༄༅༎རྒྱ་ནག་གི་རྒྱལ་ས་པེ་ཅིང་དུ་ཡོད་པའི་བོད་བརྒྱུད་ནང་བསྟན་སློབ་གཉེར་ཁང་ཞེས་པའི་སློབ་མ་མཐར་སོན་གྱི་མཛད་སྒོའི་ཐོག་ རྒྱ་ནག་གཞུང་གིས་ངོས་འཛིན་བསྐོ་བཞག་བྱས་པའི་པན་ཆེན་རིན་པོ་ཆེ་སྐུ་མགྲོན་གཙོ་བོར་ཕེབས་ཡོད་ལུགས་རྒྱ་ནག་གི་གཞུང་འབྲེལ་གསར་ལས་ཁང་གིས་གནས་ཚུལ་སྤེལ་འདུག་༎
དེ་ཡང་རྒྱ་ནག་གི་གཞུང་འབྲེལ་ཤིན་ཧ་གསར་ལས་ཁང་གིས་གནས་ཚུལ་སྤེལ་གསལ་ལྟར་ན་ རེས་གཟའ་ལྷག་པའི་ཉིན་རྒྱལ་ས་པེ་ཅིང་དུ་ཡོད་པའི་བོད་བརྒྱུད་ནང་བསྟན་སློབ་གཉེར་ཁང་གིས་སློབ་མ་མཐར་སོན་རྣམས་ལ་ཕྱག་འཁྱེར་འབུལ་བའི་ལོ་འཁོར་གྱི་མཛད་སྒོ་ཚོགས་པ་རེད་ མཛད་སྒོའི་དེའི་ཐོག་་རྒྱ་ནག་གཞུང་གིས་ངོས་འཛིན་བྱས་པའི་པན་ཆེན་རྒྱལ་ཚན་ནོར་བུས་ བོད་བརྒྱུད་ནང་བསྟན་སློབ་གཉེར་བ་༣༠༠ལྷག་ཙམ་ལ་ནང་ཆོས་སློབ་གཉེར་མཐར་སོན་གྱི་ཕྱག་འཁྱེར་གནང་ཡོད་པ་མ་ཟད་ དགེ་འདུན་པ་༡༡ལ་ དགེ་ཤེས་ལྷ་རམས་པའི་ཕྱག་འཁྱེར་གསོལ་སྩལ་གནང་བ་སྦྲགས་ མཛད་སྒོའི་གསུངས་བཤད་ནང་རྒྱལ་ཁབ་ལ་དགའ་ཞེན་དང་བརྩེ་སེམས་དགོས་པའི་ནན་སྐུལ་བྱས་ཡོད་ལུགས་བཀོད་འདུག་ གནས་ཚུལ་ནང་བཀོད་པར་གཞིགས་ན་ བོད་བརྒྱུད་ནང་བསྟན་སློབ་གཉེར་ཁང་གིས་ད་རེས་སློབ་མ་མཐར་སོན་གྱི་མཛད་སྒོ་དེའི་སྐབས་ ཡིག་རྒྱུགས་འཕྲོད་པའི་དགེ་འདུན་པ་གཞན་༢༨ལ་ ཆེས་མཐོའི་སློབ་གཉེར་ཁང་ནང་ ནང་ཆོས་སློབ་འཁྲིད་ཆོག་པའི་དགེ་རྒན་གྱི་ལག་འཁྱེར་ཡང་སྤྲད་ཡོད་པ་དང་ ༢༠༠༤ལོར་བོད་བརྒྱུད་ནང་བསྟན་སློབ་གཉེར་ཁང་གིས་དགེ་བཤེས་ལྷ་རམས་པའི་ཕྱག་འཁྱེར་འབུལ་རྒྱུའི་ལས་རིམ་འགོ་བཙུགས་བྱས་པ་ནས་བཟུང་ད་བར་སློབ་མ་གྲངས་༧༧གྱིས་ལྷ་རམ་པའི་ཕྱག་འཁྱེར་བཞེས་ཡོད་ལུགས་འགྲེལ་བརྗོད་བྱས་འདུག་༎
