ສະຫະຣັຖ ອອກຣາຍງານ ການຈຳກັດສິທ ດ້ານສາສນາ ທົ່ວໂລກ
2022.06.05
ຕໍ່ໜ້າທຳນຽບຂາວ ຫຼືທຳນຽບ ປະທານາທິບໍດີ ສະຫະຣັຖອາເມຣິກາ, ທີ່ນະຄອນຫຼວງ ວໍຊິງຕັນ ດີ.ຊີ., ເດືອນເມສາ 2022.
ນັກຂ່າວ ພົລເມືອງ
ບົດຣາຍງານປະຈຳປີ ຂອງກະຊວງການຕ່າງປະເທດ ກ່ຽວກັບເສຣີພາບການເຊື່ອຖືສາສນາ ເຊິ່ງໄດ້ລະບຸເຖິງສຖານະການເຊື່ອຖືສາສນາ ຢູ່ໃນທຸກໆປະເທດໃນໂລກ. ບົດຣາຍງານດັ່ງກ່າວ ໄດ້ລວມເອົານະໂຍບາຍຂອງຣັຖບານ ແຕ່ລະປະເທດ ທີ່ໄປລະເມີດຄວາມເຊື່ອທາງດ້ານສາສນາ ແລະ ການປະຕິບັດຂອງກຸ່ມຄົນ, ການຮັບຮູ້ເຣື່ອງສາສນາ ແລະ ສ່ວນບຸກຄົນ. ນະໂຍບາຍຂອງສະຫະຣັຖອາເມຣິກາ ກໍເພື່ອສົ່ງເສີມເສຣີພາບ ທາງດ້ານສາສນາ ຢູ່ໃນໂລກ.
ທ່ານ ແອນໂທນີ ບລິ່ງເຄັນ ຣັຖມົນຕຣີຕ່າງປະເທດ ສະຫະຣັຖອາເມຣິກາ ໄດ້ກ່າວຕອນນຶ່ງວ່າ:
“ສະຫະຣັຖອາເມຣິກາ ຈະສືບຕໍ່ຢືນຢັດ ເພື່ອເສຣີພາບການເຊື່ອຖືສາສນາ ໄປທົ່ວໂລກ, ພວກເຮົາຍັງຄົງສືບຕໍ່ເຮັດວຽກຄຽງຄູ່ກັບຣັຖບານ, ອົງການຈັດຕັ້ງຕ່າງໆ, ພາກປະຊາສັງຄົມ.”
ທ່ານ ແອນໂທນີ ບລິ່ງເຄັນ ຍັງກ່າວຕື່ມວ່າ:
“ການນັບຖືສາສນາ ບໍ່ພຽງແຕ່ເປັນນຶ່ງໃນຄຸນຄ່າອັນສູງສົ່ງ ແລະ ສິດທິຂັ້ນພື້ນຖານ ແຕ່ ຈາກຄວາມຄິດຂ້າພະເຈົ້າແລ້ວ ມັນຍັງເປັນບູລິມະສິດນະໂຍບາຍຕ່າງປະເທດທີ່ຈຳເປັນ.”
ແຕ່ກໍໜ້າເສັຽດາຍ ທີ່ຍັງມີຣັຖບານຫຼາຍປະເທດ ຫຼົ້ມແຫຼວໃນການເຄົາຣົບສິດທິຂັ້ນພື້ນຖານ ຂອງພົລເມືອງໂຕເອງ. ເຊັ່ນກໍລະນີການຂ້າລ້າງເຜົ່າພັນຊາວໂຣຮິງຢາ ຢູ່ປະເທດພະມ້າ ໃນປີ 2017. ຣັຖບານບາງປະເທດ ສືບຕໍ່ໃຊ້ກົດໝາຍຫ້າມວິພາກວິຈານ, ຫ້າມເຊື່ອຖືສາສນາ, ຕຳຣວດຈັບກຸມຊົນກຸ່ມນ້ອຍ ໃນປະເດັນເຣື່ອງທາງສາສນາ, ການຈຳກັດຄວາມເຊື່ອທາງສາສນາ ກໍຄືການຈຳກັດການນັບຖືສາສນາ ແລະ ທ່ານ ແອນໂທນີ ບລິ່ງເຄັນ ຍັງກ່າວຕື່ມວ່າ:
“ລວມທັງ ສະຫະຣັຖ ແລະ ຢູໂຣບ ຈະຕ້ອງດຳເນີນການຫຼາຍກວ່ານີ້ ເພື່ອຕໍ່ສູ້ກັບການສ້າງຄວາມຄຽດຊັງ, ການຕ້ານແບ່ງແຍກເຊື້ອຊາດ, ແລະ ການແບ່ງແຍກຊາວມຸສລິມ.”
