༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་༣༠་འཁོར་བའི་དུས་ཆེན་སྲུང་བརྩི།

རྒྱ་གར་རྡ་རམ་སཱ་ལ་གཙོས་ཕྱི་ཕྱོགས་ཀྱི་བོད་མི་གནས་ཡུལ་གང་སར་སྤྱི་ནོར་༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་༣༠་འཁོར་བའི་དུས་ཆེན་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་རྣམ་པ་འདྲ་མིན་ཐོག་སྲུང་བརྩི་གནང་འདུག
ཕྱི་ལོ་༢༠༡༩་ལོའི་ཟླ་༡༢་བའི་ཚེས་༡༠་ཉིན། རྒྱ་གར་རྡ་རམ་སཱ་ལར་གཞུང་འབྲེལ་དུས་ཆེན་སྲུང་བརྩིའི་སྐབས། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མ་འོངས་སྐུའི་ཡང་སྲིད་ཐད་རྒྱ་ནག་གཞུང་གི་ཐེ་བྱུས་རྩ་བ་ནས་བྱེད་མི་ཆོག་ཅེས་བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ནས་ནན་བརྗོད་གནང་སོང་། བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས། རྒྱ་ནག་དམར་པོའི་སྲིད་གཞུང་ནས་སྤྱི་ནོར་༧གོང་ས་མཆོག་ལ་དགྲ་ཡ་ཞེས་མཚན་སྨད་ཞུ་མཚམས་མི་འཇོག་པ་དང་། ཕྱོགས་གཞན་ཞིག་ནས་ཏཱ་ལའི་བླ་མ་སྐུ་ཕྲེང་༡༤་པའི་ཡང་སྲིད་ངོས་འཛིན་ཞུ་རྒྱུའི་དབང་ཆ་རྒྱ་ནག་དམར་ཤོག་གཞུང་ལ་ཡོད་ཚུལ་བརྗོད་བཞིན་པ་ནི་མངོན་སུམ་འཛེམས་མེད་ཀྱིས་སྨྱོ་ཧམ་ཆེན་པོས་བོད་ཀྱི་ཆོས་དད་རང་དབང་རྡོག་རོལ་གཏོང་བཞིན་པའི་གདོང་རིས་ངོ་མ་དེ་གསལ་པོར་བསྟན་ཡོད་ཅེས་གཏམ་བཤད་གནང་ཡོད།
སྲིད་སྐྱོང་བློ་བཟང་སེང་གེ་མཆོག་གིས། ཉེ་ལམ་བཞུགས་སྒར་རྡ་རམ་ས་ལར་ཚོགས་པའི་དམིགས་བསལ་ཚོགས་ཆེན་ཐེངས་གསུམ་པ་དང་། ཆོས་བརྒྱུད་ཁག་གི་ཚོགས་ཆེན་ཐེངས་བཅུ་བཞི་པའི་དམིགས་བསལ་གྲོས་ཆོད་བཅས་སུ། མ་འོངས་༧རྒྱལ་བའི་ཡང་སྲིད་ཕེབས་ཕྱོགས་ཀྱི་ཐུགས་ཐག་གཅོད་རྒྱུའི་སྐུ་དབང་ཡོངས་རྫོགས་༧གོང་ས་མཆོག་སྐུ་ཉིད་གཅིག་པུར་ཡོད་པ་དང་། ༧གོང་ས་ཏཱ་ལའི་བླ་མའི་སྐུ་ཕྲེང་ལམ་ལུགས་སྔར་མུས་བཞིན་རྒྱུན་སྐྱོང་ངེས་པར་དུ་དགོས་པ་ལས། རྒྱ་ནག་གཞུང་གིས་སྲིད་དོན་གྱི་དགོས་མཁོ་ལ་བརྟེན་ནས་ཡང་སྤྲུལ་ངོས་འཛིན་བྱས་ཚེ། དེ་ལ་བོད་མི་ཚོས་ངོས་འཛིན་དང་དད་མོས་བྱ་རྒྱུ་མིན་པ་གྲོས་ཆོད་རིམ་པ་བཞག་ཡོད་ཅེས་དང་། སྤྱི་ལོ་༢༠༢༠་ལོ་དེ་བཞིན་༧གོང་ས་སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་ཡིན་ཞེས་གཏམ་བཤད་གནང་སོང་།
སྐབས་དེར་ཆེད་དུ་གདན་ཞུ་གནང་པའི་མཛད་སྒོའི་སྐུ་མགྲོན་གཙོ་བོ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་རྒྱལ་པི་དབང་རྒྱལ་ལགས་ཀྱིས། ༧གོང་ས་ཏཱ་ལའི་བླ་མ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་༣༠་འཁོར་བའི་དུས་ཆེན་ཐོག་ངོས་ཀྱིས་ལ་དྭགས་ཡུལ་མི་དང་། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ཚབ་ཞུས་ཏེ་འགྲོ་བ་ཡོངས་ཀྱི་མགོན་སྐྱབས་༧གོང་ས་ཏཱ་ལའི་བླ་མ་མཆོག་ལ་གུས་བཏུད་དང་བཅས་འཚམས་འདྲི་ཞུ་རྒྱུ་ཡིན་ཞེས་དང་། རྒྱ་ནག་གཞུང་གིས་ད་བར་བོད་ནང་བོད་མི་ཚོའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གཞིན་ཡོད་པར་ང་ཚོས་མུ་མཐུད་ནས་རྒྱ་ནག་གཞུང་ལ་སྐྱོན་བརྗོད་བྱེད་བཞིན་ཡོད་ཅེས་དང་། ལ་དྭགས་དང་བོད་རིགས་དབར་ལ་རྒྱུན་དུ་འབྲེལ་བ་ཟབ་མོ་ཡོད་པ་ལྟར། ད་སྐབས་རྒྱ་གར་དབུས་གཞུང་གིས་ལ་དྭགས་ལ་རང་སྐྱོང་གི་ཐོབ་ཐང་སྤྲད་ཡོད་པས་ལ་དྭགས་ནང་དུ་གནས་སྡོད་བོད་རིགས་རྣམས་ལ་ང་ཚོས་གང་ཅི་ཐུབ་ཀྱིས་རོགས་རམ་དང་ལྟ་སྐྱོང་བྱེད་རྒྱུ་ཡིན་ཞེས་གསུངས་ཡོད་པ་རེད།
སྐབས་དེར་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། གཞུང་ཞབས་རྣམས། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་གཙོས་པའི་ཚོགས་མི་ཁག་ཅིག ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་དེ་བཞིན་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་རྣམ་པ་བཅས་སེར་སྐྱ་མང་ཚོགས་སྟོང་ཕྲག་ལྷག་འདུ་འཛོམས་བྱུང་ཡོད་པ་རེད།
ཟླ་བ་འདིའི་སྤྱི་ཚེས་༡༠་ཉིན་ནི། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་སྤེལ་ནས་ལོ་ངོ་༧༡་འཁོར་བའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཞེས་སྲུང་བརྩི་ཞུ་བཞིན་ཡོད་པར་ལྟར། དབུས་བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ཀྱིས་ཉིན་འདིར་རྒྱ་གཞུང་གིས་བོད་ནང་མི་ལོ་༦༠་རིང་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་ཡོད་པར་སྐྱོན་བརྗོད་ནན་པོ་བྱས་ཡོད་པ་རེད།
གཞན་ཡང་གཞུང་འབྲེལ་མཛད་སྒོའི་སྐབས། བོད་ཀྱི་ཟློས་གར་ཚོགས་པས་གཙོས་བཞུགས་སྒར་རྡ་སའི་ཉེ་འཁོར་གྱི་སློབ་གྲྭ་ཁག་ནས་བོད་ཀྱི་རིག་གཞུང་འཁྲབ་སྟོན་གནང་ཡོད་པ་དང་། ད་དུང་སྐབས་དེར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས། བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ལས་བྱེད་བཞི་ལ་ཞབས་ལོ་༢༥་འཁོར་བའི་གཟེངས་བསྟོད་ཕྱག་འཁྱེར་དང་། བོད་མིའི་སྒྲིག་འཛུགས་ཀྱི་སྲི་ཞུ་བ་ལུགས་མཐུན་བགྲེས་ཡོལ་ཕེབས་མཁན་བཅས་ལ་གཟེངས་བསྟོད་ཕྱག་འཁྱེར་གནང་ཡོད་པ་རེད།
དེ་བཞིན་བོད་ཀྱི་དབུ་ཁྲིད་༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་༣༠་འཁོར་བའི་དུས་ཆེན་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དེ་བཞིན་རྒྱ་གར་རྡ་རམ་སླ་ལ་གཙོས། རྒྱ་བལ་འབྲུག་གསུམ་གྱི་བོད་མིའི་གཞིས་ཆགས་ཁག་དང་། ཨ་མི་རི་ཀ ཡོ་རོབ། ཨོ་སུ་ཁྲི་ལེ་ཡ་བཅས་ཀྱི་བོད་མི་གནས་སྡོད་བྱེད་ཡུལ་གང་སར་རྣམ་པ་འདྲ་མིན་ཐོག་སྲུང་བརྩི་གནང་ཡོད་པ་རེད།