རྒྱ་ནག་གཞུང་གིས་༸གོང་ས་མཆོག་སྐུ་གཤེགས་ན་ཁྲིམས་མཐུན་མིན་པའི་ཆོས་ལུགས་བྱེད་སྒོ་རྩ་ནས་སྤེལ་མི་ཆོག་པའི་སློབ་གསོ་སྤེལ་བཞིན་འདུག

2024.04.09
རྒྱ་ནག་གཞུང་གིས་༸གོང་ས་མཆོག་སྐུ་གཤེགས་ན་ཁྲིམས་མཐུན་མིན་པའི་ཆོས་ལུགས་བྱེད་སྒོ་རྩ་ནས་སྤེལ་མི་ཆོག་པའི་སློབ་གསོ་སྤེལ་བཞིན་འདུག རྒྱ་ནག་གཞུང་གིས་ཀན་སུའུ་ཞིང་ཆེན་གྱི་བོད་ཀྱི་དགོན་སྡེ་ཁག་ཏུ་སྤེལ་བཞིན་པའི་སློབ་སྦྱོང་ལག་དེབ་ཀྱི་དོན་ཚན་ཁག་ཅིག ཟླ་ཚེས་མི་གསལ།
མི་སེར་གསར་འགོད་པ།

རྒྱ་ནག་གཞུང་གིས་བོད་ཀྱི་དགོན་སྡེ་ཁག་ཏུ་དམར་ཤོག་ཚོགས་པའི་ཆབ་སྲིད་སློབ་གསོ་སྤེལ་བ་དང་། ༸གོང་ས་མཆོག་དང་བཙན་བྱོལ་བོད་མི་ཚོར་འབྲེལ་བ་རྩ་ནས་བྱེད་མི་ཆོག་པའི་བཙན་ཐབས་སྣ་ཚོགས་བྱེད་བཞིན་ཡོད་པ་ལྟར། ཕྱི་ལོ་ ༢༠༢༤ ལོའི་ལོ་མགོ་ནས་བཟུང་རྒྱ་ནག་གཞུང་འབྲེལ་ངོས་ནས་རྒྱ་ནག་གཞུང་གིས་བཅད་བགོས་བྱས་པའི་ཀན་སུའུ་ཞིང་ཆེན་གྱི་བོད་ཀྱི་དགོན་སྡེ་ཁག་ཏུ། དགེ་འདུན་པ་ཚོའི་སློབ་སྦྱོང་ལག་དེབ་ཅེས་པ་ཞིག་འགྲེམས་སྤེལ་བྱས་ཏེ། དགེན་འདུན་པ་ཚོས་ཕྱི་ཕྱོགས་ཀྱི་ཁ་བྲལ་བ་ཚོར་འབྲེལ་བ་རྩ་ནས་བྱེད་མི་ཆོག་པ་དང་། ཏཱ་ལའི་བླ་མ་སྐུ་གཤེགས་ན་ཁྲིམས་མཐུན་མིན་པའི་ཆོས་ལུགས་ཀྱི་བྱེད་སྒོ་རྩ་ནས་སྤེལ་མི་ཆོག་པ་སོགས། དོན་ཚན་བཅུ་ཅན་ཞིག་ལ་བཙན་ཐབས་ཀྱིས་སློབ་གཉེར་བྱེད་བཅུག་གི་ཡོད་པ། བོད་ནང་གི་འབྲེལ་ཡོད་ཅིག་དང་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་གཉིས་ནས་འདི་ག་ཨེ་ཤེ་ཡ་རང་དབང་རླུང་ཁང་ལ་འགྲེལ་བརྗོད་གནང་བྱུང་།

