ཨ་རིའི་གྲོས་ཚོགས་ཀྱི་ཚོགས་གཙོ་ཐེ་ཝན་ནང་ཕེབས་རྒྱུའི་བསམ་བློ་དེ་ལེགས་པོ་མིན་པ་ཨ་རིའི་དམག་དཔོན་ཚོས་ཡིད་ཆེས་བྱེད་ཀྱི་འདུག་ཅེས་སྲིད་འཛིན་གྱིས་གསུང་འདུག

དེ་ཡང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་པེ་ལོ་སི་(Nancy Pelosi)་རིང་མིན་སྤྱི་ཟླ་༨པའི་ནང་ཐེ་ཝན་ནང་གཟིགས་སྐོར་དུ་ཕེབས་འཆར་ཡོད་པའི་གནས་ཚུལ་རྒྱལ་སྤྱིའི་གསར་ལམ་ཁག་ནང་ཐོན་པའི་རྗེས། འདི་ཚེས་༢༠ཉིན་ཨ་མི་རི་ཀའི་སྲིད་འཛིན་འཇཱོ་སྦཡེ་ཌེན་(Joe Biden)་གྱིས་དེའི་ཐད། ཨ་མི་རི་ཀའི་དམག་དཔུང་གི་དཔོན་རིགས་ཚོས་གྲོས་ཚོགས་ཀྱི་ཚོགས་གཙོ་མཆོག་ད་ལྟའི་ཆར་ཐེ་ཝན་ནང་གཟིགས་སྐོར་དུ་ཕེབས་རྒྱུའི་བསམ་བློ་དེ་ལེགས་པོ་ཞིག་མིན་པར་ཡིད་ཆེས་བྱེད་ཀྱིན་འདུག་ཅེས་གསུང་འདུག
དེ་རྒྱ་ནག་གི་ཕྱི་འབྲེལ་བློན་ཆེན་གྱིས་ཨ་རིའི་གྲོས་ཚོགས་ཀྱི་ཚོགས་གཙོས་ཐེ་ཝན་ནང་གཟིགས་སྐོར་བྱ་རྒྱུ་དེའི་ཐད་བློ་ཐག་རྦད་ཆོད་དང་བྱེད་ཐབས་ནུས་ལྡན་ཀྱིས་ཐག་གཅོད་བྱ་དགོས་པ་ཞིག་ཆགས་ཡོད་ཅེས་སྐྱོན་བརྗོད་བྱས་ཏེ་ཉིན་གཅིག་ཕྱིན་པའི་རྗེས་ཨ་རིའི་སྲིད་འཛིན་གྱིས་དེ་ལྟར་གསུང་བ་ཞིག་རེད།
རིང་མིན་སྤྱི་ཟླ་༨པའི་ནང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་(Nancy Pelosi)་ཡིས་སྣེ་ཁྲིད་པའི་སྐུ་ཚབ་ཚོགས་པས་རྒྱ་ནག་གིས་བདག་དབང་ཡོད་ཚུལ་བརྗོད་བཞིན་པའི་ཐེ་ཝན་ནང་གཟིགས་སྐོར་གནང་འཆར་ཡོད་པ་དང་། ད་དུང་ཨིན་རྡུ་ནི་ཤེ་ཡ་དང་། ཉི་ཧོང་། མ་ལེ་ཤེ་ཡ། སིང་གྷ་པུར་བཅས་ཀྱི་ནང་དུའང་གཟིགས་སྐོར་གནང་རྒྱུ་མ་ཟད། ཧ་ཝེ་ཡིར་རྟེན་གཞི་བྱས་པའི་ཨ་རིའི་རྒྱ་གར་རྒྱ་མཚོ་དང་ཞི་བདེ་རྒྱ་མཚོའི་མངའ་ཁུལ་གྱི་དམག་སྤྱི་ཁང་དུའང་དུས་ཐུང་རིང་སྡོད་རྩིས་ཡོད་པ་གསར་ལམ་ཁག་ནང་གནས་ཚུལ་ཐོན་ཡོད།
ཉེ་སྔོན་ཕྱི་ཟླ་བཞི་བར་ཨ་རིའི་གྲོས་ཚོགས་ཀྱི་ཚོགས་གཙོ་ལྕམ་ནན་སི་པེ་ལོ་སི་ཡིས་ཐེ་ཝན་ནང་གཟིགས་སྐོར་གནང་རྒྱུ་བྱས་ཡོད་ཀྱང་། སྐབས་དེར་ཁོང་མོར་ཏོག་དབྱིབས་རིམས་ནད་ཀྱི་ནད་རྟགས་ཐོན་པའི་རྐྱེན་ཕྱིར་འགྱངས་གནང་དགོས་བྱུང་ཡོད་པ་རེད། སྐབས་དེར་པེ་ཅིན་ནས་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཀྲི་ལི་ཅན་གྱིས་ལྕམ་ནན་སི་པེ་ལོ་སི་ཡི་གཟིགས་སྐོར་གང་རུང་གིས་རྒྱ་ནག་གི་བདག་དབང་ལ་གནོད་སྐྱོན་བཟོ་རྒྱུ་མ་ཟད། གལ་སྲིད་ཨ་རིས་རང་ཉིད་ཀྱི་འདོད་པ་བཞིན་བསྐྱོད་པ་ཡིན་ན་རྒྱ་ནག་གིས་ཐབས་ཤེས་ཤུགས་དྲག་བཀོལ་ཏེ་རྒྱལ་ཁབ་ཀྱི་བདག་དབང་ལ་སྲུང་སྐྱོབ་བྱས་ནས་ཡ་ལན་སྤྲོད་རྒྱུ་དང་། དེའི་མཇུག་འབྲས་ཐམས་ཅད་ཨ་རིས་འགན་འཁུར་དགོས་ཚུལ་བཤད་ནས་སྐྱོན་བརྗོད་དང་ཉེན་བརྡ་བཏང་ཡོད་པ་རེད།

གསར་འགོད་པ། རྡོ་རྗེ་མཚོ།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།