ຢູ່ໃນຖແລງການ ທ່ານ ແອນໂທນີ ບລິ່ງເຄັນ ຣັຖມົນຕຣີຕ່າງປະເທດ ສະຫະຣັຖອາເມຣິກາ ຍັງໄດ້ຍົກໂຕຢ່າງ ກໍຣະນີເກີດຂຶ້ນຢູ່ຫຼາຍປະເທດ ເຊັ່ນຢູ່ປະເທດຊາອຸດິອາຣາເບັຽ, ສະຫະຣັຖອາເມຣິກາ ໄດ້ດຳເນີນການທີ່ສຳຄັນ ເພື່ອເພີ່ມການປຶກສາຫາລື ກ່ຽວກັບສາສນາສອງນິກາຍ ແລະ ການຢືນຢັດທີ່ນັບຖືສາສນາ ແລະ ການນັບຖືສາສນາອື່ນ ທີ່ບໍ່ແມ່ນສາສນາອິສລາມ ຖືວ່າຜິດກົດໝາຍ ແລະ ຣັຖບານຍັງຄົງແບ່ງແຍກຊົນກຸ່ມນ້ອຍທີ່ຖືສາສນາອື່ນ.
ປະເທດຈີນ ກໍຍັງຄົງມີການຂ້າລ້າງເຜົ່າພັນ ແລະ ປາບປາມຊາວວີກເກີ ທີ່ຖືສາສນາອິສລາມ ແລະ ສາສນາອື່ນໆ ທີ່ເປັນຊົນກຸ່ມນ້ອຍ. ນັບແຕ່ປີ 2017 ມີຊາວວີກເກີ, ກາຊັກ ແລະ ເກີຈີສ ແລະ ແລະ ຊົນເຜົ່າອື່ນໆ ປະມານ 1 ລ້ານ ຄົນ ຖືກກັກຂັງຢູ່ໃນຄ້າຍດັດສ້າງ ເຂດປົກຄອງໂຕເອງ ຊິນຈຽງ. ຣັຖບານຈີນ ຍັງສືບຕໍ່ຄຸກຄາມຜູ້ທີ່ຖືກສາສນາອື່ນໆ ທີ່ບໍ່ເປັນໄປຕາມແນວທາງ ຂອງພັກຄອມມູນິສຕ໌ (Communist) ແຫ່ງປະເທດຈີນ ລວມທັງສະຖານທີ່ທາງສາສນາພຸທ, ຄຣິສຕຽນ, ຣັຖທິເຕົ໋າ ແລະ ມີການໃຊ້ສິ່ງກີດຂວາງສະຖານທີ່ດັ່ງກ່າວ.
ຢູ່ປະເທດ ອາຟການິສຖານ, ສະພາບການນັບຖືສາສນາຍິ່ງຕົກຕໍ່າ ຢູ່ພາຍໃນໃຕ້ການປົກຄອງຂອງກຸ່ມຕາລີບັນ ໂດຍສະເພາະ ພວກເຂົາໄດ້ໄປກີດກັນ ສິດທິຂັ້ນພື້ນຖານຂອງແມ່ຍິງ ແລະ ເດັກຍິງ ໃນການເຂົ້າເຖິງການສຶກສາ, ໃນການໄປເຮັດວຽກ, ການຮ່ວມກິຈກັມສັງຄົມ ໃຫ້ຢູ່ພາຍໃຕ້ສາສນາ ຂອງໂຕເອງເທົ່ານັ້ນ ແລະ ໃນເວລາດຽວກັນ ກຸ່ມຕາລີບັນ ກໍໄປຄຸກຄາມຊົນກຸ່ມນ້ອຍທີ່ບໍ່ນັບຖືສາສນາໂຕເອງ.
