བོད་མིའི་སྒྲིག་འཛུགས་ཀྱིས་གཞུང་ཞབས་ཟུར་པ་རྣམས་ལ་ཆེ་བསྟོད་སྣེ་ལེན་དང་ཉམས་མྱོང་བརྗེ་རེས་ཀྱི་ལྷན་འཛོམས་གནང་འདུག

ཟླ་བ་འདིའི་ཕྱི་ཚེས་༡༡་ཉིན་གྱི་ཕྱི་དྲོར་བཞུགས་སྒར་རྡ་རམ་ས་ལའི་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ཀྱི་གོ་སྒྲིག་འོག་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་བར་བཅར་བའི་གཞུང་ཞབས་ཟུར་པ་རྣམ་པས། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པ་རྣམས་ལ་སྲི་ཞུ་སྒྲུབ་སྐབས་ཀྱི་ཉམས་མྱོང་དང་འབྲེལ་གསུངས་བཤད་གནང་བའི་ལྷན་ཚོགས་ཤིག་གནང་ཡོད་པ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཀྱིས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་ཟུར་པ་ཁག་ཅིག་གི་གཙོས་གཞུང་ཞབས་ལས་བྱེད་ཟུར་པ་རྣམ་པ་ལྷན་འཛོམས་ཀྱི་ཐོག བཀའ་ཟུར་སྟག་ལྷ་སྐལ་བཟང་དབྱངས་སྐྱིད་ལགས་ནས་ལོ་༥༠་རིང་གཞུང་ལ་ཞབས་ཞུ་སྒྲུབ་པའི་ཉམས་མྱོང་དང་འབྲེལ་བཀའ་མོལ་གནང་སྐབས། ད་ལྟ་དང་མི་འདྲ་བར་དེ་སྔ་གཞུང་གི་ལས་བྱེད་ཚོར་མཐུན་རྐྱེན་ཞན་པོ་ཡོད་ཀྱང་ལས་བྱེད་ཚོས་སེམས་འཁུར་གྱི་ཐོག་ནས་སྤྱི་པའི་ལས་དོན་གང་མཚམས་བསྒྲུབ་ཐུབ་ཡོད་སྐོར་གསུངས་བ་དང་། བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ཀྱིས་གསུང་བཤད་གནང་བའི་ནང་། བཙན་བྱོལ་ནང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་དབུ་ཁྲིད་འོག་བོད་མིའི་སྒྲིག་འཛུགས་ཀྱི་གཞུང་མང་གཉིས་ཀྱི་སྐུ་ལས་བསྐྱོན་པ་དེར་ཕྱི་མི་ཞིག་གིས་བལྟས་པ་ཡིན་ན་གྲུབ་འབྲས་ཚད་མཐོ་ཤོས་ཐོན་ཡོད་པར་ངོས་འཛིན་གནང་བཞིན་ཡོད་པ་མ་ཟད། ༧གོང་ས་མཆོག་གི་དགོངས་གཞི་ལྟར་བོད་པའི་རིག་གཞུང་དེ་འཛམ་གླིང་ནང་ངོ་སྤྲོད་ཐུབ་ཡོད་པ་སོགས་ཀྱི་གྲུབ་འབྲས་ཐོན་སྐོར་གསུང་བཤད་གནང་སོང་།
སྐབས་དེར་ཁྲིམས་ཞིབ་པ་ཆེ་བ་ཟུར་པ་ངག་དབང་འཕེལ་རྒྱས་ལགས་ཀྱིས། བོད་དོན་བདེན་མཐའ་མ་སེལ་བར་དུ་མ་འོངས་བོད་མིའི་སྒྲིག་འཛུགས་སྲ་བརྟན་གནས་ཐབས་སུ། གཞུང་གི་ལས་བྱེད་པ་ཚོས་ངོ་ལྐོག་རྒྱབ་མདུན་མེད་པར་ལྷག་བསམ་རྣམ་དག་གནང་ཞིང་། གཙོ་ཆེ་ཤོས་གཞུང་མང་བར་ཡིད་ཆེས་མ་བརླག་པ་བྱ་རྒྱུ་གལ་ཆེན་པོ་ཡིན་པ་སྐུལ་མ་གནང་ཡོད་པ་རེད།