གོང་ཞུས་བོད་ནང་གི་འབྲེལ་ཡོད་ཅིག་ནས་དགེ་འདུན་པའི་སློབ་སྦྱོང་ལག་དེབ་ཟེར་བའི་ནང་བཀོད་པའི་དོན་ཚན་ཁག་མཁོ་སྤྲོད་གནང་བའི་ནང་། དོན་ཚན་བཅུ་ཡོད་པ་ལས་དང་པོ་མི་རིགས་མཐུན་སྒྲིལ་ལ་གནོད་པའི་བྱ་བ་ཏིལ་འབྲུ་ཙམ་ཡང་ཡོད་མི་ཆོག་པ། གཉིས་པ། ཆོས་ལུགས་ལ་ཁ་གཡར་ནས་སྤྱི་ཚོགས་བདེ་འཇགས་ལ་གནོད་པའི་བྱ་བ་གཏན་ནས་ལས་མི་ཆོག་པ། གསུམ་པ། ཕྱི་ཕྱོགས་ཁ་བྲལ་ཕྱོགས་ཁག་དང་མཉམ་འབྲེལ་གྱི་བྱ་བ་གཏན་ནས་ལས་མི་ཆོག་པ། བཞི་པ། ཏཱ་ལའི་སྐུ་ཕྲེང་བཅུ་བཞི་པའི་འདྲ་པར་ས་གནས་གང་སར་གཏན་ནས་བཤམས་མི་ཆོག་པ། ལྔ་པ། ཏཱ་ལའི་སྐུ་གཤེགས་ན་ཁྲིམས་མཐུན་མིན་པའི་ཆོས་ལུགས་ཀྱི་བྱེད་སྒོ་རྩ་ནས་སྤེལ་མི་ཆོག དྲུག་པ། ཏཱ་ལའི་ཡང་སྤྲུལ་ངོས་འཛིན་བྱེད་པར་ཁ་གཡར་ནས་གསེར་བུམ་བཀྲུགས་པའི་ལམ་ལུགས་ལ་གནོད་པ་བྱེད་མི་ཆོག་པ། བདུན་པ། ཁྲིམས་མཐུན་མིན་པའི་རྩ་འཛུགས་གང་ཡིན་རུང་དགོན་པའི་ནང་དུ་ཞུགས་མི་ཆོག་པ། བརྒྱད་པ། སློབ་གསོའི་གནས་གང་ཡིན་ཡང་ཁ་བྲལ་རིང་ལུགས་ཀྱི་བསམ་བློའི་ནང་དོན་གཏན་ནས་ཡོད་མི་ཆོག་པ། དགུ་པ། དྲ་རྒྱ་དང་བརྙན་གཟུགས་བརྒྱུད་ནས་ཁ་བྲལ་གྱི་བསམ་བློ་བརྒྱུད་སྒྲོག་གཏན་ནས་མི་ཆོག་པ། བཅུ་པ། མངོན་ལྐོག་དང་ངོ་གཉིས་ཀྱི་མི་གཏན་ནས་བྱེད་མི་ཆོག་པ་བཅས་བཀོད་འདུག

སྤྱིར་དེང་སྐབས་རྒྱ་ནག་གཞུང་གིས་བོད་ཀྱི་དགོན་སྡེ་ཁག་ཏུ་གོང་ས་མཆོག་དང་འབྲེལ་བའི་གནས་ཚུལ་རིགས་མངོན་ལྐོག་གཉིས་ནས་སློབ་གསོ་སྤེལ་བཞིན་ཡོད་པ་ལྟར། བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ནས། རྒྱ་ནག་གཞུང་གིས་ཀན་སུའི་ཞིང་ཆེན་ཁུལ་གྱི་བོད་ཀྱི་དགོན་སྡེ་ཁག་ཏུ་སློབ་གསོ་འདྲ་མིན་སྤེལ་བཞིན་པ་མ་ཟད། ཕྱི་ཟླ་ ༤ ཚེས་མགོར་ཀན་སུའུ་ཞིང་ཆེན་གྱི་དམར་ཤོག་དྲུང་ཆེ་ཧེའུ་མཱོ་པའོ་(何谋保)ཟེར་བས། བོད་ནང་གི་མདོ་ལྷོ་ས་ཁུལ་གྱི་དགོན་སྡེ་ཁག་ཏུ་ལྟ་སྐོར་དང་འབྲེལ། ཡུལ་ཤོག་དེའི་དགོན་སྡེ་ཁག་ཏུ་ནང་བསྟན་རྒྱ་སྒྱུར་གྱི་ལས་གཞི་མགྱོགས་མྱུར་ལག་བསྟར་དང་། ཏཱ་ལའི་ཁ་བྲལ་དང་འཐབ་རྩོད་དགོས་པ་དང་། རྒྱ་ནག་གཞུང་གི་ཆོག་མཆན་མེད་པར་དགོན་པ་ཁག་ཏུ་ལོ་ཆུང་གྲྭ་རྒྱུན་གསར་ཞུགས་མི་ཆོག་པ་དང་། དགོན་པ་ཁག་གིས་ཆོས་ལུགས་ཀྱི་བྱེད་སྒོ་གཉེར་རྒྱུར་ཚོད་འཛིན་དགོས་པ་དང་། དེ་དག་ལག་བསྟར་མ་བྱས་ན་དགོན་པ་སྒོ་རྒྱག་རྒྱུ་ཡིན་པའི་འཇིགས་སྐུལ་རིགས་བྱེད་བཞིན་ཡོད་པ་སོགས་འགྲེལ་བརྗོད་གནང་གི་འདུག  

