថ្ងៃ​ទី៤ ខែ​វិច្ឆិកា ឆ្នាំ២០១៩។
បុគ្គលិក​សណ្ឋាគារ​​ ដឺ ហ្ក្រេត ឌ្យូក ​ភ្នំពេញ (THE GREAT DUKE PHNOM PENH) តវ៉ា ច្រើន​ម៉ោង​នៅ​ព្រឹក​ថ្ងៃ​ទី៤ ខែ​វិច្ឆិកា ឆ្នាំ២០១៩។
រូប៖ បុគ្គលិក​សណ្ឋាគារ​​ ដឺ ហ្ក្រេត ឌ្យូក ​ភ្នំពេញ ផ្ដល់​ឱ្យ

បុគ្គលិក​សណ្ឋាគារ​ ហ្គៀត​ឌូក​ ភ្នំពេញ​ (Great Duke Phnom Penh) សម្រេច​គ្នា​ថា ​នឹង​ធ្វើ​ការ​តវ៉ា​ជាថ្មី​នោះ​ទេ ក្រោយ​ពី​ក្រុមប្រឹក្សា​អាជ្ញាកណ្ដាល​ចេញ​សេចក្ដី​សម្រេច បង្គាប់​ឲ្យ​ម្ចាស់​សណ្ឋាគារ​ផ្ដល់​ប្រាក់​សំណង​ការ​ងារ​ដល់​ពួកគេ។

ប្រធាន​សហព័ន្ធ​សហជីព​កម្មករ និយោជិក​​វិស័យ​ទេសចរណ៍​កម្ពុជា លោក ទូច កុសល ប្រាប់​អាស៊ី​សេរី នៅ​ថ្ងៃ​ទី​២៤ កុម្ភៈ ​ថា ក្រុមប្រឹក្សា​អាជ្ញាកណ្ដាល​ទុក​ពេល​រយៈ​ពេល​៨​ថ្ងៃ ឲ្យ​ភាគី​គូ​ទំនាស់ គិត​ពិចារណា ឬ​ជំទាស់​នឹង​ការ​សម្រេច​នេះ ប្រសិន​បើ​មិន​ការ​ជំទាស់​ណា​មួយ​ទេ ​នោះ​ភាគី​ថៅកែ​ត្រូវ​គិត​គូរ​ផ្ដល់​សំណង​ដល់​បុគ្គលិក​ទាំង​អស់​១៣៦​នាក់។

កាល​ពី​ថ្ងៃ​ទី​២០ ខែ​កុម្ភៈ​ ក្រុមប្រឹក្សា​អាជ្ញា​កណ្ដាល​សម្រេច​យល់​ព្រម​តាម​សំណើ​ក្រុម​អ្នក​តវ៉ា​ ៣​ចំណុច​ និង​បដិសេធ​ចោល​១​ចំណុច។ ចំណុច​ទាំង​នោះ ​គឺ​ថៅកែ​សណ្ឋាគារ​ត្រូវ ​ទូរទាត់​ប្រាក់​អតីត​ភាព​ការងារ​មុន​ឆ្នាំ២០១៩ ប្រាក់​ជូន​ដំណឹង និង​ប្រាក់​ឈប់សម្រាក​ប្រចាំ​ឆ្នាំ ឲ្យ​បុគ្គលិក ដោយ​ដក​​ប្រាក់​សំណង​​ជំងឺ​ចិត្ត​ចេញ​។

លោក ទូច​ កុសល បញ្ជាក់​ថា លោក​ទាក់ទង​ទៅ​លោក លី​ តាយឡេង ជា​មេធាវី​តំណាង​ម្ចាស់​សណ្ឋាគារ​ ដើម្បី​កំណត់​ពេល​វេលា​ជាក់​លាក់​ផ្ដល់​ប្រាក់​សំណង​នេះ ប៉ុន្តែ​ត្រូវ​មេធាវី​ប្រាប់​ថា ​មិន​ទាន់​ទទួល​បាន​ការ​ឆ្លើយ​តប​ពី​ខាង​ថៅកែ​នៅ​ឡើយ ខណៈ​បុគ្គលិក​កំពុង​ទន្ទឹម​រង់ចាំ​ប្រាក់​សំណង​យ៉ាង​អន្ទះសា។

លោក​ឲ្យដឹង​ថា ចំនួន​ទឹក​ប្រាក់​សរុប​ដែល​បុគ្គលិក​ជាង ១រយ​នាក់​នេះ ត្រូវ​ទទួល​​បាន​ពី​ថៅកែ គឺ​ចន្លោះ​ពី ៤០ម៉ឺន​ដុល្លារ ទៅ ៥០ម៉ឺន​ដុល្លារ។

បុគ្គលិក​ទាំង​អស់​ប្រកាន់​ជំហរ​ថា បើ​ថៅកែ នៅ​តែ​មិន​ព្រម​បើក​ប្រាក់​សំណង​ការងារ​ឲ្យ​ពួកគេ​ តាម​ការ​សម្រេច​របស់​ក្រុម​ប្រឹក្សា​អាជ្ញា​កណ្ដាល​នោះ​ទេ ពួកគេ​នឹង​ប្រមូល​ផ្ដុំ​គ្នា​ធ្វើ​កូដកម្ម​តវ៉ា​មុខ​នៅ​មុខ​សណ្ឋាគារ​ឡើង​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល