༄༅༎མ་འོངས་༸གོང་ས་ཏཱ་ལའི་བླ་མ་མཆོག་གི་ཡང་སྲིད་སྤྲུལ་སྐུ་དེ་ལ་ངེས་པར་དུ་རྒྱ་ནག་གཞུང་གིས་ཆོག་མཆན་ཐོབ་དགོས་པར་རྒྱ་ནག་གཞུང་གི་བོད་ཀྱི་དཔོན་རིགས་ཤིག་ནས་བཤད་འདུག
དེའང་ད་རེས་སྤྱི་ཚེས་བཅུ་གཉིས་ཉིན་རྒྱ་ནག་གཞུང་སྦྲེལ་ཤིན་ཧྭ་གསར་འགྱུར་ལས་ཁང་གིས་སྤེལ་བའི་གནས་ཚུལ་ལྟར་ན་བོད་རང་སྐྱོང་ལྗོངས་ས་གནས་སྲིད་གཞུང་གི་འགན་འཛིན་བྱམས་པ་ཕུན་ཚོགས་ཀྱིས་ད་རེས་རེས་གཟའ་ཕུར་བུའི་ཉིན་གཏམ་བཤད་ཅིག་སྤེལ་ཏེ་༸གོང་ས་ཏཱ་ལའི་བླ་མ་མཆོག་གི་མ་འོངས་པའི་ཡང་སྲིད་ངོས་འཛིན་བྱེད་ཕྱོགས་ཐད་ངེས་པར་དུ་རྒྱ་ནག་དབུས་གཞུང་གི་ཆོག་མཆན་ཐོབ་དགོས་པ་དང་རྒྱ་ནག་དབུས་གཞུང་གི་ཆོག་མཆན་མེད་པར་༸གོང་ས་ཏཱ་ལའི་བླ་མ་མཆོག་གི་མ་འོངས་པའི་ཡང་སྲིད་ངོས་འཛིན་ཞུ་མི་ཆོག་པའི་སྐོར་བཤད་ཡོད་པ་རེད་འདུག་ལ་དེ་སྔ་༸གོང་ས་ཏཱ་ལའི་བླ་མ་མཆོག་ནས་༸གོང་ས་མཆགོ་གི་མ་འོངས་པའི་ཡང་སྲིད་དེ་བཞིན་རྒྱ་ནག་གི་ཕྱི་ཕྱོགས་སུ་ཡིན་པའི་རང་དབང་གི་ཡུལ་གྲུ་ཞིག་ནང་ཕེབས་རྒྱུ་ཡིན་པ་དང་ད་དུང་༸གོང་ས་མཆོག་གི་ཡང་སྲིད་དེ་བཞིན་ཐ་ན་བོད་མི་དམངས་ཀྱི་འོས་འདེམས་ཐོག་ནས་ཐོན་སྲིད་པ་སོགས་ཀྱི་གདམས་ཀ་ཁག་ཅིག་བཀའ་གནང་ཡོད་ཅིང་ཡིན་ནའང་ད་རེས་བྱམས་པ་ཕུན་ཚོགས་ཀྱིས་༸གོང་ས་ཏཱ་ལའི་བླ་མ་མཆོག་གི་མ་འོངས་པའི་ཡང་སྲིད་ངོས་འཛིན་ཞུ་ཕྱོགས་ཐད་ངེས་པར་དུ་རྒྱ་ནག་དབུས་གཞུང་ལ་ཆོག་མཆན་ཞུ་རྒྱུ་ཚུད་པའི་ལོ་རྒྱུས་ཀྱི་ལམ་སྲོལ་ལ་སྲུང་བརྩི་ཞུ་དགོས་པ་དང་གལ་ཏེ་༸གོང་ས་མཆོག་ནས་སྲིད་དོན་དང་དེ་མིན་གྱི་དམིགས་ཡུལ་གཞན་བཅངས་གནང་སྟེ་ལོ་རྒྱུས་ཀྱི་ལམ་སྲོལ་དེ་བཞིན་ཕྱག་བཞེས་མ་གནང་བ་ཡིན་ཚེ་༸གོང་ས་མཆོག་གི་མ་འོངས་ཡང་སྲིད་དེ་ཆོས་དད་མི་དམངས་ཚོའི་ངོས་ལེན་ཡོང་མི་ཐུབ་པ་མ་ཟད་ད་དུང་རྒྱ་ནག་དབུས་གཞུང་ནས་ནམ་ཡང་ཆོག་མཆན་གནང་མི་སྲིད་པ་ཞིག་ཡིན་པར་བྱམས་པ་ཕུན་ཚོགས་ཁོ་པས་ཡིད་ཆེས་བྱེད་ཀྱི་ཡོད་པར་བཤད་འདུག།