ក្រុមអាជីវករលក់ដូរនៅក្នុងផ្សារឃ្លាំងរំសេវ ក្នុងខណ្ឌទួលគោក ប្រមូលគ្នា ធ្វើញត្តិស្នើសុំឱ្យម្ចាស់ផ្សារឯកជនមួយនេះ ពន្យារពេលបញ្ចប់កិច្ចសន្យា ឱ្យជួលបន្ត។ អ្នកឃ្លាំមើលសេដ្ឋកិច្ចក្រៅប្រព័ន្ធ ជំរុញឱ្យម្ចាស់ផ្សារ បន្តពន្យារពេលកិច្ចសន្យាជួលឱ្យអាជីវករ ដើម្បីមានលទ្ធភាពដោះបំណុលធនាគារ។
ក្រុមតំណាងអាជីវករផ្សារឃ្លាំងរំសេវ បានប្រជុំគ្នាថា នឹងធ្វើញត្តិដាក់ជូនប្រធានគណៈកម្មការផ្សារនៅថ្ងៃទី១៧ ឬ១៨ កុម្ភៈ ដើម្បីស្នើសុំបន្តកិច្ចសន្យាជួលតូប បន្តទៀត។
តំណាងអាជីវករម្នាក់ លោក ជា ម៉េងលី ឱ្យដឹងថា ក្រុមអាជីវករ កំពុងធ្វើញត្តិ ស្នើសុំ២ចំណុច គឺចង់ឱ្យម្ចាស់ផ្សារឯកជនមួយនេះ ពន្យារសុពលភាពឱ្យជួលបន្ត ថែម ៥ឆ្នាំទៀត ព្រោះអាជីវករភាគច្រើន កំពុងជាប់គាំងលក់ទូរស័ព្ទមិនចេញ ហើយម្ចាស់តូបខ្លះ ទើបជួសជុលតូបរួចក្រោយភ្លើងឆេះ មិនទាន់បានចូលលក់ដូរស្រួលបួលទេ។ ឯសំណើទី២ ក្រុមអាជីវករ គ្រោងស្នើសុំឱ្យប្រធានគណៈកម្មការផ្សារ រកទីតាំងថ្មីឱ្យសមស្រប ឱ្យអាជីវករបន្តលក់៖ «ចង់និយាយថា ភាគច្រើននៃពួកយើង ពួកអាជីវករហ្នឹង សុទ្ធតែខ្ចីលុយ ខ្ចីអ្វី ធនាគារមកប្រើប្រាស់អាជីវកម្ម អ៊ីចឹងណាបង ហើយតូបប្រមាណតូប ដែលប្រមាណខែមុនហ្នឹង វាឆេះច្រើនណាបង ឆេះ៤០តូប ហើយធ្វើផ្សារហើយ មិនទាន់បានលក់ស្រួលបួលផង។ ចំណុចទី២ ពួកយើងស្នើសុំឱ្យប្រធានគណៈកម្មការ ( ផ្សារ ) ធ្វើអន្តរាគមន៍រកទីតាំងថ្មី ឱ្យសមស្រប ដើម្បីយើងបន្តអាជីវកម្ម»។
តំណាងអាជីវករបន្តថា ផ្សារឃ្លាំងរំសេវ មានជាង ១ពាន់តូប ភាគច្រើន គឺលក់ និងជួសជុលទូរស័ព្ទ ឯផ្នែកខ្លះនៃផ្សារនេះ លក់សំលៀកបំពាក់។ ក្នុងចំណោមតូចជាង ១ពាន់នោះ មានតូចចំនួន៤០ រងការឆាបឆេះទាំងស្រុង កាលពី ៥ខែមុន គឺខែកញ្ញា ឆ្នាំ២០១៩។ អាជ្ញាធរមិនបានបង្ហាញតួលេខសរុបនៃការខូចខាតពីការឆាបឆេះ ដោយសារឆ្លងចរន្តអគ្គិសនី កាលនោះទេ ប៉ុន្តែម្ចាស់តូចខ្លះ អះអាងថា ខាតបង់គិតជាទឹកប្រាក់ មានចន្លោះពី ១០ម៉ឺនដុល្លារអាមេរិក ដល់៣០ម៉ឺនដុល្លារ ក្នុងមួយតូប។
