རྒྱ་ནག་ནི་ཨ་རིས་བློ་ཚབས་བྱེད་ཡུལ་འཛམ་གླིང་ནང་ཆོས་དད་རང་དབང་རྡོག་རོལ་གཏོང་མཁན་རྒྱལ་ཁབ་སྡུག་ཤོས་གྲས་སུ་མིང་འདོན་གནང་འདུག

དེ་ཡང་ཨ་མི་རི་ཀའི་ཕྱི་སྲིད་ལྷན་ཁང་གིས་ཕྱི་སྲིད་དྲུང་ཆེ་སྐུ་ཞབས་(Antony J. Blinken)་མཆོག་གི་མཚན་ཐོག་ཕྱི་ཟླ་དང་པོའི་ཚེས་༤ཉིན་གསར་འགོད་གསལ་བསྒྲགས་ཤིག་སྤེལ་བའི་ནང་། རྒྱ་ནག་ནི་འཛམ་གླིང་ནང་ཆོས་དད་རང་དབང་རྩིས་མེད་རྡོག་རོལ་ཚབས་ཆེན་གཏོང་མཁན་ཨ་རིས་བློ་ཚབས་བྱེད་ཡུལ་གྱི་རྒྱལ་ཁབ་གཙོ་བོའི་གྲས་སུ་མིང་ཐེར་འདོན་གནང་འདུག་ལ། འདི་ནི་ཨ་རིའི་གྲོས་ཚོགས་ཀྱིས་༡༩༩༨ལོར་གཏན་འབེབས་གནང་པའི་རྒྱལ་སྤྱིའི་ཆོས་དད་རང་དབང་གི་ཁྲིམས་ཡིག་འབྲུ་དོན་ལྟར་གསལ་བསྒྲགས་གནང་པ་ཞིག་ཡིན་པ་དང་། མི་མང་གིས་ཆོས་ལུགས་ཉམས་ལེན་དང་ཆོས་ལུགས་དད་མོས་རང་དབང་དར་སྤེལ་གཏོང་རྒྱུ་ནི་ཨ་མི་རི་ཀའི་ཕྱི་སྲིད་ཀྱི་ལས་དོན་ཁྲོད་གལ་འགངས་ཆེ་ཤོས་ཤིག་ཏུ་གྱུར་ཡོད། ད་རེས་འཛམ་གླིང་ནང་ཆོས་དད་རང་དབང་རྩིས་མེད་རྡོག་རོལ་གཏོང་མཁན་སྡུག་ཤོས་རྒྱལ་ཁབ་ཁག་གི་མིང་ཐེར་འདོན་བྱས་བའི་ནང་མཡན་མར་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ། ཁུའུ་བྷ་(Cuba) བྱང་ཀོ་རི་ཡ་། Eritrea, Iran, Nicaragua, Pakistan, Russia, Saudi Arabia, Tajikistan, Turkmenistan་བཅས་འདུག རྒྱལ་ཁབ་འདི་དག་ནི་དམིགས་བསལ་ཆོས་ལུགས་རང་དབང་རྩིས་མེད་རྡོག་རོལ་ཚབས་ཆེན་གཏོང་མཁན་ཡིན་པས་ང་ཚོས་བློ་ཚབས་བྱེད་ཡུལ་ཞིག་རེད་ཅེས་གསུངས་འདུག་ལ། ད་དུང་ཆོས་ལུགས་རང་དབང་ལ་ཚབས་ཆེའི་རྡུང་རྡེག་གཏོང་མཁན་གྱི་རྒྱལ་ཁབ་གཞན་ཁག་ཅིག་ཀྱང་ཐེར་འདོན་གནང་ཡོད་འདུག
ཡང་ཕྱི་སྲིད་དྲུང་ཆེ་མཆོག་གིས། ད་རེས་མིང་འདོན་མ་བྱས་པའི་རྒྱལ་ཁབ་ཁག་ནང་ལའང་ཆོས་ལུགས་རང་དབང་ལ་རྡུང་རྡེག་ཚབས་ཆེ་གཏོང་བའི་གནས་སྟངས་ཡོད། དེར་བརྟེན་ཆོས་ལུགས་རང་དབང་ཐོག་ལ་རྒོལ་རྡུང་གཏོང་མཁན་གྱི་རྒྱལ་ཁབ་ཁག་གི་སྲིད་གཞུང་གིས། གྲངས་ཉུང་མི་རིགས་ཀྱི་ཆོས་ལུགས་ཉམས་ལེན་བྱེད་མཁན་དང་ཁོང་ཚོའི་དད་མོས་བྱེད་ཡུལ་གྱི་གནས་ཆེན་བཅས་ལ་རྒོལ་རྡུང་གཏོང་བའི་བྱ་སྤྱོད་མཚམས་འཇོག་བྱ་དགོས་པ་དང་། དེ་བཞིན་ཞི་བའི་ངང་བསམ་ཚུལ་བརྗོད་མཁན་གྱི་ཐོག་ལ་དྲག་རྩུབ་ལག་བསྟར་བྱེད་པ་དང་། དུས་ཡུན་རིང་པོ་བཙོན་འཇུག་བྱེད་པ། དྲག་གནོན་བྱེད་པ་དང་། ཆོས་ལུགས་ཉམས་ལེན་བྱེད་མཁན་ཐོག་ལ་རྡུང་རྡེག་གཏོང་བའི་བྱ་སྤྱོད་དེ་དག་ནི་འཛམ་གླིང་གི་ས་ཁུལ་མང་པོ་ཞིག་ནང་འབྱུང་བཞིན་ཡོད་པ་རེད། རྒྱལ་སྤྱིའི་ནང་ཆོས་ལུགས་རང་དབང་གི་ཁོར་ཡུག་དང་། ལམ་ལུགས། སྡང་འཛིན་བཅས་ལ་གདོང་ལེན་ཆེན་པོ་བྱེད་དགོས་གྱུར་ཡོད་པ་རེད། འོན་ཀྱང་འཁོན་འཛིན་དང་སྡང་སེམས་མེད་པར་བསམ་ཤེས་ཐུབ་མཁན་ཡང་ཡོད་པས་ཉིན་ཞིག་འཛམ་གླིང་མི་དམངས་རྣམས་འདྲ་མཉམ་དང་། ཆེ་མཐོང་ལྡན་པའི་ངང་འཚོ་གནས་པ་ང་ཚོས་མཐོང་ཐུབ་ཀྱི་རེད་ཅེས་གསུངས་འདུག