ཕྱི་ལོ་ ༢༠༢༤ ལོའི་ལོ་མགོ་ཚུགས་པ་དང་འབྲེལ་རྒྱ་ནག་གཞུང་གིས་བོད་ནང་རྣམ་པ་ཅི་རིགས་ཀྱི་སྒོ་ནས་དམ་དྲགས་དང་། བོད་ཀྱི་དགོན་སྡེ་ཁག་ཏུ་༸གོང་ས་མཆོག་ལ་ངོ་རྒོལ་དང་ཁ་བྲལ་བར་འཐབ་རྩོད་དགོས་པའི་ལས་འགུལ་སྣ་ཚོགས་སྤེལ་བཞིན་ཡོད་བཞིན། ཕྱི་ཟླ་ ༡ ཚེས་ ༢༢ ཉིན་སི་ཁྲོན་ཞིང་ཆེན་དཀར་མཛེས་ཁུལ་དཔལ་ཡུལ་རྫོང་གི་དམར་ཤོག་ལས་བྱེད་ཚོས། ས་ཁུལ་དེའི་དགོན་སྡེ་ ༣༥ ཙམ་གྱི་ནང་ཆེད་སྐྱོད་ཀྱིས། ༸གོང་ས་སྐྱབས་མགོན་ཆེན་པོ་མཆོག་དང་ཁ་བྲལ་བའི་བྱ་སྤྱོད་ཐེར་བཏོན་བྱེད་དགོས་སྐོར་སྐུལ་མ་བྱས་ཡོད་པ་དང་། ཡང་ཕྱི་ལོ་ ༢༠༢༣ ཕྱི་ཟླ་ ༦ ནང་རྒྱ་ནག་གཞུང་གིས་ནག་ཆུ་ཤན་རྩ་རྫོང་དང་སོག་རྫོང་གི་དགོན་པ་ཁག་ཏུ་གྲྭ་ཤག་ནང་ཞིབ་བཤེར་དང་ཁ་བྲལ་བར་ངོ་རྒོལ་དགོས་པའི་ས་ཡིག་བརྒྱབ་བཅུག་པ་སོགས་བྱས་ཡོད་པ་རེད།

གསར་འགོད་པ། དཔལ་འབར། ཨེ་ཤེ་ཡ་རང་དབང་རླུང་འཕྲིན་ཁང་། 
རྩོམ་སྒྲིག་པ། ཡེ་ཤེས་ཟླ་བ། 
དྲྭ་ཐོག་སྤེལ་མཁན། ཡེ་ཤེས་ཟླ་བ།

 

བལྟ་བཤེར་མང་ཤོས་བྱས་པའི་གནས་ཚུལ།
RFA
ཨ་རིའི་གྲོས་ཚོགས་གོང་མའི་ནང་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་ལ་སྤྱི་མོས་རྒྱབ་སྐྱོར་ཐོབ་འདུག
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
ཨ་རིའི་སྲིད་འཛིན་ཕོ་བྲང་དཀར་པོའི་ངོས་ནས་ས་ག་ཟླ་བའི་དུས་ཆེན་སྲུང་བརྩི་གནང་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