ຢູ່ປະເທດປາກີສຖານ, ມີ 16 ຄົນ ທີ່ຖືກກ່າວຫາລົບລູ່ພຣະເຈົ້າ ຖືກສານປາກີສຖານ ຕັດສິນປະຫານຊີວິຕ ໃນປີ 2021 ເຖິງວ່າ ຍັງບໍ່ມີ ຜູ້ໃດຖືກປະທານຊີວິຕເທື່ອກໍຕາມ.
ກ່ຽວກັບປະເທດເຫຼົ່ານີ້ ບົດຣາຍງານ ໄດ້ບັນທຶກ ເຖິງ ເສຣີພາບການນັບຖືສາສນາ ແລະ ສິດທິຂອງຊົນກຸ່ມນ້ອຍໃນການນັບຖືສາສນາ ຖືກຄຸກຄາມແນວໃດໃນທົ່ວໂລກ.
ໂຕຢ່າງຢູ່ປະເທດອິນເດັຽ ທີ່ເປັນປະເທດປະຊາທິປະໄຕ ໃຫຍ່ທີ່ສຸດໃນໂລກ ແລະ ມີຄວາມເຊື່ອທີ່ຫຼາກຫຼາຍ ແຕ່ກໍຍັງເຫັນ ການທຳຮ້າຍປະຊາຊົນ ແລະ ການທຳລາຍສະຖານທີ່ທາງສາສນາ.
ຢູ່ປະເທດວຽດນາມ ບ່ອນທີ່ເຈົ້າໜ້າທີ່ ຄຸກຄາມ ປະຊາຊົນທີ່ນັບຖືສາສນາ ທີ່ບໍ່ໄດ້ໄປລົງທະບຽນກັບທາງການ.
ຢູ່ ປະເທດໄນຈີເຣັຽ ບ່ອນທີ່ຣັຖບານ ໄດ້ບັງຄັບໃຊ້ກົດໝາຍ ຫ້າມວິພາກວິຈານ ແລະ ລົບລູ່ພະເຈົ້າ ຕໍ່ປະຊາຊົນຂອງຕົນເອງ ທີ່ກະທຳຕາມຄວາມເຊື່ອຂອງໂຕເອງ.
ເຖິງຢ່າງໃດກໍຕາມ, ບາງປະເທດທີ່ບໍ່ເຫັນດີກັບເຣື່ອງນີ້ ກໍເຫັນວ່າ ສະຫະຣັຖອາເມຣິກາ ໄດ້ໃຊ້ປະເດັນທາງສາສນາ ເພື່ອເຂົ້າໄປແຊກແຊງກິຈການພາຍໃນປະເທດອື່ນ.
ເວບໄຊຂ່າວ ທີ່ຊື່ວ່າ Business Standard ໄດ້ຣາຍງານ ໂດຍ ອ້າງຄຳເວົ້າຂອງ ທ່ານ Zhao Lijian ໂຄສົກກະຊວງການຕ່າງປະເທດຈີນ ທີ່ໄດ້ອອກມາຕອບໂຕ້ ລາຍງານປະຈຳປີຂອງສະຫະຣັຖ ກ່ຽວກັບເສຣີພາບ ການນັບຖືສາສນາ ວ່າ: “ຢູ່ປະເທດຈີນ ມີ 200 ລ້ານ ຄົນນັບຖືສາສນາ ແລະ ສະຖານທີ່ທາງສາສນາຫຼາຍແຫ່ງ ເພື່ອໃຫ້ປະຊາຊົນປະຕິບັດກິຈກັມທາງສາສນາ. ປະຊາຊົນ ຢູ່ປະເທດຈີນ ພໍໃຈກັບສິທເສຣີພາບການເຊື່ອຖືສາສນາ. ຄວາມຈິງ ດັງກ້ອງກວ່າຄຳເວົ້າ ແລະ ການເວົ້າຕົວະ 1,000 ເທື່ອ ກໍຍັງເປັນຄຳຂີ້ຕົວະ ຄືເກົ່າ.”
ເຊິ່ງ ທ່ານ Zhao Lijian ຄົງຈະໝາຍເຖິງ ຣາຍງານຂອງ ກະຊວງການຕ່າງປະເທດ ສະຫະຣັຖ ບໍ່ມີມູນຄວາມຈິງ.
ອັນນີ້ ເປັນຖ້ອຍຖແລງການ ທີ່ເຈົ້າໜ້າທີ່ກະຊວງການຕ່າງປະເທດຂອງຈີນ ຕອບໂຕ້ ສະຫະຣັຖອາຣິກາ ກ່ຽວກັບຣາຍງານປະຈຳປີ 2021 ດ້ານເສຣີພາບການເຊື່ອຖືສາສນາ.
