༄༅༎བོད་ཀྱི་མདོ་སྟོད་སྨད་ཀྱི་ས་ཁུལ་ཁག་ལ་བོད་མི་ཚོས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེག་བཏང་བའི་དོན་རྐྱེན་བྱུང་བཞིན་པ་དང་བསྟུན་ རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ནང་བོད་མིའི་ངོ་རྒོལ་སྒེར་ལངས་བྱུང་ཡོང་བསམ་པའི་འཇིགས་སྣང་གིས་རྒྱལ་སའི་ནང་གཏན་སྡོད་བོད་མི་སྤྱི་དང་དམིགས་བསལ་ཕྱི་ཕྱོགས་ནས་ཡོང་བའི་བོད་མི་གནས་བསྐོར་བ་ཚོར་དམ་བསྒྲགས་ཤུགས་ཆེ་བྱེད་བཞིན་ཡོད་འདུག་
དེ་ཡང་མཚན་འདོན་གནང་ཐབས་མེད་པའི་འབྲེལ་ཡོད་མི་སྣ་ཞིག་གིས་འདི་གའི་རླུང་འཕྲིན་ཁང་གི་གསར་འགོད་པ་ནོར་བུ་དགྲ་འདུལ་ལགས་སུ་ རྒྱ་ནག་གཞུང་གིས་རྒྱལ་ས་ལྷ་སའི་ནང་དམག་དཔུང་འགྲེམས་འཇོག་གིས་དམ་བསྒྲཌ་ཆེན་པོ་བྱེད་བཞིན་ཡོད་པ་དང་ དམིགས་བསལ་གནས་བསྐོར་བ་ཚོར་ཕྱོགས་བསྐྱོད་ལག་འཁྱེར་པ་སི་ཡོད་མེད་རྩད་གཅོད་ཤུགས་ཆེ་བྱེད་བཞིན་ གནས་བསྐོར་བ་གང་བྱུང་འཛིན་བཟུང་བྱེད་བཞིན་ཡོད་པའི་སྐོར་རང་གི་མིག་མཐོང་བྱུང་བའི་གནས་ཚུལ་ཁག་ཅིག་དེ་ལྟར་ངོ་སྤྲོད་གནང་ཡོད་པ་རེད་
གནས་ཚུལ་ངོ་སྤྲོད་གནང་བ་པོས་གསུངས་ན་ རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ནང་དམ་བསྒྲཌ་བྱ་རྒྱུ་འདི་གཙོ་བོ་རྒྱལ་སྤྱིའི་ཡུལ་ཁག་ནང་ཡོད་པའི་བཙན་བྱོལ་བོད་མི་དང་བོད་དོན་རྒྱབ་སྐྱོར་བ་ཚོས་བོད་ནང་བོད་མིའི་དཀའ་སྡུག་ལ་སྐྱིད་སྡུག་མཉམ་མྱོང་གིས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་བའི་སྐབས་དང་བསྟུན་ བོད་ཀྱི་རྒྱལ་ས་ལྷ་སའི་ནང་དུའང་དེ་མཚུངས་ཀྱི་ངོ་རྒོལ་གྱི་ལས་འགུལ་ཐོན་ཡོང་བསམ་པའི་འཇིགས་སྣང་བྱེད་ཀྱི་ཡོད་པའི་ཚོར་སྣང་གསལ་པོ་ཞིག་ངོ་སྤྲོད་ཐུབ་རྒྱུ་ཡོད་སྐོར་གསུངས་ཀྱི་ཡོད་པ་རེད་