དེ་མཚུངས་བཀའ་ཟུར་བསྟན་པ་ཚེ་རིང་ལགས་ཀྱིས། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་དྲིན་བསམ་ཤེས་ཀྱི་ངེས་ཤེས་རྙེད་པའི་ཐོག་ནས་ཕྱི་ནང་གཉིས་ནས་བོད་མིའི་སྒྲིག་འཛུགས་ལ་ཡིད་ཆེས་རྒྱབ་སྐྱོར་ཐོབ་ཐབས་སུ་བོད་དོན་དྲིལ་བསྒྲགས་གདེང་འཁེལ་བ་ཞིག་གནང་དགོས་པའི་སྐུལ་མ་གནང་ཡོད་པ་རེད།
ཁྲིམས་ཞིབ་པ་ཆེ་བ་ཟུར་པ་དགས་པོ་བསོད་ནམས་ནོར་བུ་ལགས་ཀྱིས། ཁོང་གི་གཞུང་ཞབས་ལས་རྒྱུན་རིང་། ཕྱི་ལོ་༡༩༩༠་ལོར་༧གོང་ས་མཆོག་གིས་བཀའ་སྤྱི་གཉིས་ཁུ་བསྡུ་གནང་ཏེ་འོས་བསྡུ་ཚོགས་ཆུང་ཆེད་བཙུགས་གནང་བ་དེའི་ནང་ཁོང་ཡོད་པ་དང་། སྐབས་དེར་མི་མང་གིས་འོས་བསྡུ་བྱེད་སྐབས་ཡི་གེ་མི་ཤེས་མཁན་ཚོར་མཚོན་རྟགས་ཀྱི་ཐོག་ནས་འོས་བླུགས་རྒྱུ་བཟོ་པ་དེ་ད་དུང་ཡང་མུ་མཐུད་དུ་མཇུག་སྐྱོང་བཞིན་པ་དེ་ཁོང་ཐུགས་བློ་ཚིམས་པོ་བྱུང་བཞིན་ཡོད་པ་གསུང་གནང་ཡོད།
གཞན་བཀའ་ཟུར་བཀྲ་ཤིས་དབང་འདུས་ལགས་ཀྱིས་གསུངས་བཤད་གནང་བའི་ནང་། བོད་མིའི་སྒྲིག་འཛུགས་ཀྱི་ལས་བྱེད་པ་རྣམས་ཀྱི་ལས་དོན་ཕྱི་གསལ་ནང་གསལ་དང་འགན་འཁུར་ལྡན་པའི་ཐོག་ནས་ལས་དོན་གཉེར་དགོས་པའི་སྐུལ་མ་གནང་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་ཀྱི་ཕྱག་ལས་གནང་ཕྱོགས་སྤྱི་དང་། ལྷག་པར་དུ་བོད་མིའི་སྒྲིག་འཛུགས་སྲ་བརྟན་གནས་ཐུབ་པ་དེ་ནི་གཙོ་བོ་སྤྱི་ནོར་༧གོང་ས་མཆོག་སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། བོད་ནང་གི་བོད་མིའི་ལྷག་བསམ་བློས་གཏོང། དེ་བཞིན་བཙན་བྱོལ་ནང་བོད་མིའི་སྒྲིག་འཛུགས་ཀྱི་གཞུང་ཞབས་ཟུར་པ་རྣམས་ཀྱིས་ཡུན་རིང་སྐུ་ལས་བསྐྱོན་པ་བཅས་ཀྱི་གྲུབ་འབྲས་ལ་བརྟེན་བྱུང་བ་ཡིན་དུས་གཞུང་ཞབས་ཟུར་པ་རྣམ་པར་ཐུགས་རྗེ་ཆེ་ཞེས་གསུངས་བཤད་གནང་ཡོད་པ་དང་། གཞུང་ཞབས་ཟུར་པ་རྣམ་པར་བོད་མིའི་སྒྲིག་འཛུགས་ཀྱི་ངོས་ནས་ཆེ་བསྟོད་སྣེ་ལེན་གྱི་མཛད་སྒོ་ཚོགས་ཡོད་པ་རེད།

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།