༧གོང་ས་མཆོག་གིས་རྒྱ་གར་གྱི་སྲིད་བློན་ཟུར་པ་མཆོག་དྲག་སྐྱེད་ཡོང་བའི་ཐུགས་སྨོན་གསུང་འཕྲིན་བསྩལ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་ཟུར་པ་སྐུ་ཞབས་མན་མོ་ཧན་སིན་ (Manmohan Singh)ལགས་སུ། ཏོག་དབྱིབས་རིམས་ནད་(Covid-19)ཀྱི་ནད་རྟགས་ཐོན་པ་དེ་ནས་མགྱོགས་མྱུར་དྲག་སྐྱེད་ཡོང་བའི་ཐུགས་སྨོན་གསུང་འཕྲིན་སྩལ་གནང་འདུག
འདི་ཚེས་༢༠ཉིན་དགའ་ལྡན་ཕོ་བྲང་ཡིག་ཚང་གི་དྲ་རྒྱ་བརྒྱུད་ནས་གནས་ཚུལ་སྤེལ་གནང་དོན་ལྟར་ན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་ཟུར་པ་(Manmohan Singh)ལགས་སུ། ཏོག་དབྱིབས་རིམས་ནད་(Covid-19)འགོས་ཡོད་པའི་གནས་ཚུལ་གསན་རྟོགས་བྱུང་མ་ཐག སྲིད་བློན་ཟུར་པ་མཆོག་ལ་གསུང་འཕྲིན་ཞིག་བསྩལ་བའི་ནང་། སྲིད་བློན་ཟུར་པ་(Manmohan Singh)སྐུ་ཉིད་འཕྲལ་དུ་དྲག་སྐྱེད་ཡོང་བར་ངོས་ཀྱིས་སྨོན་ལམ་འདེབས་ཀྱི་ཡོད། ཁྱེད་ཀྱིས་མཁྱེན་གསལ་ལྟར། སྐུ་ཉིད་ལ་ངོས་ནས་གུས་བརྩི་ཆེན་པོ་ཞུ་བཞིན་ཡོད། ཁྱེད་ནི་ངོས་ཀྱི་གྲོགས་པོ་རྙིང་པ་ཞིག་ལ་ངོས་འཛིན་ཞུ་བཞིན་ཡོད།
དེ་བཞིན་ད་སྐབས་གོ་ལ་ཧྲིལ་བོར་ཏོག་དབྱིབས་ནད་ཡམས་ཀྱིས་ཉེན་ཁ་དང་དཀའ་ངལ་སྤྲོད་ཀྱི་ཡོད་པ་འདི་དག་གང་མགྱོགས་མེད་པར་འགྱུར་བར་ཐུགས་རེ་གནང་བཞིན་ཡོད་པ་བཀའ་སྩལ་འདུག
དགུང་གྲངས་༨༨་ལ་ཕེབས་པའི་རྒྱ་གར་གྱི་སྲིད་བློན་ཟུར་པ་(Manmohan Singh)ལགས་སུ། ཚ་བ་རྒྱས་པ་ལ་སོགས་པའི་ཏོག་དབྱིབས་རིམས་ནད་ཀྱི་ནད་རྟགས་ཐོན་པར། ཕྱི་ཚེས་༢༠ཉིན་རྒྱ་གར་གྱི་རྒྱལ་ས་ལྡི་ལིར་ཡོད་པའི་(AIIMS)སྨན་ཁང་ནང་སྨན་བཅོས་གནང་བཞིན་ཡོད་པ་རྒྱ་གར་གྱི་གསར་ལམ་ཁག་གིས་གནས་ཚུལ་སྤེལ་འདུག
ཁོང་གིས་རྒྱ་གར་ནང་ནས་བཟོས་པའི་(COVAXIN)ཞེས་པའི་ཏོག་དབྱིབས་ནད་ཡམས་སྔོན་འགོག་གི་སྨན་ཁབ་དང་པོ་དེ་ཕྱི་ཟླ་༣ཚེས་༤ཉིན་བསྐྱོན་ཡོད་པ་དང་། སྨན་ཁབ་གཉིས་པ་དེ་འདི་ཟླའི་ཚེས་༣་ཉིན་བསྐྱོན་འདུག
ད་སྐབས་རྒྱ་གར་ནང་ཐོག་མར་རྒྱ་ནག་ཝུའུ་ཧན་ནས་བྱུང་བའི་ཏོག་དབྱིབས་ནད་ཡམས་ཁྱབ་གདལ་རིམ་པ་གཉིས་པ་ཞིག་བྱུང་ནས་གནས་སྟངས་ཇེ་སྡུག་ཏུ་ཕྱིན་པར་བརྟེན། འདི་ཚེས་༡༩རེས་གཟའ་ཟླ་བ་ཉིན་གཅིག་པོར་མི་གྲངས་༢༧༣༨༡༠ལ་ཏོག་དབྱིབས་རིམས་ནད་འགོས་པའི་ཁྲོད་ནས་མི་གྲངས་༡༦༡༩འདས་གྲོངས་སུ་ཕྱིན་འདུག་ལ། ད་བར་རྒྱ་གར་ནང་ཏོག་དབྱིབས་རིམས་ནད་འགོས་པའི་ནད་པའི་གྲངས་འབོར་མི་གྲངས་ས་ཡ་༡༥བྱུང་ཡོད་པ་དང་། དེ་ནི་ཨ་མི་རི་ཀའི་རྗེས་སུ་ནད་པ་མང་ཤོས་ཡོད་པའི་རྒྱལ་ཁབ་གཉིས་པ་དེ་ཆགས་ཡོད་པ་རེད།