អាជ្ញាធរ​ថា មិន​បាន​ចាប់ខ្លួន​បុរស​ដែល​ទុក​គ្រាប់​មិនទាន់​ផ្ទុះ​៣០​គ្រាប់​ទេ ព្រោះ​ជា​មនុស្ស​សតិ​មិន​គ្រប់

ដោយ អាស៊ីសេរី
2020-06-15
អ៊ីម៉ែល
មតិ
Share
បោះពុម្ព

អាជ្ញាធរ​កម្ចាត់​មីន​កម្ពុជា អះអាង​ថា បុរស​ម្នាក់ ដែល​បាន​យក​គ្រាប់មីន និង​គ្រាប់​យុទ្ធភណ្ឌ​មិនទាន់​ផ្ទុះ​ដទៃ​ទៀត​ចំនួន ៣០ គ្រាប់​ទៅ​ចង់​ព្យួរ​រណែងរណោង លើ​ដើមឈើ​មុខ​ផ្ទះ​របស់​ខ្លួន​សម្រាប់​កម្សាន្ត​នោះ មិន​ត្រូវ​បាន​អាជ្ញាធរ ចាប់ខ្លួន​នោះ​ទេ ដោយសារ​បុរស​រូប​នោះ ជា​មនុស្ស​មាន​សតិ​មិន​គ្រប់។

កាល​ពី​ថ្ងៃ​ទី​១០ ខែ​មិថុនា មជ្ឈមណ្ឌល​សកម្មភាព​កម្ចាត់​មីន​កម្ពុជា (CMAC) សហការ​ជាមួយ​អាជ្ញាធរ​ខេត្ត​បន្ទាយមានជ័យ បាន​ចុះទៅ​ប្រមូល​ទុក និង​ដើម្បី​កម្ទេច​ចោល​នូវ​គ្រាប់មីន និង​គ្រាប់​យុទ្ធភណ្ឌ​មិនទាន់​ផ្ទុះ​ចំនួន ៣០​គ្រាប់ ពី​បុរស​អ្នក​រើស​អេតចាយ​វ័យ ៤៨​ឆ្នាំ​ម្នាក់ រស់នៅ​ភូមិ​ទំនប់​ដាច់ ឃុំ​អូរ៣ជាន់ ស្រុក​អូរជ្រៅ ខេត្ត​បន្ទាយមានជ័យ។ អគ្គនាយក​មជ្ឈមណ្ឌល​សកម្មភាព​កម្ចាត់​មីន​កម្ពុជា​លោក ហេង រតនា ប្រាប់​វិទ្យុ​អាស៊ីសេរី នៅ​ថ្ងៃ​ទី​១៤ មិថុនា​នេះ ថា​គ្រាប់​ទាំងនោះ ខ្លះ​នៅ​មាន​ប្រសិទ្ធភាព​ផ្ទុះ​នៅឡើយ និង​មាន​គ្រាប់មីន​ប្រឆាំង​រថក្រោះ​ជាដើម។ លោក​ថា បុរស​នេះ​ខុសគេ គាត់​ប្រមូល​គ្រាប់​ទាំងនេះ យក​ទៅ ដាក់​តាំង​នៅ​មុខ​ផ្ទះ ទុកជា​ល្បែង​កម្សាន្ត ដោយ​មិន​បាន​ដឹង​អំពី​គ្រោះថ្នាក់។

លោក ហេង រតនា បន្ថែម​ថា កាកសំណល់​យុទ្ធភណ្ឌ​មិនទាន់​ផ្ទុះ​ទាំងនេះ បង្ក​គ្រោះថ្នាក់​ដល់​អាយុជីវិត​ប្រជាពលរដ្ឋ​ខ្លាំង​បំផុត ហើយ​នៅតែ​ប្រមូល​បាន​រាល់ថ្ងៃ ដោយ​ក្នុង​រយៈពេល ៥​ខែ​ដើម​ឆ្នាំនេះ អាជ្ញាធរ​ជំនាញ ប្រមូល​បាន​ជាង ១​ម៉ឺន ៣​ពាន់​គ្រាប់ នៅ​ទូទាំង​ប្រទេស។

អាស៊ីសេរី​មិន​អាច​ទាក់ទង​សុំ​ការ​បំភ្លឺ​បន្ថែម​ជុំវិញ​ករណី​នេះ​ពី​ស្នងការ​នគរបាល​ខេត្ត​បន្ទាយមានជ័យ លោក អាត់ ខែម បាន​ទេ ដោយ​ទូរស័ព្ទ​ចូល តែ​ពុំ​មាន​អ្នក​ទទួល​ទូរស័ព្ទ។

គិត​ត្រឹម​រយៈពេល ៥​ខែ​ដើម​ឆ្នាំនេះ ដើម្បី​កាត់បន្ថយ​នូវ​គ្រោះថ្នាក់​បង្កឡើង​ដោយ​កាកសំណល់​យុទ្ធ​ភ័​ណ្ឌ​មិនទាន់​ផ្ទុះ​ទាំងនេះ អគ្គនាយក​មជ្ឈមណ្ឌល​សកម្មភាព​កម្ចាត់​មីន​កម្ពុជា សហការ​ជាមួយ​អាជ្ញាធរ​មូលដ្ឋាន និង​បណ្ដាញ​ស្ម័គ្រចិត្ត​តាម​សហគមន៍ បាន​ចុះទៅ​បង្ហាញ​ណែនាំ​ឱ្យ​ប្រជាពលរដ្ឋ​យល់ដឹង​អំពី​គ្រោះថ្នាក់​នេះ បាន​ជាង​កន្លះ​លាន​នាក់ ស្មើនឹង​ជាង ពីរ​ម៉ឺន​គ្រួសារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល