ຊາວບ້ານ 40 ຄົນ ທີ່ລັກລອບຂຸດແຮ່ທາດ ອາດຖືກສົ່ງຄະດີ ໃຫ້ໄອຍະການ

ເມື່ອວັນທີ 12 ມິຖຸນາ ປີ 2023 ທີ່ຜ່ານມານີ້ ຊາວບ້ານຈຳນວນ 40 ຄົນເຊິ່ງເປັນຊາວບ້ານ ຈາກຫຼາຍເມຶອງ ໃນແຂວງຊຽງຂວາງ ໄດ້ຖືກເຈົ້າໜ້າທີ່ຕຳຣວດ ແຂວງຊຽງຂວາງກັກໂຕ ພາຍຫຼັງທີ່ຊາວບ້ານໄດ້ພາກັນໄປລັກຂຸດຄົ້ນແຮ່ທາດ ຢູ່ບໍຣິເວນພູແຮ້ ເຂດເມືອງແປກ ພ້ອມທັງຖືກເຈົ້າໜ້າທີ່ ຍຶດແຮ່ທາດທີ່ຂຸດຄົ້ນໄດ້ຈຳນວນ 60 ເປົາ ແລະ ຣົຖຈັກອີກຫຼາຍຄັນ ທີ່ໃຊ້ເປັນພາຫະນະສຳລັບເດີນທາງ ໂດຍມີທັງຜູ້ຮັບສາລະພາບວ່າ ໄປລັກຂຸດແຮ່ທາດແທ້ ແລະອີກຈຳນວນໜຶ່ງ ໄດ້ປະຕິເສດວ່າ ໄປວຽກສ່ວນໂຕ. ດັ່ງ ພັນໂທ ສົມສັກ ພີມມະສອນ, ຫົວໜ້າ ຜແນກຕຳຣວດ ສິ່ງແວດລ້ອມ ກອງບັນຊາການ ປກສ ແຂວງຊຽງຂວາງ ໄດ້ກ່າວຜ່ານຂ່າວ ປກສ ແຂວງຊຽງຂວາງເມື່ອວັນທີ 19 ມິຖຸນາ ຜ່ານມາວ່າ:

“ໄດ້ພົບເຫັນປະຊາຊົນ ເຄື່ອນໄຫວຂຸດຄົ້ນແຮ່ທາດ ທັມມະຊາຕ ຢູ່ຂອບເຂດພູແຮ້ ຈຳນວນ 40 ຄົນ ແລະມີແຮ່ທາດ ຈຳນວນໜຶ່ງ ໃນປັດຈຸບັນພວກເຮົາພວມເກັບກຳຂໍ້ມູນ ຈະແກ້ໄຂໃຫ້ຖືກຕ້ອງ ຕາມຂັ້ນຕອນຂອງກົດໝາຍ ໃນມາຕຣາ 340 ວ່າດ້ວຍການຂຸດຄົ້ນ ແຮ່ທັມມະຊາຕ.”

ມາຮອດປັດຈຸບັນ ຊາວບ້ານທັງ 40 ຄົນດັ່ງກ່າວ ຍັງຖືກກັກໄວ້ ເພື່ອເຂົ້າສູ່ຂະບວນການ ສຶກສາອົບຮົມ ແລະການພິຈາຣະນາ ຂອງຜແນກຕຳຣວດ ສິ່ງແວດລ້ອມ ວ່າຈະໃຫ້ມີການສຣຸບ ສົ່ງສຳນວນຄະດີ ໃຫ້ທາງໄອຍະການ ຫຼືບໍ່.

ດັ່ງເຈົ້າໜ້າທີ່ ກອງ ບັນຊາການ ປກສ ແຂວງຊຽງຂວາງ ກ່າວຕໍ່ວິທຍຸ ເອເຊັຽ ເສຣີ ເມື່ອວັນທີ 21 ມິຖຸນາ ນີ້ວ່າ:

“ໂຕຄະດີພູແຮ້ ຫວະຕອນນີ້ຫັ້ນ ເພິ່ນກຳລັງສຶກສາອົບຮົມ ແລ້ວກໍລໍຖ້າຂັ້ນເທິງຫັ້ນຊີ້ນຳວ່າ ຊິໃຫ້ສຣຸບສົ່ງ ຫຼືບໍ່ ຈັ່ງໂທມາພົວພັນນຳອີກ.”

ໃນຂະນະທີ່ເຈົ້າໜ້າທີ່ ຜແນກພະລັງງານ ແລະ ບໍ່ແຮ່ ແຂວງຊຽງຂວາງ ໄດ້ໃຫ້ຂໍ້ມູນຕື່ມວ່າ ສຳລັບຢູ່ເຂດພູແຮ້ ເປັນເຂດທີ່ທາງຣັຖບານ ໄດ້ໃຫ້ສັມປະທານ ແກ່ບໍຣິສັດ ພູເບັ້ຍ ມາຍນິ້ງ ເພື່ອການຂຸດຄົ້ນ ແຮ່ທາດ ໃນອະນາຄົດ, ແຕ່ປັດຈຸບັນ ໄດ້ຫ້າມບໍ່ໃຫ້ມີການສຳຣວດແລ້ວ ພ້ອມໄດ້ຫ້າມຊາວບ້ານ ບໍ່ໃຫ້ໄປລັກຂຸດົ້ນແຮ່ທາດ ໃນບໍຣິເວັນນັ້ນຢ່າງເດັດຂາດ.

ດັ່ງທ່ານກ່າວວ່າ:

“ພູແຮ້ຫວະ ເປັນເຂດສັມປະທານ ສຶກສາສຳຣວດ ຂອງບໍຣິສັດພູເບັ້ຍ ມາຍນິ້ງ. ບໍ່ ເພິ່ນບໍ່ໃຫ້ສຳຣວດແລ້ວ. ປັດຈຸບັນຫ້າມບໍ່ໃຫ້ສຳຣວດ.”

ສ່ວນຊາວບ້ານ ຢູ່ເມືອງແປກ ແຂວງຊຽງຂວາງ ກ່າວວ່າ ສໍາລັບເຂດພູແຮ້ ແມ່ນຢູ່່ຫ່າງຈາກ ສນາມບິນເມືອງແປກ ປະມານ 10 ກິໂລແມັດ ແຕ່ບໍ່ຮູ້ຄັກແນ່ວ່າ ໃນໄລຍະທີ່ຜ່ານມາ ໄດ້ມີຊາວບ້ານລັກໄປຂຸດຄົ້ນແຮ່ທາດ ເຂດດັ່ງກ່າວ ຈຳນວນຫຼາຍໜ້ອຍສໍ່າໃດ, ຫຼາຍຄົນຮູ້ພຽງແຕ່ວ່າ ເປັນເຂດທີ່ທາງການ ຫວງຫ້າມເພື່ອສງວນ ໃຫ້ແກ່ບໍຣິສັດ ຂຸດຄົ້ນແຮ່ທາດ.

ດັ່ງຍານາງກ່າວວ່າ:

“ກາບໍ່ໄກປານໃດ ປະມານ 10 ຫຼັກນີ້. ອັນນີ້ບໍ່ຮູ້ນ່າ ແຕ່ກ່ອນກະມີຕິເບາະ ແຕ່ວ່າທາງການ ຫວງນ່າ ມັນເປັນຫວງຫ້າມເນາະ ແມ່ນໃຫ້ພວກຜູ້ສັມປະທານຫັ້ນ.”

ຊາວບ້ານ ເມືອງແປກອີກທ່ານໜຶ່ງ ກ່າວວ່າ ພາກສ່ວນທີ່ສາມາດຂຸດຄົ້ນແຮ່ທາດ ຢູ່ໃນພາຍແຂວງຊຽງຂວາງ ໄດ້ ຕ້ອງແມ່ນບໍຣິສັດ ທີ່ໄດ້ຮັບສັມປະທານ ຈາກຣັຖບານລາວ ເທົ່ານັ້ນ. ສ່ວນຊາວບ້ານທົ່ວໄປ ທີ່ໄປລັກຂຸດຄົ້ນແຮ່ທາດ ຢູ່ເຂດພູແຮ້ ແລະເຂດອື່ນໆ ແມ່ນຖືວ່າຜິດກົດໝາຍ ແລະໄລຍະທີ່ຜ່ານມາ ເຈົ້າໜ້າທີ່ໄດ້ຣາຍງານວ່າ ຊາວບ້ານທີ່ໄປລັກຂຸດຄົ້ນແຮ່ທາດ ໄດ້ເຮັດໃຫ້ສານເຄມີ ໄຫຼລົງນໍ້າ ຈົນເປັນອັນຕະຣາຍ ຕໍ່ຊາວບ້ານ ທີ່ໃຊ້ນໍ້າຫ້ວຍລວມ ທັງສັດລ້ຽງນຳດ້ວຍ.

ດັ່ງທ່ານກ່າວວ່າ:

“ໂຕນີ້ບໍ່ໄດ້ ຄັນຖ້າວ່າບໍ່ໄດ້ຜ່ານທາງຣັຖບານ ແລະແມ່ນບໍ່ໄດ້ ກາມີເປັນຊ່ວງໆ ຕຳຣວດເຂົາກະກວດສອບເຂົາກາຈັບຢູ່ ໄປຂຸດເອົາດິນມາສື່ໆ ເຂົາກາຍັງນຳຈັບເລີຍ ເຂົາບໍ່ໃຫ້ເຮັດເລີຍວ່າຊັ້ນສະ ເພາະເຂົາເຈົ້າເອົາທາດເບື່ອ ແລ້ວເຮັດໃຫ້ປະຊາຊົນ ກິນນໍ້າແລ້ວມີຜົລກະທົບ ແລ້ວກາເຮັດໃຫ້ງົວຄວາຍຕາຍ.”

ພາຍຫຼັງ ທີ່ຂ່າວດັ່ງກ່າວ ໄດ້ຖືກເຜີຍແຜ່ອອກໄປ ຜ່ານສື່ສັງຄົມອອນລາຍນ໌ ກໍໄດ້ມີຜູ້ໃຊ້ສື່ສັງຄົມອອນລາຍນ໌ ວິພາກວິຈານ ຢ່າງໜັກ ເຊິ່ງຫຼາຍຄົນເຫັນດີ ກັບການຈັບຊາວບ້ານ ທີ່ຂຸດຄົ້ນແຮ່ທາດພຽງສ່ວນໜ້ອຍ ແລະອີກຈຳນວນໜຶ່ງ ສະທ້ອນໃຫ້ເຫັນວ່າ ທາງການພະຍາຍາມ ສງວນບ່ອນທີ່ມີແຮ່ທາດໄວ້ ເພື່ອ ໃຫ້ບໍຣິສັດຕ່າງປະເທດ ໂດຍສະເພາະປະເທດຈີນ ມາເປັນຜູ້ສັມປະທານ ແລະຂຸດຄົ້ນໄປຂາຍຕ່າງປະເທດ.

ເມື່ອເດືອນພຶສພາ ທີ່ຜ່ານມາ ຊາວບ້ານ 4 ຄົນກໍໄດ້ຖືກເຈົ້າໜ້າທີ່ຕໍາຣວດ ແຂວງສວັນນະເຂດ ຈັບ ພ້ອມຂອງກາງ ເປັນຫິນຂຽວນໍ້າໜັກ 41 ຕັນ ເຊິ່ງທັງ 4 ຄົນດັ່ງກ່າວ ໄດ້ລັກຂຸດຄົ້ນແຮ່ທາດ ໃນເຂດສັມປະທານ ຂອງບໍຣິສັດລ້ານຊ້າງ ມິເນໂຣສ໌ ຢູ່ເຂດເມືອງວິລະບູລີ ພ້ອມທັງໄດ້ມີການຊຸກເຊື່ອງໄວ້ ແລະ ລັກຂົນສົ່ງ.

ກ່ອນໜ້ານັ້ນ ເມື່ອເດືອນພຶສພາ ປີ 2022 ຊາວບ້ານ 17 ຄົນ ຈາກແຂວງໄຊສົມບູນ ແລະແຂວງອື່ນໆ ໄດ້ຖືກເຈົ້າໜ້າ ທີ່ຕຳຣວດແຂວງໄຊສົມບູນ ກັກ ຍ້ອນໄປລັກຂຸດຄຳ ຢູ່ເຂດນໍ້າຍ້ອນ ເມຶອງອະນຸວົງ ເຊິ່ງພາຍຫຼັງໄດ້ຖືກກັກໂຕ ພ້ອມຮັບການສຶກສາອົບຮົມ ເປັນເວລາ ປະມານ 1 ສັບປະດາ ຊາວບ້ານຈຳນວນດັ່ງກ່າວ ໄດ້ຖືກປ່ອຍໂຕກັບບ້ານ ໃນພາຍຫຼັງ.