ཡང་རང་དབང་ཅན་ལྷན་ཚོགས་(USCIRF)་ཞེས་ཨ་རིའི་རྒྱལ་སྤྱིའི་ཆོས་དད་རང་དབང་གི་ཆེས་མཐོའི་ལྷན་ཚོགས་ཀྱིས། ཕྱི་ཟླ་༡ཚེས་༥ཉིན་རྒྱ་ནག་ཐད་འཛིན་པའི་སྲིད་ཇུས་ཡིག་ཆ་འཕར་སྣོན་བྱས་བ་ཞིག གཙོ་བོ་འཕྲུལ་རིག་དང་། རྒྱལ་མཚམས་བརྒལ་ཏེ་དྲག་གནོན་གྱི་བྱ་སྤྱོད་སྤེལ་བ། དེ་བཞིན་ཆབ་སྲིད་ཀྱི་ཤུགས་རྐྱེན་ངན་པ་སྤྲོད་ཐབས་བྱེད་པ་བཅས་ལ་གདོང་ལེན་ཆེད་དམིགས་པ་ཡིན་པ་འགོ་བརྗོད་དུ་བཀོད་དེ་འདོན་སྤེལ་གནང་པའི་ནང་། ཨ་རི་དང་རྒྱ་ནག་རྒྱལ་ཁབ་གཉིས་ཀྱི་བར་ལ་མི་མཐུན་པའི་ཆ་ལྟེ་བ་གཅིག་ནི། འགྲོ་བ་མིའི་ཐོབ་ཐང་གི་གནས་བབ་སྤྱི་དང་། ཡང་སྒོས་བོད་བརྒྱུད་ནང་བསྟན་དང་། ཡུ་གུར་དང་ཏུར་ཀེའི་ཁ་ཆེ། ཡེ་ཤུའི་རྣམ་དག་དང་གསར་མ་བ། ཧྥ་ལུང་ཀོང་རྩ་རླུང་སྒོམ་སྒྲུབ་པ་བཅས་ཚུད་པའི་རྒྱ་ནག་ནང་གི་ཆོས་དད་པ་དང་ཆོས་དད་ཚོགས་སྡེ་ཁག་གི་ཆོས་དད་རང་དབང་ལ་རྒྱ་ནག་གཞུང་གིས་འཆར་གཞི་དང་གོ་རིམ་ལྡན་པའི་སྒོ་ནས་རྡོག་རོལ་ཧ་ཅང་ཆེན་པོ་གཏོང་གི་ཡོད་པ་བཀོད་འདུག
ད་དུང་ཡིག་ཆ་དེའི་ནང་། རྒྱ་ནག་གཞུང་གིས་ཕྱི་ཕྱོགས་ཡུལ་གྲུ་ཁག་ཏུ་གནས་པའི་རྒྱ་ནག་གཞུང་དང་ལྟ་སྤྱོད་མི་མཐུན་པའི་བོད་བརྒྱུད་ནང་པ་དང་ཡུ་གུར་ཁ་ཆེ་ཚུད་པའི་ཆོས་ལུགས་སྡེ་ཁག་དང་། ཆབ་སྲིད་ཀྱི་ལྟ་བ་མི་མཐུན་པ་རྣམས་ལ་བསུན་གཙེར་བཟོ་པ་དང་འཇིགས་སྣང་སྐུལ་པ། རྡུང་རྡེག་གཏོང་བཞིན་པ་སོགས་ཐེར་འདོན་གནང་འདུག

གསར་འགོད་པ། གཡུ་སྒྲོན། བཀྲ་ཤིས་དབང་ཕྱུག
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།