ཞོ་སྟོན་གྱི་དུས་ཆེན་སྐབས་ལྷ་སར་གཟའ་འཁོར་གཅིག་ཙམ་རིང་གཞུང་ལམ་ཁག་ཅིག་བཀག་སྡོམ་བྱ་རྒྱུ་ཡིན་འདུག

ཕྱི་ལོ་ ༢༠༢༤ ཟླ་ ༨ ཚེས་ ༤ ཉིན་ནི་བོད་ནང་དུ་ཞོ་སྟོན་གྱི་དུས་ཆེན་དབུ་འཛུགས་ཀྱི་མཛད་སྒོ་ཚོགས་ཡོད་པས།  ཉིན་དེར་གཞུང་ལམ་གྱི་འགྲིམ་འགྲུལ་བདེ་འཇགས་དང་ཤར་གཏོང་ལྡན་པ་ཞིག་ཡོང་བའི་ཆེད་དུ་གྲོང་ཁྱེར་གྱི་སྤྱི་བདེ་ལས་ཁུངས་འགྲིམ་འགྲུལ་དོ་དམ་ཚན་པས་ལྷ་ས་གྲོང་ཁྱེར་གྱི་ཉེ་ཁུལ་དུ་ཆགས་པའི་གདན་ས་ཆེན་པོ་སེ་ར་དགོན་དང་འབྲས་སྤུངས་དགོན་བཅས་སུ་བརྒྱུད་ལམ་ཁག་གཅིག་ལ་འགྲིམ་འགྲུལ་བཀག་སྡོམ་བྱ་རྒྱུ་ཡིན་པ་བོད་ལྗོངས་ཉིན་རེའི་ཚགས་པར་གྱིས་ཕྱི་ཟླ་ ༨ ཚེས་ ༡ ཉིན་གནས་ཚུལ་སྤེལ་འདུག་ཅིང་།  དེ་ཡང་ཕྱི་ཚེས་ ༤ ཐོ་རེངས་ཆུ་ཚོད་ ༡༢ ནས་ཞོ་སྟོན་གྱི་མཛད་སྒོ་མཇུག་མ་སྒྲིལ་གྱི་བར་བཀག་སྡོམ་བྱ་རྒྱུ་ཡིན་འདུག
རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ནང་ཞོ་སྟོན་དུས་ཆེན་སྐབས་སུ་དེ་སྔོན་ཡང་དམིགས་བསལ་གྱི་དམ་དྲག་ཤུགས་ཆེ་བྱས་ཡོད་པ་དང་།  ལྷ་སའི་གྲོང་མི་དང་ཞོ་སྟོན་རིང་བོད་ཀྱི་ས་ཁུལ་གཞན་དང་། རྒྱ་ནག་ནས་ཡོང་མཁན་ཡུལ་སྐོར་བ་སོགས་ཚང་མ་ཞིབ་བཤེར་ས་ཚིགས་ཀྱི་འགག་སྒོ་བརྒྱུད་ནས་འགྲོ་དགོས་ཀྱི་ཡོད་འདུག
རྒྱ་ནག་གཞུང་འབྲེལ་བརྒྱུད་ལམ་གྱིས་སྤེལ་བའི་གནས་ཚུལ་གཞིར་བཟུང་དང་ཕྱི་ཚུལ་ནས་བལྟས་ན་མི་ཚོགས་མང་ལ་འཁྲུགས་ཆ་དོད་པའི་རྣམ་པ་ཞིག་མཐོང་རྒྱུ་ཡོད་རུང་། ས་གནས་གང་སར་དྲག་ཆས་གྱོན་པ་དང་དྲག་ཆས་མི་གྱོན་པའི་ཉེན་རྟོག་མི་སྣ་ཕོན་ཆེན་མངགས་གཏོང་བྱས་ཏེ་སྟངས་འཛིན་བྱེད་མུས་ཡིན་པ་དང་། ལྷ་སའི་གྲོང་ཁྱེར་དུ་བཙུགས་པའི་པར་ཆས་དང་ཉེན་རྟོག་དམག་མིས་བསྐོར་ནས་ཡོད་པའི་རྣམ་པ་འདིའི་ནང་ཞོ་སྟོན་ལ་རོལ་བ་ཞིག་སྣང་རྒྱུ་ཡོད་པ་རེད།
ད་ལྟ་བོད་ཀྱི་དགོན་སྡེ་ཁག་ནང་གཞུང་གི་ལས་བྱེད་པ་དང་སློབ་མ་ཚོ་མཆོད་མཇལ་དུ་སྐྱོད་ཆོག་གི་མེད་པ་དང་། རང་ཁྱིམ་གྱི་སྒོ་ནས་ཐོན་པ་ནས་བཟུང་རང་ཁྱིམ་དུ་ཕྱིར་མ་ལོག་གི་བར་རྒྱ་ནག་གཞུང་གིས་གང་སར་བཙུགས་པའི་པར་ཆས་ཀྱིས་བོད་མི་རེ་རེའི་ཕར་འགྲོ་ཚུར་འོང་གི་གནས་སྟངས་ལ་སྟངས་འཛིན་ནན་པོ་བྱེད་བཞིན་ཡོད་ཅིང་། བཙོན་རྭ་ལྟ་བུའི་དམ་དྲག་འོག་ཡོད་པའི་ས་གནས་སུ་འཚོ་བ་སྐྱེལ་མཁན་བོད་མི་ཚོས་རྣམ་པ་དེ་རིགས་རྒྱུན་ལྡན་ལྟར་ཆགས་ནས་ཡོད་པ་འདི་གར་རླུང་འཕྲིན་ཁང་ལ་གནས་ཚུལ་བརྗོད་མཁན་བྱུང་ཡོད་པ་རེད།  ལོ་ལྟར་ཞོ་སྟོན་དུས་ཆེན་སྐབས་ལྷ་སར་དགེ་འདུན་པ་ཚོས་ཁྲུས་གསོལ་དང་རབ་གནས།  འབྲས་སྤུངས་དགོན་པའི་གོས་སྐུའི་མདུན་ལྷ་མོའི་འཁྲབ་གཞུང་གཟིགས་འབུལ་ཞུས་ཏེ་མང་ཚོགས་སྟོང་ཕྲག་མང་པོས་ཚང་ཁ་བཤིག་བཤིག་གིས་གོས་སྐུ་མཇལ་སྲོལ་ཡོད་པ་རེད།  རྒྱ་ནག་གི་གསར་འགྱུར་བརྒྱུད་ལམ་ཁག་ནང་དམ་དྲག་གི་གནས་ཚུལ་འདི་དག་གི་སྐོར་གང་ཡང་བཀོད་མེད་པ་རེད།
ཕྱི་ཟླ་ ༨ ཚེས་ ༤ ཉིན་ཞོ་སྟོན་གྱི་བྱེད་སྒོར་ཞུགས་མཁན་གྱི་མི་མང་དང་རླངས་འཁོར་ཧ་ཅང་མང་བའི་རྐྱེན་གྱིས་མང་ཚོགས་ཀྱི་འགྲོ་སྐྱོད་ལམ་ཐིག་བཀོད་སྒྲིག་ལུགས་མཐུན་བྱེད་པ་དང་ཡག་ཤོས་བྱུང་ན་སྤྱི་སྤྱོད་རླངས་འཁོར་ནང་ཕེབས་རོགས་གློག་སྒུལ་འཕྲུལ་འཁོར་དང་སྦག་སྦག་བཅས་པ་གཏོང་མཁན་གྱི་ཁ་ལོ་བས་ས་གནས་ཁག་ཁག་ཏུ་ལས་འགན་སྒྲུབ་མཁན་གྱི་མི་སྣའི་བཀོད་འདོམས་བྱེད་པ་ཁག་ལ་བརྩི་སྲུང་ཞུས་ནས་གོ་རིམ་ལྡན་པའི་ངང་འཕྲུལ་འཁོར་འཇོག་དགོས་པ་སོགས་ཀྱི་བཀོད་ཁྱབ་བཏང་ཡོད་འདུག

གསར་འགོད་པ་། སེང་གེ་རི་བསོད་ནམས་ལྷ་མོ། 

རྩོམ་སྒྲིག་འཛིན་འགན་འཛིན། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ།  བཀྲིས་དབང་ཕྱུག

དྲྭ་ཐོག་སྤེལ་མཁན། ནོར་སྡེ་སྒྲོལ་མ།