ສະເພາະ ຢູ່ປະເທດລາວ ກະຊວງການຕ່າງປະເທດ ສະຫະຣັຖອາເມຣິກາ ໄດ້ຍົກໃຫ້ເຫັນເຖິງກໍຣະນີ ອາຈານສີທົນ ທິບພະວົງ ຄູສອນສາສນາ ຢູ່ບ້ານກະລຶມວັງແຂ້ ເມືອງຊົນນະບູລີ ແຂວງສວັນນະເຂດ ຖືກສານຕັດສິນ ຕິດຄຸກເປັນເວລາ 1 ປີ ແລະ ປັບໃໝ ຫຼາຍລ້ານກີບ ໃນຂໍ້ຫາ ແບ່ງແຍກຄວາມສາມັກຄີ ແລະ ສ້າງຄວາມວຸ້ນວາຍ ໂດຍແມ່ນສານແຂວງສວັນນະເຂດ ເປັນຜູ້ຕັດສິນໃນວັນທີ 6 ເມສາ 2021 ໂດຍ ຕັ້ງຂໍ້ຫາ ວ່າການຊຸມນຸມເຮັດກິຈກັມທາງສາສນາ ທີ່ຜິດຕໍ່ດຳຣັຖ 315 ເຊິ່ງເປັນດຳຣັຖຄຸ້ມຄອງ ເຣື່ອງສາສນາຂອງລາວ.
ນອກຈາກນີ້ ຍັງມີຊາວຄຣິສຕຽນ 7 ຄົນ ຢູ່ບ້ານປາສິງ ເມືອງຕາໂອ້ຍ ແຂວງສາຣະວັນ ຖືກຊາວບ້ານຂັບໄລ່ອອກຈາກບ້ານ ໃນເດືອນຕຸລາ 2020 ແລະ ຊາວບ້ານທີ່ບໍ່ແມ່ນ ຊາວຄຣິສຕຽນ ພາກັນໄປມ້າງເຮືອນເຂົາເຈົ້າ.
ຊາວຄຣີຕຽນຈຳນວນ 7 ຄົນ ດັ່ງກ່າວ ຕ້ອງພາກັນໄປກາງເຕັ້ນນອນ ອາສັຍຢູ່ກາງແຈ້ງ ໃນຂະນະທີ່ລໍຖ້າໃຫ້ອຳນາດການປົກຄອງບ້ານ ມາແປງເຮືອນໃຫ້ເຂົາເຈົ້າ.
ນອກຈາກນີ້ ຣາຍງານຍັງລະບຸວ່າ ໃນເດືອນມົກກະຣາ 2021 ຊາວບ້ານຕາລູ ເມືອງຕະໂອ້ຍ ແຂວງສາຣະວັນ ໄດ້ຂັບໄລ່ຊາວຄຣິສຕຽນ 14 ຄົນ ຈາກບ້ານເຂົາເຈົ້າ ຍ້ອນເຂົາເຈົ້າບໍ່ເຊົານັບຖືສາສນາຄຣິສຕຽນ.
ໃນເດືອນກໍຣະກະດາ ແລະ ເດືອນສິງຫາ 2021, ອຳນາດການປົກຄອງບ້ານ ນ້ຳມອງ ເມືອງນາໝໍ້ ແຂວງອຸດົມໄຊ ໄດ້ນາບຂູ່ວ່າ ຈະຂັບໄລ່ ຊາວຄຣິສຕຽນ 6 ຄອບຄົວ ອອກຈາກບ້ານ ພາຍໃນທ້າຍປີ ຖ້າວ່າ ຊາວຄຣິສຕຽນດັ່ງກ່າວ ບໍ່ຍອມເຊັນເອກະສານ ໃຫ້ເຊົານັບຖືສາສນາຄຣິສຕຽນ. ໃນນັ້ນມີ 4 ຄອບຄົວ ຕ້ອງຍອມເຊັນເອກະສານ ເພື່ອເຊົານັບຖືສາສນາຄຣິສຕຽນ ດ້ວຍຄວາມຢ້ານກົວ.
