རྒྱ་ནག་གི་སྐྱོན་བརྗོད་ནི་འཆར་ཅན་ཞིག་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱགར་བྱང་ཤར་ཨ་རུ་ཎ་ཅལ་མངའ་སྡེའི་ནང་ཆིབས་བསྒྱུར་གནང་གཏན་འཁེལ་བར་རྒྱ་ནག་གཞུང་ཁོང་ཁྲོ་ཆེན་པོ་ལངས་ནས་སྐྱོན་བརྗོད་ཞུ་བཞིན་པའི་ཐད་༸གོང་ས་མཆོག་གི་དགོངས་ཚུལ་ག་རེ་ཡོད་མེད་བཀའ་དྲི་ཞུས་པའི་བཀའ་ལན་དུ་ རྒྱ་ནག་གིས་སྐྱོན་བརྗོད་བྱས་པ་དེ་ནི་འཆར་ཅན་ཞིག་རེད་དཀའ་ངལ་ཡོད་པ་མ་རེད་ཅེས་བཀའ་ལན་གནང་ཡོད་ལུགས་དེ་རིང་Times of India ཞེས་པའི་གསར་ཤོག་ནང་གནས་ཚུལ་སྤེལ་བཞག ༸གོང་ས་༸སྐྱབས་མགོན་ཆེན་པོ་མཆོག་ཕྱི་ཚེས་༤ཉིན་མོན་རྟ་དབང་དུ་ཆིབས་བསྒྱུར་གནང་གི་ཡོད་པ་དང་། རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་རེས་གཟའ་པ་སངས་ཉིན་༸གོང་ས་མཆོག་རྒྱ་གར་བྱང་ཤར་དུ་ཕེབས་ཡག་དེས་རྒྱ་གར་དང་རྒྱ་ནག་གི་འབྲེལ་བར་དོ་ཕོག་ཆེན་པོ་ཐེབས་ཀྱི་རེད་ཅེས་ཉེན་བརྡ་བཏང་ཡོད་པ་རེད།  དེ་ནི་ཟླ་བ་གཅིག་གི་ནང་རྒྱ་ནག་གིས་ཉེན་བརྡ་བཏང་བ་ཐེངས་གཉིས་པ་དེ་རེད།
ཡང་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་སྒོ་ཞིག་གི་སར་བྱམས་སྙིང་བརྗེའི་ལམ་ནས་ཞི་བདེ་བསྐྲུན་ཐབས་སྐོར་བཀའ་སློབ་གནང་བའི་ནང་ རྙོགས་ཁྲ་བཟོ་མཁན་མི་ངན་རེ་བཟུང་གིས་འཇིགས་སྐུལ་གྱི་ལས་བྱས་པར་ཆོས་ལུགས་བྱེ་དྲག་ཞིག་ལ་ཁ་གཡར་ནས་ཆོས་ལུགས་དེའི་རྗེས་འབྲང་བའི་སྤྱི་ཚོགས་ཡོངས་ལ་སྐྱོན་བརྗོད་བྱས་ན་སྒྲིག་གི་མ་རེད་ཅེས་བཀའ་གནང་བཞག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་སྙིང་རྗེ་དང་།ཤེས་རབ། ཆོས་ལུགས་ཕན་ཚུན་མཐུན་འབྲེལ་གྱི་ལམ་ནས་བསམ་ཚུལ་བརྗེ་ལེན་དང་།  དེ་བཞིན་ཁ་ཞེ་གཉིས་མེད་ཀྱི་ལམ་ནས་བཟང་སྤྱོད་དང་ཚུལ་ཁྲིམས་སྲུང་པ་ཡིན་ན་འཚེ་བའི་ལས་མཇུག་བསྒྲིལ་གྱི་རེད་ཅེས་བཀའ་གནང་ཡོད་པའི་གནས་ཚུལ་འདུག།
གསར་འགོད་པ་ཚེ་དབང་དངོས་གྲུབ།