རྒྱ་ནག་གི་མགོ་ཁྲིད་གཉིས་ལ་མེ་མདས་རྒྱབ་རྗེས་རང་ཤི་རྒྱབ་འདུག

རྒྱ་ནག་ཟི་ཁྲོན་ཕྱོགས་ཀྱི་དཔོན་རིགས་ཤིག་གིས་ཚོགས་འདུའི་སྐབས་སུ་གྲོང་ཁྱེར་དེའི་མགོ་ཁྲིད་གཉིས་ལ་མེ་མདས་རྒྱབ་རྗེས་ཁོ་རང་ཤི་རྒྱབ་འདུག
དེ་ཡང་ཨེ་ཕིས་གསར་སྤེལ་ཁང་སོགས་ནས་གནས་ཚུལ་ཐོན་པ་ལྟར་ན། ཚེས་༤་ཉིན་གྱི་སྔ་དྲོར་རྒྱ་ནག་ཟི་ཁྲོན་ཞིང་ཆེན་ཕན་ཀྲི་ཧྭ་གྲོང་ཁྱེར་གྱི་མཐོ་རིམ་དཔོན་རིགས་ཚོའི་ཚོགས་འདུ་ཞིག་ཏུ་མེ་མདའ་རྒྱབ་པའི་དོན་རྐྱེན་བྱུང་ཡོད་ལ། གནས་ཚུལ་ནང་བརྗོད་ན། དོགས་ཡོད་མི་སྣ་ནི་ལོ་ན་༥༤་ཡིན་པའི་ཕན་ཀྲི་ཧྭ་གྲོང་ཁྱེར་གྱི་རྒྱལ་ཁབ་ས་ཁོངས་ཐོན་ནུས་ལས་ཁུངས་ཀྱི་མགོ་ཁྲིད་ཁྲིན་ཀྲོང་ཧྲུའུ་ཟེར་བ་ཡིན་ཞིང་། གྲོང་ཁྱེར་དེའི་ཚོགས་ཁང་ནང་ཚོགས་འདུ་འཚོགས་བཞིན་པའི་ཕན་ཀྲི་ཧྭ་གྲོང་ཁྱེར་གྱི་དམར་ཕྱོགས་དྲུང་ཆེ་ཀྲང་ཡན་དང་གྲོང་ཁྱེར་སྤྱི་ཁྱབ་པ་ལི་ཇན་ཆིན་རྣམ་གཉིས་ཐོག་བསྟུད་མར་མེ་མདའ་རྒྱབ་རྗེས་བྲོས་ཡོད་པ་དང་། རྗེས་སུ་ཚོགས་ཁང་གི་ཁང་བརྩེགས་དང་པོའི་ཐོག་རང་གིས་རང་མེ་མདས་རྒྱབ་ཏེ་རང་ཤི་རྒྱབ་འདུག་ཟེར། དེ་བཞིན་གོང་བརྗོད་དཔོན་རིགས་དེ་གཉིས་སྨན་ཁང་དུ་མྱུར་སྐྱོབ་བརྒྱུད་ད་ལྟ་ཚེ་སྲོག་གི་ཉེན་ཁ་ལས་ཐར་ཡོད་པ་བརྗོད་འདུག
ད་ལྟའི་བར་ཁྲིན་ཀྲོང་ཧྲུའུ་ཡིས་མཐོ་རིམ་དཔོན་རིགས་དེ་གཉིས་ཐོག་མེ་མདའ་རྒྱག་དགོས་པའི་རྒྱུ་རྐྱེན་གསལ་ཁ་མེད་ཀྱང་། དོགས་ཡོད་མི་སྣ་དེ་ནི་ནམ་རྒྱུན་རླུང་ཚ་བོ་ཅན་ཞིག་ཡིན་པས་དེ་སྔོན་ཚོགས་འདུ་ཞིག་ཏུ་ཚོགས་ཞུགས་མི་སྣ་ཞིག་གི་ཁ་པར་གྱི་སྒྲ་གྲགས་མ་ཐག་ལམ་སང་མི་དེའི་ལག་ནས་ཁ་པར་འཕྲོག་སྟེ་ས་ལ་བརྡབ་ནས་བཅག་པའི་གནས་ཚུལ་བྱུང་ཚུལ་བརྗོད་འདུག
ཕན་ཀྲི་ཧྭ་གྲོང་ཁྱེར་ནི་རྒྱ་ནག་ཟི་ཁྲོན་ཞིང་ཆེན་ལྷོ་ནུབ་ཕྱོགས་སུ་ཡོད་པ་དང་། མི་གྲངས་ས་ཡ་གཅིག་དང་འབུམ་གཉིས་ཙམ་ཡོད་པའི་ངར་ལྕགས་ཐོན་སྐྱེད་བྱེད་སའི་གྲོང་ཁྱེར་ཆེ་ཤོས་ཤིག་ཡིན་འདུག།

གསར་འགོད་པ་ལྕགས་མོ་འཚོ།