མི་ལོ་༥༨་རྗེས་སེམས་འགུལ་ཐེབས་པའི་མཇལ་འཛོམས་བྱུང་བ།

༧གོང་ས་མཆོག་གིས་མི་ལོ་༥༨་སྔོན་སྐུ་ཉིད་ཕེབས་སྐྱེལ་དང་སྐུ་སྲུང་གནང་མཁན་རྒྱ་གར་གྱི་མཐའ་མཚམས་དམག་མི་ཞིག་དང་མཇལ་འཕྲད་གནང་འདུག
༧གོང་ས་སྐྱབས་མགོན་ཆེན་པོ་མཆོག་གིས་གང་ཉིད་མི་ལོ་༥༨ སྔོན་རྒྱ་གར་དུ་སྐྱབས་བཅོལ་དུ་ཕེབས་སྐབས་སྐུ་སྲུང་དང་ཕེབས་སྐྱེལ་ཞུ་མཁན་རྒྱ་གར་གྱི་ས་མཚམས་དམག་མི་ཞིག་དང་མཇལ་འཕྲད་མཛད་འདུག
དེ་ཡང་རྒྱ་གར་གྱི་གསར་ལམ་ཁག་གིས་གནས་ཚུལ་སྤེལ་བར་གཞིགས་ན། ༢༠༡༧ ལོའི་སྤྱི་ཟླ་༤ པའི་ཕྱི་ཚེས་༢ ཉིན་རྒྱ་གར་གོ་ཧ་ཏྲིས་(Brahmaputra)དུས་སྟོན་ཐོག་ད་ལྟ་རྒས་ཡོལ་ཟིན་པ་དམག་མི་ཟུར་པ་སྐུ་ཞབས་ (Naren Chandra Das)ལགས་དང་༧གོང་ས་མཆོག་རྣམ་གཉིས་བར་སེམས་འགུལ་ཐེབས་པའི་མཇལ་འཛོམས་བྱུང་བའི་སྐོར་བཀོད་ཡོད་འདུག
ད་ལྟ་དགུང་གྲངས་༧༦ཕེབས་པའི་སྐུ་ཞབས་Naren Chandra Das ལགས་ཀྱིས་སྤྱི་ལོ་༡༩༥༩ ལོ་སྤྱི་ཟླ་༣ པའི་ནང་༧གོང་ས་སྐྱབས་མགོན་ཆེན་པོ་མཆོག་གི་སྐུ་སྲུང་གི་ཞབས་ཞུའི་ལས་འགན་ཐོག་ནས་༧གོང་ས་མཆོག་རྒྱ་གར་དུ་ཕེབས་སྐྱེལ་ཞུས་གནང་བ་ཡིན་འདུག སྐབས་དེ་དུས་ཁོང་ཉིད་རྒྱ་གར་གྱི་དམག་མིའི་ནང་འཛུལ་ནས་ལོ་གཉིས་ཀྱི་རྗེས་རྒྱ་དཀར་ནག་གི་ས་མཚམས་Lunglaཞེས་པའི་ས་གནས་སུ་ལས་བགོས་འགྲེམས་འཇོག་ལ་ཡོད་པ་དང་། ཁོང་དང་དམག་མི་རོགས་པ་༥ཡིས་རྒྱ་གར་གྱི་Shaki ཟེར་བའི་ས་གནས་ནས་༧གོང་ས་མཆོག་དང་སྐུ་འཁོར་རྣམས་བོད་ཀྱི་ས་མཚམས་བརྒལ་ནས་རྒྱ་གར་གྱི་ས་ཐོག་རྐང་ཐང་ཕེབས་སྐབས། ༧གོང་ས་སྐྱབས་མགོན་ཆེན་པོ་ལ་སྣེ་ལེན་ཕེབས་བསུ་ཀྱིས་Lunglaབར་དུ་སྐུའི་སྲུང་སྐྱོབ་དང་ཕེབས་སྐྱེལ་ཞུས་མཁན་དང་པོའི་གྲས་སུ་རེད་འདུག
དེའི་རྗེས་རྒྱ་གར་གྱི་དམག་མི་རུ་ཁག་གཞན་ཞིག་གིས་མུ་མཐུད་༧གོང་ས་མཆོག་མོན་རྟ་དབང་ཕྱོགས་སུ་སྐུ་སྲུང་དང་ཕེབས་སྐྱེལ་ཞུས་ཡོད་པ་བརྗོད་འདུག སྐབས་དེ་དུས་ཁོང་རྣམ་པས་འགན་འཁྲི་གཙོ་བོ་༧གོང་ས་མཆོག་སྲུང་སྐྱོབ་ཕེབས་སྐྱེལ་ཞུ་རྒྱུ་དེ་ལས་བཀའ་མོལ་གནང་རེས་དང་། དེ་མིན་འབྲེལ་འདྲིས་གང་ཡང་གནང་ཆོག་གི་མེད་པ་རེད་ཅེས་བརྗོད་ཡོད་འདུག
བོད་ཀྱི་དབུ་ཁྲིད་བླ་ན་མེད་པ་༧གོང་ས་སྐྱབས་མགོན་ཆེན་པོ་མཆོག་གིས། སྐུ་ཉིད་རྒྱ་གར་དུ་ཕེབས་སྐྱེལ་ཞུ་མཁན་རྒྱ་གར་གྱི་ས་མཚམ་དམག་མི་རྙིང་པ་དེ་དང་ད་རེས་སླར་ཡང་མཇལ་ཕྲད་བྱུང་བ་ཐུགས་དགའ་ཚོར་ཆེན་པོ་བྱུང་། དམག་མི་དེའི་ངོ་གདོང་ལ་བལྟས་ན་ང་ཡང་རྒས་ཚར་ཡོད་པ་ངེས་ཤེས་རྙེད་བྱུང་ཞེས་བཀའ་བསྩལ་བ་དང་སྦྲགས་༧་གོང་ས་མཆོག་གིས་དམག་མི་སྐུ་སྲུང་བ་དེ་ལ་གོས་ཆེན་གྱི་ཤོར་ཟན་ཞིག་ལེགས་སྐྱེས་སུ་གནང་སྟེ་སླར་ཡང་མཇལ་འཕྲད་བྱུང་བར་དགའ་ཚོར་བྱུང་ཞེས་གསུངས་ཡོད་འདུག
དམག་མི་ཟུར་པ་ཁོང་གིས། ༧གོང་ས་མཆོག་གིས་ཐུགས་བག་ཕབ་པོས་ཁོང་ཉིད་ལ་འཐམ་འཁྱུད་གནང་བ་དེ་ཁོང་ལ་འགྲན་ཟླ་བྲལ་བའི་ཚོར་བ་ཞིག་བྱུང་ཞེས་བརྗོད་འདུག དུས་སྟོན་དེའི་ཐོག་རྒྱ་གར་ཨ་སམ་དམག་དཔུང་གི་དམག་སྤྱི་གཙོ་འཛིན་སྐུ་ཞབས་Shokin Chouhan ལགས་མཉམ་ཞུགས་གནང་ཡོད་འདུག།

གསར་འགོད་པ་རྡོ་རྗེ་དགྲ་འདུལ།