ນອກຈາກນີ້ ຍັງມີກໍຣະນີ ຊາວບ້ານສິງສະຫວັນ ເມືອງອາດສະພອນ ແຂວງສະວັນນະເຂດ ໄດ້ນາບຂູ່ ເພື່ອຂັບໄລ່ ຊາວຄຣິສຕຽນ 3 ຄອບຄົວ ອອກຈາກບ້ານ ຖ້າເຂົາເຈົ້າບໍ່ເຊົານັບຖືສາສນາ ຄຣີິສຕຽນ ແລະ ຊາວຄຣິສຕຽນບາງຄົນ ຕ້ອງຫັນມາຖືສາສນາພຸທ ຍ້ອນເຂົາເຈົ້າຢ້ານ.
ຣັຖທັມນູນແຫ່ງສປປລາວ ໄດ້ລະບຸວ່າ ພົລເມືອງລາວ ມີສິທຈະເຊື່ອຖື ຫຼື ບໍ່ເຊື່ອຖືສາສນາ. ຣັຖບານລາວ ຮັບຮູ້ ຢ່າງເປັນທາງການ 4 ສາສນາ ຫຼັກ ຄື: ສາສນາພຸທ, ສາສນາຄຣິສ, ສາສນາອິສລາມ ແລະ ສາສນາບາຮາຍ. ດຳຣັຖ 315 ໄດ້ລະບຸວ່າ ຣັຖບານເປັນຜູ້ອະນຸມັດ ການຈັດກິຈກັມທາງສາສນາ.
ສູນກາງແນວລາວສ້າງຊາດ ແລະ ກະຊວງພາຍໃນ ເປັນໜ່ວຍງານທີ່ຄຸ້ມຄອງ ກິຈກັມທາງສາສນາ.
ກຸ່ມທີ່ເຄື່ອນໄຫວທາງດ້ານສາສນາ ໃນຂັ້ນແຂວງ ຈະຕ້ອງໄດ້ຮັບອະນຸຍາດ ຈາກກະຊວງພາຍໃນ ແລະ ຖ້າຈະໄປເຂື່ອນໄຫວຢູ່ຂັ້ນເມືອງ ຈະຕ້ອງໄດ້ຮັບອະນຸຍາດຈາກຂັ້ນ ແຂວງກ່ອນ, ຖ້າຈະໄປເຄື່ອນໄຫວຢູ່ບ້ານ ຈະຕ້ອງໄດ້ຮັບອະນຸຍາດ ຈາກເຈົ້າໜ້າທີ່ຂັ້ນເມືອງ ຕາມຂັ້ນຕອນ.
ອີງຕາມຂໍ້ມູນຈາກຜູ້ນຳທາງສາສນາ, ຂໍ້ຂັດແຍ່ງສ່ວນຫຼາຍທີ່ເກີດຂຶ້ນ ຢູ່ໃນບ້ານທີ່ຢູ່ເຂດຫ່າງໄກ ບ່ອນທີ່ເຈົ້າໜ້າທີ່ຂັ້ນສູນກາງເຂົ້າໄປ ດຳເນີນການໄກ່ເກັ່ຽ ລຳບາກ.
ບັນຫາທີເກີດຂຶ້ນຢູ່ບ້ານທີ່ຢູ່ຫ່າງໄກ ກໍຄືເຈົ້າໜ້າທີ່ຂັ້ນບ້ານທີ່ບໍ່ແມ່ນຊາວຄຣິສຕຽນ ຈະໄປບັງຄັບໃຫ້ຊາວບ້ານ ທີ່ເປັນຄຣິສຕຽນ ເຊົານັບຖືສາສນາຄຣິສຕຽນ.
ພົລເມືອງລາວທັງໝົດມີ 7.6 ລ້ານ ຄົນ ອີງຕາມການສຳຣວດໃນປີ 2021. ອັດຕຣາສ່ວນ ໃນການນັບຖືສາສນາຂອງຄົນລາວ ທີ່ມີການສໍາຣວດ ໃນປີ 2015 ຄື 64.7 ເປີເຊັນ ນັບຖືສາສນາ ພຸດ, 1.7 ເປີເຊັນ ນັບຖືສາສນາ ຄຣິສຕຽນ, 31.4 ເປີເຊັນ ບໍ່ໄດ້ນັບຖືສາສນາ, 2.1 ເປີເຊັນ ນັບຖືສາສນາ ອື່ນໆ.