ផ្សារនេះ ស្ថិតក្នុងសង្កាត់ផ្សារដើមគ នៅក្នុងបរិវេណជាមួយមជ្ឈមណ្ឌលម៉ុងឌីយ៉ាល់។ ម្ចាស់ផ្សារឯកជនមួយនេះ គឺ ឧកញ៉ា ស៊ី គង់ទ្រីវ និងប្រពន្ធ ឈ្មោះ ហុង ស៊ួន ដែលធ្លាប់មានរឿងអាស្រូវ ពាក់ព័ន្ធ នឹងការប្រើហិង្សាបាញ់បង្ក្រាបអ្នកមានជម្លោះដីធ្លី នៅខេត្តព្រះសីហនុ កាលពីឆ្នាំ២០១៩។
ក្រុមមេធាវី តំណាងដោយអាណត្តិរបស់ឧកញ៉ា ស៊ី គង់ទ្រីវ បានជូនដំណឹងអំពីការអស់សុពលភាពកិច្ចសន្យា របស់ក្រុមអាជីវករលក់ដូរនៅក្នុងផ្សារឃ្លាំងរំសេវ និងឱ្យត្រៀមខ្លួនរើតូបរបស់ខ្លួន ចេញពីផ្សារនេះ យ៉ាងយូរបំផុតត្រឹមចុងខែមេសាខាងមុខ ជាថ្ងៃដែលផ្សារឃ្លាំងរំសេវត្រូវបិទជាស្ថាពរ។
ក្នុងលិខិតរបស់មេធាវី បង្ហាញថា ទីតាំងដីផ្សារឃ្លាំងរំសេវ នឹងត្រូវមជ្ឈមណ្ឌលម៉ុងឌីយ៉ាល់ អភិវឌ្ឍន៍ជាអគារទំនើប ជំនួសឱ្យផ្សារឯកជនលក់ទូរស័ព្ទសព្វថ្ងៃ ហើយគម្រោងសាងសង់នេះ នឹងចាប់ផ្ដើម នៅចុងខែឧសភា។ ក្នុងរយៈពេល ៣ខែនេះ គឺខែកុម្ភៈ មីនា និងមេសា ម្ចាស់ទីតាំងផ្សារ ពុំគិតប្រាក់ឈ្នួលតូបប្រចាំខែ និងថ្លៃប្រើប្រាស់ចរន្តអគ្គិសនីឡើយ។ លិខិតរបស់មេធាវី ក៏ជំរុញឱ្យក្រុមអាជីវករស្វែងរកទីតាំងថ្មី ដើម្បីបន្តការលក់ដូររៀងៗ ខ្លួន ហើយដល់ថ្ងៃកំណត់រុះរើផ្សារ ម្ចាស់ទីតាំង នឹងមិនទទួលខុសត្រូវចំពោះការបាត់បង់ផលប្រយោជន៍អាជីវករឡើយ។
មេធាវីតំណាងដោយអាណត្តិរបស់ឧកញ៉ា ស៊ី គងទ្រីវ លោកមេធាវី ខូវ ណារ៉ូ មិនអាចសុំការអត្ថាធិប្បាយសម្រាប់រឿងនេះបានទេ ដោយសារលោកអះអាងថា សេវាទូរស័ព្ទរអាក់រអួលស្ដាប់មិនបាន ព្រោះលោកកំពុងស្នាក់ នៅខេត្តរតនគិរី។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វ៉ន់ ពៅ ជំរុញឱ្យម្ចាស់ផ្សារឯកជនឃ្លាំងរំសេវ យល់ព្រមទទួលយកសំណើរបស់ក្រុមអាជីវករ ដោយឱ្យអាជីវករបន្តការជួលតូបបន្តទៀត។ ឯអាជ្ញាធររដ្ឋ ត្រូវមានកាតព្វកិច្ចរកទីតាំងថ្មីសមរម្យ ឱ្យអាជីវករ ប្រសិនបើម្ចាស់ទីតាំងឈប់បន្តការជួលតូបឱ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។